Skip to content

Skip to table of contents

Olombangi Via Yehova

Select language Umbundu

“Vu Linga Olombangi Viange”

“Vu Linga Olombangi Viange”

“[Yesu] wa popia lavo hati: . . . ‘Vu linga olombangi viange . . . toke kasulilo okilu lieve.’”—OVIL. 1:7, 8.

1, 2. (a) Helie ombangi ya koleliwa ya Yehova? (b) Onduko ya Yesu yi lomboloka nye? Ovituwa vipi Omõla wa Suku a lekisa vi litava londuko yaco?

YESU KRISTU wa popia hati: “Eci oco nda citiwila, haico ndeyilila voluali, okuti, njimbila Ocili uvangi.” (Tanga Yoano 18:33-37.) Olondaka evi wa vi sapuila kombiali ya va Roma wo ko Yudea, eci a kala oku sombisiwa. Vepuluvi liaco, Yesu wa li lekisile ale okuti, osoma. Eci pa pita anyamo amue, upostolo Paulu wa popia eci catiamẽla kongangu yiwa yutõi Yesu a lekisa, poku “imba uvangi uwa wetavo liaye kovaso a Pondio Pilato.” (1 Tim. 6:13) Olonjanja vimue, tu sukila oku kuata utõi walua ndeci Yesu a linga, omo lioku kala ‘ombangi yocili lesunga.’—Esit. 3:14.

2 Omo okuti Yesu watiamẽlele kepata lia va Yudea, wa kala Ombangi ya Yehova tunde eci a citiwa. (Isa. 43:10) Ocili okuti, Yesu wa kala ombangi ya velapo Yehova a nõla oco a ece uvangi wonduko Yaye. Yesu wa kapeleko elomboloko lionduko Suku a ecele kokuaye. Onjanja yimue, ungelo wa sapelele la Yosefe wa laikele oku kala isia ya Yesu yo katumba hati, Maria wa mina lekuatiso liespiritu sandu. Kuenje wamisako hati: “O cita omõla ulume, u luka Yesu momo eye o popela omanu vaye kakandu avo.” (Mat. 1:20, 21) Omanu vamue vakuakukonomuisa Embimbiliya va tava okuti, onduko ya Yesu yopiwa kelimi lio Heveru okuti, Jesua. Oyo, yi tiamisiwila konduko ya Suku okuti,  ka ya sonehiwile yosi, kuenda yi lomboloka okuti, “Yehova eye Upopeli.” Omo lielomboloko lionduko yaco, Yesu wa kuatisa ‘olomeme via nyelela viepata lia Isareli,’ oku likekembela akandu avo, oco vi taviwe la Yehova. (Mat. 10:6; 15:24; Luka 19:10) Omo liaco, Yesu wa lekisa ombili kupange woku kunda catiamẽla Kusoma wa Suku. Marko usonehi Wevanjeliu wa popia hati: “Yesu weya ko Galilea, yu wa kunda ondaka yiwa ya Suku, hati: ‘Kaliye otembo ya tẽlisua, usoma wa Suku u kasi ocipepi. Likekembeli akandu ene. Tavi kondaka yiwa.’” (Mar. 1:14, 15) Yesu wa lekisa utõi woku pisa asongui vetavo lia va Yudea, vana va pangele onepa koku u pondela kuti.—Mar. 11:17, 18; 15:1-15.

“OVILINGA VINENE VIA SUKU”

3. Nye ca pita keteke liatatu noke yolofa via Yesu?

3 Kua lingiwa ovina vi komõhisa calua! Momo, eci Yesu a tẽlisa oloneke vitatu tunde eci a pondiwa, Yehova wo pindula letimba liespiritu okuti, ka fi vali. (1 Pet. 3:18) Momo, Ñala Yesu wa molẽha letimba liositu, oco omanu va limbuke okuti, wa pinduiwa. Keteke liatete noke liepinduko liaye, wa molẽha olonjanja vitãlo kovapostolo vaye.—Mat. 28:8-10; Luka 24:13-16, 30-36; Yoa. 20:11-18.

4. Nye ca pita eci Yesu a molẽha kolondonge noke liepinduko liaye? Ocikele cipi a lombolola okuti oco olondonge via sukilile oku tẽlisa?

4 Onjanja yatãlo, Yesu wa molẽha kovapostolo vaye, kuenda komanu va kala kumue lavo. Vepuluvi liaco, ovina a lombolola, wa vi linga ndelilongiso Liondaka ya Suku. Eye, “wa situlula ovitima viavo okuti va limbuka ovisonehua.” Noke, olondonge via kuata elomboloko liokuti, oku pondiwa kua Yesu lovanyãli va Suku, kuenda ocikomo cepinduko liaye, ulandu waco wa lomboluiwile ale Vovisonehua. Yesu poku malusula ohongele a linga keteke liatete liepinduko liaye, wa sapuila kolonjeveleli viaye ovina via sukilile oku linga. Eye wa popia hati: “Oku likekembela akandu kuenda okuecelua ku kundilua vonduko yaye kolofeka viosi, oku fetikila ko Yerusalãi.” Noke wa amisako hati: “Ene vulombangi viovina evi.”Luka 24:44-48.

5, 6. (a) Momo lie Yesu a popela hati: “Vu linga olombangi viange”? (b) Esokiyo lipi Yehova a linga liatiamẽla kocipango caye, oco olondonge via Yesu vi ece esapulo liaco?

5 Eci pa pita 40 koloneke, Yesu wa molẽha onjanja ya sulako, kuenje ovapostolo vaye va sukilile oku kuata elomboloko liolondaka a va sapuila hati: “Vu linga olombangi viange vo Yerusalãi, lo vo Yudea yosi, lo vo Samária, kuenda toke kasulilo okilu lieve.” (Ovil. 1:8) Momo lie Yesu a popela hati: “Vu linga olombangi viange,” pole ka popele hati, vu linga Olombangi Via Yehova? Olondaka evi Yesu a tukula ndeti noke, wa vi tiamisila ku va Isareli, momo va kala ale Olombangi Via Yehova.

Omo okuti tulondonge via Yesu, tu sukila oku kundila omanu ocipango ca Yehova catiamẽla kovaso yoloneke (Tala ovinimbu 5, 6)

6 Olondonge via Yesu, via sukilile oku sapula ocipango ca Yehova catiamẽla kovina a linga poku yovola va Isareli kupika kofeka yo Egito, kuenda kumandekua ko Bavulono. Olofa via Yesu kuenda epinduko liaye, via eca uvangi woku yovuiwa kupika wekandu, kuenda kolofa. Kocipito co Pendekoste cunyamo wa 33 K.K., olombuavekua viokaliye via Yesu, via sapuila komanu “ovilinga vinene via Suku,” kuenje, valua pokati kavo, va tava kesapulo liaco. Omo okuti Yesu o kasi kilu kondio ya Isiaye, o lete ndomo onduko yaye yi kasi oku kuata elomboloko lia velapo, osimbu omanu va lua va kasi oku likekembela akandu avo, kuenda oku kolela kokuaye okuti, eye Yehova a nõla oco omanu va popeliwe.—Ovil. 2:5, 11, 37-41.

‘OCISEMBI COKU YOVOLA VA LUA’

7. Ovolandu a pita keteke liocipito co Pendekoste cunyamo wa 33 K.K., a eca uvangi upi?

7 Ovolandu a pita keteke liocipito co Pendekoste cunyamo wa 33 K.K., a eca uvangi wokuti, Yehova wa tava kocisembi ca lipua ca Yesu, oco ci tuvike akandu.  (Va Hev. 9:11, 12, 24) Ndomo Yesu a ci popia, keyilile ‘oku vumbiwa, te oku vumba, loku eca omuenyo waye ndocisembi coku yovola va lua.’ (Mat. 20:28) Ocisembi ca Yesu, ka ci kuatisa lika va Yudea “va lua” va likekembela. Pole, onjongole ya Yehova, yoku “yovola omanu vosi,” momo, wa eca omuenyo wa Yesu oco ‘ope akandu voluali.’ 1 Tim. 2:4-6; Yoa. 1:29.

8. Olondonge viatete via Yesu, via tẽla ndati oku amamako oku kunda catiamẽla kokuaye, kuenda via ci linga lekuatiso lie?

8 Anga hẽ olondonge viatete via Yesu, via sukilile oku kuata utõi oco vi ece uvangi watiamẽla kokuaye? Ndaño via sukilile oku kuata utõi, pole, ka via ci lingile longusu yavo muẽle. Espiritu sandu lia Yehova olio lia va vetiya oku kuata ombili yoku amamako oku kunda. (Tanga Ovilinga 5:30-32.) Eci pa pita 27 kanyamo tunde kocipito co Pendekoste kunyamo wa 33 K.K., “ondaka yocili haiyo ondaka yiwa,” ya kundiwila ku va Yudea, kuenda ku Vakualofeka “vosi voluali.”—Va Kol. 1:5, 23.

9. Nye ca pita lekongelo Liakristão vocili, ndomo ca popiwile?

9 Ocili okuti, ekongelo Liakristão vocili vokuenda kuotembo lia fetika oku yapuisiwa. (Ovil. 20:29, 30; 2 Pet. 2:2, 3; Yuda 3, 4) Ndomo Yesu a ci popele, unanguluke wa vetiyiwa ‘londingaĩvi’ Eliapu, weya oku livokiya, kuenje wa fetika oku tateka alongiso Akristão vocili, toke “kesulilo lioluali.” (Mat. 13:37-43) Pole, Yehova wa likuminyile oku vialeka Yesu komangu Yusoma, oco a viale oluali. Ulandu waco wa tẽlisiwa kosãi ya Mbalavipembe kunyamo wa 1914 okuti, oco ‘oloneke via sulako’ violuali lulo lua Satana via fetika.—2 Tim. 3:1.

10. (a) Otembo yipi yi kuete esilivilo Akristão olombuavekua vo koloneke vilo va sapuila komanu? (b) Nye ca pita kosãi ya Mbalavipembe yunyamo wo 1914, kuenda ca limbukiwa ndati?

10 Akristão olombuavekua vo koloneke vilo, va popele ale okuti, Osãi ya Mbalavipembe yunyamo wo 1914, yi kuete elomboloko lia velapo. Ovo va tiamisila ulandu waco, vocitumasuku ca Daniele, catiamẽla kuti unene okuti, ndaño wa tetiwa, pole, wa laikele oku yova vali noke ‘yolotembo epanduvali.’ (Dan. 4:16) Yesu wa tukula otembo yaco hati, ‘oloneke via vakualofeka,’ vocitumasuku caye catiamẽla koku tukuluka kuaye kovaso yoloneke, kuenda ‘esulilo lioluali lulo.’ Tunde kunyamo wo 1914, “ondimbukiso yokutukuluka” kua Kristu okuti wa vialekiwa komangu yusoma, ya limbukiwa lomanu  vosi. (Mat. 24:3, 7, 14; Luka 21:24) Omo liaco, ‘vovilinga vinene via Suku,’ mua kongela ovina Yehova a linga poku tumbika Yesu komangu Yusoma, oco a viale omanu.

11, 12. (a) Nye Osoma yokaliye ya palo posi ya fetika oku linga noke liuyaki wa pita kunyamo wo 1919? (b) Nye ceya oku limbukiwa oku upisa kunyamo wo 1930? (Tala elitalatu kefetikilo liocipama cilo.)

11 Omo okuti Yesu Kristu eye Osoma yokaliye ya palo posi, noke, wa fetika oku yovola olombuavekua ‘ko Bavulono Yinene.’ (Esit. 18:2, 4) Kunyamo wo 1919 noke Liuyaki Watete wa pita Voluali luosi, Akristão olombuavekua va kuata epuluvi lioku kundila voluali luosi esapulo liatiamẽla konjila Suku a kuama yoku yovola omanu, kuenda olondaka viwa viatiamẽla Kusoma wa tumbikiwa. Omo liaco, omanu valua va panga onepa Kakristão olombuavekua va kongeliwa, oco va ka viale la Kristu kilu.

12 Oku upisa kunyamo wo 1930, omanu va kuata elomboloko liokuti, Kristu wa fetika oku kongela omanu valua va panga onepa ‘kolomeme vikuavo’ va tunda kolofeka viosi okuti, “owiñi wakahandangala.” Lekuatiso Liakristão olombuavekua, owiñi wakahandangala u kuãi ongangu ya Yesu yoku eca esapulo liokuti, epopelo liavo li tunda ku Suku, kuenda ku Kristu. Omo okuti va kasi loku pandikisa kupange woku kunda, kuenda vamamako oku lekisa ekolelo kocisembi ca Kristu, va ka kuata esumũlũho lioku popeliwa ‘kohali ya piãla,’ yina yi ka sulila koku nyõliwa kuoluali lulo lua Satana.—Yoa. 10:16; Esit. 7:9, 10, 14.

‘KUATA UTÕI WOKU KUNDA OLONDAKA VIWA’

13. Omo okuti Tulombangi Via Yehova, nye tu sukila oku linga, kuenda tu pondola oku kuata ndati onima?

13 Tu sukila oku amamako oku kapako esumũlũho lietu lioku eca Uvangi watiamẽla ‘kovilinga vinene’ Yehova Suku a siata oku linga, kuenda ovina a likuminya oku tẽlisa kovaso yoloneke. Pole, pamue ka ca lelukile oku eca uvangi waco. Vamanji valua va siata oku kundila vovikanjo vina okuti, omanu vaco ka va lekisa onjongole, pamue va tema, ale va va lambalala. Pole, tu sukila oku kuama ongangu yupostolo Paulu, kuenda yakamba vaye. Paulu wa popia hati: “Tua kuata utõi vu Suku yetu oku u sapuili ondaka yiwa ya Suku yetu pokati kuyaki wa lua.” (1 Va Tes. 2:2) Omo liaco, ka tu ka liwekipo oku linga upange waco. Pole, tu sukila oku amamako oku lekisa ovituwa vi likuata lelitumbiko lietu, toke eci oluali lulo lua vialiwa la Satana lu nyõliwa. (Isa. 6:11) Ka tu pondola oku linga ovina viaco longusu yetu muẽle. Pole, tu kuãi ongangu Yakristão vatete, poku likutilila oco Yehova lekuatiso liespiritu liaye a tu ĩhe “unene wa piãla.”—Tanga 2 Va Korindo 4:1, 7; Luka 11:13.

14, 15. (a) Akristão vo kocita catete K.K., va tendiwile ndati, kuenda nye upostolo Petulu a popia catiamẽla kokuavo? (b) Nye tu sukila oku linga, eci tu lambalaliwa omo lioku kala Olombangi Via Yehova?

 14 Koloneke vilo, kuli omanu valua va siata oku popia vati Akristão vocili, pole, ‘va likala Suku lovilinga viavo. Omanu vaco vãvi enene, va sina sina, kuenje kovilinga viosi viwa ka va silivila, ndaño naito.’ (Tito 1:16) Tu sukila oku ivaluka okuti, kocita catete, Akristão vocili va suvukiwile lomanu valua va kala kotembo yavo. Eli olio esunga lieci upostolo Petulu a sonehela ndoco: “Nda vo wimbuili onduko ya Kristu . . . wa sumũlũhi, momo nda oco, . . . Espiritu lia Suku, li kasi lene.”—1 Pet. 4:14.

15 Anga hẽ olondaka evi vi tiamisiwilavo Kolombangi Via Yehova vio koloneke vilo? Ocili okuti, vi tiamisiwilavo kokuetu, momo, tua siata oku eca uvangi watiamẽla kuviali wa Yesu. Oku suvukiwa omo lioku tukuiwa londuko ya Yehova, ku sokisiwa loku ‘imbuiwa vonduko ya Yesu Kristu,’ wa sapuila kovanyãli vaye hati: “Ndeyilila vonduko ya Tate, kuenje ka wa nambuili.” (Yoa. 5:43) Omo liaco, nda eteke limue wa lambalaliwa kupange woku kunda, kuata utõi. Nda vu talisiwa ohali ci lekisa okuti, vu taviwa la Suku, kuenda espiritu ‘liaye li kasi lene.’

16, 17. (a) Nye afendeli va Yehova va yevite kovitima omo liupange woku kunda u kasi oku lingiwa voluali luosi? (b) Nye wa nõlapo oku linga?

16 Ndaño lovitangi viaco, pole ivaluka okuti, kolonepa vialua violuali, omanu valua va kasi oku iñila vocisoko ca Yehova. Vovikanjo vina okuti mua siata oku kundiwila olonjanja vialua, citava okuti tu sangamo omanu va lekisa onjongole yoku tu yevelela okuti, tu pondola oku va kundila esapulo li tuala kepopelo. Omo liaco, tu sukila oku lekisa ombili koku nyula omanu va lekisa onjongole, oco tu va longise Embimbiliya okuti, va kuata ukũlĩhĩso u va vetiya oku litumbika ku Suku, kuenda oku papatisiwa. Nda wa ci linga, o kuama ongangu ya manji Sarie wo kofeka yo Afrika do Sul okuti, wa siata oku lekisa ombili kupange woku kunda vokuenda kueci ci pitahãla 60 kanyamo. Eye wa popia hati: “Ngeca olopandu omo okuti, lekuatiso liocilumba cocisembi ca Yesu Kristu, ndi pondola oku kuata ukamba la Yehova, Ombiali yoluali luosi, kuenda nda sanjukila oku kundila omanu oco va kũlĩhe onduko yaye yi kola.” Eye kumue lulume waye Martinus, va siata oku kuatisa omanu valua oku kongelamo omãla vavo vatatu, oco va linge afendeli va Yehova. Manji Sarie wa amisako lulandu waye hati: “Ka kuli upange ukuavo u nena esanju lialua, momo, lekuatiso liespiritu sandu, Yehova o tu ĩha ongusu tu sukila oco tu amameko oku linga upange u yovola omanu.”

17 Cikale okuti, Tuakristão va papatisiwa, ale tu kasi oku likolisilako oco tu papatisiwe, vosi yetu tu kuete esunga lioku eca olopandu omo liesumũlũho tu kuete lioku kala vekongelo Liolombangi Via Yehova voluali luosi. Omo liaco, amamako oku kundila omanu osimbu o likolisilako oku liyelisa kovina violuali lulo lua vĩha lua vialiwa la Satana. Nda wa ci linga, o ka eca esivayo ku Isietu ukuacisola wo kilu, okuti, tu kuete esumũlũho lioku tukuiwa londuko yaye yi kola.

1, 2. (a) Helie ombangi ya koleliwa ya Yehova? (b) Onduko ya Yesu yi lomboloka nye? Ovituwa vipi Omõla wa Suku a lekisa vi litava londuko yaco?

3. Nye ca pita keteke liatatu noke yolofa via Yesu?

4. Nye ca pita eci Yesu a molẽha kolondonge noke liepinduko liaye? Ocikele cipi a lombolola okuti oco olondonge via sukilile oku tẽlisa?

5, 6. (a) Momo lie Yesu a popela hati: “Vu linga olombangi viange”? (b) Esokiyo lipi Yehova a linga liatiamẽla kocipango caye, oco olondonge via Yesu vi ece esapulo liaco?

7. Ovolandu a pita keteke liocipito co Pendekoste cunyamo wa 33 K.K., a eca uvangi upi?

8. Olondonge viatete via Yesu, via tẽla ndati oku amamako oku kunda catiamẽla kokuaye, kuenda via ci linga lekuatiso lie?

9. Nye ca pita lekongelo Liakristão vocili, ndomo ca popiwile?

10. (a) Otembo yipi yi kuete esilivilo Akristão olombuavekua vo koloneke vilo va sapuila komanu? (b) Nye ca pita kosãi ya Mbalavipembe yunyamo wo 1914, kuenda ca limbukiwa ndati?

11, 12. (a) Nye Osoma yokaliye ya palo posi ya fetika oku linga noke liuyaki wa pita kunyamo wo 1919? (b) Nye ceya oku limbukiwa oku upisa kunyamo wo 1930? (Tala elitalatu kefetikilo liocipama cilo.)

13. Omo okuti Tulombangi Via Yehova, nye tu sukila oku linga, kuenda tu pondola oku kuata ndati onima?

14, 15. (a) Akristão vo kocita catete K.K., va tendiwile ndati, kuenda nye upostolo Petulu a popia catiamẽla kokuavo? (b) Nye tu sukila oku linga, eci tu lambalaliwa omo lioku kala Olombangi Via Yehova?

16, 17. (a) Nye afendeli va Yehova va yevite kovitima omo liupange woku kunda u kasi oku lingiwa voluali luosi? (b) Nye wa nõlapo oku linga?