Skip to content

Skip to table of contents

Olombangi Via Yehova

Select language Umbundu

 OSAPI YO KOÑOÑO | UYAKI WA PONGOLOLA OLUALI

Unyãli wa Nena Uyaki kuenda Ohali

Unyãli wa Nena Uyaki kuenda Ohali

Kunyamo wo 1918 keteke 11 kosãi ya Kuvala, Uyaki Watete Voluali wa pitila kesulilo. Olonjo violomilu via yika kuenda omanu va fetika oku pilukila volokololo. Pole esanju liavo ka lia tumalele otembo yalua. Momo noke yuyaki kueya ocitangi cikuavo ca ponda omanu valua okuti uyaki ci sule.

Kunyamo wo 1918 kosãi Yevambi asualali vo kofeka yo Fransa kovilombo viavo va kuatiwa luvei u tukuiwa hati, grípe Espanyola. Uveyi waco wa ponda omanu valua. Vokuenda kuolosãi vimue vitito uvei waco wa ponda asualãli valua vo ko Amerika va kala oku yakela ko Fransa okuti, vana va pondiwa kuyaki ci sule. Uvei waco wa sambukila asualãli vosi okuti eci va tiukila kolofeka viavo noke yuyaki, va wambata kuenje uveyi waco wa lisanduila voluali luosi.

Noke lianyamo amue tunde eci uyaki wa pua, kueya onjala kuenda ekambo liolombongo. Kunyamo wo 1918 eci uyaki wa sulila, valua ko Europa ka va kuatele okulia. Kunyamo wo 1923, kofeka yo Alemanya olombongo ka via kuatele vali esilivilo. Noke yanyamo epandu, uhũkui wa lisanduila voluali luosi. Noke kunyamo wo 1939, kueya uyaki wavali voluali kuenje ovitangi vina via fetika kuyaki watete via amamako. Nye ca kala oku koka ovitangi viaco?

ONDIMBUKISO YOLONEKE VIA SULAKO

Ovitumasuku Viembimbiliya vi tu kuatisa oku limbuka ovohembi a kasi konyima yovitangi viaco, capiãla enene uyaki Watete Voluali. Yesu Kristu wa  tukuile otembo eci ‘ofeka yi ka katukila ofeka’ kuenda wa lekisa okuti ku ka kala onjala lefengi kolonepa vialua violuali. (Mateo 24:3, 7; Luka 21:10, 11) Eye wa sapuila olondonge viaye okuti ovitangi viaco vi ka kala ondimbukiso yoloneke via sulako. Kelivulu Liesituluilo, ku tukula ovolandu akuavo a sokisa ovitangi viovoluali luyaki wa pita kilu.—Tanga vo ka kasia losapi hati,  “Uyaki wa Palo Posi Kuenda Uyaki wo Kilu.”

Elivulu eli Liembimbiliya li tukula alume vakuãla va endela kotuvalu, okuti olonjanja vimue va siata oku tukuiwa hati, alume vakuãla vo kotuvalu va tukuiwa kelivulu Liesituluilo. Vatatu pokati kavo va lomboloka ovitangi vimuamue Yesu a tukuile ndeci: uyaki, onjala, kuenda afengi. ( “Tanga vokakasia losapi hati: Anga hẽ Alume Vakuãla va Endela Kotuvalu va Kasi Oku Amamako?”) Ocili okuti uyaki watete wapita voluali wa nena efetikilo liotembo yimue yohali okuti toke cilo ka ya tepulukile. Embimbiliya li lekisa okuti Satana eye wa koka ovitangi viosi. (1 Yoano 5:19) Anga hẽ unene waye eteke limue u ka pua?

Elivulu Liesituluilo li tu sapuilavo okuti Satana ‘oloneke viaye vitito.’ (Esituluilo 12:12) Eli olio esunga lieci a kasilili lonyeño yalua, kuenda oku nena ohali voluali. Omo liaco, ovitangi tua siata oku mola voluali vi lekisa okuti otembo ya Satana yi kasi kesulilo.

 OKU NYÕLA OVILINGA VIELIAPO

Uyaki Watete wa pita Voluali wa pongolola ekalo lioluali. Uyaki waco wa nena usuanji kuenda ekambo lioku likolela pokati kolombiali viomanu. Uyaki waco wa lekisavo okuti Satana wa tundisiwa kilu. (Esituluilo 12:9) Ombiali eyi ka yi letiwe yoluali lulo, yi kasi ndombiali yimue yĩvi ya kũlĩha okuti oloneke viaye vioku viala vi kasi kesulilo. Eci oloneke viaco vi sulila, ovitangi viosi via kokiwa Luyaki Watete Woluali vi sulilavo.

Lekuatiso liovitumasuku Viembimbiliya o sukila oku kolela okuti Yesu Osoma yetu yokilu, ndopo o ka “nyõla ovilinga vieliapu.” (1 Yoano 3:8) Omanu valua voluali va siata oku li kutilila oco Usoma wa Suku wiye. Ove hẽ wa siatavo oku ci linga? Lekuatiso Liusoma, omanu vakuekolelo va ka mola oku telisiwa kuocipango ca Suku—palo posi okuti—ca Satana hacoko. (Mateo 6:9, 10) Vemehi Liusoma wa Suku, lalimue eteke voluali mu ka kala vali ovoyaki! (Osamo 46:9) Omo liaco, lilongisa ovina vikuavo viatiamẽla Kusoma oco o ka mole otembo voluali mu ka kala ombembua!Isaya 9:6, 7.

^ tini. 20 Tanga ocipama 8 celivulu Embimbiliya li Longisa Nye?, lia sandekiwa Lolombangi Via Yehova.