Skip to content

Skip to table of contents

Olombangi Via Yehova

Select language Umbundu

 Osapi Yo Koñoño

Ceci Suku a Siata Oku ku Lingila

Ceci Suku a Siata Oku ku Lingila

“Omo Suku a sola ndoco oluali, oco a ecela Omõlaye wongunga okuti wosi u kolela ka fi, puãi o mola omuenyo ko pui.”Yoano 3:16.

Ocinimbu eci Cembimbiliya oco ca kũlĩhiwa vali enene voluali haico ca siata oku tangiwa calua. Ka kuli ocinimbu cikuavo Cembimbiliya ci lombolola “ukamba wa Suku lomanu kuenda onjila yaye yoku va popela.” Omo liaco, kolofeka vimue ocisonehua celivulu lia “Yoano 3:16” ale olondaka viaco, via siata oku lekisiwa kovipito vimue, oku sonehiwa vakãlu, vovimano kuenda kovina vikuavo.

Vosi vana va tukula ocisonehua eci va kolela okuti ocisola ca Suku ci va ĩha elavoko lioku popeliwa otembo ka yi pui. Nye ci popiwa kokuove? Ocisola ca Suku ci lomboloka nye kokuove? Nye ove o sima okuti oco Suku a siata oku linga ci lekisa ocisola a ku kuetele?

“SUKU WA SOLA OLUALI”

Omanu valua va tava okuti kuli Suku poku kũlĩhĩsa ilu, ongongo kuenda eci va kũlĩhĩsa etimba liavo muẽle. Oviendalomuenyo kuenda ndomo via pangiwa ciwa vi eca uvangi wokuti kuli umue wa loñoloha wa vi panga. Omanu valua va eca olopandu ku Suku oloneke viosi omo liombanjaile yomuenyo. Ovo va kũlĩha okuti oco va kale lomuenyo va sukila ofela yi tunda ku Suku, ovava, okulia—kuenda ovina vikuavo vi kasi voluali.

Tu sukila oku eca olopandu ku Suku omo liovina viaco, kuenda eye Ululiki haeye wa siata oku tu Tekula. (Osamo 104:10-28; 145:15, 16; Ovilinga 4:24) Poku sokolola ovina viosi Suku a siata oku linga vina vi tu kuatisa oku kala lomuenyo, tu limbuka ocisola a tu kuetele. Upostolo Paulu wa soneha ndoco: “[Suku] eca eca komanu vosi omuenyo lefuimo lovina viosi. Vokuaye, omo tu muila omuenyo  loku lisengasenga, haimo tu kasilili lomuenyo.”Ovilinga 17:25, 28.

Ocisola ca Suku ka ci lekisiwila volonepa vialua okuti koku tu tekula lika ci sule. Eye wa tu lulika lonjila yimue yi likasi kuenda wa tu ĩha epondolo lioku u kũlĩha kuenda o tu kuatisa oku tẽlisa onjongole yaco. (Mateo 5:3) Omo liaco, omanu vana vakuepokolo, va kuete elavoko lioku tiamẽla kepata lia Suku okuti, “omãla” vaye.Va Roma 8:19-21.

Ndomo ca lekisiwa kelivulu lia Yoano 3:16, Suku wa lekisa ocisola caye kokuetu poku tuma Omõlaye Yesu palo posi oco a tu longise eci catiamẽla ku Suku Isiaye, kuenda oku tu fila. Pole, omanu valua ka va kũlĩhile esunga lieci Yesu a sukililile oku fila omanu kuenda ndomo olofa viaye via situlula ocisola Suku a tu kuetele. Omo liaco, tu kũlĩhisi ndomo Embimbiliya li lombolola esunga lieci Yesu a fila kuenda esilivilo liolofa viaye.

“EYE WA ECA OMÕLAYE WONGUNGA”

Omanu vosi va fa, momo vosi va vela kuenda va kuka. Pole, eci haicoko ca kala ocipango ca Yehova Suku eci a lulika omanu. Eye wa eca komanu vatete elavoko lioku kala otembo ka yi pui vocumbo ceposo palo posi. Pole va sukila oku linga cimue: Ovo va sukilile oku pokola kokuaye. Suku wa va sapuila hoti, nda ka va pokuile, va pondola oku fa. (Efetikilo 2:17) Omunu watete wa lueya ocihandeleko ca Suku kuenje wa likokela eye muẽle olofa kuenda kocitumbulukila caye. Upostolo Paulu wa lombolola hati: “Ndeci ekandu lia iñila voluali lomunu umuamue, kuenda okufa kueya lekandu, haico okufa kua sambukila omanu vosi, momo vosi va linga ekandu.”Va Roma 5:12.

Suku, “o sole esunga.” (Osamo 37:28) Suku, ndaño okuti ka sepuile ekandu liomunu vatete, pole ka pisile omanu vosi oco va tale ohali loku fa otembo ka yi pui. Pole loku kuama ocihandeleko coku eca “omuenyo lomuenyo,” wa tumbika ombalãsa yesunga kuenda wa ecelela okuti omanu vakuepokolo va kuata omuenyo ko pui. (Etundilo 21:23) Epulilo lieli: Citava ndati oku kuata vali omuenyo wa lipua Adama a pumba? Etambululo lieli: Omunu umue wa sukilile oku lieca ale oku lumba omuenyo waye wa—lipua ndowu wa Adama.

Yesu wa tava oku iya palo posi oco a yovole omanu kekandu kuenda kolofa

Ocili okuti, lomue pokati kocitumbulukila ca Adama wa kuatele epondolo lioku eca ocilumba caco momo va kala vakuekandu. Yesu eye lika wa tẽla oku ci linga. (Osamo 49:6-9) Yesu eci a citiwa ka piñalele ekandu, wa lipuile ndeci Adama a kala. Yesu poku eca omuenyo waye, wa yovola omanu kupika wekandu. Poku ci linga, wa eca kocitumbulukila ca Adama epuluvi lioku kuata omuenyo wa lipua ndowu Adama la Heva va kuatele. (Va Roma 3:23, 24; 6:23) Kuli hẽ, ocina cimue tu sukila oku linga oco tu kuatisiwe lelinga liaco liocisola?

 “WOSI O KOLELA KOKUAYE”

Kelivulu lia Yoano 3:16, tu sangako olondaka viokuti: “Wosi o kolela [ku Yesu] ka fi, pole o mola omuenyo ko pui.” Eci ci lekisa okuti, oco tu kuate ombanjaile yomuenyo ko pui, ci sukila oku linga ocina cimue. Nda tu yongola “oku kuata omuenyo ko pui,” tu sukila oku kolela ku Yesu kuenda oku pokola kokuaye.

Citava okuti o lipula ndoco: ‘Nye ca kongela voku pokola? Yesu ka popele okuti, wosi “o kolela kokuaye” o ka kuata omuenyo ko pui?’ Ocili okuti, oku tava ale oku kolela, ku kuete esilivilo. Pole, tu sukila oku ivaluka okuti Vembimbiliya, oku kolela kua litepa loku tava. O Dicionário Expositivo do Antigo e do Novo Testamento de Vine, yi lombolola okuti, ondaka ya tukuiwa kelivulu lia Yoano, kelimi liatete ka yi lomboloka oku tava ño kocina cimue, pole, yi lomboloka “oku kolela lutima wosi.” Oco omunu a taviwe la Suku, ka sukila lika oku limbuka okuti Yesu eye Upopeli, pole, kuli ocina cikuavo a sukila oku linga. Voku tava mua kongelavo oku likolisilako oku kapako ovina Yesu a longisa. Ekolelo li lekisiwa kovilonga. Embimbiliya li popia ndoco: “Ekolelo ka li kuete ovilinga laliovo lia fa.” (Tiago 2:26) Eci ci lomboloka okuti oco omunu a lekise okuti wa kolela ku Yesu—o sukila oku lekisa ekolelo liaco kovilinga ale oku ambata omuenyo u likuata lekolelo liaco.

Paulu wa lombolola etosi liaco poku popia ndoco: “Ocisola ca Kristu oco ci tu vetiya, omo tua kolela okuti [Yesu] wa fila vosi . . . Kuenje eye wa fila vosi okuti, ava va kasi lomuenyo ka va kasilili lawo ovo muẽle, te oku vumba u wa va fila haeye wa va pinduiwila.” (2 Va Korindo 5:14, 15) Olopandu vietu kocilumba ca Yesu vi tu vetiya oku linga a pongoloko komuenyo wetu kuenda oku pokola kokuaye omo a tu fila. Eci ci lomboloka okuti, tu sukila oku pitisa kovaso ovina Yesu a longisa. Apongoloko aco a ka limbukiwila kovituwa vietu, kolonjila tu kuama, kuenda kovilinga vietu viosi. Vana va tava haivo va lekisa ekolelo ku Yesu, onima yipi va ka tambula?

“KA FI, POLE O MOLA OMUENYO KO PUI”

Onepa ya sulako yelivilu lia Yoano 3:16, yi lombolola ohuminyo ya Suku ku vana va lekisa ekolelo keliangiliyo liocisembi haivo va pokola kolonumbi via Suku. Suku wa likuminya okuti omanu vaco vakuekolelo, “ka va fi, pole va mola omuenyo ko pui.” Omanu vaco va ka kuatisiwa locisola ca Suku, va kuete alavoko a litepa.

Kocisoko catete, Yesu wa likuminya oku eca omuenyo ko pui kilu. Eye wa vangula lolondonge viaye va kuekolelo okuti, o ka va pongiyila ocitumãlo oco va ka viale kumue laye vulamba waye. (Yoano 14:2, 3; Va Filipoi 3:20, 21) Vana va ka pindukila oku kuata omuenyo kilu va ka “linga ovitunda via Suku la Kristu, kuenje va viala kumue laye ohũlũkãi yanyamo.”Esituluilo 20:6.

Esumũlũho eli li ka eciwa lika ketendelo limue litito lioloñame Viakristu. Yesu wa popia hati: “Akacunda, ku ka kuate usumba, momo Isiene wa panga oku wĩhi Usoma.” (Luka 12:32) Li pi hẽ, etendelo liaco liokacunda katito”? Elivulu Liesituluilo 14:1, 4, li popia ndoco: “Nda vanja vali kuenda nda mola Kameme [Yesu Kristu wa pinduiwa] o tãi [kilu] Komunda Siono. Ocita lakũi akuãla la vikuãla kolohulukãi viava va kuete onduko yaye londuko ya Isiaye via sonehiwa kovipolo viavo . . . Va yowiwa komanu kuenje va linga apako atete a eciwa ku Suku la Kameme.” Ci soka 144.000 komanu ovo “okacunda katito” pole, olohuluwa vialua viomanu va ka kuata omuenyo ko pui. Ava va tukuiwa ndeti hati olosoma, va ka viala velie?

Yesu wa tukula ocisoko cavali comanu vakuekolelo vana va ka tambula asumũluho a tunda Kusoma wokilu. Ndomo ca lekisiwa kelivulu lia Yoano 10:16, Yesu wa popia siti: “Ñuete olomeme vikuavo haviocunda eciko. Evi laviovo ca sesamela okuti ndi vi nena, kuenje vi tava kondaka yange. Oco noke ku kala ocunda cimuamue lungombo umuamue.” “Olomeme” viaco vi ka kuata omuenyo ko pui palo posi, okuti olio esumũluho Adama la Heva va kuatele. Tua kũlĩha ndati okuti elavoko liavo oku kala palo posi?

 Embimbiliya olonjanja vialua li tukula ndomo ovina vi ka kala Voluali Luokaliye palo posi. Oco o limbuke ekalo liaco, ikula Embimbiliya liove kuenda tanga ovinimbu vikuãimo: Osamo 37:9-11; 46:8, 9; 72:7, 8, 16; Isaya 35:5, 6; 65:21-23; Mateo 5:5; Yoano 5:28, 29; Esituluilo 21:4. Ovinimbu evi vi tu sapuila esulilo liuyaki, onjala, oku vela, kuenda olofa. Vi lombololavo otembo omanu vakuesunga va ka kuata esanju lioku tunga olonjo viavo, oku lima ovapia avo, kuenda oku tekuila omãla vavo vekalo limue liombembua. * Elavoko liaco hẽ, ka liu ku nenela esanju? Tu kuete esunga lioku tava okuti olohuminyo viaco vi ka tẽlisiwa.

SUKU WA SIATA OKU LINGA OVINA VIALUA

Nda wa sokolola lutate ovina viosi Suku a siata oku ku lingila kuenda evi a lingila omanu vosi, o limbuka okuti eye wa linga ovina vialua. Tu kuete omuenyo, olondunge, uhayele kuenda ovina vikuavo vi tu kuatisa komuenyo. Handi vali, ombanjaile ya Suku yocisembi ca lekisiwa ku Yesu una wa tu fila, ci lomboloka asumũluho alua ndomo tua ci li longisa kelivulu lia Yoano 3:16.

Oku kuata omuenyo ko pui pocitumãlo combembua, lekalo liwa, okuti lomue o vela, kuenda ka kuli vali uyaki, onjala, ale oku fa, ci nena esanju lia piãla kuenda asumũlũho. Ocili okuti, oco o tambule asumũluho aco ca tamba ño kokuove. Pole, kuli epulilo likuavo: Nye ove o kasi oku lingila Suku?

^ tini. 24 Oco o kuate alomboluilo akuavo atiamẽla kovitumasuku evi, tanga ocipama 3 celivulu Embimbiliya li Longisa Nye? lia sandekiwa Lolombangi via Yehova.