Skip to content

Skip to table of contents

Olombangi Via Yehova

Select language Umbundu

 ULANDU WA TUNDA VOCISELEKO CETU CALIVULU

“Nda Kala Ndombeu Ya Iñila Vocikoko Caye”

“Nda Kala Ndombeu Ya Iñila Vocikoko Caye”

UPANGE woku kunda wa lingiwa vokuenda kuoloneke ecea oku upisa kosãi Yenyenye toke Yenyenye Linene, kunyamo wo 1929, kua kala eci cisoka 10.000 ya vamanji, va kundila kolonepa viosi viofeka yo Estados Unidos. Ovo va eca alivulu alua komanu. Pokati kakundi vaco Vusoma, pa kala ocita cakundi valikasi. Kuenje, etendelo liakundi lieya oku livokiya lonjanga! Okokanda kamue ka tukuiwa hati, Buletim *, ka lombolola okuti, akundi votembo yosi va linga “upange umue u komohisa” oku upisa kunyamo wo 1927, toke wo 1929.

Kunyamo wo 1929, vofeka mua kala ekambo liolombongo. Ondando yovina ya li vokiyile calua volupale luo Nova Yorke, oku upisa Vovali keteke 29 kosãi ya Mbalavipembe yunyamo wo 1929. Omanu veya oku sumua calua omo liocitangi caco. Momo, volombango ka mua kalele olombongo vialua, kuenda omanu va liwekelepo oku lima ovapia. Olonjo vinene viovopange via yikiwile, kuenda, omanu valua va liwekelepo oku talavaya kovopange avo omo liocitangi caco. Kunyamo wo 1933, ondando yoku fetela olonjo ya livokiyile, momo eteke leteke, va enda oku feta ci soka 1.000 kolombongo vio kofeka yaco.

Akundi votembo yosi va tẽla ndati oku kunda olondaka viwa kotembo yovitangi viaco? Va yula ocitangi caco poku tunga olonjo vimue viendela kalola oco va kalemo. Kuenje, ca va kuatisa oku amamako kupange wakundi votembo yosi, momo ka va sukilile vali oku sanda olombongo vioku fetela onjo, kuenda elisimu. * Kotembo yohongele yofeka, onjo yaco yendela kalola, yi kala ndowotele. Kunyamo wo 1934, okokanda losapi hati, Buletim okuti cilo ka tukuiwa hati: Upange Wetu Wusoma, ka lombolola ndomo vamanji va sukilile oku posuisa onjo yaco okuti, mu kapiwa ovava, iko lioku teleka, ula, kuenda yi tungiwa lonjila yimue okuti, ka mu iñila ombambi.

Omo okuti akundi vaco va loñolohele calua, va tẽla oku tunga olonjo viavo vi endela kalola. Manji umue o tukuiwa hati, Victor Blackwell, wa popia hati: “Omo okuti Noha ka kũlĩhĩle ndomo a laikele oku tunga ocimbaluku, ame sia kuatelevo uloño woku tunga onjo yendela kalola.” Pole, Noha wa tẽla oku tunga ocimbaluku.

Vamanji va kasi oku yoka olui lonjo yavo yendela kalola, kotembo yombela kofeka yo India

Vamanji ndeci: Avery, Lovenia, kuenda Bristow, va kuata onjo yendela kalola. Manji Avery wa popia hati: “Nda kala ndombeu ya iñila vocikoko caye, momo poku linga ovongende nda enda oku ambata onjo yange yendela kalola.” Manji Bristow, la Harvey, kuenda Anne Conrow, okuti va kala akundi votembo yosi, va kuata onjo yimue yendela kalola okuti, vovimano viaco va kapelemo olopapelo. Poku linga ungende lonjo yaco, olopapelo via enda oku loluka vovimano. Omo liaco, manji Avery wa popia hati: “Tunde kosimbu, lomue wa muile onjo yaco yendela kalola, kuenda lomue weya oku yi mola vali oku upisa kotembo yaco!” Pole, manji Avery wa popiavo hati, manji Conrow kumue lukãi waye, kuenda omãla vaye vavali, “va kuata esanju vepata.” Manji Harvey Conrow wa soneha doco: “Ka tua la kambela lacimue, momo Yehova wa tu kuatisa poku linga upange waye, kuenda wa lekisa ocisola kokuetu.” Noke, manji Conrow kumue lepata liaye, veya oku pindisiwa Kosikola yo Gileada, kuenje, va tumiwa kofeka yo Peru, kupange wumisionaliu.

Manji Maton kumue lepata liaye, va kalavo akundi votembo yosi. Kunyamo wo 1929, eci manji Giusto a limbuka okuti ukãi waye Vincenza wa mina, va posuisa ciwa Onjo Yavo yendela Kalola, kuenje, “ya linga ndowotele” okuti, muna va kala tete yi sule. Ndaño okuti va kuata omõla utito, pole, va  amamako oku kundila vocikanjo cimue kofeka yo Estados Unidos mua kala omanu vo ko Italia.

Ndaño okuti omanu valua va tava oku va kundila olondaka viwa, pole, vamue ka va endele oku eca olombanjaile vialivulu va tambula omo liuhukũi, kuenda ekambo liupange. Pole, poku tambula alivulu va enda oku eca ovina viwa va kuata. Kuenje, akundi vavali votembo yosi, va soneha eci ci soka 64 kolombanjaile va tambula okuti, “via kala ndovina via tunda vovenda yimue.”

Onjanja yimue, eci manji Fred Anderson a kala kupange woku kunda, wa sanga omunu umue vepia okuti, wa yonguile oku tambula alivulu, kuenje, wa eca ombanjaile yovinokolo via inaye. Eci manji a pitĩla vepia likuavo, wa sangavo ulume umue wa lekisa onjongole yoku tambula alivulu etu. Pole, wa popia hati: Si pondola oku tanga omo liekambo liovinokolo.” Eci manji a eca ovinokolo kulume waco, wa fetika oku tanga alivulu, kuenje, wa eca ombanjaile yalivulu, kuenda yovinokolo a tambula.

Onjanja yimue, manji Herbert Abbott, wa ambatele ocamba colosanji vekãlu liaye. Noke yoku landa olosanji vitatu ale vikuãla, o vi landisa vali pocitanda, oco a lande ongasolina yoku kapa vekãlu liaye. Eye wa popia hati: “Anga hẽ tua kala otembo yimue okuti ka tua kuatele olombongo? Ndaño okuti otembo yimue ka tua kuatele olombongo, pole, ka tua liwekelepo oku linga ungende. Eci tu limbuka okuti vekãlu lietu ka muli ongasolina, tu likutilila ku Yehova oco a tu kuatise.”

Manji Maxwell la Emmy Lewis va kolelele ku Yehova, vokuenda kuotembo yovitangi. Onjanja yimue, eci kua kala ombela lofela yalua, uti umue wa kupukila vetapalo, kuenje, wa tateka ungende wavo. Ndaño okuti wa nyola onepa yimue yonjo yavo, pole, va puluka kocilunga caco. Omo liaco, manji Maxwell wa soneha ndoco: “Ovilunga viaco ka via kalele ocitangi kokuetu, kuenda ka tua kuatele ovisimĩlo vioku liwekapo oku linga upange wetu. Momo, tua kuata upange walua wa sukilile oku lingiwa.” Lekuatiso lia vamanji, va tẽla oku semulula onjo yavo yendela kalola.

Ndaño okuti koloneke vilo kuli ovitangi vialua, pole, Olombangi Via Yehova voluali luosi, via siata oku likolisilako oku tẽlisa ovikele viavo, ndeci akundi va tukuiwa vocipama cilo va linga. Omo liaco, tua nõlapo oku amamako oku kunda olondaka viwa Viusoma, toke eci Yehova a ka popia hati, upange waco wa tẽlisiwa.

^ tini. 3 Cilo, okokanda kaco ka tukuiwa hati: Upange Wetu Wusoma.

^ tini. 5 Kotembo yaco, akundi votembo yosi ka va kuatele upange woku sanda eteku. Omo liaco, olombanjaile va enda oku tambula poku eca alivulu kupange woku kunda, ovio via va kuatisa oku landa ovina va sukila.