Skip to content

Skip to table of contents

Olombangi Via Yehova

Select language Umbundu

Wa Tekula Omanu Valua Lekuatiso Lietendelo Litito Liolondonge

Wa Tekula Omanu Valua Lekuatiso Lietendelo Litito Liolondonge

‘Noke yoku timbula olombolo wa vi eca kolondonge viaye, kuenje olondonge via vi eca komanu.’—MAT. 14:19.

1-3. Lombolola ndomo Yesu a tekula owiñi walua ocipepi lolupale luo Betesaita. (Tala elitalatu li kasi kefetikilo liocipama cilo.)

KŨLĨHĨSA ulandu owu. (Tanga Mateo 14:14-21.) Osimbu ocipito co Paskoa yunyamo wa 32 K.K., ka ca lingiwile handi, owiñi weci ci soka 5.000 kalume okuti akãi lomãla ka va tendiwile, vosi yavo va kala la Yesu kumue lolondonge viaye vekalasoko ocipepi limbo lio Betesaita lina lia kala konano yo Kalunga ko Galilea.

2 Eci Yesu a mola omanu valua wa va kuatela ohenda, kuenje, wa sakula olombei via kala pokati kavo, kuenda wa va longisa ovina vialua viatiamẽla Kusoma wa Suku. Eci ekumbi lia kala oku iñila, olondonge via vetiya Yesu oco a tume omanu oku ka landa okulia vovaimbo a kala ocipepi. Pole, Yesu wa sapuila olondonge viaye hati: ‘Eci kokuavo cimue cokulia.’ Olondaka viaye via va nenela esakalalo, momo va kuata lika olombolo vitãlo kuenda olõsi vivali vitito.

3 Ohenda Yesu a kuata, yo vetiya oku linga ocikomo ca sonehiwa lika Vavanjeliu akuãla. (Mar. 6:35-44; Luka 9:10-17; Yoa. 6:1-13) Yesu wa pinga kolondonge viaye oco vi sapuile owiñi oku tumala vowangu vovimunga via 50 kuenda 100 komanu. Yesu noke yoku likutilila, wa fetika oku timbula olombolo kuenda oku tepa ombisi. Noke wa eca okulia ‘kolondonge viaye, kuenje olondonge via ku eca kowiñi.’ Omanu vosi va kalapo valia, omo liocikomo caco! Ivaluka okuti, Yesu wa tekula omanu valua lekuatiso lietendelo litito liolondonge. *

4. (a) Esakalalo lipi Yesu a lekisa lioku eca ovina vi pamisa ekolelo, kuenda momo lie? (b) Nye tu konomuisa vocipama cilo, kuenda cikuavo ci kuãimo?

 4 Yesu wa sakalalele calua lovina vi pamisa ekolelo liolondonge viaye. Eye wa kũlĩhĩle okuti oku kuatisa olondonge viaye Londaka ya Suku, ci tuala komuenyo ko pui. (Yoa. 6:26, 27; 17:3) Ohenda Yesu a kuata, yo vetiya oku tekula owiñi lolombolo vimue kuenda olõsi.  Eye wa pita olowola vialua loku longisa olondonge viaye. (Mar. 6:34) Momo wa kũlĩhĩle okuti noke liotembo yitito o tiukila kilu. (Mat. 16:21; Yoa. 14:12) Yesu noke yoku tiukila kilu wa amamako ndati oku eca olonumbi vi pamisa ekolelo liolondonge viaye via kala palo posi? Eye wa laikele oku kuama onjila yimuamue a kuama eci a linga ocikomo coku tekula omanu valua lekuatiso lietendelo litito liolondonge. Velie va laikele oku panga onepa ketendelo liaco litito? Tu konomuisi ndomo Yesu a kuatisa etendelo liomanu vamue oco va tekule olondonge viaye olombuavekua kocita catete. Vocipama ci kuãimo, tu ka konomuisa epulilo eli li kuete esilivilo kokuetu liokuti: Tu limbuka ndati omanu Kristu a nõla oco va ece olonumbi vi pamisa ekolelo lietu koloneke vilo?

Omanu valua va tekuiwa lekuatiso lietendelo litito liolondonge (Tala  ocinimbu 4)

YESU WA NÕLA ETENDELO LITITO

5, 6. (a) Eliangiliyo lipi Yesu a linga oco ocimunga citito colondonge viaye ca amameko oku pamisa ekolelo lia valua noke yolofa viaye? (b) Yesu wa pindisa ndati olondonge viaye oco vi tambule ovikele noke yolofa viaye?

5 Usongui wepata o sukila oku linga eliangiliyo liokuti, epata liaye li amamako oku tatiwa ciwa ndaño kueya ocilunga cimue okuti eye o fa. Cimuamue haico ca pita la Yesu utue wekongelo Liakristão, momo wa linga eliangiliyo lioku amamako oku eca olonumbi vi pamisa ekolelo liolondonge noke yolofa viaye. (Va Efe. 1:22) Osimbu kua kambele anyamo avali oco Yesu a pondiwe, wa kuama onjila yimue. Eye wa nõla etendelo lia vamue a kundika ocikele coku tekula omanu valua. Tu konomuisi ndomo a ci linga.

6 Noke yoku likutilila uteke wosi, wa vilikiya olondonge viaye, kuenje pokati kavo wa nõlapo 12 kovapostolo. (Luka 6:12-16) Vokuenda kuanyamo avali a kuamamo, Yesu wa linga ukamba walua lolondonge viaco ekũi la vivali, poku vi longisa lolondaka, kuenda oku lekisa ongangu yiwa kokuavo. Yesu wa kũlĩhĩle okuti olondonge viaye vi sukila oku lilongisa ovina vialua, kuenda vi amamako oku tukuiwa okuti “olondonge.” (Mat. 11:1; 20:17) Yesu wa eca elungulo komunu lomunu pokati kavo, kuenda wa vi pindisa kupange woku kunda. (Mat. 10:1-42; 20:20-23; Luka 8:1; 9:52-55) Yesu wa pindisa olondonge viaye oco okuti, eci a tiukila kilu noke yolofa viaye, vi tẽlisa ocikele cimue ci kuete esilivilo lia velapo.

7. Yesu wa eca ndati ocisimĩlo catiamẽla kovina olondonge viaye via sukilile oku sakalala lavio?

7 Ocikele cipi ovapostolo va laikele oku tambula? Eci eteke lio Pendekoste yunyamo wa 33 K.K., lia kala ocipepi, ovapostolo va kũlĩhĩle okuti va laikele oku ‘tambula ovikele vikuavo.’ (Ovil. 1:20) Ocina cipi va sakalalele laco? Yesu noke liepinduko liaye, vombangulo a kuata lupostolo Petulu, wa tukula ondaka yimue yi tu ĩha etambululo. (Tanga Yoano 21:1, 2, 15-17.) Eci Yesu a kala kumue lovapostolo vakuavo wa sapuila Petulu hati: “Lisa olomeme viange.” Yesu wa lekisa okuti, etendelo litito liovapostolo a nõla, va laikele oku tambula ocikele coku eca olonumbi oco vi pamise ekolelo liomanu valua. Ombangulo Yesu a kuata lolondonge viaye yi lekisa okuti, wa kapeleko ‘okacunda katito’! *

WA TEKULA VALUA OKUPISA KO PENDEKOSTE

8. Omanu vana va linga Akristão ko Pendekoste va limbuka ndati etendelo litito Kristu a nõla oco li pamise ekolelo liomanu?

8 Oku upisa ko Pendekoste yunyamo wa 33 K.K., Kristu wa pinduiwa wa eca ocikele ketendelo litito liovapostolo vamue oco va ece olonumbi vi pamisa ekolelo liolondonge vikuavo olombuavekua. (Tanga Ovilinga 2:41, 42.) Etendelo liaco litito lieya oku limbukiwa la va Yudea, kuenda vakualofeka okuti va linga Akristão olombuavekua koloneke viaco. Ovo va ‘amamako oku kakatela kelongiso liovapostolo.’ Ulume umue ukuakukonomuisa ovolandu wa popia hati, ondaka yo Helasi yokuti “oku amamako oku ­kakatela,” yi lomboloka “oku tẽlisa upange umue.” Omanu vana veya oku li kongela kefendelo liocili, va kuatele onjongole yoku lilongisa olonumbi vi pamisa ekolelo liavo,  kuenda va kũlĩhĩle oku vi sangiwa. Omo okuti va kuatele onjongole yalua, va yevelela lutate ovina ovapostolo va enda oku longisa, kuenda va kapeleko ovina Yesu a linga. Kuenje, va kuata elomboloko liovina via tukuiwa vovisonehua viatiamẽla kokuaye. *​—Ovil. 2:22-36.

9. Ovapostolo va amamako ndati oku tẽlisa ocikele cavo coku eca olonumbi vi pamisa olomeme via Yesu?

9 Ovapostolo va amamako oku tẽlisa ocikele cavo coku eca olonumbi vi pamisa ekolelo liolomeme via Yesu. Kũlĩhĩsa ndomo va tetulula ocitangi ca kala vekongelo liokaliye okuti nda ca nena olonepele pokati ka vamanji. Ocitangi caco catiamẽla koku ava okulia. Ovimbumba vi vangula o Helasi, ka via endele oku tambula okulia, pole, ovimbumba vi vangula o Heveru, ovio lika via enda oku tambula okulia. Ovapostolo ‘ekũi la vavali’ va tetulula ndati ocitangi caco? Ovo va nõla vamanji epanduvali oco va songuile ‘upange’ woku ava okulia. Ovapostolo vana va kuata ocikele coku avela okulia kowiñi Yesu a tekula locikomo, va limbuka okuti, oku eca olonumbi vi pamisa ekolelo liomanu, oco ci kuete esilivilo lia velapo. Omo liaco, va litumbikile kupange ‘woku kunda ondaka’ ya Suku.—Ovil. 6:1-6.

10. Ocikele cipi Kristu a ecele kovapostolo, kuenda kakulu vamue va loñoloha ko Yerusalãi?

10 Oku upisa kunyamo wa 49 K.K., ketendelo liovapostolo va sialelepo, kua vokiyiwa akulu vamue vekongelo va loñoloha. (Tanga Ovilinga 15:1, 2.) ‘Ovapostolo kumue lalume vakuavo akulu va kala ko Yerusalãi,’ va pangele onepa kosungu yakulu. Omo okuti Kristu eye Utue wekongelo, wa eca ocikele kocimunga citito calume va loñoloha oco va tetulule ovitangi viatiamẽla kelongiso, kuenda oku songuila upange woku kunda loku longisa olondaka viwa Viusoma.—Ovil. 15:6-29; 21:17-19; Va Kol. 1:18.

11, 12. (a) Nye ci lekisa okuti Yehova wa sumũlũisa eliangiliyo Omõlaye a linga lioku pamisa akongelo kocita catete? (b) Ocimunga Kristu a kundika ocikele coku eca olonumbi ca limbukiwa ndati?

11 Yehova wa sumũlũisa hẽ eliangiliyo Omõlaye a linga lioku kuatisa akongelo kocita catete? Wa sumũlũisa eliangiliyo liaco! Tua ci kũlĩha ndati? Elivulu Liovilinga li tu sapuila ulandu waco ndoco: “Eci va pita vovaimbo va sia olonumbi via eciwa lovapostolo kuenda akulu ko Yerusalãi, kuenda va vetiya omanu oco va pokole kolonumbi viaco. Noke, akongelo a kolisiwila vekolelo, ­kuenje ava va tava va li vokiya eteke leteke.”  (Ovil. 16:4, 5, NW) Ivaluka okuti, akongelo kotembo yaco eya oku livokiya omo lioku pokola kolonumbi viosungu yakulu ko Yerusalãi. Ulandu owu ka u lekisa hẽ okuti Yehova wa sumũlũisa eliangiliyo Omõlaye a linga lioku kuatisa akongelo kocita catete? Omo liaco, tu ivaluki okuti, oco tu pamise ekolelo lietu, tu sukila oku tambula esumũlũho lia Yehova.—Olosap. 10:22; 1 Va Kor. 3:6, 7.

 12 Vulandu tua konomuisa tua lilongisa okuti, Yesu poku eca kolondonge viaye olonumbi vi pamisa ekolelo liavo, wa kuama onjila yimuamue ndeci a linga poku tekula owiñi. Eye wa tekula omanu valua lekuatiso lietendelo litito liovapostolo vaye. Oku upisa kotembo yaco omanu va limbuka ocimunga Yesu a kundika ocikele coku tekula akongelo. Noke, ovapostolo vosi va panga onepa kosungu yakulu va limbuka okuti, ekuatiso va tambula li tunda kilu. Elivulu Liovilinga 5:12, * li popia ndoco: ‘Lekuatiso liovapostolo, pokati komanu pa kala olondimbukiso vialua lovikomo.’ Omanu vana va linga Akristão ka va kuatele atatahãi loku li pula ndoco: ‘Velie Kristu a kundika ocikele coku pamisa ekolelo liolomeme viaye?’ Kesulilo liocita catete, ovina vieya oku pongoloka.

Kocita catete kua kala uvangi u lekisa okuti, Yesu wa nõlele ocimunga ca pamisa akongelo (Tala  ocinimbu 12)

CECI O SOKA YA LIVOKIYA KUENDA OTILIKU YA TEPULUKA

13, 14. (a) Elungulo lipi Yesu a ecele liatiamẽla kunanguluke? Otembo yipi olondaka viaye via fetika oku tẽlisiwa? (b) Vapuluvi api avali unanguluke wa moleha vekongelo? (Tala pombuelo yemẽla.)

13 Yesu wa popele hati, Ekongelo liakristão lia laikele oku lambalaliwa. Ivaluka okuti, volusapo Yesu ata luatiamẽla kotiliku kuenda kosoka, wa popia hati vepia liotiliku okuti (li lomboloka Akristão olombuavekua), mua laikele oku wayiwa osoka okuti, (yi lomboloka Akristão vesanda). Ukuakulima wa ecelela okuti, otiliku losoka vi kulila kumosi toke kotembo yoku ungula ku lingiwa ‘kesulilo lioluali.’ (Mat. 13:24-30, 36-43) Ka pa pitile otembo yalua, kuenje olondaka via Yesu via fetika oku tẽlisiwa. *

14 Ndaño okuti kocita catete unanguluke wa livokiyile vekongelo, pole, ovapostolo ‘ka va tavele’ oku yapuisiwa lalongiso esanda. (2 Va Tes. 2:3, 6, 7) Noke yolofa viupostolo wa sulako, unanguluke weya oku livokiya lonjanga vekongelo osimbu ombuto ya kala oku kula, kuenje ocitangi caco ca pita otembo yalua. Handi vali, vokuenda kuotembo yaco, osoka ya livokiya, pole, otiliku ya tepuluka. Omo liaco, vamanji va kuata ocikele coku eca olonumbi vi pamisa akongelo va liyaka lovitangi vialua, momo ka va kalele pamosi. Pole, ovina vieya oku pongoloka. Otembo yipi kua pita epongoloko liaco?

HELIE ECA EKUATISO KOTEMBO YOKU UNGULA?

15, 16. Omo lionjongole Vakuakulilongisa Embimbiliya va lekisa onima yipi va kuata? Epulilo lipi lia lingiwa?

15 Osimbu otembo yoku kula kuombuto ya kala oku panda kesulilo, kua kala omanu valua va yonguile oku lilongisa Embimbiliya. Ivaluka okuti, oku upisa kunyamo wo 1870, ocimunga citito comanu va kala oku sanda ocili, va likongela, kuenda va sokiya ocimunga ca Vakuakulilongisa Embimbiliya. Kuenje, va litepa Lakristão Vesanda, kuenda atavo akuavo a sokisiwa losoka. Omo okuti Vakuakulilongisa Embimbiliya va kuata onjongole yalua yoku lilongisa, va likutilila, kuenda va konomuisa lutate Ovisonehua.—Mat. 11:25.

16 Omo lionjongole Vakuakulilongisa Embimbiliya va lekisa loku konomuisa lutate Ovisonehua, va kuata onima yiwa. Ovo va situlula alongiso esanda poku lombolola ocili ci sangiwa Vembimbiliya, kuenda va sandeka alivulu loku a tumisa kolonepa viosi violuali. Upange wavo wa vetiya ovitima viomanu, kuenda wa kuatisa valua va kuatele onjongole yoku kũlĩha ocili. Pole, kua votuiwa epulilo limue lia linga hati:  Anga hẽ Vakuakulilongisa Embimbiliya ovo Kristu a nõla oco va kuatise olomeme viaye osimbu unyamo wo 1914 ka wa pitĩlile? Havoko. Momo va kala kotembo yoku kula kuombuto, kuenda eliangiliyo liocimunga coku eca olonumbi ca kala oku sokiyiwa. Handi vali, ka ya pitĩlilepo otembo yoku tepa Akristão va sokisiwa losoka, kuenda Akristão vocili va sokisiwa lotiliku.

17. Upange upi wa fetika kunyamo wo 1914?

17 Ndomo tua konomuisa vocipama ca pita, otembo yoku ungula ya fetika kunyamo wo 1914. Kunyamo waco etendelo lia vana va lekisa onjongole yoku lilongisa Embimbiliya lia fetika oku li vokiya. Omo liaco, oloneke via sulako via fetika kunyamo waco eci Yesu a vialekiwa komangu Yusoma. (Esit. 11:15) Oku upisa kunyamo wo 1914 toke kefetikilo liunyamo wo 1919, Yesu wa endele kumue la Isiaye vonembele yespiritu, oco va linge upange woku yi kũlĩhĩsa loku yi yelisa. * (Mal. 3:1-4) Otembo yoku ungula otiliku ya fetika kunyamo wo 1919. Anga hẽ kotembo yaco oco Kristu a nõla ocimunga ca kuata ocikele coku eca olonumbi ku vamanji? Oco a ci nõla!

18. Nye Yesu a popele catiamẽla komanu a laikele oku nõla? Epulilo lipi lia lingiwa eci oloneke via sulako via fetika?

18 Vocitumasuku ca Yesu catiamẽla kotembo yesulilo wa lekisa okuti wa laikele oku nõla etendelo liomanu vatito, oco a va kundike ocikele coku eca “okulia votembo ya sokiyiwa.” (Mat. 24:45-47) Velie a nõla oco va linge upange waco? Yesu wa tekula omanu valua lekuatiso lietendelo litito liolondonge, ndeci a lingile kocita catete. Omo okuti kotembo yaco tua kala kefetikilo lioloneke via sulako, kua votuiwa epulilo eli: Velie va laikele oku panga onepa ketendelo liaco litito? Ocipama ci kuãimo, ci ka tambulula epulilo eli, kuenda akuavo atiamẽla kocitumasuku ca Yesu.

 

^ tini. 3 Ocinimbu 3: [1] Onjanja yimue, Yesu wa lingile ocikomo coku tekula ci soka 4.000 kalume okuti akãi lomãla ka va tendiwile, momo wa eca okulia ‘kolondonge viaye, kuenje olondonge via ku ecavo kowiñi.’—Mat. 15:32-38.

^ tini. 7 Ocinimbu 7: [2] Petulu eci a kala komuenyo wa tambuile ocikele coku lisa ‘okacunda katito’ ka va vana va kuatele elavoko lioku enda kilu.

^ tini. 8 Ocinimbu 8: [3] Omo okuti vana va tava ndopo va ‘amamako oku kakatela kelongiso liovapostolo’ ci lekisa okuti, ovapostolo va enda oku longisa omanu olonjanja viosi. Ovina vimue ovapostolo va longisa, via sonehiwa valivulu ana a panga onepa Kovisonehua vio Helasi.

^ tini. 12 Ocinimbu 12: [4] Ndaño okuti Akristão vamue ka va kaile ovapostolo va tambuilevo ombanjaile yespiritu locikomo. Pole, citava okuti vakuavo va tambula ombanjaile yaco lekuatiso liovapostolo ale, eci va yi tambula pa kala umue upostolo.—Ovil. 8:14-18; 10:44, 45.

^ tini. 13 Ocinimbu 13: [5] Olondaka upostolo Paulu a tukula kelivulu Liovilinga 20:29, 30, vi lekisa okuti, ekongelo lia laikele oku lambalaliwa olonjanja vivali. Onjanja yatete, Akristão vesanda vana va lomboloka (“osoka”), ‘va litenga’ Lakristão vocili. Onjanja yavali, “pokati” Kakristão vocili peya oku kala vamue va linga olonanguluke okuti ‘va popia ovina via penga.’

^ tini. 17 Ocinimbu 17: [6] Tala ocipama losapi hati: ‘Ndi Kasi Kumue Lene Oloneke Viosi,’ ci sangiwa Vutala ulo Wondavululi, kemẽla 11, ocinimbu 6.