Skip to content

Skip to table of contents

Olombangi Via Yehova

Select language Umbundu

Apulilo a Lingiwa la Vakuakutanga

Apulilo a Lingiwa la Vakuakutanga

Va Isareli va enda hẽ oku tulika olongangala koviti poku vi ponda?

Kosimbu, kolofeka vialua kua kala ocituwa coku tulika olongangala koviti poku vi ponda. Va Roma, poku ponda olondingãivi, va enda oku vi kutila vuti, okuti omo vi kala oloneke vialua levalo, enyona, onjala kuenda ovitangi vikuavo. Ocituwa coku tulika omunu kuti, va Roma va ci tendele ndekangiso lieciwa kolondingaĩvi olohukũi.

Nye ci popiwa catiamẽla ku va Isareli kosimbu? Anga hẽ va Isareli va enda oku tulika olongangala koviti poku vi ponda? Ocihandeleko Suku a ecele ku Mose ci popia ndoco: Nda omunu wa linga ekandu okuti o sesamẽla oku fa, kuenje noke yoku pondiwa wa nyoñamisiwa kuti, ocivimbi caco ka ci ka kale u teke wosi kuti waco, pole, ci kendiwe keteke liaco.’ (Esin. 21:22, 23) Omo liaco, eci Ovisonehua vio Heveru via sonehiwa, omunu wosi o sesamẽla oku fa, noke yoku pondiwal o tulikiwa kuti.

Catiamẽla kondaka eyi elivulu Liovisila 20:2 li popia hati: ‘Omunu wosi o kasi pokati ka va Isareli, pamue pokati kovingendeleyi via tunga vo Isareli, okuti eca omãla vaye ku Moleke, omunu waco a pondiwe, kuenje omanu vakuafeka yaco, vo sosole lovawe toke eci a fa.’ Omo liaco, omanu vana va kuata ocituwa coku ‘singila, ale coku tãha’, va enda oku pondiwavo. Va enda oku ci linga ndati? Poku ‘va sosola lovawe.’—Ovis. 20:27.

Kelivulu Liesinumuĩlo 22:23, 24, tu tangako ndoco: ‘Nda kuli ufeko wa lombiwa lulume, noke ulume ukuavo u sanga vimbo kuenje o lipekela laye, kavali kavo va tundisiwe kosamua yimbo liaco, kuenje vu va sosola lovawe toke eci va fa. Ufeko vu sosola, momo ka litetelele vimbo. Vu sosola ulume, momo wa sepula ukãi wulume ukuavo. Kuenje, u yelisa evĩho pokati kene.’ Va Isareli va kuatele ocituwa coku sosola lovawe olongangala toke eci vi fa. *

Eci Ovisonehua vio Heveru via sonehiwa, omunu wosi o sesamẽla oku fa, noke yoku pondiwa o tulikiwa kuti

Elivulu Liesinumuĩlo 21:23, li popia hati: ‘Omunu wosi wa nyoñamisiwa kuti, wa siñaliwa la Suku.’ Ocituwa coku tulika voluayela etimba liondingaĩvi ‘ya siñaliwa la Suku,’ ca kuata esilivilo ku va Isareli. Omo liaco, oku tulika kuti etimba liondingaĩvi, ca kala elungulo komanu vakuavo.

^ tini. 6 Olonoño vialua vi tava Kocihandeleko Suku a ecele ku Mose ci lekisa okuti, osimbu ondingaĩvi ka ya pondiwile, etimba liaye li tulikiwa kuti. Pole, kuli uvangi u lekisa okuti, kocita catete, va Yudea va enda oku tulika kuti olondingaĩvi toke eci vi fa.