Skip to content

Skip to table of contents

Olombangi Via Yehova

Select language Umbundu

 OKU SAPELA LOMUNU O KASI POSONGO YETU

Momo Lie Suku a Ecelela Ohali?

Momo Lie Suku a Ecelela Ohali?

Ombangulo yi kuãimo yi lekisa ndomo Ombangi ya Yehova yi pondola oku sapela lomunu umue posongo yavo. Tu sokololi ndu okuti Ombangi yimue ya Yehova yi tukuiwa hati, Michelle yenda konjo yukãi umue o tukuiwa hati, Sophia oco a sapele laye.

SUKU WA TENDA NDATI OHALI YETU?

Michelle: Kalunga, a Sophia. Nda sanjuka omo nda ku sanga konjo yove.

Sophia: Lamevo.

Michelle: Eteke lina ndeyile kulo, tua sapela ndomo Suku a tenda ohali yetu. * Ove wa popele hati wa siata oku sokolola calua catiamẽla kondaka yaco, ca piãla enene tunde eci ina yove a tusuiwa lekãlu. Cilo ina yove, o kasi hẽ ndati?

Sophia: Oloneke vimue o kala ciwa pole, pamue ka kala ciwa. Etali, o kasi ciwa.

Michelle: Ondaka eyi yi ndi sanjuisa. Nda kũlĩha okuti kokuove ka ca lelukile oku liyaka locitangi caco.

Sophia: Ocili. Olonjanja vimue ndi li pula nda o ka amamako toke pi lohali yaco.

Michelle: Wa tambulula ciwa. Eteke lina eci tua sapela, ivaluka epulilo nda lingile liatiamẽla kesunga lieci Suku a kasilili oku ecelela ohali ndaño okuti, o kuete unene woku yi malako?

Sophia: Ã-a, ndi ci ivaluka.

Michelle: Osimbu ka tua kũlĩhĩsile etambululo Liembimbiliya, tu konomuise atosi amue tua sapelele onjanja ya pita.

Sophia: Ciwa.

Michelle: Tua lilongisile okuti, ulume umue ukuekolelo wa tukuiwa Vembimbiliya wa pulilevo esunga lieci Suku a ecelela ohali. Pole, Suku ko pisile omo lioku linga epulilo liaco kuenda ko sapuilile okuti wa sukilile oku pamisa ekolelo liaye.

Sophia: Ondaka eyi ya kala yokaliye kokuange.

Michelle: Tua lilongisavo okuti Yehova Suku ka sanjukila ohali yetu. Momo Embimbiliya li popia okuti eci afendeli vaye kosimbu va kala oku tala ohali ‘wa talelavo kumosi lavo ohali.’ * Anga hẽ oku kũlĩha okuti Suku o sumua eci tu tala ohali ka ci tu lembeleka?

Sophia: Ocili, ci lembeleka.

Michelle: Omo okuti Ululiki wetu o kuete unene walua, tua kolela okuti o ka malako ohali yosi vepuluvi a sokiya.

Sophia: Eci oco ka ca ndombolokele. Momo lie Suku a kasilili oku ecelela ovina vĩvi nda eye o kuete unene woku vi malako?

HELIE WA VANGULA OCILI?

Michelle: Etambululo liepulilo liove tu lisanga poku tanga kelivulu liatete Liembimbiliya okuti Efetikilo. Ove hẽ, wa kũlĩha ulandu wa Adama la Heva kuenda epako lioku kũlĩha eci ciwa leci cĩvi?

 Sophia: Ocili, nda lilongisa ulandu waco Komisa ya Calumingu komẽle. Suku wa va sapuilile oco ka va kalie kepako liuti umue, pole ovo va kuata kepako liaco kuenje va lia.

Michelle: Eci, ocili. Kaliye tu kũlĩhise ulandu u lekisa ndomo Adama la Heva va linga ekandu. Ulandu waco u tu kuatisa oku kũlĩha esunga lieci tu talela ohali. O pondola hẽ oku tanga elivulu Liefetikilo ocipama 3, kocinimbu 1 toke 5?

Sophia: Ciwa. “Onyõha ya velelepo oku nyanga, ovinyama viosi viovusenge via lulika Yehova Suku vi sule. Kuenje ya pula ukãi yiti, ‘Ocili Suku wa popia hati, Ko ka li koviti viosi viovocumbo, ale?’ Ukãi wa kumbulula onyõha hati, ‘Tuakuakulia kapako oviti viovocumbo; te epako liuti owo u kasi vokati kocumbo, owo Suku a linga hati, Ko ka liko, ndaño oku lambako, sanga vu fa.”’ O nyohã ya popia lukãi yiti, ‘Mbu, okufa ka vu fi; momo Suku wa kulĩha okuti eteke vu liako, ovaso ene haico a letuluka kuenje vu linga nda Suku, vu kulĩha eci ciwa leci cĩvi.’”

Michelle: Nda pandula. Tu konomuise lutate ovinimbu viaco. Catete, onyohã ya vangula la Heva. Onepa yikuavo Yembimbiliya yi lekisa okuti Satana Eliapo eye wa vanguila vonyohã poku sapela la Heva. * Satana wa pula Heva ocihandeleko ca Suku catiamẽla kuti umue. Ove hẽ, wa limbuka eyambulo Suku a tukula okuti olio lieciwa ku Adama la Heva, nda valia kepako liaco?

Sophia: Eye wa popia hati, va fa.

Michelle: Oco muẽle. Noke, vovinimbu vi kuãimo, Satana wa lundila Suku. Tala ño eci eye a popia: “Mbu, okufa ka vu fi.” Satana wa tukula Suku hati, ohembi!

Sophia: Ulandu owu lalimue eteke nda u yevele.

Michelle: Eci Satana a tukula Suku hati ohembi, wa katula ocitangi cimue okuti oco ci potoluiwe ca sukilile otembo. O yongola oku kũlĩha esunga liaco?

Sophia: Ã-a. Ame sia ci kolelele.

Michelle: Ciwa, ndi lombolola etosi liaco poku linga ocindekaise eci. Sokolola ndeci okuti, eteke limue nda ñualehela love kuenda nda ku sapuila okuti, ame nda pama calua okuti ove o sule. O pondola oku kũlĩha ndati okuti nda kemba?

Sophia: Ndi sima okuti ove o sukila oku linga o seteko yimue.

Michelle: Ocili muẽle. Citava okuti tu tikula ocikuata cimue ci lema calua oco tu tale u o tẽla oku ci yelula. Ocili okuti onjila ya sunguluka yoku limbuka u wa pama, oku u seteka.

Sophia: Nda limbuka ocisimĩlo cove.

Michelle: Pole, nda nda popia hati ame ndukuacili okuti ove ci sule? Ku tava okuti eci ka ca lelukile oku ci limbuka?

Sophia: Ocili, ndi sima okuti ka ca lelukile.

Michelle: Oku kala ukuacili ocina cimue okuti ka ci limbukiwila kongusu, pole, ci sukila oku linga o seteko yimue.

Sophia: Sio.

Michelle: Onjila ya sunguluka yoku potolola ocitangi caco, oku ecelela otembo oku pita oco omanu va mole loku limbuka helie ukuacili pokati ketu.

Sophia: Ondaka eyi yocili.

Michelle: Kaliye, kũlĩhisa vali ulandu welivulu Liefetikilo. Anga hẽ, Satana wa lombolola okuti eye o kuete ongusu yalua okuti ya Suku yi sule?

Sophia: Sio.

Michelle: Nda oco ca kaile, Suku nda lekisa lonjanga oku lueya kuaye. Pole, Satana wa popia okuti eye ukuacili, Suku ci sule. Omo liaco, wa sapuila Heva okuti, ‘Suku ohembi, pole ame ñasi oku vangula ocili.’

Sophia: Nda sanjukila oku yeva ondaka yaco.

Michelle: Suku omo okuti ukualondunge via piãla, wa kũlĩhile okuti oco ocitangi caco ci potoluiwe ci sukila otembo. Noke ci leluka oku limbuka u wa vangula ocili pokati kavo.

ETOSI LIMUE LI KUETE ESILIVILO

Sophia: Pole eci Heva a fa, ka ca lekisile hẽ okuti, Suku wa vangula ocili?

Michelle: Ocili, ca lekisile. Pole kua kala ocitangi cikuavo Satana a votola. Tanga vali ocinimbu  5. Ove hẽ, wa limbuka ocina cikuavo Satana a sapuila Heva?

Sophia: Eye wo sapuila okuti nda wa lia kepako liaco, ovaso aye a patuluka.

Michelle: Oco, kuenda Heva o “lisoka la Suku, kuenje o kũlĩha eci ciwa leci cĩvi.” Satana wa yonguile oku popia okuti Suku wa kala oku limbika ocina cimue ciwa komanu.

Sophia: Nda ci limbuka.

Michelle: Eci ca kalavo ocitangi cimue cinene.

Sophia: Eci ci lomboloka nye?

Michelle: Lolondaka evi, Satana wa lekisa okuti Heva kuenda omanu vosi, va pondola oku kala ciwa ndaño ka va kuatisiwa luviali wa Suku. Kondaka eyi, Yehova wa kũlĩhĩlevo okuti onjila ya sunguluka yoku potolola ocitangi caco, oku ecelela Satana oku lekisa uvangi wocili condaka yaye. Omo liaco, Suku wa ecelela okuti Satana o viala oluali vokuenda kuotembo yimue. Eci ci situlula esunga lieci tu letele ohali yalua momo, Satana eye o kasi oku viala oluali, okuti Suku hayeko. * Pole, kuli esapulo liwa.

Sophia: Eci ci lomboloka nye?

Michelle: Embimbiliya li longisa atosi avali atiamẽla kocili ca Suku. Catete, Yehova o sakalala calua eci tu tala ohali. Kũlĩhisa olondaka via Soma Daviti, via sonehiwa kelivulu Liolosamo 31:7. Daviti wa pita lovitangi vialua komuenyo waye pole, kũlĩhisa eci a lombolola vohutililo a linga ku Suku. Citava hẽ, okuti o tanga ocinimbu caco?

Sophia: Citava. Oco ci popia hati: “Njolela, sanjukila ocisola cove ka ci pui. Momo wa mõla ohali yange kuenje wa limbuka otokua yange.”

Michelle: Daviti ndaño wa kala oku liyaka lovitangi vialua, wa lembelekiwa poku kũlĩha okuti Yehova o lete ohali yaye. Anga hẽ ove o pondolavo oku sanga elembeleko poku kũlĩha okuti Yehova o lete ovina viosi, ndaño ovisimĩlo vietu vina okuti omanu ka va kuete elomboloko liaco?

Sophia: Oco muẽle.

Michelle: Etosi liavali liocili caco, lieli okuti Suku ka ka ecelela okuti ohali yetu ya amamako otembo ka yi pui. Embimbiliya li longisa okuti ndopo o ka malako uviali ũvi wa Satana. Kuenda o ka malako ovina viosi vĩvi via siata oku pita voluali, oku kongelamo ovitangi ove kuenda ina yove wa siati oku liyaka lavio. Citava okuti ndi tiuka vali osemana iya oco ndi ku lekise esunga lieci tu kolelela okuti Suku o ka malako ohali yosi? *

Sophia: Nda pandula, citava oku tiuka.

Ove hẽ, wa tangele ale Vembimbiliya ulandu umue wa ku komõhisa? O yongola hẽ, oku kũlĩha ovina Olombangi Via Yehova via siata oku lilongisa? Nda oco, ku ka kuate ohele yoku pula Ombangi yimue ya Yehova. Eye o pondola oku ku kuatisa oku sanga atambululo aco.

^ tini. 7 Tanga ulandu u sangiwa vorevista 1 Yevambi Linene, wo 2013 kocipama losapi hati: “Oku Sapela Lomunu o Kasi Posongo Yetu—“Anga hẽ, Suku wa Kapako Ovitangi Vietu?” Ocipama eci ci sangiwavo vo www.jw.org.

^ tini. 17 Tanga Isaya 63:9.

^ tini. 61 Oco o kuate elomboloko lia suapo, tanga ocipama 9 celivulu losapi Embimbiliya li Longisa Nye? lia sandekiwa Lolombangi via Yehova.