Skip to content

Skip to table of contents

Olombangi Via Yehova

Select language Umbundu

O Pondola hẽ Oku Likolisilako Oku Lungula Omanu?

O Pondola hẽ Oku Likolisilako Oku Lungula Omanu?

Kesulilo liocita cakũi avali, volupale luo San Francisco, kofeka yo Estados Unidos, mua lekisiwa o filme yimue ka ya kuatele ocileñi yi tukuiwa hati: A Trip Down Market Street. Omanu va lekisa o filme yaco, va kapa olomakina kilu liekãlu limue lia kala vetapalo. Kuenje, ya taliwa lomanu va endela kolokavalu vi koka olokalosa, vakuakulanda ovina, vakuakuendisa akãlu, la vakuakulandisa ovikanda viasapulo, kuenda omanu vakuavo.

O filme yaco ya lekisa ovina ka via sungulukile viatiamẽla kocilunga cinene ca pita keteke 18 kosãi ya Kupupu kunyamo wo 1906 okuti, ca ponda omanu valua kuenda ca nyõla onepa yimue yolupale. Vo filme yaco mua lekisiwavo omanu vamue va panda kolofa. Ulume umue o tukuiwa hati, Scott Miles okuti, watiamẽla kocimunga ca vakuakulekisa olofilme wa popia hati: “Nda mola lika omanu va kala oku tala ohali okuti, ka va kũlĩhĩle ovitangi vikuavo va laikele oku pita lavio. Ndaño okuti ku pondola oku va kuatisa, pole o yeva esumuo lialua.”

Ocilunga ca pita kunyamo wo 1906, ca nyõla onepa yimue yolupale luo San Francisco

Koloneke vilo, tu lavokavo ocilunga cimue okuti, lalimue eteke ca pitile handi voluali. Ndaño okuti ka tu pondola oku kuatisa omanu, pole tu yeva esumuo lialua. Momo, va sakalala lika loku linga ovopange avo muẽle, pole ka va kapeleko ocilunga ci laika oku iya ci ka ñyola oluali lulo lua vĩha. Ndaño okuti voluali mua siata oku pita ovilunga vimue viya ocipikipiki, pole tu kuete epuluvi lioku sapuila omanu catiamẽla kocilunga ceteke lia Yehova ci laika oku iya. Omo liaco, olosemana viosi tu sukila oku sanda otembo yoku kundila omanu konjo lanjo. Anga hẽ o pondola oku vokiya ombili oco okundile omanu?

YESU WA KUATA OMBILI KUPANGE WOKU KUNDA

Ongangu ya Yesu ya lekisa okuti, wa kuata ombili kupange woku kunda. Eye wa kundila omanu vosi ndeci: Vakuakutambula elisimu, kuenda eci a kala oku puyuka wa kundila ukãi umue u Samaria. (Luka 19:1-5; Yoa. 4:5-10, 21-24) Eci Yesu a kala oku puyuka wa sanda epuluvi lioku longisa omanu. Ohenda a kuatela omanu, yo vetiya oku va kuatisa. (Mar. 6:30-34) Koloneke vilo, tu pondola ndati oku kuama ongangu ya Yesu yoku lekisa ombili kupange woku kunda?

VA SANDA EPULUVI LIOKU KUNDILA OMANU

Manji Melika, o kasi vosapalalo yimue yi laviwa lolondavululi. Omanu valua a lisungue lavo, va tunda kolofeka vikuavo, kuenda olonduko viavo ka vi sangiwa kulala wotelefone.  Eye wa siata oku sanjukila epuluvi a kuete lioku sapela lomanu va kasi vosapalalo yaco poku iñila, ale poku tunda. Omo liaco, wa popia hati: “Ndi tenda osapalalo yaco ndocikanjo cange.” Manji Melika poku enda kupange woku kunda, wa siata oku ambata alivulu valimi a litepa, kuenda omanu valua va tava oku tambula otuikanda, lolorevista. Eye wa siatavo oku lekisa omanu vonumbi yetu yo jw.org. Omo liaco, o kuete epuluvi lioku longisa omanu valua Embimbiliya.

Manji Sonia, wa siatavo oku kundila omanu vosi a li sanga lavo. Omo okuti o talavaya kosipitali, o likolisilako oku kundila vana a talavaya lavo. Tete, o kũlĩhĩsa ovina omunu lomunu a sukila, oco a limbuke ndomo a pondola oku u kuatisa. Vepuluvi lionanya, o sapela lomanu ovina viatiamẽla Kembimbiliya. Omo liaco, wa fetika oku longisa omanu vavali Embimbiliya. Eye wa siatavo oku kundila omanu vana va kasi vohondo yoku kevelela ndotolo.

SANDA EPULUVI LIOKU KUNDILA OMANU

Ulume umue wa puluka kocilunga ca pita kunyamo wo 1906, wa popia hati: “Ocilunga caco ca nyõla ovina vialua volupale.” Pole, tu lavoka eteke ku keya ocilunga cimue cinene ci ka nyõla ‘omanu vosi ka va yongola oku kũlĩha Yehova Suku.’ (2 Va Tes. 1:8) Yehova o yongola okuti, omanu vosi va kuata epuluvi lioku tava kesapulo lielungulo li kasi oku eciwa lafendeli vaye, oco va linge apongoloko komuenyo wavo.—2 Pet. 3:9; Esit. 14:6, 7.

Wa siata hẽ oku sanda epuluvi lioku kundila omanu osimbu enda kovopange eteke leteke?

Koloneke vilo viohali, o kuete epuluvi lioku kundila omanu oco va yuvule oku sakalala lika lovina viavo muẽle, pole, va lekisa onjongole yoku sandiliya Yehova. (Sof. 2:2, 3) Wa siata hẽ oku sanda epuluvi lioku kundila omanu vana o talavaya lavo kupange woku sanda eteku, vana o lisungue lavo, kuenda vana o lisanga lavo kovopange eteke leteke? O pondola hẽ oku likolisilako oku linga upange waco?