Skip to content

Skip to table of contents

Olombangi Via Yehova

Select language Umbundu

Alonjali, Pindisi Omõla Vene Tunde Vutila

Alonjali, Pindisi Omõla Vene Tunde Vutila

EMBIMBILIYA li popia ndoco: “Omãla ovo ocipiñalo ca eciwa la Yehova. Epako limo olio onima.” (Osa. 127:3) Eli olio esunga lieci olonjali via siatela oku sanjuka eci omõla a citiwa.

Ndaño okuti olonjali vi sanjuka, pole, vi kuete ocikele coku pindisa omõlaco. Nda olonjali vi yongola okuti eci omõla wavo a kula o kuata uhayele, vi sukila oku u tekula lokulia kuwa. Oco omõla a kuate ukamba la Yehova, olonjali viaye vi sukila oku eca epindiso kokuaye, loku u longisa olonumbi Viembimbiliya. (Olosap. 1:⁠8) Otembo yipi olonjali vi sukila oku fetika oku pindisa omõla wavo, kuenda ovina vipi vi sukila oku kongela vepindiso liaco?

 OLONJALI VI SUKILA EPINDISO

Embimbiliya li tukula ulume umue o tukuiwa hati Manoa, wa kala volupale luo Sora, kofeka yo Isareli. Yehova wa tumile ungelo umue ku Manoa loku u sapuila hati, ndaño okuti ukãi wove ka citi, pole, o lavoka oku mina. (Olong. 13:2, 3) Ndaño okuti Manoa lukãi waye va sanjukilile esapulo liaco, pole, va kuata esakalalo liatiamẽla koku eca epindiso liwa komõla waco. Omo liaco, Manoa wa likutilila hati: “A Yehova, hu pinga, omunu wa Suku yocili una wa tumĩle, eye vali kokuetu, oco a tu ĩhe olonumbi vioku longisa omõla o laika oku citiwa.” (Olong. 13:8, NW) Manoa kumue lukãi waye va yonguile oku kũlĩha olonumbi va sukila oku eca komõlavo. Ovo va longisa omõla wavo Samisone olonumbi via Suku, kuenje, va kuata onima yiwa. Embimbiliya li popia hati: ‘Espiritu lia Yehova lia fetika oku vetiya Samisone.’ Omo liaco, Samisone wa linga ovopange alua ko Isareli, koloneke violonganji.—Olong. 13:25; 14:5, 6; 15:14, 15.

Manoa wa likutilila oco a kuate olonumbi vioku pindisa omõla a laikele oku cita

Otembo yipi olonjali vi sukila oku fetika oku pindisa omãla vavo? Timoteo wa pindisiwa la inaye Eunike, kuenda la nyokulu yaye Loisi, “tunde vutila.” (2 Tim. 1:5; 3:15) Ocili okuti, Timoteo wa fetika oku pindisiwa Lovisonehua tunde vutila.

Olonjali vina okuti Akristão vocili, vi sukila oku likutilila ku Yehova oco vi tambule olonumbi vioku pindisa omãla vavo “tunde vutila.” Elivulu Liolosapo 21:5 li popia hati: “Oku liangiliya kukuambili ku muisa elau.” Osimbu olonjali ka via citile oñaña, vi sukila oku lipongiya loku landa ovina vi sukiliwa. Vi sukilavo oku sokolola ndomo vi ka pindisa oñaña yavo lolonumbi Viembimbiliya. Ocimãho colonjali, oku fetika oku pindisa oñaña yavo eci yi citiwa.

Elivulu limue li lombolola ndomo omõla a fetika oku kula, li popia hati: “Olonjali viakãi via limbuka okuti, eci oñañaoñaña yaco yi fetika oku kula, olonjali vi sukila oku yi longisa lonjanga olonumbi Viembimbiliya, kuenda ovina vikuavo vi sukiliwa!

Onjali yimue yukãi okuti ukundi wotembo yosi, ya popia eci catiamẽla komõlaye ukãi hati: “Eci a kuata lika osãi yimosi noke yoku citiwa, nda kuatele ocituwa coku enda laye kupange woku kunda. Ndaño okuti ka kuatele elomboloko liovina, pole, nda kũlĩha okuti, wa kuatisiwa omo lioku kala lame kupange woku kunda. Eci a tẽlisa anyamo avali wa fetika oku eca otuikanda komanu tu sanga kupange woku kunda.”

Oku pindisa omõla tunde vutila, ci nena asumũlũho alua. Pole, olonjali via kũlĩha okuti, ka ca lelukile oku pindisa omãla olonumbi Viembimbiliya.

“SOKIYI OTEMBO”

Omo okuti omãla va kuete ocituwa coku tiamisila utima kolomapalo, ka ca lelukile oku va pindisa. Momo va yongola oku kũlĩha ovina viosi va mola. Nye olonjali vi sukila oku linga oco omãla vavo va tiamisile utima kovina va longisiwa?

Konomuisa olondaka via Mose kelivulu Liesinumuĩlo 6:6, 7 li popia hati: “Olondaka evi ñasi loku ku sapuila etaili vi kale vutima wove, o longa lavio omãla vove loku vi pitolola, o vi vangula eci o tumãla vonjo yove, leci wenda vonjila, lo poku pekela, lo poku pasuka.” Ondaka oku “longa,” yi lomboloka oku longisa omõla poku pitolola ovina. Omõla o sokisiwa locikũla cimue citito okuti, ci sukila oku ci tapela ovava olonjanja vialua. Oku pitolola ovina vi kuete esilivilo, ci kuatisa akulu oku vi sokolola. Cimuamue haico ci pita lomãla okuti, va sukila oku longisiwa loku pitolola ovina!

Oco olonjali vi longise omãla olonumbi via Suku, vi sukila oku sokiya otembo yoku kala lavo. Koloneke vilo, ka ca lelukile oku sokiya otembo yoku kala lomãla. Pole, upostolo Paulu wa popia hati, tu sukila “oku sokiya otembo” yoku linga ovopange ekongelo a kuete esilivilo lia velapo. (Va Efe. 5:15, 16) Olonjali vi sokiya ndati otembo yaco? Ulume una okuti ukulu wekongelo, kuenda ukãi waye ukundi wotembo yosi, ka ca lelukile oku pindisa omãla vavo, loku tẽlisa ovikele viavo ndeci: Ovopange ekongelo, kuenda upange woku sanda eteku.  Olohueli viaco vi pondola ndati oku pindisa omõla wavo ukãi? Ulume waco wa popia hati: “Oloneke viosi komẽle, osimbu sia endele kupange, ame kumue lukãi wange tu ­tangela omõletu Elivulu Liasapulo Embimbiliya, ale okalivulu Konomuisa Ovisonehua Eteke Leteke. Koñolosi, osimbu ka pekelele handi, tu kũlĩhĩsa nda tua tanga laye ovina vimue. Eci tu enda kupange woku kunda tu ambata omõletu. Omo liaco, tu likolisilako oku tẽlisa ocikele caco osimbu ka kulile handi.”

‘OMÃLA VA KASI NDOVISONGO’

Tu yongola okuti eci omãla vetu va linga akulu va kuata olondunge. Omo liaco, tu kuete ocimãho coku va pindisa oco va sole Suku lutima wavo wosi.—Mar. 12:28-30.

Elivulu Liosamo 127:4, NW, li popia hati: “Omãla olonjali vi cita, va kasi ndovisongo peka lienyanga.” Omãla va sokisiwa lovisongo enyanga li asa vocinyama cimue. Eci enyanga limba usongo lohonji, ka u tiuka vali konyima. Cimuamue haico ci pita lolonjali okuti, vi kala lika lomãla vavo vokuenda kuotembo yitito osimbu handi ka va lingile akulu. Vokuenda kuotembo yaco, olonjali vi sukila oku va pindisa olonumbi via Yehova oco vi kale kovitima viavo.

Upostolo Yoano wa kuatisa omanu va linga afendeli va Yehova poku soneha ndoco: “Oku yeva okuti omãla vange va kasi oku endela vocili, ci ndi nenela esanju lialua.” (3 Yoa. 4, NW) Olonjali Akristão vi sanjukavo eci vi limbuka okuti, ‘omãla vavo va kasi oku endela vocili.’