Skip to content

Skip to table of contents

Olombangi Via Yehova

Select language Umbundu

Sanjukila Ovituwa via Yehova

Sanjukila Ovituwa via Yehova

“Omo okuti vumãla va soliwa va Suku, kuami ongangu yaye.”—VA EFE. 5:1, NW.

1. (a) Ovituwa vipi via Yehova Ukristão a sukila oku kũlĩhĩsa? (b) Tu kuatisiwa ndati poku konomuisa ovituwa via Yehova?

ECI o sokolola ovituwa via Yehova, ovisimĩlo vipi o kuata? Valua pokati ketu tua siata oku sima okuti Yehova ukuacisola, ukuesunga, ukualondunge, kuenda ukuonene. Pole, tua kũlĩha okuti, Yehova o kuete ovituwa vialua viwa. Eye o kuete eci pitahãla 40 kovituwa via litepa okuti via tukuiwa valivulu etu. Nda wa konomuisa ovituwa viaco pokolika ale kumue lepata liove, ci ku kuatisa oku lilongisa ovina vialua viatiamẽla ku Yehova! Tu pondola ndati oku kuatisiwa lelilongiso liaco? Tu kuatisiwa lika nda tua kapako ovina tu lilongisa viatiamẽla Kokuaye. Nda tua ci linga, tu pamisa ukamba wetu laye, kuenda tu kuama ongangu yaye.—Yeh. 23:8; Osa. 73:28.

2. (a) Lombolola ndomo tu pondola oku sola ovituwa via Yehova. (b) Ovina vipi tu konomuisa vocipama cilo?

2 Oku “sola” ocina cimue ci lomboloka nye? Ndomo tu konomuisa ondaka ya tukuiwa ndeti, ci lomboloka oku kapako ocina cimue ci kuete esilivilo. Oku sola ocina cimue, ku livokiya vokuenda kuotembo. Tu kũlĩhĩsi ocindekaise eci: Onjongole yoku sola okulia kumue kuokaliye yi fetika oku livokiya eci tu yeva elemba liokulia kuaco. Noke yoku mãha okulia kuaco, tu kuata onjongole yoku ku teleka. Cimuamue haico ci pita letu okuti, oku sola Yehova, ku fetikila koku kũlĩha ciwa ovituwa viaye, oku vi sokolola, kuenda oku vi kapako komuenyo wetu. (Va Efe. 5:1) Ocipama cilo, kuenda vivali vi kuãimo, vi kuete ocimãho coku tu kuatisa oku sola ovituwa vikuavo via Yehova okuti ka tua vi kũlĩhĩle ciwa. Vovipama viaco tu konomuisa apulilo amue ndeci: Ovituwa viaco vi lomboloka nye? Yehova wa siata oku lekisa ndati ovituwa viaco? Tu pondola ndati oku kuama ongangu ya Yehova yoku lekisa ovituwa viaco?

 YEHOVA WALIANJA LOMANU

3, 4. (a) Oku lianja ku lomboloka nye? (b) Yehova wa siata oku lekisa ndati okuti wa lianja lomanu vosi?

3 Tete tu konomuisi eci ci lomboloka oku lianja. Omunu o lekisa ndati okuti wa lianja la vakuavo? O pondola oku popia ndoco: ‘Omunu wa lianja la vakuavo, o lekisa ohenda, kuenda ca leluka oku sapela laye.’ O pondola oku limbuka nda omunu wa lianja la vakuavo ale sio, eci o yeva ovina a popia, ekalo a lekisa pupolo waye poku vangula, kuenda ovina vikuavo.

4 Yehova o lekisa ndati okuti wa lianja lomanu? Omo okuti Yehova eye Ululiki wavelapo voluali luosi, wa likuminya oku yevelela olohutililo vietu, kuenda o vi tambulula. (Tanga Osamo 145:18; Isaya 30:18, 19.) Citava okuti tu sapela la Yehova olonjanja viosi kuenda kovitumãlo viosi tu kasi. Tu pondola oku ci linga poku limbuka okuti eye ka pisa ovina tu linga. (Osa. 65:2; Tia. 1:5) Embimbiliya li lekisa ndomo tu pondola oku lianja la Yehova poku sapela laye vohutililo. Ukualosamo Daviti wa popia hati: ‘Ovaso a Yehova a tu lete kuenda o tu yakela leka liaye liondio.’ (Osa. 34:15; 63:8) Uprofeto Isaya wa sokisa Yehova lungombo wolomeme poku popia hati: “Ongolola otumeme vovoko aye, o tu ambatela ponete. O songuila levando evi vi kasi lomãla.” (Isa. 40:11) Sokolola ndomo a siata oku ci linga! Yehova o yongola okuti, tu kuata ukamba laye, ndeci omeme yitito yendela peka liungombo ukuacisola. Ocili okuti, tu kuete Isia umue wa lianja letu! Tu kuama ndati ocituwa ca Yehova coku lianja lomanu vosi?

OCITUWA CIMUE CI KUETE ESILIVILO LIA VELAPO

5. Momo lie ci kuetele esilivilo akulu vekongelo oku lianja?

5 Vokuenda kuanyamo amue, Olombangi Via Yehova vi kasi kolofeka via litepa via pulisiwa ndoco: “Ocituwa cipi ukulu wekongelo a kuete okuti oco o sole calua?” Vamanji valua va tambulula vati: “Oku lianja.” Akristão vosi va sukila oku lekisa ocituwa caco, ca piãla enene akulu vekongelo okuti, va sukila oku lianja la vamanji. (Isa. 32:1, 2) Manji umue ukãi poku lekisa esunga lieci a tukuila ocituwa caco wa popia hati: “Nda ukulu umue wekongelo wa lianja, cu kuatisa oku lekisa ovituwa vikuavo viwa a kuate.” Wa limbuka hẽ esilivilo liolondaka manji a popia ndeti? Nye ci kuatisa omunu oku lianja la vakuavo?

6. Nye ci kuatisa omunu oku lianja la vakuavo?

6 Oco omunu a lianje la vakuavo, o sukila oku lekisa onjongole yoku va kapako. Ukulu wosi wekongelo wa lianja la vakuavo, o likolisilako oku lingila ovina viwa vamanji oku kongelamo amalẽhe. Nda wa ci linga, ci vetiya vamanji oku sapela laye. (Mar. 10:13-16) Umalẽhe umue o tukuiwa hati Carlos okuti o kuete 12 kanyamo wa popia hati: “Nda siata oku mola ndomo akulu vekongelo va lekisa esanju locisola, kuenje, nda sanjukila ovituwa viaco.” Ukulu wekongelo ka sukila lika oku popia hati wa lianja la vamanji, pole o sukilavo oku lekisa ocituwa caco. (1 Yoa. 3:18) O ci linga ndati?

7. Momo lie oku wala okokanda kohongele yofeka ci vetiyila omanu oku sapela letu? Ulandu owu u tu longisa nye?

7 Kũlĩhĩsa ulandu owu: Vokuenda kuanyamo a pita, manji umue eci a kala oku endela vombalãu poku tunda kohongele yofeka, wa walele okokanda kaye kohongele. Eci onalavayi yimue yombalãu ya mola okokanda kaco losapi hati: “Usoma wa Suku Wiye!,” ya sapuila manji hati: “Tu yongola okuti usoma waco wiya muẽle, momo tua siata oku vangula ovina viatiamẽla kondaka yaco.” Noke, manji wa sapela lonalavayi yaco, kuenje, ya tava oku tambula orevista yetu. Valua pokati ketu tua siata oku pita lovolandu aco. Momo lie omanu va siatela oku tava oku sapela letu eci va mola okokanda kohongele yofeka? Momo okokanda kaco ka vetiya omanu “oku lianja letu, kuenda ka va vetiyavo oku kũlĩha oku tu enda.” Okokanda kaco ka vetiyavo omanu oku limbuka okuti, tu yongola oku va sapuila ovina viatiamẽla ketavo lietu. Cimuamue haico ukulu vekongelo a sukila oku linga poku lekisa ku vamanji okuti, “o kuete onjongole yoku sapela lavo.” Akulu vekongelo va pondola ndati oku ci linga?

8. Akulu vekongelo va lekisa ndati okuti va kapako vamanji? Ocituwa caco ci kuatisa ndati ekongelo?

8 Ofeka lofeka yi kuete ovituwa via litepa, pole, nda tu lekisa esanju ku vamanji, oku va yolela ciwa, kuenda oku va lama, ci lekisa okuti tua va kapako. Helie o sukila oku ci linga tete? Tu kũlĩhĩsi ongangu Yesu a tu sila. Mateo wa popia hati, kohongele Yesu a linga lolondonge viaye, ‘wa amẽla kokuavo, kuenje, wa sapela lavio.’ (Mat. 28:18) Koloneke vilo, akulu vekongelo va sukilavo oku kuama ongangu ya Yesu yoku lianja la vamanji poku sapela lavo. Ocituwa caco ci kuatisa ndati ekongelo? Manji umue ukãi o kuete 88 kanyamo okuti ukundi wotembo yosi wa popia hati: “Esanju vamanji va siata oku lekisa kokuange, kuenda epandiyo ndi tambula kakulu vekongelo poku iñila Vonjango Yusoma, via siata oku pamisa ekolelo liange.” Manji ukuavo ukãi wa popia hati: “Ndaño okuti kuli ovina vimue tu sima okuti ka vi kuete esilivilo lia velapo, pole, nda akulu vekongelo va ndi yolela kohongele, ci pamisa ekolelo liange.”

SANDA OTEMBO YOKU SAPELA LA VAMANJI

9, 10. (a) Ongangu yipi yiwa Yehova a kuete? (b) Akulu vekongelo va lekisa ndati okuti va lianja la vamanji?

 9 Nda tu yongola okuti vakuetu va lianja poku sapela letu, tu sukila oku sokiya otembo yoku kala lavo. Yehova eye ongangu yiwa yoku lianja lomanu vosi. Momo ‘ka kasi ocipãla lomanu vana vo sandiliya.’ (Ovil. 17:27) Akulu ­vekongelo va ­sukila oku lekisa onjongole yoku sapela la vamanji akulu kuenda amalẽhe osimbu ohongele ka ya fetikile handi, ale kesulilo liohongele. Manji umue ukundi wotembo yosi wa popia hati: “Nda ukulu umue wekongelo o yongola oku kũlĩha ndomo ndi kasi, kuenda eci ndu tambulula o ndi yevelela lutate, ndi limbuka okuti wa ndi kapako.” Manji ukuavo ukãi okuti o kasi oku vumba Yehova vokuenda kueci ci soka 50 kanyamo, wa popia hati: “Nda akulu vekongelo va sapela lame noke liohongele, ci lekisa okuti va ndi kapako.”

10 Ocili okuti, akulu vekongelo va kuete ovikele vialua va sukila oku tẽlisa. Pole, eci va enda kolohongele va sukila oku sokiya otembo yoku sapela la vamanji.

YEHOVA KA KUETE OCAME

11, 12. (a) Nye ca kongela voku yuvula ocame? (b) Nye ci lekisa okuti Yehova eye ongangu yiwa yoku yuvula ocame?

11 Ocituwa cikuavo ciwa ca Yehova ceci okuti, ka kuete ocame. Oku yuvula ocame ci lomboloka nye? Ci lomboloka oku tata ciwa vakuetu, kuenda oku yuvula oku velisapo omanu vamue okuti vakuavo ci sule. Omunu o yuvula ocame wa kapako ovina vivali ndeci: Oku lekisa ukamba komanu, kuenda oku va lingila ovina viwa. Momo lie ovina viaco vi kuetele esilivilo? Omunu wosi ka kuete ocame o yuvula oku tata vakuavo locame. Vovisonehua vio Heveru, ondaka “ka kuete ocame,” yi lomboloka “oku yuvula oku “kapako lika omanu vamue okuti vakuavo ka va kapiwako.” (Ovil. 10:34) Omo liaco, omunu ka kuete ocame o yuvula oku tata lika ciwa omanu vana va kuete ovokuasi, pole, o linga ukamba lomanu vosi.

12 Yehova eye lika ongangu yiwa yoku yuvula ocame. Ondaka yaye yi popia hati: ‘Yehova ka kuete ocame, kuenda wa kapako omanu vosi.’ (Tanga Ovilinga 10:34, 35; Esinumuĩlo 10:17.) Ulandu umue wa pita koloneke via Mose u lekisa ndomo Yehova a yuvula ocame.

Omãla va Celefeada va sanjukilile ocituwa ca Yehova coku yuvula ocame

(Tala  ovinimbu 13, 14)

13, 14. (a) Ocitangi cipi omãla vatãlo va Celefeada va liyaka laco? (b) Yehova wa lekisa ndati kokuavo okuti ka kuete ocame?

 13 Osimbu va Isareli ka va iñilile Vofeka Yohuminyo, afeko vamue vatãlo va liyaka locitangi cimue. Ocitangi cipi va liyaka laco? Ovo va kũlĩhĩle okuti, epata liavo kuenda akuavo a va Isareli, a lavokaile oku tambula ocipiñalo ca eciwile ku isiavo. (Ate. 26:52-55) Kotembo yaco isiavo Celefeada una watiamẽlele kepata lia Manase, wa fa ale. Ko Isareli kua kala ocihandeleko cokuti, ocipiñalo ceciwa lika komãla valume va Celefeada, pole, eye wa kuatele lika omãla vafeko. (Ate. 26:33) Ocili okuti, Celefeada ka kuatele omãla valume oco va tambule ocipiñalo caco. Anga hẽ ca sungulukile oku eca ocipiñalo caco kepata likuavo lia Celefeada okuti ka ceciwa komãla vaye vafeko?

14 Noke, afeko vaco vatãlo va endele ku Mose kuenje vo pulisa vati: ‘Onduko ya isietu yi fila nye ndaño okuti ka kuatele omõla ulume?’ Kuenje, va pinga kokuaye vati: “Tu ĩhe onepa pokati kavamanji va isietu.” Anga hẽ Mose wa va sapuila hati: ‘Ka va kuatele omoko yoku tambula ocipiñalo caco’? Sio, Mose ka ci lingile. Pole, “wa tuala ondaka yavo ku Yehova.” (Ate. 27:2-5) Etambululo lipi vo wĩha? Yehova wa sapuila Mose hati: ‘Omãla vakãi va Celefeada va kuete esunga. Va avela muẽle onepa yocipiñalo pokati ka vamanji a isiavo. Va tepisila ocipiñalo ca isiavo.’ Noke, Yehova wa sapuila Mose oco a kongele vocihandeleko onumbi yikuavo yi popia hati: ‘Nda omunu umue wa fa okuti ka sile omõla ulume, ocipiñalo caye ceciwe komõlaye ufeko.’ (Ate. 27:6-8; Yeh. 17:1-6) Omo liaco, oku upisa kotembo yaco akãi vosi vo ko Isareli va liyaka locitangi caco, va kuatele omoko yoku tambula ocipiñalo.

15. Yehova wa siata oku tata ndati omanu vaye ca piãla enene vana ka va kuete umue o va kuatisa? (b) Ovolandu api a sangiwa Vembimbiliya a lekisa okuti Yehova ka kuete ocame?

15 Yehova wa nõla onjila yikuavo yoku yuvula ocame! Eye wa tetulula lesunguluko ocitangi comãla vafeko vaco, ndeci a lekisa esumbilo kakãi vakuavo ko Isareli vana va kuatele ekalo liwa. (Osa. 68:5) Ulandu owu, umue pokati kovolandu alua a sangiwa Vembimbiliya u lekisa ndomo Yehova a siata oku tata omanu vaye okuti ka lekisa ocame.—1 Sam. 16:1-13; Ovil. 10:30-35, 44-48.

TU PONDOLA OKU KUAMA ONGANGU YA YEHOVA

16. Tu kuama ndati ongangu ya Yehova yoku yuvula ocame?

16 Tu kuama ndati ongangu ya Yehova yoku yuvula ocame? Ivaluka okuti, voku yuvula ocame mua kongela ovina vivali. Tu yuvula lika ocame, nda tu lekisa esunguluko ku vakuetu. Vosi yetu pamue tu sima okuti, ka tua siatele oku lekisa ocame ku vakuetu. Pole, pamue ka ci leluka oku limbuka nda tu kuetele vakuetu ovisimĩlo ka via sungulukile. Nye tu sukila oku linga oco tu limbuke okuti ka tu kuete ocame? Eci Yesu a yonguile oku kũlĩha ndomo omanu vo tukula, wa pula kakamba vaye hati: ‘Mõlomunu vo tukula ndati?’ (Mat. 16:13, 14) Momo lie ku kuamẽla ongangu ya Yesu? O pondola oku pula kekamba liove oco a ku sapuile nda ovituwa viove vi lekisa okuti ku kuete ocame. Nda ekamba liove lia ku sapuila hati, o kuete olonepele viakova, ale ocame, nye o sukila oku linga? O sukila oku likutilila ku Yehova oco a ku kuatise oku yuvula ocituwa coku kuata ocame.—Mat. 7:7; Va Kol. 3:10, 11.

17. Tu pondola ndati oku lekisa okuti ka tu kuete ocame?

 17 Vekongelo Liakristão tu lekisa onjongole yoku kuama ocitiwa ca Yehova coku yuvula oku lekisa ocame, poku lekisa esumbilo kuenda ocisola ku vamanji vosi. Nda tu yongola okuti vamanji vamue veya konjo yetu, tu sukila oku laleka vosi ndeci: Vana va tunda kolofeka via litepa, olohukũi, olosiwe, kuenda ovimbumba. (Tanga Va Galatia 2:10; Tiago 1:27.) Nda tu kasi kupange woku kunda esapulo Liusoma, tu kundila omanu vosi tu sanga oku kongelamo vana va tunda kolofeka vikuavo. Tu kuete esanju lialua, momo alivulu etu a pongoluiwa kueci ci soka 600 kalimi. Omo liaco, tu kuete epuluvi lioku lekisa okuti, ka tu kuete ocame!

18. O lekisa ndati okuti o sole ocituwa ca Yehova coku lianja lomanu, kuenda ku kuete ocame?

18 Poku sokolola okuti Yehova wa lianja lomanu kuenda ka kuete ocame, ci tu kuatisa oku velisapo ovituwa viaye. Omo liaco, tu sukila oku kuama ongangu ya Yehova, loku lekisa ovituwa viaco poku tata ciwa vamanji, kuenda omanu vana tu sanga kupange woku kunda.

“Yehova o kasi ocipepi la vosi vo vilikiya.”—Osa. 145:18

( Tala ocinimbu 9)

‘Yehova, Suku yene ka lekisa ocame komunu la umue.’—Esin. 10:17

(Tala  ocinimbu 17)