Skip to content

Skip to table of contents

Olombangi Via Yehova

Select language Umbundu

Yuvula “Oku Funguila Yehova”

Yuvula “Oku Funguila Yehova”

“Ekambo liolondunge li yapula omunu vonjila ya sunguluka, kuenje, o funguila Yehova.”—OLOSAP. 19:3, NW.

1, 2. Momo lie tu sukilila oku yuvula oku lundila Yehova loku sima okuti, eye wa siata oku kokela ovitangi komanu? Tukula ulandu umue.

SOKOLOLA ndeci okuti ove ulume umue o kuete esanju volohuela vokuenda kuanyamo alua. Pole, eteke limue eci wa pitĩla konjo yove wa sanga okuti ovikuata viosi via nyõliwa, alonga osi a tetoka, kuenda onjo yaco yi kasi ndu okuti mua pita ocilunga cimue. Helie osima okuti eye wa nyõla ovikuata viove? Anga hẽ ca sunguluka oku pula hati: ‘Momo lie ukãi wange a nyõlela ovikuata?’ Ale o linga epulilo likuavo ndoco: “Helie wa nyõla ovikuata?” Momo lie o lingila epulilo eli? Momo, wa kũlĩha okuti ukãi wove ka kuete utõi woku nyõla ovikuata viene vio vonjo.

2 Koloneke vilo, voluali mue yuka evĩho, ungangala, kuenda oku vĩhisiwa kuofela. Etu Tuakristão vocili tua kũlĩha okuti, Yehova hayeko wa siata oku nena ovitangi viaco voluali. Eye wa lulika oluali oco lu linge ocumbo ceposo. (Efet. 2:8, 15) Yehova eye Suku yocisola. (1 Yoa. 4:8) Elilongiso Liembimbiliya lia siata oku tu kuatisa oku limbuka esunga lieci voluali mue yukila ovitangi. Momo Satana Eliapu, eye ‘ombiali yoluali lulo.’—Yoa. 14:30; 2 Va Kor. 4:4.

3. Tu pondola ndati oku kuata ovisimĩlo ka via sungulukile omo liovitangi vietu?

3 Tu sukila oku yuvula oku lundila Satana loku sima okuti, eye lika wa siata oku tu kokela ovitangi viosi tu liyaka lavio. Momo lie? Momo vimue pokati kovitangi viaco vi tunda kakulueya etu. (Tanga Esinumuĩlo 32:4-6.) Tua kũlĩha okuti, ekambo lietu lioku lipua, li pondola oku tu vetiya oku kuata ovisimĩlo ka via sungulukile okuti, vi tu nenela ovitangi. (Olosap. 14:12) Ovitangi viaco viya ndati? Nda ka tua lavuluile tu sima okuti, vimue pokati kovitangi viaco ka vi tundi kakulueya etu, ale ku Satana. Pole, tu fetika oku lundila Yehova loku sima okuti, eye wa siata oku tu kokela ovitangi viosi tu liyaka lavio. Nda tua kuata ocituwa caco, tu “funguila Yehova.”—Olosap. 19:3.

4, 5. Ukristão o pondola ndati oku “funguila Yehova”?

 4 Ca sunguluka hẽ oku “funguila Yehova”? Oku kuata ocituwa caco, uveke. (Isa. 41:11) Onima yipi yi tunda koku funguila Yehova? Onjanja yimue usonehi umue wa popele hati: “Lomue o tẽla oku liyaka la Suku.” Pamue tu sima okuti, lalimue eteke tua funguilile Yehova. Pole, elivulu Liolosapo 19:3 li popia hati: ‘Omunu una okuti eveke o yapuka vonjila ya sunguluka, kuenje, o funguila Yehova.’ Olondaka evi vi lomboloka okuti, pamue omunu o funguila Yehova vutima waye. Citava okuti o lekisa ocituwa caco volonepa via litepa ndeci: Oku tunda vekongelo, ale oku tepulula ombili yaye koku kuatisa kupange wa Yehova.

5 Nye ci pondola oku tu vetiya oku “funguila Yehova”? Tu yuvula ndati onjanjo yaco? Oku kũlĩha atambululo kapulilo a lingiwa ndeti, ci kuete esilivilo. Momo ci tu kuatisa oku teyuila ukamba wetu la Yehova Suku!

NYE CI PONDOLA OKU TU VETIYA “OKU FUNGUILA YEHOVA”?

6, 7. Momo lie va Isareli koloneke via Mose va lisiõsũilila Yehova?

6 Nye ci pondola oku vetiya manji umue oku funguila Yehova Suku yaye? Tu konomuisi atosi atãlo a lekisa ndomo omanu vamue kosimbu va wila vonjanjo yaco.—1 Va Kor. 10:11, 12.

Oku yevelela olondaka vĩvi ci ku nenela ovitangi (Tala ocinimbu 7)

7 Ovina vĩvi vakuetu va popia, vi pondola oku tu yapuisa. (Tanga Esinumuĩlo 1:26-28.) Sokolola eci ca pita la va Isareli eci va yovuiwa kupika Kegito. Yehova wa nenele ekũi liafengi, kuenda wa nyõla Fareo kumue lolohoka viaye Vokalunga Kakusuka. (Etu. 12:29-32, 51; 14:29-31; Osa. 136:15) Ndaño okuti va Isareli va kala ocipepi loku iñila Vofeka Yohuminyo, pole, vamue pokati kavo va fetika oku lisiõsũila Yehova. Nye ca va vetiya oku kuata ekambo liekolelo? Esapulo lĩvi va tambula kalume va tumiwile oku konomuisa ofeka, olio lia va vetiya oku ci linga. (Ate. 14:1-4) Nye ceya oku pita lavo? Vosi yavo ka va taviwile oku iñila ‘vofeka yiwa.’ (Esin. 1:34, 35) Anga hẽ ovina vĩvi vakuetu va siata oku popia vi tepulula ekolelo lietu, kuenje, ka tu sanjukila olonumbi via Yehova vioku tu songuila?

8. Momo lie kotembo ya Isaya omanu vo ko Yuda va lundilila Yehova?

8 Ovilunga kuenda ovitangi, vi pondola oku tepulula ombili yetu. (Tanga Isaya 8:21, 22.) Koloneke via Isaya, omanu vo ko Yuda va talisiwa ohali yalua. Omo okuti va ñualiwile lovanyãli, va kala onjala omo liekambo liokulia, kuenda ka va kuatele ukamba la Yehova. (Amo. 8:11) Va Yuda ka va sandiliyile ekuatiso li tunda ku Yehova, pole, vo lundila, kuenda va lisiõsũila soma yavo omo liovitangi va liyaka lavio. Nda tu liyaka lovitangi anga hẽ tua siata oku lipula tuti: ‘Pi Yehova a kala eci nda sukila ekuatiso liaye?’

9. Momo lie va Isareli koloneke via Esekiele va kuatela ovisimĩlo ka via sungulukile?

9 Ka tua kũlĩhĩle ovina via kongela vovitangi vimue. Omo okuti va Isareli kotembo ya Esekiele ka va kũlĩhĩle ovina via kongelele vovitangi va liyaka lavio, va simĩle okuti, Yehova ka vi tetuluile lonjila yimue ‘ya sunguluka.’ (Esek. 18:29) Ocituwa cĩvi va Isareli va lekisa ca kala ndu okuti, va kuatele esunga lioku sombisa Yehova. Pole, ka va kuatele elomboloko lieci Yehova a lingila ovina viaco oco a va kuatise. Citava okuti ka tu kuata elomboloko lia suapo liulandu umue Wembimbiliya, ale ka tua kũlĩhĩle esunga lieci tu liyakela lovitangi  vimue. Anga hẽ tu sukila oku sima okuti Yehova o kasi oku tetulula ovitangi vietu lonjila yimue “ka ya sungulukile”?—Yovi 35:2.

10. Omunu o pondola ndati oku kuama ongangu yĩvi ya Adama?

10 Ka tu kuete eko liakandu etu kuenda ovina vĩvi tua siata oku linga. Eci Adama a lulikiwa, wa lundila Yehova Suku omo liekandu a linga. (Efet. 3:12) Ndaño okuti Adama wa kũlĩhĩle ovitangi vi tunda koku tomba olonumbi via Yehova, pole, wo lundila hati, wo wĩha ukãi umue ũvi. Tunde kotembo yaco toke cilo, omanu va siata oku kuama ongangu yĩvi ya Adama, yoku lundila Yehova omo liovitangi viavo. Omo liaco, tu sukila oku lipula ndoco: ‘Anga hẽ esumuo li tunda kakulueya ange li ndi vetiya oku sima okuti, olonumbi via Yehova ka via sungulukile?’

11. Ulandu wa Yona u tu longisa nye?

11 Pamue tua siata oku lisokolola lika etu muẽle. Uprofeto Yona wa funguilile Yehova eci a limbuka okuti wa lekisa ohenda komanu vo ko Ninivei. (Yona 4:1-3) Momo lie? Eye wa kuatela usumba omanu, omo lioku sima okuti, va laikele oku popia vati, Yona wa kala uprofeto wesanda. Momo olupale ka lua nyõliwile ndomo a sapuilile omanu. Yona wa sakalalele lovina omanu vo ko Ninivei va laikele oku popia viatiamẽla kesapulo a va kundilile. Anga hẽ tua siatavo oku lisokolola etu muẽle, noke tu funguila Yehova omo okuti ka kasi oku nena lonjanga esulilo lioluali lulo? Citava okuti tu kasi oku kundila omanu vokuenda kuanyamo alua loku va sapuila okuti eteke lia Yehova li kasi ocipepi. Anga hẽ tu sukila oku pua epandi lioku kolela Yehova eci omanu va tu popia lãvi omo lioku va kundila ovina vi sangiwa Vembimbiliya?—2 Pet. 3:3, 4, 9.

NDOMO TU YUVULA “OKU FUNGUILA YEHOVA”

12, 13. Nda tua fetika oku patãla ovopange amue a Yehova, nye tu sukila oku linga?

12 Nye tu sukila oku linga nda tua fetika oku patãla ovopange a Yehova omo liekandu tua piñala? Ivaluka okuti, oku kuata ovisimĩlo viaco uveke. Embimbiliya kelivulu Liolosapo 19:3 li popia ndoco: ‘Uveke u vetiya omunu oku funguila Yehova omo liovitangi a liyaka lavio.’  Omo liaco, tu konomuisi atosi atãlo a tu kuatisa oku yuvula oku funguila Yehova eci tu liyaka lovitangi.

13 Ku ka ecelele okuti ukamba wove la Yehova u tepuluka. Ka tu ka eceleli okuti, ovitangi tu liyaka lavio omo liekambo lioku lipua vi tu vetiya oku tepa ukamba wetu la Yehova. (Tanga Olosapo 3:5, 6.) Tu sukila oku kolela ku Yehova. Pole, tu yuvuli ovisimĩlo viokuti, tu kuete ukũlĩhĩso walua, kuenda ovina Yehova a siata oku linga vi sule. (Olosap. 3:7; Uku. 7:16) Nda tua ci linga, ka tu lundila Yehova eci tu liyaka lovitangi.

14, 15. Nye ci tu kuatisa oku yuvula oku yapuisiwa lolondaka vĩvi via vakuetu?

14 Ku ka ecelele okuti ovina vĩvi vakuene va popia vi ku yapuisa. Koloneke via Mose va Isareli va kuatele elavoko liokuti, Yehova o va iñisa Vofeka Yohuminyo. (Osa. 78:43-53) Pole, eci va yeva esapulo lĩvi lia tunda kolondavululi ka via sungulukile, va ivalako ekuatiso ‘li tunda ku Yehova.’ (Osa. 78:42) Nda tua ivaluka ovopange a Yehova, kuenda ovina viwa a siata oku tu lingila, tu vetiyiwa oku pamisa ukamba wetu laye. Nda tua ci linga, ka tu ecelela okuti, ovina vĩvi vakuetu va popia, vi tepa ukamba wetu la Yehova.—Osa. 77:11, 12.

15 Nye ci pondola oku pita letu nda tu kuetele ocikumbiti manji umue? Nda tua lekisa ocituwa caco, ukamba wetu la Yehova u nyõleha. (1 Yoa. 4:20) Eci Arone a nõliwa oco a linge ocitunda cinene, va Isareli va fetika oku lisiõsiõla. Pole, oku lisiõsiõla kuaco kua kala ndu okuti va ku lingila Yehova. (Ate. 17:10) Cimuamue haico ci pondola oku pita letu koloneke vilo okuti, nda tua lekisa ocituwa coku lisiõsuĩla vana va nõliwa la Yehova oco va songuile ocisoko caye palo posi, tu kala ndu okuti tu kasi oku lisiõsuĩla Yehova.—Va Hev. 13:7, 17.

16, 17. Nye tu sukila oku ivaluka eci tu liyaka lovitangi?

16 Ivaluka okuti, Yehova hayeko wa siata oku tu kokela ovitangi. Ndaño okuti va Isareli koloneke via Isaya va yandulukile Yehova, pole, eye wa yonguile oku va kuatisa. (Isa. 1:16-19) Tu sukila oku ivaluka okuti, nda tu liyaka lovitangi, tu pondola oku kuata elembeleko poku limbuka okuti Yehova wa siata oku tu tata ciwa, kuenda o yongola oku tu kuatisa. (1 Pet. 5:7) Yehova wa likuminya oku tu pamisa, oco tu pandikise poku liyaka lovitangi.—1 Va Kor. 10:13.

17 Nda tu kasi oku talisiwa ohali ndeci ca pita la Yovi, tu sukila oku ivaluka okuti, ovitangi viaco ka vi tundi ku Yehova. Momo, Yehova o nyãle evĩho, pole, o sole esunga. (Osa. 33:5) Tu pondola oku kuama ongangu ya Elihu, ekamba lia Yovi wa popia hati: “Suku yocili ka lingi ovina via vĩha. Tõlo ka lingi ovina ka via sungulukile.” (Yovi 34:10, NW) Tu sukila oku ivaluka okuti, Yehova hayeko wa siata oku tu kokela ovitangi, momo ‘ovina viosi viwa tu kuete, kuenda ombanjaile ya lipua,’ vi tunda kokuaye.—Tia. 1:13, 17.

18, 19. Momo lie tu sukilila oku yuvula oku kuatela atatahãi Yehova? Ci lombolola.

18 Yuvula oku kuatela atatahãi Yehova. Ocili okuti Yehova wa lipua, kuenda ovisimĩlo viaye ka vi sokisiwa levi vietu. (Isa. 55:8, 9) Umbombe lesunguluko vi tu kuatisa oku limbuka okuti, ka tu pondola oku kuata elomboloko liovina viosi. (Va Rom. 9:20) Olonjanja vimue, ka ca lelukile oku kuata elomboloko liovina via kongela vocitangi cimue. Citava okuti pamue wa limbuka ocili colondaka violosapo vi popia hati: “Omunu o fetika tete lombangulo yaye, o molẽha ndukuesunga, toke eci ukuavo o linga apulilo amue.”—Olosap. 18:17, NW.

19 Citava okuti ekamba lietu tua kolela, li linga ocina cimue ka ci tu lomboloka, ale tu sima okuti lia sukilile oku ci linga lonjila yikuavo. Anga hẽ tu yayulako oku sima okuti lia linga ocina cimue ka ca sungulukile? Ale tu kuatela ekamba liaco atatahãi, ndaño tua li kũlĩha vokuenda kuanyamo alua?  Nda poku sapela tua lekisa ocisola kekamba liaco ndaño ka tua lipuile, ci tu kuatisa oku kolela ku Isietu wokilu. Momo olonjila viaye kuenda ovisimĩlo viaye ka vi sokisiwa levi vietu!

20, 21. Momo lie tu yuvuila oku lundila Yehova eci tu liyaka lovitangi?

20 Kũlĩhĩsa esunga liovitangi tu liyaka lavio. Momo lie tu sukilila oku ci linga? Pamue citava okuti ovitangi viaco etu tua vi likokela. Omo liaco, tu sukila oku kũlĩhĩsa esunga liaco. (Va Gal. 6:7) Yuvula oku lundila Yehova omo liovitangi viove. Momo lie o yuvuila oku ci linga? Konomuisa ulandu u kuãimo: Sokolola ndeci okuti omunu o lupukisa calua ekãlu poku linga ungende, kuenje o pitahãla onumbi a sukila oku kuama poku endisa. Omo okuti wa lupuka calua, eci a pitĩla panyaha, o tinguka lekãlu liaco. Ove hẽ o tava okuti omunu wa endisa ekãlu liaco o lundila una wa li panga? Sio, ku tava! Cimuamue haico ci pita la Yehova okuti, wa tu lulika lelianjo lioku nõla eci tu yongola oku linga. Pole, wa tu ĩha olonumbi vi tu kuatisa oku nõla ciwa onjila tu sukila oku kuama. Omo liaco, nda tua lueya, tu yuvuli oku lundila Yehova Ululiki wetu.

21 Kuli ovitangi vimue tua siata oku liyaka lavio okuti, ka vi tundi kovina vĩvi tua linga. Momo Embimbiliya li lekisa okuti, ovitangi ‘viya ño kuenda vi veta ño.’ (Uku. 9:11) Tu sukila oku ivaluka okuti, Satana Eliapu, eye wa siata oku nena ovitangi voluali luosi. (1 Yoa. 5:19; Esit. 12:9) Satana eye unyãli wetu, pole, Yehova hayeko!—1 Pet. 5:8.

SANJUKILA UKAMBA WOVE LA YEHOVA

Yehosua la Kalembe va sumũlũisiwa omo lioku kolela Yehova (Tala ocinimbu 22)

22 Nda o kasi oku liyaka lovitangi, ivaluka ongangu ya Yehosua la Kalembe. Momo va litepele lolondavululi ekũi via nenele esapulo lĩvi, pole, va nena esapulo liwa liatiamẽla Kofeka Yohuminyo. (Ate. 14:6-9) Ovo va lekisa okuti, va kolela Yehova. Momo va kala vekalasoko kumue la va Isareli ci soka 40 kanyamo. Anga hẽ Yehosua la Kalembe va lisiõsuĩla Yehova loku sima okuti ka laikele oku tẽlisa olohuminyo viaye? Sio, ka va ci lingile. Ovo va kolela Yehova, kuenje, wa va sumũlũisa. Ndaño okuti valua pokati ka va Isareli va fila vekalasoko, pole Yehova wa ecelela okuti, Yehosua la Kalembe va iñila Vofeka Yohuminyo. (Ate. 14:30) Cimuamue haico tu sukila oku linga okuti, nda tua likolisilako oku tẽlisa ocipango ca Yehova, tu ka tambula asumũlũho ka a pui.—Va Gal. 6:9; Va Hev. 6:10.

22, 23. Nye tu sukila oku ivaluka nda tua limbuka okuti ekolelo lietu lia tepuluka omo liovitangi tu liyaka lavio?

23 Pamue o limbuka okuti ekolelo liove lia tepuluka omo liovitangi vi tunda kekambo liove lioku lipua, ale momo liovina vĩvi vakuene va ku lingila omo liekambo liavo lioku lipua. Pole, nye o sukila oku linga? Tiamisila utima wove kovituwa vi komõhisa via Yehova. Sokolola elavoko Yehova a ku likuminya. Lipula ndoco: ‘Nda sia kuatele ukamba la Yehova omuenyo wange nda wa kala ndati?’ Omo liaco, amamako oku pamisa ukamba wove la Yehova, kuenda yuvula oku u funguila!