Skip to content

Skip to table of contents

Olombangi Via Yehova

Select language Umbundu

 EMBIMBILIYA LI PONGOLOLA OMUENYO WOMANU

“Ohuminyo Yoluali Luokaliye ya Pongolola Omuenyo Wange”

“Ohuminyo Yoluali Luokaliye ya Pongolola Omuenyo Wange”
  • UNYAMO A CITIWA: 1974

  • OFEKA A CITIWILA: LATVIA

  • ULANDU WOMUENYO: OKU KAPA OMUENYO KOHELE LOLOMAPALO VIOKU YOLOKA LOMOTO

OMUENYO WANGE KOSIMBU:

Nda citiwila volupale luo Riga, ombala yo ko Latvia. Ame la manjange ukãi tua tekuiwa la ina yetu. Ndaño okuti Ina yetu wa kala u Katolika, etu tua endaile lika konembele kovipito vimue vietavo. Ame nda kolelele kunene umue wa velapo, pole omo okuti nda kala umalẽhe nda yapuisiwa lolonjongole vikuavo.

Osimbu nda kala oku kula, ina yange wa limbuka okuti ame ndi kuete uloño woku muangolola ovina kuenda oku vi panga vali. Omo liosiata yange yoku muangolola ovina kuenda oku vi panga vali, ina yetu wa kuatele ohele yoku ndi sia konjo lika liange. Omo liaco, wa nyiha ondunda yimue yovikuata viupange nda solele calua oco ndi vi muangolole kuenda oku vi panga vali. Nda solelevo calua oku endisa omoto. Ina yange wa ndi sonehisa kosikola yoku lupoka lomoto yi tuiwa hati, Zelta Mopēds (The Golden Moped). Nda fetikila koku endisa omoto yitito, noke, nda fetika oku enda lomoto yinene.

Nda lilongisa lonjanga uloño waco kuenje votembo yimue yitito nda loñolohele calua komapalo yaco yohele. Olonjanja vitatu nda yula olomapalo vioku yoloka lomoto kolupale luo Latvia, kuenda volonjanja vivali nda yula Olomapalo viaco kofeka yo Estados Baltiko.

NDOMO EMBIMBILIYA LIA PONGOLOLA OMUENYO WANGE:

Eci nda kala oku amamako lupange wange, ufeko wange Evija (okuti noke weya oku linga ukãi wange) wa sapela Lolombangi Via Yehova. Velivulu liaco wa sangamo onumbi yi lekisa ndomo o pondola oku pinga elilongiso Liembimbiliya. Eye wa soneha vonumbi yaco kuenje wa yi tumisa kokuavo. Noke yokatembo kamue wa nyuliwa lakãi vavali Olombangi Via Yehova kuenje va fetika oku u longisa Embimbiliya. Ndaño okuti kotembo yaco sia kuatele onjongole yoku tiamẽla ketavo limue, pole nda sanjukile omo liukãi wange wa kala oku lilongisa Embimbiliya.

Noke, Olombangi Via Yehova via ndi laleka oco ndi yeveleleko osimbu Evija vo longisa Embimbiliya. Nda tava kondaka yavo kuenje nda sola calua ovina nda yevelela. Vimue pokati kovina nda yeva okuti via ndi vetiya, ohuminyo Yembimbiliya yatiamẽla koluali luokaliye. Ovo va ndi lekisa olondaka  vi sangiwa kelivulu Liosamo 37:10, 11 vi popia ndoco: “Okasimbu kaño handi kuenje ondingaĩvi ka yi kalapo. Ndaño o vanjiliya pomangu yaye lutate, eye kepo. Ambombe puãi va piñala ofeka, kuenje va sanjukila okusalala kualua.” Ohuminyo yaco ya mbetiya calua.

Onjongole yange yoku tiamẽla ketavo limue ya kala oku livokiya. Nda fetika oku limbuka ndomo atavo a siata oku longisa uhembi. Pole, alongiso a sangiwa Vembimbiliya a lembeleka kuenda a situluiwa ciwa.

Osimbu nda kala oku amamako oku lilongisa Embimbiliya, nda lilongisa ndomo omuenyo u kuete esilivilo kovaso a Yehova. (Osamo 36:9) Eci ca mbetiya oku sokolola lutate omuenyo wange woku lupuka lomoto—kuenje nda nõlapo oku siapo upange waco oco si ka kape vali omuenyo wange kohele. Nda yonguile oku ambata omuenyo umue weca esivayo ku Yehova. Omo liaco, ekemãlo, esivayo, kuenda esanju liolomapalo vioku yoloka lomoto ka via kuatele vali esilivilo kokuange.

Nda limbuka okuti ñuete ocikele ci nene kovaso a Suku Ukuakueca omuenyo

Kunyamo wo 1996, nda endele kohongele yimue yolofeka ya lingiwa Lolombangi Via Yehova volupale luo Tallinn, ko Estonia, ocipepi locitumãlo tua enda oku lingila olomapalo vioku yoloka lomoto. Kohongele yaco nda mola omanu valua va tunda kolofeka via litepa okuti va kala pamosi lomunga kuenda ombembua. Eci Ombangi yimue ya Yehova ya nyelisa ekolombele liaye, nda sima okuti lalimue eteke a ka li sanga vali. Pole, noke yokatembo kamue, Ombangi yimue ya Yehova ya nena ekolombele liaco okuti lacimue ca nyelelamo. Nda ci komoha calua! Kuenje nda limbuka okuti Olombangi Via Yehova via kapako ovina va lilongisa Vembimbiliya. Ame la Evija tua amamako oku lilongisa Embimbiliya kuenda kunyamo wo 1997 tua papatisiwa kuenje tua linga Olombangi Via Yehova.

NDOMO NDA KUATISIWA:

Vamue pokati ka kamba vange va fa omo lioku linga olomapalo vioku yoloka lomoto. Tunde eci nda fetika oku lilongisa Embimbiliya, nda limbuka okuti ñuete ocikele kovaso a Yehova Ukuakueca omuenyo. Elomboloko liaco lia popela omuenyo wange.

Vokuenda kuanyamo akuãla, Evija lame, tua kuata esumũlũho lioku talavaya kupange wotembo yosi kofiliale Yolombangi Via Yehova ko Riga. Cilo tua sanjuka omo lioku tekula omõletu ukãi o tukuiwa hati, Alise kuenda oku u kuatisa oku sola Yehova. Ñuetevo esumũlũho lioku talavaya eteke limosi vosemana voseketa yoku pongolola alivulu kalimi akuavo, oku semulula akãlu kuenda ovina vikuavo via nyõleha. Oku talavaya ciwa lovoloño nda lilongisa vutila ci ndi sanjuisa! Toke cilo, ñasi oku amamako luloño woku longolola ovina kuenda oku vi panga vali.

Nda sanjukila esumũlũho ñuete lioku imbila uvangi Suku yocili kumue lepata liange kuenje vosi yetu tu eca olopandu omo liovina nda lilongisa Vembimbiliya. Ohuminyo yoluali luokaliye, ya pongolola omuenyo wange!