Skip to content

Skip to table of contents

Olombangi Via Yehova

Select language Umbundu

Elisia wa Mola Akãlu a Kuete Ondalu—O Pondolavo Oku a Mola?

Elisia wa Mola Akãlu a Kuete Ondalu—O Pondolavo Oku a Mola?

O PONDOLAVO OKU A MOLA?

Soma yo ko Asuria wa yonguile oku sanga Elisia uprofeto wa Suku, oco o kuate. Eye wa yevele okuti, Elisia o kasi volupale luo Dotane lua tungiwila kilu liomunda okuti, lua ñualiwile lovimbaka. Vokuenda kuteke, wa tuma volupale luaco asualali vaye lolokavalu, kuenda akãlu uyaki. Kociteketeke, va ñuala ocingonja olupale luaco.—2 Olos. 6:13, 14.

Eci ukuenje wa Elisia a pasuka komẽle wa tundila posamua, kuenje, eci a mola olohoka viasualali, wa kuata usumba. Noke, wa kaluka hati: “A cime cange we! Tu ci linga ndati?” Elisia wo tambulula hati: “Ku ka saluke! Momo ava va kasi letu ovo valua, ava va kasi lavo va sule.” Noke uprofeto Elisia wa likutilila hati: “A Yehova, patulula ovaso aye oco a mole.” Ulandu waco wa amisako ndoco: “Yehova wa patulula ovaso umalẽhe kuenje wa mola . . . omunda ye yuka to lotuvalu lakãlu ondalu a ñuala Elisia.” (2 Olos. 6:15-17) Ulandu wa pita la Elisia u tu longisa nye?

Eci Elisia a limbuka okuti wa ñualiwa lasualali a va Asuria, ka kuatele usumba. Momo wa kolelele Yehova, kuenda wa kũlĩhĩle okuti, o kuatisiwa. Koloneke vilo, ka tu kevelela ovikomo, pole, tua kũlĩha okuti, Yehova o pondola oku popela afendeli vaye. Tu kasi ndu okuti tua ñualiwavo lolokavalu, kuenda akãlu ondalu, oco a tu teyuile. Nda tua kolela okuti Yehova o pondola oku popela afendeli vaye, loku limbuka okuti o tu kuatisa, tu kolapo, kuenda tu kuata elavoko lioku tambula asumũlũho aye. (Osa. 4:8) Omo liaco, tu konomuisi ndomo tu kuatisiwa lulandu wa pita la Elisia.

ELISIA WA KUATISA ELIYA

Onjanja yimue, eci Elisia a kala oku lima vepia, uprofeto Eliya wa endele ponẽle yaye, kuenje wo wimba onanga yaye. Elisia wa kũlĩhĩle elomboloko liaco. Eci a pitĩla konjo, wa linga ocipito, kuenje, wosika olonjali viaye, kuenda wa linga ungende oco a ka kuatise Eliya. (1 Olos. 19:16, 19-21) Omo okuti Elisia wa lekisile onjongole yoku linga upange, Yehova wo wĩha ovikele vialua. Noke weya oku nõliwa oco a piñale pomangu ya Eliya yoku kala uprofeto.

 Elisia wa kuatisa Eliya ci soka anyamo epandu. Vokuenda kuotembo yaco, ‘Elisia eye lika wa kuata omoko yoku pesila ovava povaka a Eliya.’ (2 Olos. 3:11) Kotembo yaco, omanu va enda okulia lovoko, kuenda ka va sukilile olonguto lolomoko, ale ovina vikuavo. Noke yoku lia, oñuatisi yaco ya enda oku itila ovava oku sukula peka lia cime caye. Ndaño okuti Elisia ka kuatele upange walua, pole, kokuaye ca kala esumũlũho oku kala oñuatisi ya Eliya.

Koloneke vilo, vamanji valua va litumbika kupange wa litepa wotembo yosi. Ekolelo liavo, olio li va vetiya oku lieca olumue kupange wa Yehova. Ndaño vamue va sima okuti upange waco ka u kuete esilivilo lia velapo, pole, vamanji va lieca olumue va sukila oku tunda kolonjo viavo oco va ende ko Betele, koku tunga Olonjango Viusoma, kuenda ovikele vikuavo. Lomue Ukristão ka ka sime okuti, upange waco ka u kuete esilivilo lia velapo. Momo Yehova wa kapako upange wosi u lingiwa lafendeli vaye.—Va Hev. 6:10.

ELISIA KA SILEPO OCIKELE CAYE

Osimbu Suku ka tambuile handi Eliya vilu locipepe, wa tuma uprofeto oku tunda ko Giligali oco a ende ko Betele. Eci Eliya a sapuila Elisia hati ka yongola oku enda laye, eye wo tambulula hati: “Si litepi love!” Osimbu va kala oku linga ungende, Eliya wa sapuila Elisia olonjanja vivali hati, siala, pole, ka tavele. (2 Olos. 2:1-6) Ndeci ca pita la Ruti okuti ka tavele oku litepa la Naomi, Elisia ka tavelevo oku li tepa la Eliya. (Ruti 1:8, 16, 17) Momo lie? Momo Elisia wa solele ocikele a tambuile ku Yehova coku kuatisa Eliya.

Elisia wa tu sila ongangu yiwa. Nda tua tambula ocikele cimue vocisoko ca Yehova, tu pondola lika oku ci kapako, nda tua ivaluka okuti, tu kasi oku linga upange wa Yehova. Oku linga upange waco ci nena asumũlũho alua.—Osa. 65:4; 84:10.

“PINGA ECI HU LINGILA”

Eci Eliya a kala oku linga ungende la Elisia, Eliya wa popia hati: “Pinga eci hu lingila.” Ndeci Salomone a lingile epingilo kosimbu, Elisia wa pinga cimue co kuatisa oku vumba ciwa Yehova. Eye wa pinga ‘olonepa vivali viunene waye.’ (1 Olos. 3:5, 9; 2 Olos. 2:9) Ko Isareli, kua kala Ocihandeleko cokuti, omõla watete ulume, eye o kuete omoko yoku tambula olonepa vivali viocipiñalo. (Esin. 21:15-17) Elisia wa pinga oco a piñale omangu ya Eliya yoku kala uprofeto. Omo liaco, Elisia wa yonguilevo oku kuata utõi ndowu wa Eliya, woku lekisa ‘ombili kefendelo liocili.’—1 Olos. 19:13, 14.

Uprofeto Eliya wa tambulula ndati ukuenje waye? Eye wa tambulula hati: ‘Nda o ndi mola eci va ngambata kupãla, o tambula eci wa pinga. Pole, nda kua ndi muile vali ku tambula.’ (2 Olos. 2:10) Etambululo lia Eliya, lia kuata alomboloko avali. Liatete li lekisa okuti, Suku eye lika wa kuata omoko yoku tava nda Elisia o tambula ovina a pinga, ale sio. Liavali li lomboloka okuti, nda Elisia o tambula ovina a pinga, o sukila oku kala la Eliya, ndaño lovitangi.

OVINA ELISIA A MOLA

Suku wa tenda ndati epingilo lia Elisia liolonepa vivali viunene wa Eliya? Ulandu waco u popia ndoco: ‘Eci vamako loku vangula, kua tukuluka ekãlu liondalu lotuvalu tuondalu, kuenje lia va tepa pokati. Noke, Eliya wa londa kilu locipepe. Kuenje, Elisia wa ci mõla.’ * Eli olio lia kala etambululo Yehova a eca kepingilo lia Elisia. Kuenje, Elisia wa mola eci Eliya a litepa laye. Noke, wa tambula olonepa vivali viunene wa Eliya, kuenje, wa piñala omangu ya Eliya yoku kala uprofeto wa Suku.—2 Olos. 2:11-14.

Elisia wa tikula onanga uprofeto Eliya a ecele kokuaye, kuenje wa yi lisikĩlĩla. Kuenje, onanga yaco ya eca uvangi wokuti, Elisia uprofeto wa Suku. Uvangi ukuavo wa lekisa okuti wa kala uprofeto, wa limbukiwa eci a linga ocikomo coku tepa ovava Olui Yordão.

Elisia wa komõha calua eci a mola Eliya wa kala oku ambatiwa locipepe. Citava okuti omunu ka moli oloneke viosi akãlu uyaki, kuenda olokavalu vi kuete ondalu! Ocikomo Elisia a mola, ca eca uvangi wokuti, Yehova wa tambulula epingilo liaye. Yehova poku tambulula olohutililo vietu,  ka tu sukila oku kuata ocinjonde ci lekisa akãlu uyaki, kuenda olokavalu vi kuete ondalu. Pole, unene a kuete, u tu kuatisa oku limbuka okuti, o kasi oku tẽlisa ocipango caye. Eci tu limbuka ndomo Yehova a kasi oku sumũlũisa ocisoko caye palo posi, ci kasi ndu okuti, tu lete ekãlu lia Yehova li kasi oku enda.—Esek. 10:9-13.

Elisia wa pita lovolandu alua o kuatisa oku limbuka okuti Yehova o kuete unene u komõhisa. Espiritu lia Yehova, lia kuatisa uprofeto Elisia oku linga ci soka 16 kovikomo. Pole, Eliya wa linga lika ovikomo olonjanja vivali. * Elisia wa mola onjanja yavali olokavalu lakãlu uyaki a kuete ondalu, eci volupale luo Dotane mua kala ovitangi, ndomo ca lomboluiwa kefetikilo liocipama cilo.

ELISIA WA KOLELELE YEHOVA

Ndaño okuti olupale luo Dotane lua ñualiwile lovanyãli, pole, Elisia ka kuatele usumba. Momo lie? Momo wa kolelele Yehova. Tu pondolavo oku kuata ekolelo ndeli liaye. Omo liaco, tu likutilili ku Yehova loku pinga espiritu sandu liaye li tu kuatisa oku pamisa ekolelo lietu, oco tu lekise ovituwa vikuavo vi panga onepa kapako espiritu.—Luka 11:13; Va Gal. 5:22, 23.

Ocitangi ca pita ko Dotane ca kuatisa Elisia oku kolela kekuatiso li tunda ku Yehova, kuenda kovangelo vaye. Suku wa tumile ovangelo oco va teyuile uprofeto waye wa kala volupale luo Dotane eci lua ñualiwile ocingonja. Eye wa popela Elisia kumue lakuenje vaye, poku kapa vupeke ovanyãli vaye. (2 Olos. 6:17-23) Eci Elisia a liyaka locitangi caco wa kolelele Yehova.

Tu lekisi ekolelo ku Yehova ndeci Elisia a linga. (Olosap. 3:5, 6) Nda tua ci linga, ‘Yehova o tu kuatela ohenda, kuenda o tu sumũlũisa.’ (Osa. 67:1) Koloneke vilo, ka tua ñualiwile lakãlu ondalu kuenda olokavalu vi muiwa lovaso etu. Pole, vokuenda ‘kuohali ya piãla,’ Yehova o ka teyuila afendeli vaye. (Mat. 24:21; Esit. 7:9, 14) Osimbu tu lavoka otembo yaco, tu sukila oku ivaluka okuti, ‘Yehova Suku eye ocitililo cetu.’—Osa. 62:8.

^ tini. 17 Eliya ka londele kilu kuna ku kasi Yehova kumue lovangelo vaye. Tanga Utala Wondavululi 15 Yenyenye Linene wo 1997, kemẽla 15.

^ tini. 20 Tala Utala Wondavululi 1 wosãi ya Mbalavipembe wo 2005, kemẽla 19.