Skip to content

Skip to table of contents

Olombangi Via Yehova

Select language Umbundu

Ocimbumba co ko Sarepata ca Tambula Asumũlũho Omo Liekolelo Liaye

Ocimbumba co ko Sarepata ca Tambula Asumũlũho Omo Liekolelo Liaye

UKÃI umue ocimbumba okuti ohukũi, wa kuatelela omõlaye locisola. Eye ka tavele kovina a mola. Noke wa muñila ponanga etimba liomõlaye ndaño ka kuatele vali omuenyo. Eci ukãi waco a limbuka okuti omõlaye wa pinduka, wa kuata esanju lialua. Kuenje ulume umue wa kala ukombe wa popia hati: “Tala, omõlove wa pinduka.”

Tunde eci ulandu waco wepinduko wa lingiwa, pa pita ale 3.000 kanyamo. O pondola oku tanga ulandu waco kelivulu 1 Olosoma kocipama 17. Ukombe waco Eliya, una wa kala uprofeto wa Yehova Suku. Helie wa kala ina yaco? Ukãi umue ocimbumba wa kala kofeka yo ko Sarepata okuti, onduko yaye ka ya tukuiwile vulandu waco. Epinduko liomõlaye lia pamisa ekolelo liaye. Osimbu tu lilongisa ulandu waco, ci pamisavo ekolelo lietu.

ELIYA WA SANGA OCIMBUMBA CIMUE CI KUETE EKOLELO

Yehova wa popele hati, kotembo yuviali wa Ahava soma ya va Isareli una wa kala ongangala, kua laikele oku kala ocitenya. Eci Eliya a eca esapulo liesulilo liocitenya, Yehova wo teyuila peka lia Ahava, kuenje wa linga ocikomo coku u tekula lombolo kuenda lositu ovikuamanga vio nenela. Noke, Yehova wa sapuila Eliya hati: ‘Katuka, kuende ko Sarepata ko Sitono, noke, kalako otembo yalua. Momo, nda pañinyako ukãi umue ocimbumba okuti, eye o ku tekula.’—1 Olos. 17:1-9.

Eci Eliya a pitĩla ko Sarepata, wa mola ukãi umue ohukũi haye ocimbumba okuti wa kala oku tiaña olohũi. Anga hẽ wa kuatele epondolo lioku pongiya okulia oco a ku ece kuprofeto? Omo okuti wa kala ohukũi, wa sukilile oku linga ndati ovina viaco? Ndaño okuti Eliya ka kuatele elomboloko liovina viaco, pole, wa sapela lukãi waco poku popia hati: “Hu pinga, ka njupileko ovava vocikuata cimue, oco ndi nyueko.” Eci ukãi a endele okupa ovava, Eliya wa amisako hati: “Hu pinga, neneleko okacimalañanya kombolo.” (1 Olos. 17:10, 11) Ocili okuti, ca lelukile kukãi waco oku eca ovava, pole, ka kuatele epondolo lioku eca ombolo kokuaye.

Ukãi waco wa tambulula hati: ‘La Yehova Suku yove o kasi lomuenyo, si kuete ombolo te lika epupu liosema vombia kuenda okolela kamue vocipupu. Tala, ñasi loku tiaña olohũi, noke ndi tiukila konjo okuti ndi liangiliyila okakulia lomolange, oco tu ka lie, kuenje tu fa.’ (1 Olos. 17:12) Tu sokololi eci ovina viaco vi lomboloka.

Ukãi waco wa limbuka okuti Eliya wa kala uprofeto umue wa Yehova u Isareli. Eli olio esunga lieci a popela hati: “La Yehova Suku yove o kasi lomuenyo.” Omo okuti, ukãi waco wa kũlĩhĩle ovina vimue viatiamẽla ku Suku ya va Isareli, poku tukula olondaka viokuti Suku yange, wa vi tiamisila ku Yehova. Eye wa kala ko Sarepata, olupale luna lua enda oku kuatisiwa lo Foinike, olupale luo Sitono. Ocili okuti, omanu va kala kofeka yo Sarepata, va enda oku fendela Baale. Omo liaco, Yehova wa limbuka ocina cimue ci kuete esilivilo lialua kocimbumba caco.

Ndaño okuti ukãi ocimbumba haye ohukũi wa kala pokati komanu va enda oku fendela olosuku viesanda, pole wa kuata ekolelo. Yehova wa tuma uprofeto Eliya oco a tekule ukãi waco kumue laye. Ulandu waco u tu kuatisa calua.

Ndaño okuti omanu vo kofeka yo Sarepata va enda oku fendela Baale, pole, havosiko va kala vakuevĩho. Yehova poku tuma uprofeto Eliya kukãi waco, wa lekisa okuti, wa kapako omanu vosi ndaño muẽle omanu vana ka vo fendela. Embimbiliya li popia hati: ‘Kolofeka viosi, omunu wosi o lekisa esumbilo ku Suku, loku linga esunga, o taviwa laye.’—Ovil. 10:35.

Anga hẽ omanu va kasi vimbo liove va sokisiwavo locimbumba co kofeka yo Sarepata? Ndaño okuti va ñualiwa lomanu va kuetavo liesanda, pole, citava okuti va yongola oku linga ovina viwa. Omo okuti ka va kũlĩhĩle Yehova, va sukila ekuatiso oco va kale vefendelo liocili. Wa siata hẽ oku likolisilako oco o kuatise omanu vaco?

“TETE NENELEKO OKACIMALAÑANYA KOMBOLO”

Kũlĩhĩsa lutate ovina Eliya a yonguile okuti, ovio ocimbumba a linga. Ocimbumba caco ca sapuila Eliya hati, noke yoku angiliya okakulia kaye kumue lomõlaye, va lia oco va fa noke. Pole, nye Eliya a popia? Eye wa popia hati: ‘Ku ka yokoke ño. Kuende, linga ndeci wa popia, pole, tete ndingileko okambolo, kuenje, ka nenele, noke lilingilavo ove lomõlove. Momo Yehova Suku ya Isareli wa popia hati, ‘Vombia yosema ka mu pui, ndaño vocipupu culela ka mu kambi, toke eteke Yehova a lokisa ombela kilu lieve.’—1 Olos. 17:11-14.

‘Tu pondola hẽ oku eca okulia kua sialapo? Omanu vamue va siata oku tambulula vati, ‘o kasi oku papala.’ Pole, ukãi ocimbumba ka kuatele ovisimĩlo viaco. Ndaño okuti ka kũlĩhĩle ovina vialua viatiamẽla ku Yehova, pole, wa kolelele ku Eliya kuenda wa linga ovina Eliya o pinga. Omo liaco, wa ñola onjila ya sunguluka!

Ukãi ocimbumba omo lioku kolela ku Yehova Suku ya Eliya wa popeliwa kuenda omõlaye wa pinduiwa

Yehova Suku ka yandulukile ukãi waco ocimbumba. Pole, wa sumũlũisa ukãi waco poku u wĩha okulia kualua oco a tekule omõlaye kumue la Eliya. Omo liaco, ‘Vombia yosema ka mua puile, ndaño vocipupu culela ka mua kambele, ndomo ­Yehova a popele ku Eliya.’ (1 Olos. 17:16; 18:1) Nda ukãi waco wa lekisile ovituwa vimue ka via sungulukile, ombolo a linga losema yotiliku kuenda ulela a kuata, nda oyo okulia kuaye kua sulako. Omo okuti wa kolelele ku Yehova, tete wa eca okulia ku Eliya.

Ulandu waco u tu longisa okuti, Yehova o sumũlũisa vana va kolela kokuaye. Eci o liyaka lovina vi seteka ekolelo liove, kolela okuti Yehova o ku kuatisa. Eye o linga Ulongisi wove, oku teyuila, kuenda o kala ekamba liove oco a ku kuatise poku liyaka lovitangi.—Etu. 3:13-15.

Utala Wondavululi wo 1898, wa lombolola ulandu wukãi ocimbumba hati: “Nda ukãi waco wa kolelele okuti o sukila oku pokola, nda wa tambula asumũlũho omo lioku kuatisa Uprofeto wa Ñala. Pole, nda ka lekisile ekolelo, uprofeto waco nda wa sandiliya ocimbumba cikuavo. Citava okuti tu pitavo lovitangi komuenyo wetu, kuenda Ñala ecelela okuti, ekolelo lietu li setekiwa. Nda tua pandikisa kovitangi viaco lekolelo, tu tambula asumũlũho, pole, nda ka tua ci lingile, tu pumba asumũlũho aco.”

Eci tu liyaka lovitangi tu sukila oku sandiliya ekuatiso li sangiwa Vovisonehua kuenda valivulu akuavo a sandekiwa lukuenje wa kolelua. Tu sukilavo oku kapako olonumbi via Yehova ndaño okuti ka ca lelukile oku ci linga. Tu pondola oku tambula asumũlũho nda tua kapako olondaka ukualosapo a popia hati: ‘Kolela Yehova lutima wove wosi. Ku ka tiamẽle kolondunge viove muẽle. Sumbila Suku kovina viosi o linga, kuenje eye o suñamisa olonjila viove.’—Olosap. 3:5, 6.

‘OVE HẼ WEYA OKU PONDA OMÕLANGE?’

Ekolelo liukãi ocimbumba, lia setekiwa vali lonjila yikuavo. Ulandu Wembimbiliya u lekisa okuti: ‘Omõla wa cimbumba okuti eye muelianjo, wa vela. Uvei waye wa kãla calua okuti ka fuimile vali. Kuenje, ukãi wa popia la Eliya hati: ‘Nye ñuete love, amunu wa Suku yocili? Weya hẽ kokuange oku njivaluisa ekandu liange loku ipa omõlange?’ (1 Olos. 17:17, 18) Olondaka evi vi lomboloka nye?

Anga hẽ ukãi waco wa ivaluka ekandu limue okuti lionenela esumuo? Anga hẽ wa simĩle okuti Suku eye wa ponda omõlaye oco a tumila uprofeto waye Eliya? Embimbiliya ka li tu sapuila ulandu waco, pole, li popia hati: Ocimbumba caco ka ca pisile Suku omo liovitangi a liyaka lavio.

Eliya wa sumũile calua omo liolofa viomõla wa cimbumba momo wa simĩle okuti, eye wa kuata eko omo liolofa viaco. Noke, Eliya wa ambata etimba liomõlaco kohondo yaye, kuenje wa vilikiya hati: “A Yehova Suku yange, ocimbumba nda sikĩla, anga wa ci kokelavo ohali loku ipa omõlaye”? Uprofeto ka yonguile oku sia lesumuo ukãi una wo tata ciwa. Pole, nda wa ci lingile, nda ca nena etombo konduko ya Suku. Omo liaco, Eliya wa likutilila hati: “A Yehova Suku yange, hu pinga, tava okuti omuenyo womõla u tiukamo vali.”—1 Olos. 17:20, 21.

“TALA OMÕLOVE WA PINDUKA”

Yehova wa yeva olondaka viaco. Ukãi waco ocimbumba wa kuatisa uprofeto kuenda wa kolelele kokuaye. Citava okuti, Yehova wa ecelela okuti omõlaco amamako loku vela toke eci a fa. Momo wa yonguile okuti, o pinduiwa ndomo ca lekisiwa Vovisonehua, oco ovitumbulukila vikuavo vi kuate ekolelo kelavoko liepinduko. Eci Eliya a likutilila, Yehova wa pindula omõlaco. Sokolola esanju ukãi waco a kuata eci Eliya o sapuila hati: ‘Tala omõlove wa pinduka’! Omo liaco, ukãi wa sapuila ku Eliya hati: ‘Kaliye nda kũlĩha okuti vumunu wa Suku, kuenda ondaka ya Yehova ya tunda vomela wove yocili.’ —1 Olos. 17:22-24.

Ulandu u sangiwa kelivulu 1 Olosoma kocipama 17, ka u lombolola ovina vikuavo, pole, u tukula lika catiamẽla kukãi waco. Yesu wa sanjukile calua poku mola ovina ukãi waco a linga, momo wa kala ufendeli umue wa Yehova ukuekolelo. (Luka 4:25, 26) Ulandu waye, u tu longisa okuti, Yehova o sumũlũisa vana va likolisilako oku lingila ovina viwa afendeli vaye. (Mat. 25:34-40) Ovina viaco vi eca uvangi wokuti, Suku o kuatisa afendeli vaye vo kolela, poku liyaka lovitangi. (Mat. 6:25-34) Handi vali, u tu kuatisavo oku limbuka okuti Yehova o kuete onjongole yoku pindula omanu va fa. (Ovil. 24:15) Omo liaco, tu kuete esunga lioku ivaluka ukãi ocimbumba co kofeka yo Sarepata.