Skip to content

Skip to table of contents

Olombangi Via Yehova

Select language Umbundu

Tu “Tambulula Ndati Omunu Lomunu”?

Tu “Tambulula Ndati Omunu Lomunu”?

“Upopi wene u kale lumbombe, . . . okuti vu kumbulula ciwa omunu lomunu oku puli cimue.”—VA KOL. 4:6.

1, 2. (a) Tukula ulandu umue u lekisa esilivilo lioku linga apulilo a sunguluka. (Tala elitalatu kefetikilo liocipama cilo.) (b) Momo lie ka tu sukilila oku kuata usumba, poku sapela lomanu ovina viatiamẽla kalongiso ka a lelukile oku a lombolola?

KOSIMBU, manji umue ukãi okuti ulume waye ka kalele ombangi ya Yehova, wa sapela laye catiamẽla Kembimbiliya. Omo okuti wa tiamẽlele ketavo Liakristão vesanda, osimbu va kala oku sapela, ulume waye wo sapuila hati, wa tavele kelongiso lia Suku umosi Muvatatu. Omo liaco, ukãi waye wa limbuka okuti, ulume ka kuatele elomboloko liatiamẽla kelongiso liaco. Noke, ukãi wo pula lutate ndoco: “O tava hẽ okuti Suku eye Suku, Yesu eye Suku,kuenda espiritu sandu Suku, okuti ka kuli olosuku vitatu, pole, kuli lika Suku umosi?” Kuenje ulume wa popia hati: “Sio, si tava kondaka eyi!” Noke va amamako loku sapela catiamẽla ku Suku.

2 Ulandu owu, u tu longisa okuti, tu sukila oku linga lutate apulilo a sunguluka. U tu longisavo okuti, ka tu sukila oku kuata usumba poku sapela lomanu ovina vimue ndeci: Elongiso lia Suku umosi Muvatatu, ondalu yifelu ka yimi, kuenda eci catiamẽla Kululiki wetu. Nda tua kolela ku Yehova kuenda kepindiso a siata oku tu ĩha, tu pondola oku longisa lonjila yimue yi vetiya ovitima viomanu va tu yevelela. (Va Kol. 4:6) Vocipama cilo, tu konomuisa ndomo tu pondola oku longisa lonjila yimue ya sunguluka ndeci: (1) Poku linga apulilo a kuatisa omunu oku situlula ovisimĩlo viaye, (2) Esunga lieci Embimbiliya li popia, kuenda (3) oku longisa lekuatiso liovindekaise.

LINGA APULILO A VETIYA OMANU OKU SITULULA OVISIMĨLO VIAVO

3, 4. Momo lie ci kuetele esilivilo oku linga apulilo oco a tu kuatise oku limbuka ovina omunu a tava? Tukula ulandu umue.

3 Oku linga apulilo a sunguluka, ci tu kuatisa oku limbuka ovina omunu lomunu a tava. Momo lie ci kuetele esilivilo? Elivulu Liolosapo 18:13 li popia hati: ‘Nda umue o kumbulula osimbu ka yevelile ciwa, o linga eveke, kuenje, cu kutisa osõi.’ Osimbu ka tua sapelele lomunu etosi limue Liembimbiliya, tu sukila oku kũlĩhĩsa ovina a tava. Nda ka tua ci lingile, tu pesila otembo yetu koku sapela ovina okuti, omunu waco ka vi kolela!—Va Kor. 9:26.

4 Sokolola ndeci okuti, tu kasi oku sapela lomunu umue catiamẽla kelongiso liondalu yifelu ka yimi. Ocili okuti, omanu vamue ka va tava kelongiso liokuti, kuli ocitumãlo cimue condalu yifelu ka yimi. Omanu vakuavo va siata oku popia vati, vana va kapiwa vondalu yifelu, ka va kuete ukamba la Suku. Pole, tu pondola oku popia ndoco: “Omo okuti omanu va kuete ovisimĩlo via litepa viatiamẽla kelongiso liondalu yifelu ka yimi, ci tava hẽ okuti ndu ku pula cimue?” Noke lioku yevelela etambululo liomunu waco, tu pondola oku u kuatisa oku kuata elomboloko lieci Embimbiliya li popia catiamẽla kondaka yaco.

5. Oku linga apulilo a sunguluka ci tu kuatisa ndati oku limbuka esunga lieci omunu a tavela kovina a linga?

5 Oku linga apulilo lutate, ci tu kuatisa oku limbuka esunga lieci omunu a tavela kovina a linga. Nda kupange woku kunda tua sanga omunu umue okuti, ka tava ku Suku, nye tu sukila oku linga? Pamue ci leluka oku sima okuti, omunu waco wa tiamisila utima waye kelongiso liokuti, ovina via tukuluka ño. (Osa. 10:4) Pole, omanu vamue va pua ekolelo ku Suku omo liohali va liyaka layo, ale ovina vĩvi va siata oku pita lavio. Pamue va sima okuti, Suku ukuacisola, ka ecelela okuti, omanu va tala ohali. Nda omunu tua sanga ka tava okuti kuli Suku, tu pondola oku u pula ndoco: “Anga hẽ o kuete ovisimĩlo viaco tunde kosimbu?” Nda wa tambulula hati, sio, tu sukila oku u pula eci co vetiya oku kuata atatahãi nda kuli Suku ale sio. Etambululo liaye li tu kuatisa oku sandiliya onjila yoku u kuatisa.—Tanga Olosapo 20:5.

6. Nye tu sukila oku linga noke yoku linga epulilo komunu umue?

6 Noke yoku linga epulilo komunu umue, tu sukila oku yevelela lutate etambululo liaye, kuenda oku kũlĩhĩsa ovisimĩlo viaye. Citava okuti omunu waco tu u sapuila hati, ovilunga via siata oku pita voluali, ovio vio vetiya oku kuata atatahãi atiamẽla ku Suku. Osimbu ka tua lekisile kokuaye okuti kuli Suku, tu sukila oku kuata ukamba laye, loku u lomboluila okuti, ca sunguluka oku kũlĩha esunga lieci tu talela ohali. (Hav. 1:2, 3) Nda tua lekisa epandi lohenda komunu waco, cu vetiya oku kuata onjongole yoku lilongisa ovina vikuavo viatiamẽla kondaka yaco. *

OKU KONOMUISA ECI EMBIMBILIYA LI POPIA

Ovolandu api a pondola oku tu kuatisa oku kuata onima yiwa kupange woku kunda? (Tala ocinimbu 7)

7. Nye tu sukila oku linga oco tu kuate onima kupange woku kunda?

7 Cilo, tu konomuisa eci Embimbiliya li popia. Embimbiliya olio lia velapo kupange woku kunda. Olio li tu kuatisa oku ‘linga ovopange osi awa.’ (2 Tim. 3:16, 17) Oco tu kuate onima kupange woku kunda, ka tu sukila oku tanga ovipama vialua Viembimbiliya. Pole, tu sukila oku kũlĩha ndomo tu lomboluila komunu eci Embimbiliya li popia, kuenda ndomo tu u lomboluila ovinimbu tua tanga laye. (Tanga Ovilinga 17:2, 3.) Oco tu kũlĩhĩse ondaka yaco, tu konomuisi ovolandu atatu a kuãimo.

8, 9. (a) Onjila yipi tu sukila oku kuama poku sapela lomunu umue o tava okuti, Yesu wa lisoka la Suku? (b) Wa siata ndati oku kuatisa omanu poku sapela lavo catiamẽla kondaka eyi?

8 Catete: Citava okuti kupange woku kunda tu sanga omunu umue o popia hati, Yesu wa lisoka la Suku. Ocinimbu cipi Cembimbiliya tu sukila oku tangela omunu oco tu u lomboluile ciwa ondaka yaco? Tu sukila oku pinga komunu waco oco a tange elivulu lia Yoano 6:38 li popia ndoco: “Sia tundilile kilu oku linga ocipango cange, te ocipango cu wa numa.” Eci omunu a mala oku tanga ocinimbu eci, tu pondola oku u pula ndoco: “Nda Yesu eye Suku, helie wo tuma oku iya palo posi? Anga hẽ Omunu waco wo tuma ka velelepo okuti Yesu o sule? Ocili okuti omunu o tuma umue, wa velapo una o tumiwa.”

9 Tu pondolavo oku tanga kelivulu lia Va Filipoi 2:9, kuna upostolo Paulu a lombolola eci Suku a linga noke yolofa via Yesu, kuenda epinduko liaye. Ovinimbu viaco Viembimbiliya vi popia ndoco: ‘Suku wa kemainya Yesu, kuenje, wo kapa pomangu ya velapo, kuenda wo wĩha onduko ya velapo okuti vikuavo vi sule.’ Oco tu lomboluile komunu eci Embimbiliya li popia, tu sukila oku u pulisa ndoco: “Nda Yesu osimbu ka file wa lisokele la Suku, kuenje, weya oku u kapa pomangu ya velapo, nda ka ci lekisa hẽ okuti, Yesu wa velapo Suku? Citava ndati okuti omunu umue o velapo Suku?” Nda omunu waco wa sumbila Ondaka ya Suku, ovina tu sapela laye viu vetiya oku amamako oku konomuisa ondaka yaco.—Ovil. 17:11.

10. (a) Tu pondola oku sapela ndati lomunu o tava kelongiso lioku imbiwa vondalu yifelu? (b) Wa siata oku kuatisa ndati omanu oku kuata elomboloko liatiamẽla kelongiso lioku imbiwa vondalu yifelu?

10 Cavali: Omunu tu sapela laye, ka tava okuti, omanu vãvi ka va ka imbiwa vondalu yifelu otembo ka yi pui. Eye o tava kondaka yaco, momo o yongola okuti, omanu vãvi, va kangisiwa vondalu yifelu omo liovina vĩvi va linga eci va kala komuenyo. Onjila yipi tu sukila oku kuama oco tu sapele lomunu o kuete ovisimĩlo viaco? Catete, tu sukila oku u lomboluila okuti, olondingaĩvi vi ka nyõliwa. (2 Va Tes. 1:9) Noke, tu pondolavo oku pinga kokuaye oco a tange kelivulu Liefetikilo 2:16, 17, ku lekisa okuti, ekangiso liekandu olofa. Tu sukilavo oku u sapuila okuti, omo lia Adama wa lueya, omanu vosi va piñala ekandu. (Va Rom. 5:12) Pole, Suku ka popele lacimue catiamẽla koku kangisa omanu vondalu yifelu. Noke, tu podola oku u pula ndoco: “Nda Adama la Heva va kalele kohele yoku kangisiwa vondalu yifelu otembo ka yi pui, nda ka ca sungulukile hẽ oku va lungula catiamẽla kocitangi caco?” Noke, tu pondola oku tangela omunu waco kelivulu Liefetikilo 3:19, kuna Suku a sapuila Adama la Heva ovina via laikele oku pita lavo noke yoku lueya. Pole, ka va sapuilile lacimue catiamẽla kondalu yifelu. Momo, wa sapuila ku Adama hati, wa laikele oku tiukila koneketela. Omo liaco, tu sukila oku pula omunu tu kasi oku sapela laye ndoco: “Anga hẽ nda ca sunguluka oku sapuila ku Adama okuti, wa laikele oku tiukila koneketela, osimbu okuti, o ka imbiwa vondalu yifelu?” Apulilo a lingiwa ndeti, a pondola oku vetiya omunu oku sapela catiamẽla kondaka yaco.

11. (a) Onjila yipi tu sukila oku kuama poku kuatisa omanu va tava kelongiso liokuti, vana vawa va lavoka oku ka kala kilu? (b) Wa siata oku kuatisa ndati omanu poku va lomboluila catiamẽla koku ka kala kilu?

11 Catatu: Kupange woku kunda tua siata oku sanga valua va tava kelongiso liokuti, omanu vosi vawa va lavoka oku ka kala kilu. Elongiso liaco li pondola oku nyõla ovisimĩlo viomunu tua sanga viatiamẽla koku kuata elomboloko Liembimbiliya. Sokolola ndeci okuti, tu kasi oku konomuisa lomunu waco elivulu Liesituluilo 21:4. (Tanga.) Pamue omunu waco o popia hati, asumũlũho a tukuiwa kocinimbu eci, tu ka a tambuila kilu. Tu pondola oku kuatisa ndati omunu waco? Tu yuvuli oku tanga ovinimbu vikuavo Viembimbiliya viatiamẽla kondaka yaco, pole, tu u lomboluila lika etosi liocinimbu caco ci lekisa okuti, ‘oku fa ka ku ka kalako vali.’ Tu pondolavo oku pula komunu waco nda o tava okuti, oco ocina cimue ka ci ka kaleko vali, tete ci sukila oku kalako. Pamue omunu waco o tambulula hati, ocili. Noke, tu pondola oku u sapuila okuti, kilu lalimue eteke kua kalele olofa, pole, omanu va fila lika palo posi. Omo liaco, elivulu Liesituluilo 21:4, li tukula asumũlũho omanu va ka tambula palo posi.—Osa. 37:29.

LONGISA LEKUATISO LIOVINDEKAISE

12. Momo lie Yesu a lingila ovindekaise poku longisa omanu?

12 Ndaño okuti Yesu wa linga apulilo kupange woku kunda, pole, wa enda oku lingavo ovindekaise. (Tanga Mateo 13:34, 35.) Ovindekaise Yesu a linga, via kuatisa olonjeveleli viaye oku nõla nda vi yongola oku vumba Yehova ale sio. (Mat. 13:10-15) Ovindekaise Yesu a linga, via kuatisa omanu oku sokolola ovina a va longisa, kuenda va sanjukilile oku u yevelela. Tu pondola oku longisa ndati omanu lekuatiso liovindekaise?

13. Ocindekaise cipi tu pondola oku linga oco tu kuatise omanu oku limbuka okuti, Suku wa velapo Yesu?

13 Oku linga ovindekaise via leluka, ci kuete esilivilo. Eci tu lomboluila komunu umue okuti, Suku wa velapo Yesu, citava okuti tu linga ocindekaise ci kuãimo ndeci: Tu pondola oku lekisa okuti, Suku la Yesu, va tukula ovina viatiamẽla kepata poku lombolola ukamba u kasi pokati kavo. Suku wa tukula Yesu hati, Omõlaye, kuenda Yesu wa tukula Suku hati, Isiaye. (Luka 3:21, 22; Yoa. 14:28) Noke, tu pondola oku pula komunu tua sanga ndoco: “Nda o yongola oku ndi lomboluila okuti omanu vavali vamuamue, ukamba upi wo vepata o tukula vocindekaise caco?” Citava okuti omunu o tukula ukamba u kasi pokati komunu la manjaye, ale kolonjamba. Nda omunu wa ci linga, tu pondola oku popia okuti, esokiso lia lingiwa ndeti, lia sunguluka. Noke tu pondola oku pula komunu waco ndoco: “Nda ove lame tua tẽla oku sokolola ocindekaise ndeci ca tukuiwa ndeti, anga hẽ Yesu Ulongisi wa Velapo nda ka sokoluilevo ocindekaise caco? Pole, Yesu wa tukula Suku hati, Isiaye. Omo liaco, Yesu wa lekisa okuti, Suku eye wa velapo, kuenda o kuete unene walua okuti, eye ci sule.”

14. Ocindekaise cipi ci lekisa okuti, Suku ka tumi Satana oco a kangise omanu vondalu yifelu?

14 Konomuisa ulandu ukuavo. Omanu vamue va tava kelongiso liokuti, Satana eye “usongui” wondalu yifelu. Ocindekaise tu linga, ci pondola oku kuatisa isia umue oku limbuka okuti, ka ca sungulukile oku sima okuti, Suku eye wa siata oku tuma Eliapu oco li kangise omanu vondalu yifelu. Omo liaco, tu pondola oku pulisa konjali ndoco: “Nye o sukila oku linga, nda wa limbuka okuti ­omõla wove wa sina, kuenda wa siata oku linga ovina ka via sungulukile?” Citava okuti onjali yi tambulula hati, yi sukila oku lungula omõla waye, loku u kuatisa oco a siepo ovituwa ka via sungulukile. (Olosap. 22:15) Noke, tu pulisa vali onjali yaco eci yi sukila oku linga, nda ya limbuka okuti, omõla ka tava oku u kuatisa. Olonjali vialua vi pondola oku nõlapo oku kangisa omõla waco. Noke, tu pondola oku pula vali konjali yaco ndoco: “Nye o sukila oku linga, nda wa limbuka omunu ongangala o kasi oku yapuisa omõla wove oco a lekise esino?” Ocili okuti, onjali yi kuatela onyeño omunu waco. Pole, oco onjali yi kuate elomboloko liocindekaise caco, tu sukila oku yi pulisa ndoco: “Omo okuti wa kũlĩha omunu wa yapuisa omõla wove, o pondola hẽ oku pinga komunu waco oco a kangise omõla wove?” Ocili okuti onjali yi pondola oku tambulula hati, sio. Cimuamue haico Suku a linga okuti, ka ecelela okuti, Satana o kangisa omanu vana a yapuisa oco va linge ovina ka via sungulukile!

LEKISA ESUNGULUKO

15, 16. (a) Momo lie tu sukilila oku yuvula ovisimĩlo viokuti, omanu vosi tu kundila va ka tava kesapulo Liusoma? (b) Anga hẽ tu sukila oku loñoloha calua oco tu kale alongisi vawa kupange woku kunda? Ci lombolola. (Talavo pokakasia losapi hati: “ Olonumbi vi tu Kuatisa Oku Eca Etambululo.”)

15 Tua kũlĩha okuti omanu vamue tu kundila, ka va siatele oku tava kesapulo Liusoma. (Mat. 10:11-14) Eli olio esunga lieci tu sukilila oku linga apulilo a sunguluka, oku kũlĩhĩsa nda omunu o kuete elomboloko liovina tu kasi oku sapela laye, kuenda oku linga ovindekaise via sunguluka. Ocili okuti, omanu valua ka va tavele kovina Yesu a longisa, ndaño okuti eye Ulongisi wa Velapo wa kala palo posi!—Yoa. 6:66; 7:45-48.

16 Ndaño ka tua loñolohele calua, pole, tu pondola oku kuata onima yiwa kupange woku kunda. (Tanga Ovilinga 4:13.) Embimbiliya li tu ĩha esunga lieci tu tavela kondaka yokuti, ‘omanu vosi va nõliwila oku kuata omuenyo ko pui,’ va pondola oku tava kolondaka viwa. (Ovil. 13:48) Omo liaco, tu sukila oku lekisa ovituwa via sunguluka komanu tu kundila olondaka viwa Viusoma. Nda tua kolela ku Yehova wa siata oku tu ĩha epindiso, tu kala alongisi vawa, kuenda tu li kuatisa etu muẽle, la vana va tu yevelela. (1 Tim. 4:16) Yehova o tu kuatisa oku limbuka ndomo ‘tu sukila oku tambulula omunu lomunu.’ Vocipama ci kuãimo, tu ka konomuisa ndomo tu pondola oku kuata onima yiwa kupange woku kunda, poku kuama Ocihandeleko Coku Sola Omanu.

^ tini. 6 Oco o kuate elomboloko lia suapo, tanga Vutala Wondavululo 1 wosãi ya Mbalavipembe wunyamo wo 2009, vocipama losapi hati: “Anga hẽ Citava Oku Kolela Okuti Kuli Ululiki?