Skip to content

Skip to table of contents

Olombangi Via Yehova

Select language Umbundu

O Tava hẽ Okuti o Kuete Ocili? Momo Lie?

O Tava hẽ Okuti o Kuete Ocili? Momo Lie?

“Vu limbuka ndeci ci kasi ocipango ca Suku, okuti ciwa, ca sunguluka, [kuenda] ca pua eko.”VA ROMA 12:2.

1. Nye asongui vetavo Liokatolika kuenda Liopostande va linga vokuenda kuotembo yuyaki?

ANGA hẽ Suku o yongola okuti Akristão vocili va litenga vuyaki kuenda va ponda omanu vo kolofeka vikuavo? Pa pita ale 100 canyamo, tunde eci omanu vana va litukula vati Akristão va li ponda pokati vuyaki. Momo, vakuetavo Liokatolika, va ponda vakuetavo Liokatolika, kuenda vakuetavo Liopostande, va pondavo vakuetavo Liopostande. Noke, asongui vakuetavo Liokatolika kuenda Liopostande, va sumũlũisa asualali kuenda ovota avo. Vokuenda Kuyaki Wavali wa pita Voluali, oku li ponda kuaco pokati ka vana va litukula vati Akristão, kua lingiwa olonjanja vialua.

2, 3. Nye Olombangi Via Yehova via linga vokuenda kuyaki wavali wa pita voluali, kuenda kovoyaki akuavo? Momo lie?

2 Nye Olombangi Via Yehova via linga vokuenda Kuyaki Wavali wa pita Voluali? Ovio, via yuvula oku litenga vopulitika, kuenda ka via pangele onepa kovoyaki a pita pokati kolofeka. Momo lie? Momo, Olombangi Via Yehova via pokola kalongiso a Yesu, kuenda vi kuãi ongangu yaye yoku li sola pokati lomanu vakuavo. Yesu wa popia hati: “Kokulisola kuene pokati oko omanu vosi va limbukila okuti vulondonge viange.”  (Yoano 13:35) Olombangi Via Yehova via ivalukavo olondaka upostolo Paulu a sonehela vamanji vo ko Korindo, kuenda via kapako olonumbi viaco eci via pita lovitangi via lua.Tanga 2 Va Korindo 10:3, 4.

3 Akristão vocili va kapako olonumbi Viembimbiliya oco vi va songuile poku tepisa pokati keci ciwa leci cĩvi. Kuenje, utima wavo u va kuatisa oku yuvula oku enda kuyaki, ale oku lilongisa oku liyaka pokati. Omo okuti Olombangi Via Yehova Akristão vocili, valua pokati kavo va siata oku lambalaliwa. Amalẽhe lakulu, akãi lalume kuenda omãla, va kapiwa volokayike, loku kisikiwa oku linga ovopange alua vocila coku kangisila omanu. Vuyaki wavali wa pita voluali, eci ofeka yo Alemanya ya vialiwile Lombiali yimue Ongangala, vamue pokati kavo va pondiwa. Vokuenda kuelambalalo liaco vocifuka co Europa, Olombangi Via Yehova ka via ivaleleko ocikele cavo coku kunda olondaka viwa Viusoma wa Yehova. Ovo, vamamako lupange wavo woku kunda, ndaño ceci vamue pokati kavo va kapiwa volokayike, vocila coku talisiwa ohali, kuenda va ambatiwa kolofeka vikuavo. * (Tala etosi pombuelo yemẽla.) Noke, kunyamo wo 1994, Olombangi Via Yehova ka via litengelevo vocitangi coku ponda omanu kofeka yo Rwuanda. Pole, via amamako oku yuvula oku litenga vopulitika, kuenda vuyaki wa pita kofeka yina okuti, kosimbu ya enda oku tukuiwa hati, o Yugoslavia.

Omanu valua voluali va siata oku popia vati, Olombangi Via Yehova vi sole Suku, kuenda omanu vakuavo

4. Eci omanu va limbuka okuti Olombangi Via Yehova ka vi litengi vopulitika, nye va siata oku popia?

4 Omo okuti Olombangi Via Yehova vi yuvula oku litenga vopulitika kuenda vuyaki, omanu valua voluali luosi va siata oku popia vati, Olombangi Via Yehova vi sole Suku, lomanu vakuavo, kuenda ovo, Akristão vocili. Momo lie omanu vamue va siatela oku popia vati, Olombangi Via Yehova Akristão vocili?

UPANGE WOKU LONGISA U KASI OKU LINGIWA TUNDE KOSIMBU

5. Epongoloko lipi olondonge via Yesu via linga?

5 Yesu wa popele hati, oku kunda olondaka viwa Viusoma wa Suku, owo upange wa velapo palo posi. Eci a fetika upange waye woku kunda, wa nõla eci ci soka 12 kolondonge, oco vi fetike upange waco okuti, wa laikele oku lingiwa voluali luosi. Noke, Yesu wa pindisavo eci ci soka 70 kolondonge. (Luka 6:13; 10:1) Yesu wa longisa olondonge viaye ndomo via laikele oku kala alongisi. Tete, wa va pindisa ndomo va laikele oku longisa va Yudea vakuavo. Pole,  wa va sapuilavo oco va fetike oku kundila olondaka viwa komanu vo kolofeka vikuavo. Olondonge vina okuti va Yudea, eci via fetika oku kundila omanu vana ka va kalele va Yudea, ca kala epongoloko linene kokuavo!—Ovilinga 1:8.

6. Nye ca kuatisa Petulu oku limbuka okuti, Yehova ka velisilepo ekova liapata amue okuti, akuavo a sule?

6 Korneliu okuti ka kalele u Yudea, kuenda ka seviwile evamba, eye omunu wa tete wa linga Ukristão. Yehova wa tumile upostolo Petulu oco a kundile Korneliu kumue lepata liaye. Noke, Petulu wa kuata elomboloko liokuti, Yehova ka velisilepo ekova liapata amue okuti, akuavo a sule. Momo, Yehova o yongola okuti, omanu vo kolofeka viosi va yeva ocili, kuenda va tava. Omo liaco, Petulu wa sapuila Korneliu kumue lepata liaye oco va papatisiwe. (Ovilinga 10:9-48) Tunde keteke liaco, Petulu kumue lolondonge vikuavo via Yesu, va fetika oku kundila omanu vo kolofeka viosi.

7, 8. Nye Olombangi Via Yehova via siata oku linga, oco vi kuatise omanu oku yevelela olondaka viwa Viusoma? (Tala elitalatu kefetikilo liocipama cilo.)

7 Koloneke vilo, vamanji va songuila ocisoko ca Yehova, va siata oku kuatisa kupange woku sokiya ndomo olondaka viwa vi kundiwa voluali luosi. Cilo, voluali luosi muli eci ci soka olohuluwa ecelãla Kolombangi Via Yehova. Ovo, va kasi oku kunda esapulo Liusoma lia pongoluiwa kueci ci pitahãla 600 kalimi, kuenda etendelo liaco li kasi oku amamako oku livokiya. Ovo, va siata oku kundila konjo lanjo, kuenda volokololo. Kupange woku kunda, olonjanja vimue va siata oku kapa olomesa vialivulu volokololo okuti, kua kapiwa olopapelo kua sonehiwa alimi valivulu omunu a yongola oku nõla. Omo liaco, omanu va pondola oku limbuka Olombangi Via Yehova, momo, ovio lika via siata oku kuama onjila yaco yoku kunda.

8 Ocisoko ca Yehova ca pindisa eci ci pitahãla 2.900 ya vamanji va kasi oku pongolola Embimbiliya, kuenda alivulu etu kalimi akuavo. Alivulu etu a kasi oku pongoluiwavo kalimi ana okuti, ka a kũlĩhĩwile ciwa lomanu valua. Koloneke vilo, Olombangi Via Yehova kofeka yo Espanya, vi kasi oku pongoluila alivulu etu kelimi lio Katalan. Ka pa pitile otembo yalua kuenje, omanu valua va fetika oku sapela kelimi liaco valupale amue ndeci: Luo Valensia, luo Alikante, vocifuka co Balearic, kuenda vofeka yo Andorra. Koloneke vilo, kuli omanu valua va vangula elimi lio Katalan. Omo liupange woku pongoluila alivulu kalimi akuavo Olombangi Via Yehova vi kasi oku linga, omanu va vangula elimi lio Katalan va kuete alivulu kelimi liavo, kuenda va siata oku linga olohongele kelimi liaco okuti, li va kuatisa oku kuata elomboloko liovina va lilongisa.

9, 10. Ovolandu api a lekisa okuti ocisoko ca Yehova ci yongola okuti omanu vosi va lilongisa ocili?

9 Upange woku pongoluila alivulu etu kalimi akuavo, oco omanu va longisiwe kalimi avo, u kasi oku lingiwa kolonepa viosi violuali. Ndaño okuti kofeka yo Mesiku omanu valua va vangula elimi lio Espanyole, pole, kulivo vamue va vangula alimi akuavo. Limue pokati kalimi aco, elimi lio Maya. Ocimunga ca vamanji va kasi oku pongoluila alivulu etu kelimi lio Maya, va sangiwa vimbo limue va vangula elimi liaco. Omo okuti vamanji va pongoluila alivulu etu kelimi lio Maya va pondola oku yeva omanu va vangula elimi liaco eteke leteke, poku ci linga, va kuama olondaka via leluka, oco omanu va kuate lonjanga elomboloko liaco. Ulandu ukuavo wo kofeka yo Nepale okuti, omanu vaco va vangula eci ci soka 120 kalimi. Vofeka yo Nepale muli eci ci pitahãla 29 kolohuluwa viomanu. Ci pitahãla 10 kolohuluwa viomanu va vangula elimi lio Nepale okuti, olio elimi liavo  liatete. Mulivo vamue okuti, ndaño va vangula elimi likuavo, pole, va vangulavo elimi lio Nepale. Vamanjetu va kasi oku pongoluila alivulu kelimi lio Nepale.

10 Koloneke vilo, upange woku pongoluila alivulu etu kalimi akuavo, weca uvangi wokuti, ocisoko ca Yehova ca kapako upange woku kundila olondaka viwa viusoma voluali luosi. Olombangi Via Yehova via siata oku eca komanu olohuluwa viotuikanda, olombrochura, kuenda olorevista, pole, ka vi landisa alivulu aco. Olombangi Via Yehova via siatavo oku kuatisa kupange waco lolombanjaile viavo. Momo, vi kuãi onumbi ya Yesu wa popia hati: “Omo wa tambuli ocali, ... ecivo ocali.”—Mateo 10:8.

Ocimunga ca vamanji va kasi oku pongoluila alivulu etu kelimi lio Alemão (Tala ocinimbu 10)

Alivulu kelimi lio Alemão a kasi oku kuatisavo omanu vo ko Paraguai (Talavo elitalatu kefetikilo liocipama cilo)

11, 12. Omo okuti tu kasi oku kundila voluali luosi, nye omanu valua va siata oku popia?

11 Olombangi Via Yehova vi tava okuti, vi kuete ocili, momo, via siata oku likolisilako oku pokola konumbi yoku kundila omanu vo kolofeka viosi, kuenda kapata osi. Valua pokati kavo va leluisa omuenyo wavo, kuenje, va lilongisa elimi likuavo, kuenda va lilongisa ovituwa vio kolofeka vikuavo. Omo okuti tu kasi oku kundila omanu voluali luosi, valua va siata oku popia vati, Olombangi Via Yehova ovio olondonge viocili via Yesu Kristu.

12 Olombangi Via Yehova vi kasi oku likolisilako oku tẽlisa ocikele cavo, momo vi tava okuti, via sanga ocili. Pole, nye ca siata oku vetiya vamanji vamue oku limbuka okuti, va kuete ocili?Tanga Va Roma 14:17, 18.

ESUNGA LIECI VA TAVELA OKUTI VA KUETE OCILI

13. Olombangi Via Yehova via siata oku linga nye oco ocisoko caye ci yelisiwe?

13 Vamanjetu va siata oku lekisa esunga lieci va tavela okuti, va kuete ocili. Manji umue o kasi oku vumba Yehova vokuenda kuanyamo alua wa popia hati: “Oco ocisoko ca Yehova ca amameko oku yelisiwa, vana ka va pokola kolonumbi Viembimbiliya, va sukila oku lunguiwa.” Afendeli va Yehova va siata oku kapako ndati onumbi ya tukuiwa ndeti? Omunu lomunu pokati kavo, wa siata oku likolisilako oku pokola kondaka ya Suku yi sangiwa Vembimbiliya, loku kuama ongangu ya Yesu, kuenda yolondonge viaye. Etendelo limue litito Liolombangi Via Yehova, olio lika ka lia siatele oku pokola kolonumbi via Yehova vioku tepisa pokati keci ciwa leci cĩvi,  kuenje, va siata oku tundisiwa vekongelo. Pole, valua pokati Kolombangi Via Yehova, va siata oku ambata omuenyo umue u sanjuisa Yehova. Omanu valua okuti kosimbu va enda oku linga ovina ka vi taviwa la Yehova, cilo va linga apongoloko, kuenda va kuãi olonumbi viaye.Tanga 1 Va Korindo 6:9-11.

14. Apongoloko api vamanji valua va siata oku linga noke lioku tundisiwa vekongelo, kuenda lonima yipi?

14 Vembimbiliya mu sangiwa olonumbi via siata oku kuatisa Akristão vocili, oco va tundise vekongelo vana ka va tava oku pokola ku Yehova. Tu sanjuka calua poku limbuka okuti, noke valua va siata oku likekembela kovina vĩvi va linga, kuenje, va tiuka vali vocisoko ca Yehova. (Tanga 2 Va Korindo 2:6-8.) Omo okuti Olombangi Via Yehova via siata oku kuama Embimbiliya oco li va kuatise oku yuvula ovituwa ka via sungulukile, ekongelo li kasi oku amamako oku yelisiwa. Kuenje, ovina viaco vi va kuatisa oku limbuka okuti, ocisoko cavo ci taviwa la Yehova. Ndaño vatavo esanda va ecelela okuti omanu vaco va linga ovina va yongola, pole, Akristão vocili va kapako olonumbi via Yehova. Omo liaco, omanu valua va siata oku vetiyiwa oku limbuka okuti, Olombangi Via Yehova vi kuete ocili.

Ndaño vatavo esanda va ecelela okuti omanu vaco va linga ovina va yongola, pole, Akristão vocili va kapako olonumbi via Yehova

15. Nye ca vetiya manji umue oku tava okuti o kuete ocili?

15 Momo lie Olombangi vikuavo Via Yehova vi tavela okuti vi kuete ocili? Manji umue o kuete eci ci soka 54 kanyamo okuti o kasi oku vumba Yehova tunde vutila, wa popia hati, ekolelo liaye li tiamisiwila katosi atatu ndeci: (1) Kuli Suku. (2) Embimbiliya lia tunda ku Suku. (3) Olombangi Via Yehova ovio lika vi kasi oku linga ocipango caye voluali luosi koloneke vilo. Eye wa popiavo hati: “Omo okuti ndi kasi oku vumba Yehova vokuenda kuanyamo alua, nda siata oku seteka atosi atatu a tukuiwa ndeti, kuenda oku li pula nda nda kolela muẽle kovina viaco. Eci nda limbuka okuti nda kapako atosi aco atatu a tukuiwa, ca pamisa ekolelo liange kuenda nda tava okuti, tu kuete ocili.”

16. Nye ca vetiya manji umue ukãi oku tava okuti o kuete ocili?

16 Manji umue ukãi okuele, okuti otalavaya kombala Yolombangi Via Yehova kofeka yo Nova Yorke wa popia ovina vio kuatisa oku tava okuti o kuete ocili. Eye wa popia hati, ocisoko ca Yehova oco lika ca siata oku sapuila komanu ovina viatiamẽla konduko ya Yehova okuti, yi sangiwa Vembimbiliya ci soka 7.000 kolonjanja. Eye, wa pamisiwavo lolondaka vielivulu 2 Asapulo 16:9, li popia ndoco: “Ovaso a Yehova a vanja vanja kuosi kilu lieve ha lekisa unene waye ku vakuavitima vio sungulukila.” Noke, wa popiavo hati: “Ovina viocili nda lilongisa, via siata oku ndi kuatisa ndomo ndi pondola oku kuata utima uwa, oco Yehova a pamise ekolelo liange. Nda sanjukila ukamba ndi kuetele Yehova, kuenda nda kapako ocikele Yesu a kuete coku ndi kuatisa oco ndi kuate ukũlĩhĩso u pamisa ekolelo liange.”

17. Manji umue kosimbu ka tavele okuti kuli Suku, nye co vetiya oku tava okuti wa sanga ocili, kuenda momo lie?

17 Manji umue kosimbu ka tavele okuti kuli Suku  wa popia hati: “Ovina via lulikiwa via ndi vetiya oku tava okuti, Suku o yongola okuti, tu kuata esanju komuenyo, kuenda ka ecelela okuti, ohali yi ka amamako. Osimbu omanu voluali va kasi oku amamako oku linga ovina via vĩha, afendeli va Yehova va kasi oku pamisa ekolelo liavo, oku kuata ombili, kuenda ocisola. Espiritu lia Yehova, olio lika li pondola oku linga ocikomo caco koloneke vilo.”Tanga 1 Petulu 4:1-4.

18. Momo lie vamanji vavali va tavela okuti va kuete ocili? Nye o yevite vutima catiamẽla kondaka yaco?

18 Manji ukuavo okuti o kasi oku vumba Yehova vokuenda kuanyamo alua wa lekisa esunga lieci a tavela okuti, o kuete ocili. Eye wa popia hati: “Elilongiso nda siata oku linga vokuenda kuanyamo, lia ndi kuatisa oku tava okuti, Olombangi Via Yehova vi kasi oku likolisilako oku kuama ongangu Yakristão vo kocita catete. Nda siata oku limbuka ukamba u kasi pokati Kolombangi via Yehova poku linga ovongende kolofeka vialua violuali. Ocili ci sangiwa Vembimbiliya ca siata oku ndi nenela esanju lialua.” Manji umue o kuete ci pitahãla 60 kanyamo wa lekisa okuti, Olombangi Via Yehova via kolela Yesu. Eye wa popia hati: “Tua siata oku lilongisa lutate ovina viatiamẽla komuenyo wa Yesu, kuenda kupange waye woku kunda, loku kuama ongangu yaye. Tua siatavo oku linga apongoloko alua kekalo liomuenyo wetu, oco tu kuate ukamba la Suku, kuenda la Yesu Kristu. Tua limbuka okuti, ocisembi ca Kristu, oco lika ci pondola oku tu yovola. Tua kũlĩha okuti, Yesu wa pinduiwa kolofa. Momo, tu kuete uvangi wovina viaco.”Tanga 1 Va Korindo 15:3-8.

SAPUILA KOMANU CATIAMẼLA KOCILI

19, 20. (a) Ocikele cipi Paulu a tukula vukanda a sonehela kekongelo lia va Roma? (b) Nye afendeli vosi va Yehova va sukila oku linga?

19 Akristão vocili va kuetele ocisola omanu vakuavo. Eli olio esunga lieci tu sukilila oku sapuila komanu ocili tua lilongisa. Paulu wa sapuila vamanji vekongelo lio ko Roma hati, olondonge viocili via Yesu vi kuete ocikele coku kunda. Eye wa soneha ndoco: “Nda o popia lomẽla wove, huti, Yesu eye Ñala, kuenda o kolela lutima wove okuti Suku wo pindula kuava va fa, o popeliwa. Momo, eci omunu a kolela lutima waye, oco a tendiwa ndukuesunga, leci a likekembela akandu aye lomẽla, oco a popeliwa.”Va Roma 10:9, 10.

20 Olombangi Via Yehova vi tava okuti, vi kuete ocili, kuenda via kũlĩha okuti, oku longisa omanu olondaka viwa Viusoma wa Suku, ci nena esanju. Omo liaco, kuata ocimãho coku longisa omanu catiamẽla Kembimbiliya, kuenda oku lekisa kokuavo okuti, ekalo liomuenyo wove li eca uvangi wokuti, o kuete ocili.

^ tini. 3 Tala velivulu Testemunhas de Jeová—Proclamadores do Reino de Deus, kamẽla 191-198, 448-454.