Skip to content

Skip to table of contents

Olombangi Via Yehova

Select language Umbundu

Pokoli Kangombo va Yehova

Pokoli Kangombo va Yehova

“Pokoli kasongui vene loku linga eci va tuma, momo va kasi oku lavulula ovimuenyo viene.”—VA HEV. 13:17, NW.

1, 2. Momo lie Yehova a li sokisila lungumbo?

YEHOVA o li sokisa lungombo. (Esek. 34:11-14) Olondaka evi vi tu kuatisa oku kũlĩha ndomo Yehova a tuwa. Ungombo ukuacisola, o kuete ocikele coku lava ciwa olomeme viaye. O vi songuila kocitumãlo kuli okulia, kuenda ovava. (Osa. 23:1, 2) O lava ciwa olomeme viaye kutanya, kuenda kuteke. (Luka 2:8) O vi teyuila kovinyama vi yongola oku vi ponda. (1 Sam. 17:34, 35) O lava ciwa olomeme vina via citiwa ndopo. (Isa. 40:11) Ungombo waco o sandiliya olomeme via nyelela, kuenda o tata ciwa vina vi vela.—Esek. 34:16.

2 Kosimbu, omo okuti afendeli va Yehova va enda oku talavaya vovapia, va kuata elomboloko lieci Yehova a li sokisila lungombo. Momo, angombo vaco va kũlĩhĩle ovina olomeme vi sukila oco vi kuate uhayele, kuenda oku amamako lomuenyo. Cimuamue haico ci pita lafendeli va Yehova okuti, va sukila oku songuiwa lolonumbi viaye. (Mar. 6:34) Nda ka va tatiwa ciwa la Yehova, va tala ohali, kuenje, va kala ‘ndolomeme ka vi kuete ungombo,’ momo ka va kũlĩhĩle eci ciwa leci cĩvi. (1 Olos. 22:17) Pole, Yehova wa siata oku linga eliangiliyo lioku eca ovina viosi afendeli vaye va sukila.

3. Ovina vipi tu konomuisa vocipama cilo?

3 Koloneke vilo, tua kũlĩhavo ndomo Yehova a sokisiwa lungombo. Eye wa siata oku linga eliangiliyo lioku kuatisa omanu vana va kasi ndolomeme. Omo liaco, tu konomuisi ndomo Yehova a kasi oku songuila olomeme viaye koloneke vilo, kuenda ndomo a siata oku eca ovina vi sukila. Tu konomuisavo ndomo olomeme vi limbuka ocisola Yehova a siata oku lekisa kokuavo.

UNGOMBO UWA O PINDISA VAKUAVO

4. Yesu wa siata oku tata ndati olomeme via Yehova?

4 Yehova wa nõla Yesu oco a linge Utue wekongelo Liakristão vocili. (Va Efe. 1:22, 23) Omo okuti Yesu eye “ungombo uwa,”  wa siata oku lekisa ovituwa ndevi via Isiaye. Yesu ‘wa eca omuenyo waye oco a yovole olomeme viaye.’ (Yoa. 10:11, 15) Ocisembi ca Kristu, ca nena asumũlũho komanu! (Mat. 20:28) Momo, Yehova o yongola okuti, omanu ‘vana va kolela komõlaye wongunga, ka va fi, pole, va kuata omuenyo ko pui’!—Yoa. 3:16.

5, 6. (a) Velie Yesu a nõla oco va songuile olomeme viaye? Ovina vipi olomeme vi sukila oku linga oco vi kuatisiwe leliangiliyo liaco? (b) Nye ci tu vetiya oku pokola kakulu vekongelo?

5 Olomeme via siata oku tava ndati ku Yesu Kristu, Ungombo Uwa? Yesu wa popia hati: “Olomeme viange vi yeva ondaka yange. Nda vi kũlĩha, kuenje vi ñuama.” (Yoa. 10:27) Oku yevelela ondaka Yungombo Uwa, ci lomboloka oku tava kovina viosi a tuma. Vovina viaco mua kongela oku pokola kolonumbi vi eciwa lakulu vekongelo va nõliwa lespiritu lia Yehova. Yesu wa popia hati, ovapostolo kumue lolondonge viaye va laikele oku amamako oku linga upange a fetika. Ovo, va sukilile ‘oku longisa olomeme via Yesu, kuenda oku vi tekula.’ (Mat. 28:20; tanga Yoano 21:15-17.) Osimbu olondaka viwa via kala oku kundiwila kolonepa vikuavo, etendelo liolondonge lia kala oku li vokiya. Omo liaco, Yesu wa nõla alume va loñoloha oco va songuile akongelo.—Va Efe. 4:11, 12.

6 Kocita catete, upostolo Paulu wa sonehela akulu vekongelo ko Efeso va nõliwile lekuatiso liespiritu sandu poku va sapuila hati: ‘Lisi ekongelo lia Suku.’ (Ovil. 20:28) Cimuamue haico ci kasi oku pita lakulu vekongelo koloneke vilo. Momo, va nõliwavo lekuatiso liespiritu sandu, ndomo ca lekisiwa Vembimbiliya. Omo liaco, nda tu pokola kakulu vekongelo, ci lekisa okuti, tua sumbila Yehova, kuenda Yesu. Momo, ovo angombo va velapo. (Luka 10:16) Eli olio esunga lieci tu sukilila oku pokola kakulu vekongelo. Pole, kuli esunga likuavo lieci tu sukilila oku pokola kokuavo.

7. Akulu vekongelo va siata oku tu kuatisa ndati oco tu amameko oku pamisa ukamba wetu la Yehova?

7 Akulu vekongelo va siata oku kuama olonumbi Viembimbiliya oco va kuatise vamanji. Poku eca olonumbi viaco, ka va nõlelako vamanji onjila va yongola oku kuama komuenyo wavo. (2 Va Kor. 1:24) Pole, va eca olonumbi Viembimbiliya oco vi va kuatise oku nõla onjila ya sunguluka, kuenda oku va vetiya oku kuata ombembua vekongelo. (1 Va Kor. 14:33, 40) Akulu vekongelo poku ‘lavulula ovimuenyo vietu,’ va ci linga locimaho coku kuatisa vamanji vosi oco va pamise ukamba wavo la Yehova. Nda va limbuka okuti manji umue ‘wa lueya,’ va eca lonjanga ekuatiso a sukila. (Va Gal. 6:1, 2; Yuda 22) Eli hẽ halioko esunga lieci tu sukilila oku ‘pokola kakulu vekongelo’?—Tanga Va Heveru 13:17.

8. Akulu vekongelo va siata oku teyuila ndati ocunda ca Suku?

8 Omo okuti upostolo Paulu wa kala ungombo umue uwa, wa sonehela vamanjaye vekongelo lio ko Kolosai poku va sapuila hati: ‘Lunguki sanga umue o nyõla etavo liene lovilongua viesanda. Va sole oku tõlisa ovisila viomanu loviholo violuali, vina ka via tundile ku Kristu.’ (Va Kol. 2:8) Olondaka evi vi tu kuatisa oku limbuka esilivilo lioku pokola kalungulo a eciwa lakulu vekongelo. Ovo va teyuila vamanji kovina vi pondola oku nyõla ekolelo liavo. Upostolo Petulu wa lungula eci catiamẽla koku yuvula ‘ovaprofeto vesanda, kuenda alongisi vesanda’ va seteka oku yapuisa ‘omanu va hongua.’ (2 Pet. 2:1, 14)  Koloneke vilo, akulu vekongelo va siatavo oku eca ekuatiso vamanji va sukila. Omo okuti va loñoloha, va kũlĩha ovina vialua komuenyo wavo. Osimbu handi ka va nõliwile oco va linge akulu vekongelo, ovituwa viavo vi lekisa okuti, va kuete ukũlĩhĩso wa suapo Wembimbiliya, kuenda va pondola oku longisa ovina viocili. (1 Tim. 3:2; Tito 1:9) Ukũlĩhĩso Wembimbiliya va kuete, u va kuatisa oku eca ku vamanji olonumbi via sunguluka.

Ndeci ungombo a teyuila ocunda caye, akulu vekongelo va teyuilavo olomeme vi kasi peka liavo (Tala ocinimbu 8)

ANGOMBO VAWA VA KUATISA KUENDA VA TEYUILA OCUNDA

9. Koloneke vilo, Yesu wa siata oku eca ndati olonumbi, loku kuatisa ekongelo Liakristão vocili?

9 Yehova lekuatiso liocisoko caye, wa siata oku linga eliangiliyo lioku eca olonumbi vi pamisa ekolelo liafendeli vaye va sangiwa voluali luosi. Alungulo alua Embimbiliya, a siata oku sandekiwa valivulu etu. Olonjanja vimue ocisoko ca Yehova, ca siata oku eca olonumbi kakulu vekongelo lekuatiso liovikanda, ale la vamanji va nyula akongelo. Omo liaco, olomeme via siata oku tambula olonumbi vi sukila.

10. Ocikele cipi akulu vekongelo va kuete oco va kuatise vana va tunda vekongelo?

10 Akulu vekongelo, va kuete ocikele coku teyuila olomeme, kuenda oku vi lava. Ovo va sukila oku kuatisa vamanji vana va tepulula ukamba wavo la Yehova, ale vana va linga akandu anene. (Tanga Tiago 5:14, 15.) Citava okuti vamanji vamue va tunda vekongelo, kuenda va liwekapo oku fendela Yehova.  Akulu vekongelo ka va sukila hẽ oku sandiliya omanu vaco loku va vetiya oku tiuka vekongelo? Va sukila oku ci linga! Momo, Yesu wa popia hati: ‘Isiange o kasi kilu, ka yongola okuti, yimue pokati kolomeme viaye yi fa.’—Mat. 18:12-14.

TU TENDA NDATI AKULUEYA AKULU VEKONGELO?

11. Momo lie vamanji vamue ka va pokuila kalungulo a eciwa lakulu vekongelo?

11 Yehova kumue la Yesu, Angombo vamue va lipua. Pole, akulu vekongelo va kuete ocikele coku songuila akongelo, ka va lipuile. Omo liaco, pamue vamanji vamue ka va pokola kolonumbi vi eciwa lakulu vekongelo, kuenje, va li sandela esunga poku popia vati: ‘Akulu vekongelo ka va lipuile, kuenda va kasi ndetu. Momo lie tu sukilila oku pokola kalungulo avo?’ Ocili okuti, akulu vekongelo ka va lipuile. Pole, tu sukila oku yuvula oku kapako akulueya avo.

12, 13. (a) Alume vana Yehova a nõlele oco va songuile afendeli vaye, va lingile akandu api? (b) Momo lie Yehova a ecelela okuti akandu aco a sonehiwa Vembimbiliya?

12 Vembimbiliya mu sangiwa ovolandu omanu va lueya okuti, va nõliwile la Yehova oco va songuile afendeli vaye kosimbu. Umue pokati komanu vaco Daviti, una wa kala osoma ya nõliwa oco a songuile va Isareli. Pole, weya oku yapuisiwa, kuenje wa linga ukahokolo, kuenda wa ponda omunu umue. (2 Sam. 12:7-9) Tu kũlĩhĩsivo ulandu wa pita lupostolo Petulu. Ndaño okuti wa kuatele ocikele vekongelo Liakristão vocili kocita catete, pole, wa linga akandu anene. (Mat. 16:18, 19; Yoa. 13:38; 18:27; Va Gal. 2:11-14) Yesu eye lika wa lipua okuti, ka kongeliwile kekandu liomanu va tunda kocikoti ca Adama la Heva.

13 Momo lie Yehova a ecelela okuti, ovolandu akandu omanu vana a nõlele a sonehiwa Vembimbiliya? Wa ci lingila oco a lekise okuti, ndaño omanu ka va lipuile, pole, o nõla vamue oco va songuile afendeli vaye. Oco ka tu ka kapeko akulueya akulu vekongelo, tu sukila oku yuvula oku lisiõsiõla, ale oku tomba ocikele cavo coku tu songuila. Yehova o yongola okuti, tu sumbila akulu vekongelo, loku pokola kokuavo.—Tanga Etundilo 16:2, 8.

14, 15. Nye tu pondola oku lilongisa konjila Yehova a kuama ndomo a ecele olonumbi vioku songuila afendeli vaye kosimbu?

14 Koloneke vilo, oku pokola kakulu vekongelo, ci kuete esilivilo. Sokolola ndomo Yehova a enda oku sapela lafendeli vaye eci va liyaka lovitangi kosimbu. Eci va Isareli va tunda Kegito, Yehova wa nõla Mose la Arone, oco va ece olonumbi kafendeli vaye. Va Isareli va sukililevo oku pokola kolonumbi via Yehova, oco va popeliwe kafengi ekũi. Noke, va va sapuila oco va pongiye okulia kumue ku likasi, oku ponda omeme yimue, loku pesila osonde yaco povikuli, kuenda pavindi apito olonjo viavo. Omanu ka va tambuile olonumbi viaco lekuatiso liondaka yimue ya tunda kilu. Pole, va yeva ondaka yaco lekuatiso lia Arone wa pindisiwile la Mose. (Etu. 12:1-7, 21-23, 29) Omo liaco, Yehova wa nõla Mose la Arone, oco va ece olonumbi kafendeli vaye. Koloneke vilo, Yehova wa nõlavo akulu vekongelo oco va ece olonumbi kafendeli vaye.

15 Citava okuti, ivaluka ovolandu Embimbiliya a lekisa ndomo Yehova a nõla omanu, ale ovangelo, oco va ece olonumbi kafendeli vaye. Olonumbi viaco via popela omuenyo womanu valua. Momo Yehova wa limbuka okuti, wa sukilile oku nõla alume vamue oco va songuile afendeli vaye. Alume vaco, va sapuila omanu ovina va sukilile oku linga oco va popeliwe kovitangi via laikele oku iya.  Anga hẽ tua kolela okuti, Yehova o ka kuama onjila yimuamue oco a popele afendeli vaye vuyaki wo Harmagedo? Omo liaco, akulu vekongelo va nõliwa la Yehova oco va songuile ocisoko caye koloneke vilo, va sukila oku yuvula oku linga ovina ka vi likuata lolonumbi viaye.

“OCUNDA CIMUAMUE LUNGOMBO UMUAMUE”

16. ‘Ondaka’ yipi tu sukila oku yevelela?

16 Afendeli va Yehova va kasi ‘vocunda’ cimuamue, vemehi lia Yesu Kristu okuti, eye ‘ungombo wavo.’ (Yoa. 10:16) Yesu wa sapuila olondonge viaye hati, o kala lavio “oloneke viosi toke kesulilo lioluali” lulo. (Mat. 28:20) Omo okuti Yesu eye Osoma yo kilu, o lete ovina viosi vi ka pita osimbu ka nyõlele oluali lulo lua Satana. Oco tu amameko oku likuata omunga vocisoko ca Yehova, tu pokoli ‘kondaka yi tu sapuila’ onjila tu sukila oku kuama. ‘Vondaka’ yaco, mua kongela oku kapako ovina espiritu sandu lia Suku li tu sapuila lekuatiso Liembimbiliya. Tu sukilavo oku yevelela kovina Yehova la Yesu va kasi oku sapuila kakulu vekongelo va nõliwa oco va songuile akongelo.—Tanga Isaya 30:21; Esituluilo 3:22.

Akulu vekongelo va siata oku teyuila vamanji vana va tekula omãla likaliavo, oco ka va ka yapuisiwe lakamba vãvi (Tala ovinimbu 17, 18)

17, 18. (a) Ovina vipi vi kapa kohele afendeli va Yehova? Kovina vipi tu sukila oku kolela? (b) Nye tu ka konomuisa vocipama ci kuãimo?

17 Satana o sokisiwa ‘lohosi yi koma loku sandiliya u a lia.’ (1 Pet. 5:8) Ndeci ocinyama cimue ca tema ci sandiliya umue a lia, cimuamue haico Satana a kasi oku linga okuti, o sandiliya epuluvi lioku kuata omeme yimue ya hongua, ale ya tunda pokati kolomeme vikuavo. Eli olio esunga lieci tu sukilila oku kala kumosi la vamanji, kuenda ‘lakulu vekongelo va kuete ocikele coku tu lava.’ (1 Pet. 2:25) Elivulu Liesituluilo 7:17, li tu sapuila ovina viatiamẽla koku puluka kohali ya piãla hati: ‘Kameme okuti Yesu, o ka songuila omanu kolono viovava omuenyo, kuenje, Suku o ka puenya asuelẽla osi vovaso avo.’ Ohuminyo eyi, yi komõhisa calua!

18 Omo okuti tua konomuisa ocikele akulu vekongelo va kuete, tu sukila oku lipula ndoco: ‘Akulu vekongelo va limbuka ndati okuti, va kasi oku lava olomeme via Yesu lonjila yimue ya sunguluka?’ Etambululo liepulilo eli, li ka konomuisiwa vocipama ci kuãimo.