Skip to content

Skip to table of contents

Olombangi Via Yehova

Select language Umbundu

‘Okulia Kuange Oku Linga Ocipango ca Suku’

‘Okulia Kuange Oku Linga Ocipango ca Suku’

Nye ca siata oku ku nenela esanju? Anga hẽ ovina vimue viatiamela komuenyo ndeci, olohuela, oku kuata epata ale oku sola ekamba limue? O pondola oku kuata esanju poku lila kumosi lakamba vove. Omo okuti tuafendeli va Yehova, ka tu sukila hẽ oku linga ocipango ca Suku poku lilongisa ondaka yaye loku kunda olondaka viwa?

Vocisungo cimue Soma Daviti wo ko Isareli a imbila ululiki wetu, wa popia hati: ‘Oku linga ocipango cove, a Suku yange, oco ndi sanjukila. Ovihandeleko viove vi kasi vutima wange.’ (Osa. 40:8) Ndaño okuti Soma Daviti wa liyakele lelambalalo kuenda ovitangi vikuavo, pole, wa likolisilako oku linga ocipango ca Yehova. Ocili okuti, Daviti hayeko lika ufendeli wa Yehova Suku, wa kuata esanju lioku u vumba.

Poku kapako olondaka vi sangiwa kelivulu Liosamo 40:8, viatiamẽla ku Mesiya ale Kristu, upostolo Paulu wa soneha ndoco: ‘Eci Yesu eya kilu lieve, wa popia hati: Ovilumba loviali kua vi yonguile, puãi wa ndi angiliyila etimba. Ovilumba vioku yoka levi viakandu kua vi sanjukilile. Oco nda linga siti: ‘A Suku, ndeya oku linga ocipango cove, ndeci ca ndi sonehiwila ame vociña celivulu.’—Va Hev. 10:5-7.

Eci Yesu a kala palo posi, wa sanjukilile oku mola ovina via lulikiwa, oku kala lakamba kuenda oku lia kumue lavo. (Mat. 6:26-29; Yoa. 2:1, 2; 12:1, 2) Yesu wa velisilepo oku linga ocipango ca Isiaye o kasi kilu. Omo liaco, wa popia hati: “Sia tundilile kilu oku linga ocipango cange, te ocipango cu wa numa.” (Yoa. 4:34; 6:38) Olondonge viaye, via lilongisa esilivilo lioku kuata esanju liocili. Ovio via kuata esanju poku lieca olumue kupange woku kundila omanu esapulo Liusoma.—Luka 10:1, 8, 9, 17.

‘KUENDI KA TAVISI OMANU OCO VA LINGE OLONDONGE’

Yesu wa handeleka olondonge viaye hati: ‘kuendi, ka tavisi omanu vo kolofeka viosi oco va linge olondonge. Va papatisili vonduko ya Tate, leyi Yomõla, kuenda yespiritu sandu. Va longisi oku linga ovina viosi ndo kundiki. Kuenje, ame ñasi lene kumue oloneke viosi toke kesulilo lioluali.’ (Mat. 28:19, 20) Voku tẽlisa ocikundi caco, mua kongela oku kundila omanu povitumãlo posi va sangiwa, oku nyula vana va lekisa onjongole kuenda oku longisa Embimbiliya komanu vosi. Oku linga upange waco, ci nena esanju.

Ocisola ci tu vetiya oku amamako oku kunda ndaño omanu vamue tu sanga ka va tava oku tu yevelela

Cikale okuti omanu va lekisa onjongole ale sio, ocituwa ciwa tu lekisa ci kuete esilivilo, momo ci tu kuatisa oku kuata esanju kupange woku kunda. Momo lie tu sukilila oku amamako oku kunda olondaka viwa, ndaño pamue tu sanga omanu vamue ka va lekisa onjongole? Momo, oku kunda Usoma loku longisa omanu oco va linge olondonge, ci lekisa okuti, tu kuetele ocisola Suku kuenda omanu vosi. Ocili okuti, omuenyo wetu lowu womanu vakuavo u kasi kohele. (Esek. 3:17-21; 1 Tim. 4:16) Omo liaco, tu konomuisi atosi amue a siata oku kuatisa vamanji valua oku amamako oku lekisa ombili kupange woku kundila vovikanjo vina va siata oku liyaka lovitangi.

KUNDA KAPULUVI OSI

Tu pondola oku kuata onima yiwa kupange woku kunda poku linga apulilo a sunguluka. Eteke limue komẽle, manji umue o tukuiwa hati, Amalia, wa mola ulume umue wa kala oku tanga ukanda wasapulo vocumbo cimue colonelẽho. Noke, manji wa amela ponele yaye, kuenje, wo pula nda wa kala oku tanga esapulo limue liwa. Eci ulume waco o tambulula hati, ka kasi oku tanga esapulo limue liwa, noke manji wa popia laye hati: “Nda ku nenela olondaka viwa viatiamẽla Kusoma wa Suku.” Olondaka evi, via vetiya ulume waco oku lekisa onjongole, kuenje wa tava oku lilongisa Embimbiliya. Noke manji Amalia, wa fetikavo oku longisa Embimbiliya komanu vatatu va kala vocumbo caco.

Manji umue o tukuiwa hati, Janice, wa enda oku kundila kupange waye ndocikanjo caye. Eci ulume umue ondavululi kuenda ukãi ukuavo a talavaya laye kupange va lekisa onjongole kocipama cimue ci sangiwa Vutala Wondavululi, manji Janice wa linga esokiyo lioku eca kokuavo olorevista olosãi viosi. Eye wa endavo oku eca komunu ukuavo a talavaya laye, okuti wa vetiyiwavo lovina va sapela viatiamẽla Kutala Wondavululi kuenda ko Despertai!. Ovina viaco, via vetiyavo ukãi umue a talavaya laye oku pingavo olorevista. Manji Janice wa popia hati: “Esumũlũho liaco lia tunda ku Yehova!” Omo liaco, olosãi viosi wa enda oku eca olorevista kueci ci soka 11 komanu a talavaya lavo.

LEKISA ESUNGULUKO

Manji umue ukuakunyula akongelo, wa popia hati, nda akundi va kasi kupange woku kundila konjo lanjo, ka ca sungulukile oku malusula ombangulo lomunu va sanga poku u sapuila okuti, tu yongola oku tiuka eteke likuavo. Pole, va sukila oku pula komunu va sanga ndoco: “O yongola hẽ okuti ndu ku lekisa ndomo elilongiso Liembimbiliya li lingiwa?” Ale: “Eteke lipi, o yongola okuti ndi tiuka, oco tu amameko lombangulo yetu?” Manji ukuakunyula akongelo wa lombolola hati, oku kuama onjila yaco, ca kuatisa vamanji vo vekongelo limue a kala, kuenje va fetika oku longisa Embimbiliya kueci ci soka 44 komanu vokuenda kuosemana yimosi.

Oku nyula lonjanga omanu tua kundila ceca onima yiwa. Momo lie? Momo, nda tua ci linga, ci lekisa okuti tu yongola oku kuatisa omanu vakuavitima via sunguluka oku kuata elomboloko Liembimbiliya. Eci ukãi umue a pulisiwa esunga lieci a tavela oku lilongisa Embimbiliya Lolombangi Via Yehova, eye wa tambulula hati: “Nda fetika oku lilongisa Embimbiliya momo ovo va lekisa onjongole kokuange, kuenda ocisola.”

O pondola oku pula komunu wa sanga ndoco: “O yongola hẽ okuti ndu ku lekisa ndomo elilongiso Liembimbiliya li lingiwa?”

Manji Madaí noke yoku pindisiwa kosikola Yakundi Votembo Yosi, wa fetika oku longisa Embimbiliya kueci ci soka 15 komanu, kuenda wa kuatisa eci ci soka 5 komanu oku kala akundi. Omanu vana eye a kala oku longisa Embimbiliya, va fetika oku enda enda kolohongele olonjanja viosi. Nye ca kuatisa manji Madaí oku fetika oku longisa Embimbiliya komanu valua? Osikola yaco yo kuatisa oku limbuka esilivilo lioku amamako oku nyula omanu vana va lekisa onjongole. Manji ukuavo okuti wa kuatisavo omanu valua oku lilongisa Embimbiliya, wa popia hati: “Nda limbuka okuti, oku amamako oku nyula omanu va lekisa onjongole, oco ocina ca velapo ci va kuatisa oku kũlĩha Yehova.”

Oku nyula lonjanga omanu tua kundila, ci lekisa okuti, tua kapako vana va yongola oku kuata elomboloko Liembimbiliya

Tu sukila oku likolisilako oku nyula omanu tua kundila, kuenda oku va longisa Embimbiliya. Pole, nda tua ci linga tu kuata onima yiwa. Nda tua litumbika kupange woku kunda, tu kuatisa omanu “oku kuata ukũlĩhĩso wocili,” u pondola oku va popela. (1 Tim. 2:3, 4) Poku ci linga, ci tu kuatisa oku kuata esanju lialua.