Skip to content

Skip to table of contents

Olombangi Via Yehova

Select language Umbundu

O Pondola hẽ Oku Eca Olombanjaile Oco o Kuatise Kupange Wusoma?

O Pondola hẽ Oku Eca Olombanjaile Oco o Kuatise Kupange Wusoma?

“Suku o sole u eca lesanju.”—2 VA KOR. 9:7.

1. Ovina vipi omanu va siata oku likolisilako oku vi tẽlisa, kuenda momo lie?

OMANU va siata oku likolisilako oku sandiliya ovina vi kuete esilivilo kokuavo. Olonjali via siata oku sokiya otembo yoku kala lomãla vavo, kuenda oku eca olombongo kokuavo oco vi va kuatise. Amalẽhe vana vakuakulinga olomapalo vioku yoloka, osimbu ka va nõliwile oco va ka linge omapalo yoku Yoloka kofeka yikuavo, va siata oku pita otembo yalua vokuenda kueteke, oco va pindisiwe. Yesu wa likolisilakovo oku linga ovina vi kuete esilivilo kokuaye. Eye, ka sandele ovokuasi, kuenda ka kuatele omãla. Pole, wa nõlelepo oku pitisa kovaso Usoma wa Suku. (Mat. 4:17; Luka 9:58) Olondonge viaye via liecelevo koku kuatisa kupange Wusoma wa Suku. Omo okuti via pitisile kovaso Usoma wa Suku, via likolisilako oku kuatisa kupange waco. (Mat. 4:18-22; 19:27) Omo liaco, tu sukila oku li pula ndoco: ‘Ocina cipi nda velisapo komuenyo wange?’

2. (a) Alikolisilo api Akristão vocili va sukila oku linga? (b) Alikolisilo api akuavo vamanji vamue va siata oku linga?

2 Akristão vocili, va siata oku likolisilako oku linga ovina vi kuete esilivilo lia velapo, momo, vi va kuatisa oku pamisa ukamba wavo la Yehova. Vovina viaco, mua kongela oku sokiya otembo yoku likutilila, oku tanga Embimbiliya, oku linga efendelo liepata, oku endaenda kolohongele, kuenda kupange woku kunda. * (Yeh. 1:8; Mat. 28:19, 20; Va Hev. 10:24, 25) Omo lialikolisilo etu, kuenda asumũlũho a tunda ku Yehova, upange woku kunda u kasi oku lingiwa lonjanga, kuenda omanu valua va kasi oku ‘iñila vomunda yonjo ya Yehova.’ (Isa. 2:2) Oco upange woku kunda Usoma wa amameko, vamanji valua va siata oku lieca olumue kupange wo ko Betele, koku tunga Olonjango Viusoma, Olonjango Violohongele Vinene, oku sokiya olohongele viofeka, ale koku kuatisa vamanji va pita lovilunga.  Ndaño okuti ka tu lingi upange waco omo lielavoko lioku kuata omuenyo ko pui, pole, tu u linga locimãho coku kuatisa kupange Wusoma wa Suku koloneke vilo.

3. (a) Nda tua likolisilako oku pitisa kovaso Usoma wa Yehova, onima yipi tu tambula? (b) Apulilo api tu sukila oku konomuisa?

3 Koloneke vilo, upange Wusoma wa Suku wa li vokiya calua okuti, kosimbu ci sule. Tu kuete esanju omo lioku limbuka ndomo vamanji valua va siata oku lieca olumue kupange wa Yehova! (Tanga Osamo 54:6.) Ocituwa caco ci tu nenela esanju lialua, osimbu tu lavoka oku iya Kusoma wa Suku. (Esin. 16:15; Ovil. 20:35) Vosi yetu, tu sukila oku konomuisa lutate ekalo lietu, poku li pula ndoco: Tu pondola hẽ oku linga esokiyo lioku kuatisa kupange Wusoma? Kovina vipi tua siata oku pesila otembo yetu, olombongo, ongusu yetu, kuenda uloño? Ovina vipi tu sukila oku velisapo poku kuatisa kupange wa Yehova? Omo liaco, tu konomuisi ovina tu pondola oku lilongisa kovolandu a vamanji va lieca olumue kupange wa Yehova, oco tu kuate esanju lialua.

OVILUMBA VA ISARELI VA ENDA OKU ECA KOSIMBU

4. Va Isareli va enda oku kuatisiwa ndati poku eca ovilumba?

4 Oco Yehova a ecele akandu a va Isareli, va sukilile oku eca ovilumba. Ovo va enda oku eca ovilumba viaco, oco va taviwe la Yehova. Va Isareli va kisikiwile oku eca ovilumba vimue, pole, vikuavo va enda oku vi eca ndaño ka va kisikiwile oku ci linga. (Ovis. 23:37, 38) Va Isareli va enda oku eca lutima wosi ku Yehova ovilumba vioku yoka. Ongangu yiwa yoku eca ovilumba va Isareli va lekisa, ya limbukiwa eci onembele ya Salomone ya tumbikiwa.—2 Asa. 7:4-6.

5. Eliangiliyo lipi Yehova a lingile, oco olohukũi vi ece ovilumba?

5 Omo okuti Yehova ukuacisola, wa kũlĩha okuti, omanu ka va pondola oku eca onjongo yimuamue yovilumba. Eye, o tava ovilumba viosi omunu lomunu a kuete. Ocihandeleko ca Yehova ca lekisile okuti, osonde yocinyama yeciwa ndocilumba, ya sukilile oku pesiwa. Momo, ovilumba viaco via kala ulembo wovina viwa via laikele oku iya okuti, vi tiamisiwila ku Yesu. (Va Hev. 10:1-4) Pole, Yehova wa lekisile esunguluko poku kapako ocihandeleko caco. Momo, nda omunu umue ka pondola oku eca ohombo, ale ­omeme, eca olopomba vivali vitito. Omo liaco, olohukũi, via enda oku kuata esanju poku eca ovilumba ku Yehova. (Ovis. 1:3, 10, 14; 5:7)  Ndaño okuti Yehova wa enda oku tava ovilumba viovinyama via litepa, pole, omunu lomunu wa kuatele elianjo lioku eca lutima wosi ovilumba a kuete.

6. Nye omunu lomunu a sukilile oku linga poku eca ovilumba lutima wosi? Oku kapako ocihandeleko caco ca kuatele esilivilo lie?

6 Catete, omunu wa sukilile oku eca ocilumba cimue ciwa. Momo, Yehova wa sapuilile va Isareli hati, va sukila oku eca ovinyama vi kuete uhayele oco ‘va taviwe laye.’ (Ovis. 22:18-20) Yehova ka tavele oku tambula ovilumba viovinyama vina vi vela. Cavali, osimbu omunu ka ecele ocilumba, tete wa sukilile oku li yelisa ndomo ca lekisiwile Vocihandeleko. Nda omunu ka li yelisile, wa sukilile oku eca ocilumba cekandu, oco a tumbulule ukamba waye la Yehova, osimbu ka ecele ocilumba caye lutima wosi. (Ovis. 5:5, 6, 15) Ocihandeleko caco, ca kuatele esilivilo liocili. Momo, Yehova wa popele hati, nda omunu ka li yelisile poku eca ocilumba combembua oku kongelamo ovilumba vina vi eciwa lutima wosi, wa sesamelẽle oku pondiwa. (Ovis. 7:20, 21) Pole, nda omunu eca ocilumba cimue ci kuete uhayele, o pamisa ukamba waye la Yehova, kuenda o kuata esanju lialua.—Tanga 1 Asapulo. 29:9.

OVILUMBA VI ECIWA KOLONEKE VILO

7, 8. (a) Onima yipi vamanji vana va likolisilako oku kuatisa kupange Wusoma va siata oku tambula? (b) Ovina vipi tu kuete oco tu kuatise lavio kupange wa Yehova?

7 Koloneke vilo, kuli vamanji valua va siata oku lieca olumue kupange wa Yehova. Kuenje, ocituwa caco ca siata oku sanjuisa utima wa Yehova. Oku linga upange woku kuatisa vamanjetu, ci nena asumũlũho alua. Manji umue wa litumbika kupange woku tunga Olonjango Viusoma, haeye o kuatisa omanu vana va pita lovilunga, wa lombolola okuti, oku linga upange waco, ca siata oku u nenela esanju lialua. Eye wa popia hati: “Eci ndi mola vamanji va kuete esanju omo lioku fetika olohongele Vonjango Yusoma yokaliye, ale ceci va tambula ekuatiso noke liocilunga cimue, ci lekisa okuti, upange waco u kuete esilivilo lia lua.”

Ovilumba vialua via enda oku eciwa lutima wosi, ndeci tua siata oku linga koloneke vilo (Tala ovinimbu 7-13)

8 Koloneke vilo, afendeli va Yehova voluali luosi, va siata oku kuatisa kupange woku kunda Usoma. Kunyamo wo 1904, Manji C. T. Russell, wa soneha ndoco: “Omunu lomunu wa nõliwa la Ñala, o sukila oku sokiya otembo, loku talavaya ciwa lolombongo lekuatiso liuloño waye, oco a ece esivayo ku [Yehova,] Cime caye.” Ndaño tu sima okuti ka ca lelukile oku linga upange wa Yehova, pole, tu pondola oku tambula asumũlũho alua. (2 Sam. 24:21-24)  Tu pondola ndati oku talavaya ciwa lovina tu kuete?

Vamanji va talavaya ko Betele kofeka yo Australia

9. Catiamẽla koku sokiya ciwa otembo yetu, tu pondola oku kuatisiwa ndati lonumbi ya Yesu yi sangiwa kelivulu lia Luka 10:2-4?

9 Otembo yetu: Tu sukila oku sokiya ciwa otembo yetu, loku likolisilako oco tu pongoluile alivulu etu kalimi akuavo, oku tunga olonjango Viusoma, olonjango violohongele vinene, oku sokiya olohongele viofeka, oku kuatisa vamanji vana va pita lovilunga, kuenda oku linga ovopange akuavo. Omo okuti tu kuete lika 24 kolowola veteke, Yesu wa tu ĩha onumbi yimue yi tu kuatisa oku sokiya ciwa otembo yetu. Eci Yesu a tuma olondonge viaye kupange woku kunda, wa vi sapuila hati: ‘Ko ka ambati ocipete, ndaño opatolonya, ale olohaku.’ (Luka 10:2-4) Momo lie Yesu a ecela olonumbi viaco kokuavo? Ulume umue ukuakukonomuisa Embimbiliya wa popia hati: “Koloneke via Yesu, omanu poku li lama ka va kuatele ocituwa coku likuata peka, pole, va enda oku likuata lika kapepe. Ovo, va enda oku pita otembo yalua loku linga ovina viaco.” Yesu wa vetiya olondonge viaye oco vi yuvule, ocituwa coku lihoyisa pokati. Eye wa vi kuatisa oku limbuka okuti, otembo yavo ya kala yitito, kuenda va sukilile oku pitisa kovaso ovina via velapo. (Va Efe. 5:16) Tu pondola ndati oku kapako elungulo lia Yesu oco tu kuate otembo yalua yoku kuatisa kupange Wusoma?

Akundi va kasi Vonjango Yusoma kofeka yo Kenia, vo Afrika

10, 11. (a) Olonjila vipi tua siata oku kuama poku eca olombanjaile oco tu kuatisa kupange Wusoma ukasi oku lingiwila voluali luosi? (b) Onumbi yi sangiwa kelivulu lia 1 Va Korindo 16:1, 2, yi tu kuatisa ndati?

10 Olombongo vietu: Tu sukila oku kuata olombongo oco tu kuatise kupange Wusoma. Unyamo lunyamo, ci soka ekũi liolohuluwa kolohuluwa violondolale, via siata oku eciwa ku vamanji va nyula akongelo, kakundi valikasi, kuenda kolomisionaliu, oco vi va kuatise. Tunde kunyamo wo 1999, kua tungiwa eci ci pitahãla 24.500 Kolonjango Viusoma, oku kongelamo kolofeka vina okuti, kuli uhukũi. Citava okuti, ku ka vokiyiwa eci ci soka 6.400 Kolonjango Viusoma. Olosãi viosi, kua siata oku pangiwa ci soka 100 kolohuluwa violohuluwa Viutala Wondavululi kuenda o Despertai!. Upange waco, wa siata oku lingiwa lekuatiso liolombanjaile.

11 Upostolo Paulu, wa tu ĩha onumbi yimue tu sukila oku kuama poku eca olombanjaile. (Tanga. 1 Va Korindo 16:1, 2.) Paulu wa vetiya vamanji kekongelo lio ko Korindo hati, ka va sukila oku kevelela toke kesulilo liosemana okuti, oco va sokiya olombanjaile va yongola oku eca. Pole, wa va vetiya oku sokiya olombanjaile viavo kefetikilo liosemana. Koloneke vilo, vamanji va siatavo oku sokiya olombanjaile va yongola oku eca, ndeci Akristão vo kocita catete va enda oku linga. (Luka 21:1-4; Ovil. 4:32-35) Omo liaco, Yehova wa siata oku sumũlũisa vamanji vana va kuete ocituwa coku eca olombanjaile.

Vamanji va Songuila Upange Woku Tunga Olonjango Viusoma, kofeka yo Estados Unidos vocikanjo co Tuxedo, ko Nova Yorke

12, 13. Ovina vipi via siata oku tateka vamanji vamue oku kuatisa kupange Wusoma? Yehova o pondola oku va kuatisa ndati?

12 Ongusu yetu, kuenda Uloño. Yehova wa siata oku tu kuatisa eci tu likolisilako oku linga upange Wusoma. Eye wa likuminya oku tu kuatisa nda tua kava. (Isa. 40:29-31) Tua siata hẽ oku sima okuti, ka tu kuete uloño woku kuatisa kupange Wusoma? Tu sima hẽ okuti, kuli vamanji va tẽla oku linga upange waco? Ivaluka okuti, Yehova o pondola oku kuatisa vamanji vosi, ndeci a linga poku kuatisa Becalele, la Aholiava.—Etu. 31:1-6; tala elitalatu kefetikilo liocipama cilo.

13 Yehova wa siata oku tu kuatisa oco ka tu ka liwekepo oku linga upange waye. (Olosap. 3:27) Osimbu va Yudea va kala oku semulula onembele ko Yerusalãi, Yehova wa va sapuila oco va limbuke esilivilo liupange va kala oku linga. (Hag. 1:2-5) Vamue pokati kavo, va pitisile kovaso ovina vikuavo, ­kuenje, va liwekelepo oku linga upange wa Yehova. Omo liaco, tu sukila oku kũlĩhĩsa nda ovina tu linga vi lekisa okuti, tua velisapo upange wa Yehova, ale sio.  Anga hẽ tu pondola oku sokolola ekalo liomuenyo wetu, oco tu linge esokiyo lioku kuatisa kupange woku kunda Usoma koloneke vilo via sulako?

TU ECI LUTIMA WOSI OVINA TU KUETE

14, 15. (a) Ovolandu a vamanji va kasi volofeka muli uhukũi a tu vetiya ndati? (b) Ocituwa cipi tu sukila oku kuata?

14 Omanu valua, va kasi volofeka vimue okuti, ka ca lelukile oku sanga ovina va sukila eteke leteke. Ocisoko ca Yehova, ca siata oku eca ‘ekuatiso’ ku vamanji vana va kasi volofeka viaco. (2 Va Kor. 8:14) Pole, vamanji vana ka va kuete ovina vialua, va velisapo esumũlũho li tunda koku eca. Yehova o sanjuka calua poku limbuka ndomo vamanji olohukũi va likolisilako oku eca ovina va kuete.—2 Va Kor. 9:7.

15 Vofeka yimue yo Afrika okuti muli uhukũi walua, vamanji vamue va siata oku lima ovapia. Noke yoku ungula, va landisa ovikulia vimue oco olombongo viaco vi kuatise kupange woku kunda olondaka viwa Viusoma. Omo okuti vofeka yaco mua lingiwile esokiyo lioku tungiwa Kuonjango Yusoma, vamanji va kuatisa kupange waco. Ndaño okuti Onjango yaco Yusoma ya kala oku tungiwa kotembo yoku lima, pole, vamanji va nõlapo oku kuatisa kupange konepa yomẽle. Kuenje, kekumbi, va enda kupange wavo woku lima ovapia. Momo, va kuata ocituwa coku lieca olumue kupange waco! Ongangu yavo, yi tu ivaluisa vamanji va kala ko Makedonia kocita catete. Ndaño okuti va kala ‘olohukũi,’ pole, va pinga ku Paulu oco va ece olombongo vioku kuatisa vamanji vakuavo. (2 Va Kor. 8:1-4) Omunu lomunu pokati ketu, o pondola oku eca ovina a kuete, omo liasumũlũho tua siata oku tambula ku Yehova.’—Tanga Esinumuĩlo. 16:17.

16. Tu limbuka ndati okuti, olombanjaile vietu vi taviwa la Yehova?

16 Poku eca olombanjaile vietu, tu sukila oku lavulula, oco ka tu ka liwekepo oku linga ovina vi kuete esilivilo lia velapo. Tu sukila oku kũlĩhĩsa oco tu limbuke okuti, olombanjaile vietu vi taviwa la Yehova, ndeci va Isareli va enda oku linga kosimbu. Nye ci pondola oku tateka olombanjaile vietu oku taviwa la Yehova? Tu sukila oku kapako ocikele tu kuete coku tekula epata lietu, kuenda oku fendela Yehova. Citava okuti tu kuatisa kupange woku tunga Olonjango Viusoma, oku kuatisa vamanji va pita lovilunga, ale oku linga ovopange akuavo. Pole, nda ka tu kuatisa epata lietu oku vumba Yehova, ale oku eca kokuavo ovina va sukila, ‘upange tu linga ka u kuata esilivilo.’ Ka tu pondola oku eca ku Yehova ovina ka tu kuete. (Tanga 2 Va Korindo 8:12.) Omo liaco, tu amamiko oku pamisa ukamba wetu la Yehova, oco tu taviwe laye. (1 Va Kor. 9:26, 27) Ivaluka okuti, nda tua kapako olonumbi Viembimbiliya, olombanjaile tu eca, vi tu nenela esanju, kuenda, ‘vi taviwa’ la Yehova.

OVILUMBA VIETU VI KUETE ESILIVILO LIA VELAPO

17, 18. Poku mola vamanji valua va kasi oku kuatisa kupange Wusoma, ci tu vetiya oku linga nye? Ovina vipi tu sukila oku kũlĩhĩsa lutate?

17 Kuli vamanji valua va siata oku lieca olumue ‘ndovilumba vioku nyua,’ oco va kuatise kovopange Usoma. (Va Fil. 2:17) Tu sanjuka calua poku mola vamanji va kuete ocituwa coku lieca olumue. Akãi kumue lomãla a vamanji va kuete ocikele coku songuila upange Wusoma, va pandiyiwavo omo liocituwa cavo coku eca ekuatiso ku vakuavo.

18 Vosi yetu tu likolisiliko oku kuatisa kupange Wusoma. Omo liaco, tu sukila oku likutilila oco tu sokiye otembo yoku kuatisa kupange waco. Nda tua ci linga, tu tambula onima koloneke vilo, kuenda asumũlũho alua ‘voluali luokaliye tu lavoka.’—Mar. 10:28-30.

^ tini. 2 Oco o kuate elomboloko lia suapo, tanga ocipama ci sangiwa Vutala Wondavululi 15 ya Susu, wo 2012, losapi hati: “Tu Eci Lutima Wosi Ovilumba ku Yehova,” kamẽla 21-25.