Skip to content

Skip to table of contents

Olombangi Via Yehova

Select language Umbundu

Ndamupi Yehova a Siata Oku Lekisa Ocisola Kokuetu?

Ndamupi Yehova a Siata Oku Lekisa Ocisola Kokuetu?

“Tali ocisola ca piãla ndomo Isia a tu cĩha.”1 YOANO 3:1.

OVISUNGO VI IMBIWA: 91, 13

1. Upostolo Yoano o tu vetiya oku sokolola nye, kuenda momo lie?

UPOSTOLO Yoano o tu vetiya oku sokolola lutate catiamẽla kocisola calua Yehova a tu kuetele. Kukanda 1 Yoano 3:1, tu tangako ndoco: “Tali ocisola ca piãla ndomo Isia a tu cĩha.” Nda tu sokolola ocisola Yehova a tu kuetele, kuenda ndomo a siata oku ci lekisa kokuetu, tu kuata ukamba laye, kuenje tu u kuatelavo ocisola calua.

2. Momo lie ka ca lelukilile komanu vamue oku kuata elomboloko liokuti Yehova o va sole?

2 Omanu vamue ka va kuete elomboloko ndomo Suku a siata oku lekisa ocisola kokuavo. Ovo va siata oku sima okuti Suku ka kapeleko omanu. Va tavavo okuti Suku wa siata oku eca lika olonumbi, kuenje o kangisa vana ka va lekisa epokolo kokuaye. Omo lialongiso esanda, omanu vamue va siata oku sima okuti Suku ongangala, kuenda lomue o pondola oku lekisa ocisola kokuaye. Vakuavo va siata oku sima okuti Suku o sole omanu vosi, ndaño vana va linga ovina vĩvi ale viwa. Pole, elilongiso liove  Liembimbiliya lia siata oku ku kuatisa oku kũlĩha ocili catiamẽla ku Yehova. Ove wa kũlĩha okuti ocisola oco ocituwa ca velapo ca Yehova, kuenda wa eca omõlaye ndocisembi kokuove. (Yoano 3:16; 1 Yoano 4:8) Pole, omo liovitangi wa siata oku liyaka lavio komuenyo, pamue ka ci leluka kokuove oku kuata elomboloko liocisola Yehova a ku kuetele.

3. Nye ci pondola oku tu kuatisa oku kuata elomboloko liocisola Yehova a tu kuetele?

3 Oco tu kuate elomboloko liocisola Yehova a tu kuetele, tete tu sukila oku kuata elomboloko liokuti Yehova eye wa tu lulika. Eye wa tu ĩha omuenyo. (Tanga Osamo 100:3-5.) Eli olio esunga lieci Embimbiliya li popela okuti, omunu watete o tukuiwa hati, “omõla a Suku.” (Luka 3:38) Kuenje Yesu wa tu longisa oco tu tukule Yehova tuti, “Isietu o kasi kilu.” (Mateo 6:9) Omo liaco, Yehova eye Isietu, kuenda o tu sole ndeci isia umue uwa a sole omãla vaye.

4. (a) Yehova Isia umue wa tuwa ndati? (b) Nye tu konomuisa vocipama cilo, leci ci kuaĩmo?

4 Ka ca lelukile komanu vamue oku sima okuti isia o sokisiwa lomunu umue ukuacisola. Momo pamue va siata oku sokolola ndomo olonjali viavo via enda oku va tata lungangala eci va kala omãla. Yehova lalimue eteke a tatele lãvi omãla vaye. Yehova eye onjali ya velapo tu kuete. (Osamo 27:10) Eye o tu sole calua, kuenda wa siata oku tu tata lolonjila via litepa. Eci tu limbuka okuti tu soliwe calua la Yehova, ci tu vetiya oku lekisa ocisola kokuaye. (Tiago 4:8) Vocipama cilo tu lilongisa olonjila vikuãla vi situlula ndomo Yehova a siata oku lekisa ocisola kokuetu. Vocipama ci kuãimo tu ka konomuisavo olonjila vikuãla vi tu kuatisa oku lekisa ocisola kokuaye.

YEHOVA UKUACISOLA KUENDA UKUACALI

5. Nye Suku a eca komanu vosi?

5 Eci upostolo Paulu a kala ko Atenai, lo ko Helasi, wa limbuka okuti kua kala oviteka vialua kuenda omanu va tavele okuti olosuku viavo via enda oku eca kokuavo omuenyo. Omo liaco, wa va sapuila ovina viatiamẽla ku “Suku u wa lulika oluali lovina viosi vi kasimo.” Noke wa popia hati, Suku wa siata oku “eca komanu vosi omuenyo lefuimo lovina viosi,” kuenda “omo tu muila omuenyo loku lisengasenga, haimo tu kasilili lomuenyo.” (Ovilinga 17:24, 25, 28) Yehova wa tu ĩha ovina viosi tu sukila oco tu kale lomuenyo, kuenda oku kuata esanju. Sokolola eci catiamẽla kovina vimue a tu ĩha omo liocisola a tu kuetele.

6. Onjo yipi Yehova a tu ĩha? (Tala elitalatu kefetikilo liocipama cilo.)

6 Yehova wa tu pongiyila onjo yimue ya posoka calua. (Osamo 115:15, 16) Pokati koviengele viosi Yehova a lulika, ongongo oyo lika yi kasi ndu okuti ya litepa. Ndaño okuti olonoño via siata oku linga akonomuiso alua vilu, kuenda via limbuka oviengele vialua, pole toke cilo ka via sangele ocengele cikuavo muli ovina viosi omanu va sukila oco vamameko lomuenyo. Yehova ka tu ĩhile lika ovina viosi tu sukila oco tu kale komuenyo, pole wa lulikavo ongongo yimue ya posoka calua okuti yecelela oku kalamo lesanju komuenyo kuenda oku kolapo. (Isaya 45:18) Eci tu sokolola ovina viatiamẽla konjo Isietu Yehova a tu ĩha, tu limbuka ocisola calua a tu kuetele.Tanga Yovi 38:4, 7; Osamo 8:3-5.

7. Onjila Yehova a kuama poku tu lulika yi lekisa ndati okuti o tu sole?

7 Onjila yikuavo yeca uvangi wokuti Yehova  o tu kuetele ocisola, poku tu lulika luloño woku u setukula. (Efetikilo 1:27) Eci ci lomboloka okuti tu pondola oku limbuka ocisola a tu kuetele, kuenje tu vetiyiwavo oku lekisa ocisola kokuaye. Eye wa kũlĩha okuti ovina viaco vi tu nenela esanju. Omãla va kuata esanju eci va limbuka okuti va soliwe calua lolonjali viavo. Ivaluka okuti Yesu wa tu longisa okuti tu kuata lika esanju nda tua linga ukamba la Isietu Yehova. (Mateo 5:3) Eye wa tu ĩha “ovina viosi [okuti] tu sanjuka lavio.” Yehova ukuacali kuenda o tu sole calua.1 Timoteo 6:17; Osamo 145:16.

JEHOVAH YEHOVA O TU LONGISA OCILI

8. Momo lie tu yonguila okuti Yehova o tu longisa?

8 Olonjali vi sole omãla vavo, ka vi yongola okuti va kembiwa, ale va yapuisiwa. Pole, olonjali vialua koloneke vilo ka via siatele oku tava kolonumbi Viembimbiliya viatiamẽla koku tepisa pokati keci ciwa leci cĩvi. Omo liaco, ka vi tẽla oku songuila  ciwa omãla vavo, kuenje ca siata oku nena esumuo kuenda ombuanja. (Olosapo 14:12) Pole, Yehova wa eca komãla vaye olonumbi via velapo, momo eye “Suku yocili.” (Osamo 31:5) Yehova o kuete esanju lioku tu longisa ocili catiamẽla kokuaye. Eye wa siatavo oku tu longisa ndomo tu u fendela, kuenda o lekisa kokuetu onjila yiwa yoku kala komuenyo. (Tanga Osamo 43:3.) Ovina vipi Yehova a siata oku tu longisa vi eca uvangi wokuti o tu sole calua?

Olonjali okuti Akristão vocili, vi setukula Yehova poku longisa ocili komãla vavo, kuenda oku va kuatisa oco va kuate ukamba la Isiavo wo kilu (Tala ocinimbu 8 toke 10)

9, 10. (a) Momo lie Yehova a siatela oku tu longisa ovina viatiamẽla kokuaye? (b) Ovina vipi Yehova a siata oku tu longisa viatiamẽla kocipango caye kuenda kokuetu?

9 Yehova tete o tu sapuila eci catiamẽla kokuaye. Eye o yongola okuti tu u kũlĩha. (Tiago 4:8) Omo liaco, o tu sapuila onduko yaye. Embimbiliya li tukula onduko yaye olonjanja vialua okuti, olonduko vikuavo ci sule. Yehova wa siatavo oku tu sapuila ndomo a tuwa. Nda tu tala ovina a lulika, tu lilongisa okuti o kuete unene kuenda uloño. (Va Roma 1:20) Eci tu tanga Embimbiliya tu lilongisa okuti Yehova ukuesunga kuenda o tu sole calua. Osimbu tu amamako oku kũlĩha ovituwa vi komõhisa via Yehova, tu vetiyiwa oku kuata ukamba laye.

Osimbu tu amamako oku kũlĩha ovituwa vi komõhisa via Yehova, tu vetiyiwa oku kuata ukamba laye

10 Yehova wa siata oku tu longisa ovina viatiamẽla kocipango caye. Eye o tu sapuilavo okuti tu panga onepa kepata liaye. Yehova o tu lomboluilavo ovina a yongola okuti ovio tu sukila oku linga ndeci, oku likuata omunga poku talavaya lomanu vosi vakuepata liaye, kuenda oku kuata ombembua. Embimbiliya li lekisa okuti Suku ka tu lulikile lomoko yoku li nõlela etu muẽle eci ciwa leci cĩvi. (Yeremiya 10:23) Yehova wa kũlĩha eci ciwa kokuetu. Kuenje, omo lioku tava komoko yaye yoku viala, loku pokola kokuaye, tu pondola oku kuata ombembua kuenda esanju komuenyo. Yehova wa siata oku tu longisa ocili ci kuete esilivilo lia velapo, omo liocisola a tu kuetele.

11. Isietu ukuacisola wa siata oku tu longisa nye catiamẽla kovaso yoloneke?

11 Isia ukuacisola o sokolola lutate ndomo omãla vaye va ka kala kovaso yoloneke. Eye o yongola okuti va kuata esanju komuenyo. Pole, omanu valua koloneke vilo, va siata oku sakalala calua lovina vio kovaso yoloneke, kuenda va likolisilako oku linga ovopange amue oco va kuate ovina okuti ndopo ka vi ka kalako vali. (Osamo 90:10) Tu kuete esanju lialua omo okuti Isietu Yehova ka siatele lika oku tu longisa ndomo tu pondola oku kuata cilo esanju komuenyo, pole wa tu likuminyavo ekalo limue li komõhisa kovaso yoloneke!

YEHOVA O SONGUILA OMÃLA VAYE KUENDA O VA PINDISA

12. Yehova wa seteka oku kuatisa ndati Kaini la Baruki?

12 Eci Yehova a limbuka okuti Kaini wa yonguile oku linga ocina cimue cĩvi, wa seteka oku u kuatisa poku u pula ndoco: “Nye wa temẽla? Locipala cove ca nyumalẽla . . . nye? Nda o linga ciwa ku taviwa?” (Efetikilo 4:6, 7) Omo okuti Kaini ka tavele ekuatiso lia  Yehova, wa liyaka lovitangi vialua. (Efetikilo 4:11-13) Onjanja yimue Yehova wa limbukile okuti Baruki wa kala oku lekisa ocituwa cimue ka ca sungulukile, kuenje, wa fetika oku kava kuenda oku pua epandi. Omo liaco, Yehova wa sapuila Baruki hati, wa sukilile oku linga apongoloko omo liocisimĩlo caco ka ca sungulukile. Noke, Baruki wa tava kelungulo lia Yehova, kuenje wa popela omuenyo waye.Yeremiya 45:2-5.

13. Nye afendeli va Yehova vakuekolelo va lilongisa poku liyaka lovitangi?

13 Yehova wa siata oku tu songuila, loku tu pindisa, momo o tu sole. Eye ka siatele lika oku tu lungula eci tu linga cimue cĩvi, pole wa siatavo oku tu kuatisa. (Va Heveru 12:6) Vembimbiliya tu sangamo ovolandu afendeli va Yehova vakuekolelo vana a pindisa oco va linge omanu vawa. Ovolandu a lekisa okuti Yosefe, la Mose kuenda Daviti, va liyakele lovitangi vialua. Pole, vokuenda kuovitangi viaco, Yehova wa kala lavo. Kuenje, ovina va lilongisa vokuenda kuovitangi viaco, vieya oku va kuatisa eci Yehova a eca kokuavo ovikele vinene. Eci tu tanga Vembimbiliya ovolandu a lekisa ndomo Yehova a kuatisa afendeli vaye loku va pindisa, tu limbuka okuti o tu sole calua.Tanga Olosapo 3:11, 12.

14. Nda tua linga ocina cimue ka ca sungulukile, Yehova o lekisa ndati ocisola kokuetu?

14 Ndaño pamue tu linga ocina cimue ka ca sungulukile, pole Yehova amamako oku lekisa ocisola kokuetu. Nda tua kapako epindiso kuenda tua likekembela, eye o tu ecela “ca lua.” (Isaya 55:7) Eci ci lomboloka nye? Olondaka via Daviti viatiamẽla koku ecela kua Yehova vi lekisa okuti, tu kuete Isia umue ukuahenda ndomo Embimbiliya li popia hati: “Eye ecela akandu ove osi. O sakula ovoveyi ove osi. O yovola omuenyo wove konjembo. O ku walisa ekolowa liocisola ka ci pui kuenda ohenda. Ndeci kutundilo kupãla lutakelo haico a kapa okulueya kuetu ocipãla.” (Osamo 103:3, 4, 12) Yehova o tu pindisa kuenda o tu songuila volonjila via litepa. Ove hẽ wa siata oku linga apongoloko lonjanga? Olonjanja viosi ivaluka okuti Yehova wa siata oku tu pindisa omo liocisola a tu kuetele.Osamo 30:5.

YEHOVA O TU TEYUILA

15. Onjila yipi yikuavo Yehova a siata oku kuama yi lekisa okuti o tu sole?

15 Isia ukuacisola o teyuila epata liaye nda li kasi kohele. Eci oco Isietu Yehova a siata oku tu lingila. Ukualosamo wa popia eci catiamẽla ku Yehova hati: “Eye o silamela ovimuenyo violosandu viaye. O va popela povaka olondingaĩvi.” (Osamo 97:10) Sokolola ulandu u kuãimo ndeci: Omo okuti ovaso ove a kuete esilivilo lia velapo kokuove, wa siata oku a teyuila lonjanga. Cimuamue haico Yehova a siata oku linga okuti, o teyuila lonjanga afendeli vaye, momo va kuete esilivilo lia velapo kokuaye.Tanga Sakariya 2:8.

Yehova wa siata oku teyuila lonjanga afendeli vaye omo okuti va kuete esilivilo lia velapo kokuaye

16, 17. Yehova wa teyuila ndati afendeli vaye kosimbu kuenda wa siatavo oku ci linga ndati koloneke vilo?

16 Onjila yikuavo yeyi okuti, Yehova lekuatiso  liovangelo vaye wa teyuila afendeli vaye kosimbu, kuenda wa siatavo oku ci linga koloneke vilo. (Osamo 91:11) Onjanja yimue ungelo umosi wa pondele eci ci soka 185.000 kasualali vo ko Asuria vuteke umuamue, kuenje wa teyuila afendeli va Suku. (2 Olosoma 19:35) Kocita catete ovangelo vamue va yovola Petulu, la Paulu kuenda omanu vakuavo vokayike. (Ovilinga 5:18-20; 12:6-11) Vokuenda kuanyamo a pita, vofeka yimue yocifuka co Afrika mua pita uyaki. Vofeka yaco omanu va tala ohali yalua omo liuyaki, oku nyaniwa, oku putuiwa, kuenda oku pondiwa. Ndaño okuti lomue pokati ka vamanji wa fa, valua va pesela ovina viosi va kuatele. Pole, vosi yavo va limbuka ocisola Yehova a va kuetele, kuenda va kũlĩha okuti Yehova wa siata oku va tata ciwa. Ndaño va siata oku liyaka lovitangi vialua, toke cilo va kuete esanju. Momo, eci manji umue onumiwa yo Kombala Yolombangi Via Yehova a endele oku ka va nyula, kuenje wa va pulisa ndomo va kasi, ovo va tambulula vati: “Vosi yetu tu kasi ciwa, kuenda tu eca olopandu ku Yehova!”

17 Ocili okuti afendeli vamue va Yehova ndeci, ndonge Stefano kuenda vakuavo va pondiwa omo liekolelo va lekisa. Yehova olonjanja vimue ka siatele oku tateka oco ovina viaco ka vi ka lingiwe. Pole, o teyuila afendeli vaye va likuete omunga poku va lungula kovina viatiamẽla kolonjila via litepa Satana a siata oku kuama oco a va yapuise. (Va Efeso 6:10-12) Tua siata oku sanga alungulo aco Vembimbiliya, kuenda valivulu ocisoko ca Yehova. Tua lilongisa eci catiamẽla kovitangi vi tunda vo Internet, koku sola calua olombongo, kukahonga, kolofilme viungangala, kalivulu amue, ale kolovideo game. Ocili okuti Yehova o tu sole, kuenda o yongola oku tu teyuila.

ESUMŨLŨHO LIMUE LINENE

18. Nye o yeva vutima omo liocisola Yehova a ku kuetele?

18 Eci Mose a sokolola ovina viatiamẽla kanyamo osi a kala oku vumba Yehova, wa limbuka okuti Yehova u kuetele ocisola. Kuenje Mose wa popia hati: “Tu kutise omẽle locisola cove ka ci pui, ha tu yolela loku sanjuka oloneke vietu viosi.” (Osamo 90:14) Tu kuete esumũlũho omo lioku kuata elomboloko liokuti Yehova o tu sole. Tu kuetevo esumũlũho lia velapo lioku soliwa la Yehova! Omo liaco, tu kuete ovisimĩlo ndevi viupostolo Yoano wa popia hati: “Tali ocisola ca piãla ndomo Isia a tu cĩha.”1 Yoano 3:1.