Skip to content

Skip to table of contents

Olombangi Via Yehova

Select language Umbundu

Fendela Yehova Soma Yonahũlulua

Fendela Yehova Soma Yonahũlulua

‘Ku Soma yonahũlũlua, ku kale esumbilo lulamba otembo ka yi pui.’—1 TIM. 1:17.

1, 2. (a) Elie “Soma yonahũlũlua,” kuenda momo lie a sesamẽlela oku tukuiwa londuko yaco? (Tala elitalatu kefetikilo liocipama cilo.) (b) Momo lie tu yonguila okuti Yehova eye o tu viala?

SOMA SOBHUZA II wo kofeka yo Suazilândia, wa viala eci ci soka 61 kanyamo. Pokati kolosoma vio koloneke vilo, ka pali la yimue ya viala otembo yalua ndeye. Ndaño okuti otembo Soma Sobhuza a viala yi komõhisa, pole, kuli osoma yikuavo okuti, uviali waye ka u sokisiwa lotembo omanu va pondola oku kala komuenyo. Omo liaco, Embimbiliya li tukula ombiali yaco hati: “Soma yonahũlũlua.” (1 Tim. 1:17) Ukualosamo wa tukula Soma yaco poku popia hati: ‘Yehova eye soma otembo ka yi pui.’—Osa. 10:16.

2 Otembo yuviali wa Suku, yi lekisa okuti uviali waye ka u sokisiwa luviali womanu. Onjila ya Yehova yoku viala oyo yi tu vetiya oku kuata ukamba laye. Osoma yimue ya vialele ko Isareli ci soka 40 kanyamo, ya sivaya Suku poku popia hati: “Ukuahenda, o kasi locali, o livala konyeño. Ocisola caye ka ci pui ca lua cimue. Yehova wa tumbika ocalo caye kilu. Usoma waye u viala kovina viosi.” (Osa. 103:8, 19)2 Yehova eye Soma yetu haeye Isietu wo kilu ukuacisola. Yehova o lekisa ndati okuti eye Isia? Yehova wa siata oku lekisa ndati okuti o kuete unene woku viala tunde kusuanji wa lingiwa vocumbo Cedene? Atambululo kapulilo a lingiwa ndeti, a tu vetiya oku kuata  ukamba la Yehova loku u fendela lutima wetu wosi.

SOMA YONAHŨLŨLUA WA LULIKA OVANGELO KUENDA OMANU

3. Helie omunu watete wa lulikiwa vepata lia Yehova voluali luosi? Velie va lulikiwavo ‘ndomãla’ va Suku?

3 Yehova wa kuata esanju lialua eci a lulika Omõlaye wongunga! Eye ka tatele omõlaye ndonungi yimue ka yi kuete esilivilo. Omo okuti eye Omõlaye, u sole calua, kuenda wo laleka kupange woku lulika olohuluwa viovangelo va lipua. (Va Kol. 1:15-17) Embimbiliya li popia hati, ovangelo vaco va kasi oku vumba Yehova lesanju ‘ndakuenje va linga ocipango caye.’ Kuenje Yehova o va sumbila poku va tukula okuti ‘omãla’ vaye. Ovangelo vaco, va panga onepa kepata lia Yehova voluali luosi.—Osa. 103:20-22; Yovi 38:7.

4. Omanu veya oku tiamẽla ndati kepata lia Yehova Suku voluali luosi?

4 Eci Yehova a lulika ilu longongo, kuenda ovina viosi, wa linga esokiyo liokuti, epata liaye li li sanduila voluali luosi. Eci Yehova a mala oku pongiya ongongo ndonjo yimue ya posoka, wa lulika ulume watete okuti Adama, ukuesetahãlo Liaye. (Efet. 1:26-28) Omo okuti Yehova eye Ululiki, haeye ya Adama, wa yonguile okuti, o pokola kokuaye. Omo liaco, Yehova wo longisa olonumbi viosi locisola, kuenda ohenda. Olonumbi viaco ka via tatekele elianjo lia Adama lioku li ñolela ovina a yongola oku linga.—Tanga Efetikilo 2:15-17.

5. Esokiyo lipi Yehova a linga oco a yukise ongongo lomanu?

5 Yehova wa litepa lolombiali viomanu, momo o sanjukila oku eca ovikele kafendeli vaye, kuenda o va tata ciwa, momo omãla vaye. Eye, wa tuma Adama oku tata ovinyama kuenda wo wĩhavo ocikele coku eca olonduko kovinyama viaco. (Efet. 1:26; 2:19, 20) Yehova ka lulikile omanu valua va lipua oco va yukise ongongo. Pole, wa lulika Heva oco a linge oñuatisi ya lipua ya Adama. (Efet. 2:21, 22) Eye wa eca epuluvi kolohueli viaco oco vi yukise ongongo lomãla vavo. Ovo va kuatavo epuluvi lioku pongolola ongongo yosi oco yi linge Oluali Luokaliye. Ovo kumue lovangelo, nda va kuata epuluvi lioku fendela Yehova otembo ka yi pui, kuenda oku tiamẽla kepata liaye voluali luosi. Elavoko liaco li komõhisa calua, kuenda li situlula ocisola ca Isietu Yehova!

OMÃLA VAKUESINO KA VA TAVA OKUTI SUKU EYE SOMA YAVO

6. (a) Epata lia Suku lia fetika ndati oku lekisa esino? (b) Momo lie esino lia Adama ka li lombolokela okuti, Yehova ka kuatele vali unene woku songuila uviali waye palo posi?

6 Tu sumua calua poku limbuka okuti, Adama la Heva ka va sanjukilile Uviali wa Yehova. Momo va nõlapo oku kuama Satana, ungelo una wa tomba olonumbi via Suku. (Efet. 3:1-6) Omo liesino liavo, va likokela ovitangi, ohali, kuenda olofa okuti, via sambukilavo komãla vavo. (Efet. 3:16-19; Va Rom. 5:12) Kotembo yaco, Yehova ka kuatele vali afendeli vaye vakuepokolo palo posi. Anga hẽ ovina viaco vi lekisa okuti Yehova ka kuatele vali unene woku songuila uviali waye palo posi? Sio hacoko! Momo Yehova wa tundisa Adama la Heva Vocumbo Cedene, kuenje, wa tuma ovangelo oku ci lava, oco ka va ka tiuke vali. (Efet. 3:23, 24) Omo okuti Yehova eye Isietu ukuacisola, wa likuminya oku kuata epata liovangelo, kuenda liomanu okuti, umue pokati ‘kovitumbulukila’ via Adama, o ka nyõla Satana, kuenda oka malako ekandu Adama a tu kokela.—Tanga Efetikilo 3:15.

7, 8. (a) Koloneke via Noha ovituwa vipi omanu va lekisile? (b) Esokiyo lipi Yehova a linga oco a teyuile epata liomanu palo posi?

 7 Noke lianyamo alua, kua kala alume vamue ndeci, Havele, la Enoke okuti, va lekisile ekolelo ku Yehova. Omanu valua ka va tavele okuti, Yehova eye Isiavo, haeye Soma yavo. Koloneke via Noha, ‘oluali lue yukile ungangala.’ (Efet. 6:11) Anga hẽ eci ci lekisa okuti Yehova ka kuatele vali unene woku songuila ovina via palo posi? Nye Embimbiliya li popia?

8 Kũlĩhĩsa ulandu wa Noha. Yehova wo wĩhile olonumbi via suapo vioku tunga ocimbaluku cinene ca laikele oku u popela kumue lepata liaye. Yehova wa lekisavo ocisola caye kepata liomanu poku tuma Noha oku “sapula esunga.” (2 Pet. 2:5) Noha wa laleka omanu oku likekembela kuenda wa va sapuila enyõleho lia laikele oku iya, pole, lomue wa tava kesapulo liaco. Noke, Noha kumue lepata liaye, va kala voluali lumue lueyukile ungangala kuenda evĩho. Omo okuti Yehova o sokisiwa la Isia umue ukuacisola, wa teyuila omanu ecelãla, kuenda wa va sumũlũisa. Yehova wa lekisa unene waye komanu kuenda kovangelo va lekisa esino, eci a nena etande. Yehova poku ci linga, wa lekisa okuti, o kuete unene woku songuila uviali waye.—Efet. 7:17-24.

Olonjanja viosi Yehova wa siata oku lekisa unene wuviali waye (Tala ovinimbu 6, 8, 10, 12, 17)

UVIALI WA YEHOVA NOKE LIETANDE

9. Epuluvi lipi Yehova a ecele komanu noke Lietande?

9 Eci Noha kumue lepata liaye va tunda vocimbaluku, va fetika oku fuima ofela ya yela, kuenje va eca olopandu ku Yehova omo lioku va tata kuenda oku va teyuila. Noke Noha, wa tunga utala kuenda wa eca ovilumba vioku fendela Yehova. Kuenje, Yehova wa sumũlũisa Noha kumue lepata liaye, kuenda wa va sapuila hati: ‘Liciti, siati, yukisi oluali.’ (Efet. 8:20–9:1) Omo liaco, omanu va kuata epuluvi lioku fendela Yehova kuenda oku yukisa oluali.

10. (a) Pi omanu va fetikila oku lekisa esino noke lietande, kuenda va ci linga ndati? (b) Nye Yehova a linga oco a tẽlise ocipango caye?

10 Etande ka lia maleleko ekambo lioku lipua, momo toke cilo, omanu va siata oku liyaka lovitangi vi tunda ku Satana, kuenda kolondele viaye. Noke omanu va fetika oku lekisa esino kuviali wa Yehova. Pokati komanu vaco pa kala Nimuroti onekulu ya Noha okuti weya oku tomba uviali wa Yehova. ‘Nimuroti wa kala embelengenje linene ku Yehova.’ Kuenje wa fetika oku tunga alupale anene, oku kongelamo o Bavele, kuenda wa li nõla eye muẽle oco a viale ‘ofeka yo Sinare.’ (Efet. 10:8-12) Yehova wa tendele ndati soma Nimuroti omo liesino a lekisa? Nye Yehova a linga kosoma yaco omo lioku seteka oku tateka ocipango caye catiamẽla koku “yukisa ongongo”? Yehova wa tateka upange wa Nimuroti poku pongolola alimi omanu oco va li sanduile “voluali luosi.” Kolonepa viosi violuali va li sanduila, va ambata alongiso avo esanda, kuenda va nõlapo oku vialiwa luviali womanu.—Efet. 11:1-9.

11. Yehova wa lekisa ndati kekamba liaye Avirahama okuti ukuacili?

11 Ndaño okuti omanu valua va enda oku fendela olosuku viesanda noke Lietande, pole, kua kala vamue va amamako oku fendela Yehova. Umue pokati ka fendeli vaco, Avirahama okuti wa tava oku siapo ovokuasi lonjo yaye kolupale luo Uri, oco a kale volombalaka vokuenda kuanyamo alua. (Efet. 11:31; Va Hev. 11:8, 9) Vokuenda kuotembo yaco, Avirahama ka kolelele kolosoma viomanu ale kocimbaka colupale. Momo Yehova wa teyuila Avirahama kumue lepata liaye. Ukualosamo wa soneha ovina viatiamẽla ku Yehova hati: “Yehova ka tavele okuti, umue o va linga cĩvi, pole, wa pisa  olosoma vina via va linga cĩvi.” (Osa. 105:13, 14, NW) Omo okuti Avirahama wa kala ukuepokolo, Yehova wa lingile ohuminyo kokuaye poku popia hati: ‘Olosoma vi tunda kocitumbulukila cove.’—Efet. 17:6; Tia. 2:23.

12. Yehova wa lekisa ndati unene waye kofeka Yegito, kuenda ovina viaco via kuatisa ndati afendeli vaye?

12 Yehova wa likuminyile ku Isake omõla wa Avirahama, kuenda ku Yakoba onekulu yaye hati, wa laikele oku va sumũlũisa, momo, kocitumbulukila caye oko kua laikele oku tunda olosoma. (Efet. 26:3-5; 35:11) Pole, osimbu ovitumbulukila via Yakoba ka via lingile olosoma, va kala apika kofeka Yegito. Anga hẽ ovina viaco vi lomboloka okuti Yehova ka ponduile oku tẽlisa olohuminyo viaye palo posi? Ale wa liwekelepo oku lekisa unene waye woku viala ongongo? Sio hacoko! Noke yotembo yimue, Yehova wa lekisa ku Fareo okuti eye lika o kuete unene wa velapo. Va Isareli eci va kala kupika, va kolelele ku Yehova, momo wa va teyuila lonjila yimue yi komõhisa, poku yoka Okalunga ka Kusuka. Omo liaco, Yehova eye Ombiali Yavelapo voluali luosi kuenda o sokisiwa la Isia umue ukuacisola, momo wa siata oku lekisa unene waye oco a teyuile afendeli vaye.—Tanga Etundilo 14:13, 14.

YEHOVA WA LINGA OSOMA YA VA ISARELI

13, 14. (a) Vocisungo va Isareli va imba, ovina vipi va tukula viatiamẽla kuviali wa Yehova? (b) Ohuminyo yipi Yehova a lingile ku Daviti?

13 Eci va Isareli va yovuiwa Kegito, va imbila Yehova ocisungo cesivayo ci sangiwa kelivulu Lietundilo kocipama 15, oku kongelamo olondaka vi sangiwa kocinimbu 18 viokuti: ‘Yehova o viala otembo ka yi pui.’ Ocili okuti, wa kala Soma yofeka yokaliye ya va Isareli. (Esin. 33:5) Pole, va Isareli ka va sanjukilile uviali wa Yehova. Eci pa pita 400 kanyamo, va Isareli va pinga ku Yehova oco a va nõlele osoma yimue ndeci ca kala kolofeka va li sunguile lavio. (1 Sam. 8:5) Omo liaco, Yehova wa amamako oku kala Soma yavo vokuenda kuviali wa Daviti, una wa kala osoma yavali ya va Isareli.

14 Daviti wa nena ocikasia covisila ko Yerusalãi. Vokuenda kuotembo yaco yesanju, va lewi va imba o cisungo cesivayo  mua kongelele olondaka vi sangiwa kelivulu lia 1 Asa. 16:31, ku popia hati: “Va sapule kolofeka vati: ‘Yehova o viala!’” Pamue omunu umue o pula ndoco: ‘Nda Yehova eye Soma yonahũlũlua, ndamupi a linga Osoma kotembo yaco?’ Eye wa linga Osoma eci a lekisa unene waye ale ceci a nõla umue oco a linge onumiwa yaye. Oku kũlĩha okuti Yehova eye Soma, ci kuete esilivilo lialua. Osimbu Daviti ka file, Yehova wo likuminyile hati, usoma waye u ka amamako otembo ka yi pui poku u sapuila hati: “Noke ñatula omõlove wa tunda koviongo viove muẽle kuenje numalisa uviali waye.” (2 Sam. 7:12, 13) Ohuminyo yaco, ya tẽlisiwa eci pa pita ci pitahãla 1000 kanyamo noke yoku tukuluka ‘kuomõla’ a Daviti. Helie wa kala omõlaco kuenda otembo yipi a linga Osoma?

YEHOVA WA NÕLA OSOMA YOKALIYE

15, 16. Otembo yipi Yesu a ñoliwa oco a linge Osoma? Eci Yesu a kala palo posi, nye a linga oco a pongiye Usoma waye?

15 Kunyamo wo 29 K.K, Yoano wa fetika oku kunda hati: “Usoma wokilu u kasi ocipepi.” (Mat. 3:2) Eci Yoano a papatisa Yesu, Yehova wo nõla oco a linge Mesiya kuenda Osoma Yuviali waye. Yehova wa lekisa ocisola caye ku Yesu poku u sapuila hati: “U, Eye Omõlange wa soliwa, ndo sanjukila.”—Mat. 3:17.

16 Yesu vokuenda kupange waye woku kunda, wa sivaya Isiaye. (Yoa. 17:4) Eye wa ci linga poku kunda Usoma wa Suku. (Luka 4:43) Kuenje, wa longisa olondonge viaye oco vi li kutilile okuti Usoma wa Suku wiya palo posi. (Mat. 6:10) Omo okuti Yesu eye Osoma ya nõliwa la Suku, wa sapuila ovanyali vaye hati: ‘Usoma wa Suku u kasi pokati kene.’ (Luka 17:21) Kuteke wa sulako osimbu Yesu ka file, wa linga ocisila ‘cusoma’ lolondonge viaye. Eye wa sapuila kolondonge viaye hati, vamue pokati kavo, va ka viala laye kilu Vusoma wa Suku.—Tanga Luka 22:28-30.

17. Yesu wa fetika ndati oku viala kunyamo wa 33 K.K.? Momo lie a sukilile oku talamẽla?

17 Otembo yipi Yesu a laikele oku fetika oku viala Vusoma wa Suku? Eci a enda kilu, ka fetikile oku viala vonjanja yaco. Momo, eci a kala palo posi, tete wa pondiwa, kuenje, olondonge viaye, vio tila. (Yoa. 16:32) Pole, tunde kosimbu, Yehova wa siata oku lekisa unene Wuviali waye. Yesu wa pinduiwa eci pa pita oloneke vitatu, kuenje, keteke lio Pendekoste yunyamo wa 33 K.K., wa fetika oku viala ekongelo Liakristão olombuavekua. (Va Kol. 1:13) Pole, omo okuti Yesu eye ‘omõla’ a Daviti, wa talamẽla oco a tambule unene woku viala oluali luosi. Omo liaco, Yehova wo sapuila hati: “Tumãla kondio yange toke hu lingila ovanyali vove ociliatelo cove.”—Osa. 110:1.

OKU FENDELA SOMA YONAHŨLŨLUA

18, 19. Nye tu vetiyiwa oku linga, kuenda, nye tu ka lilongisa vocipama ci kuãimo?

18 Vokuenda kuanyamo alua, ovangelo vamue kumue lomanu, va siata oku tomba uviali wa Yehova. Pole, Yehova ka la liwekapo oku lekisa unene waye kuenda o kasi o ku amamako oku viala. Omo okuti Yehova eye Isia ukuacisola, wa tata ciwa afendeli vaye, kuenje, wa teyuila Noha, la Avirahama, kuenda Daviti. Anga hẽ ovina viaco ka vi tu vetiya oku tava okuti Yehova eye Osoma yetu, kuenda o tu vetiya oku kuata ukamba laye?

19 Omo liaco tu pondola oku lipula ndoco: Yehova wa siata oku kala ndati Osoma yetu koloneke vilo? Tu pondola ndati oku kala afendeli vakuekolelo, oco tu kale omãla va lipua vatiamẽla kepata lia Yehova voluali luosi? Ohutililo yokuti Usoma wa Suku wiye, yi lomboloka nye? Apulilo a lingiwa ndeti, a ka tambuluiwa vocipama ci kuãimo.