Skip to content

Skip to table of contents

Olombangi Via Yehova

Select language Umbundu

Va Lieca Olumue ko Mesiku

Va Lieca Olumue ko Mesiku

POKU mõla etendelo lialua liamalẽhe Olombangi Via Yehova va leluisa omuenyo oco va vokiye upange wavo woku kunda, ci nena esanju. (Mat. 6:22) Apongoloko api va linga? Ovitangi vipi va liyaka lavio? Oco tu sange atambululo aco, tu kũlĩhĩsi ulandu wa vamanji vamue okuti cilo va kasi oku kundila ko Mesiku.

“TUA LINGA APONGOLOKO”

Dustin lulume waye Jassa

Manji Dustin lukãi waye Jassa va tunda ko Estados Unidos, vakuela kosãi ya Susu yunyamo wo 2007. Ovo va limbuka okuti va pondola oku tẽlisa onjongole yavo yoku ñuala ñuala lowato wavo vokuenda kunyamo. Owato wavo, wa kala ocipepi lolupale luo Astoria, Oregon, ko Estados Unidos okuti, lua posoka calua, momo lua ñualiwa lolomunda vi kuete oviti lombundu, kuenda lua kala ocipepi Lokalunga ko Pasifiku. Manji, Dustin wa popia ndoco: “O pondala oku mõla ocina cimue ca posoka!” Ovo va leluisa omuenyo oco va vumbe Yehova. Noke, va sima ndoco: ‘Tu pondola oku kala ocipepi lowato u kasi ocinala ci soka 7.9 kolometulu. Kuenje, tua sanda upange wolowola vikuãla veteke, oco tu kale vekongelo va vangula elimi likuavo, kuenda olonjanja vimue tu litumbika kupange wakundi va sokamo.’ Pole, va limbuka okuti, ka va kuete ovisimĩlo via sunguluka. Manji Dustin wa popia hati: “Nda tua kuatisa ekongelo tu kuata otembo yalua yoku kunda lowato wetu.  Tua limbuka okuti oco tu pitise kovaso upange wa Yehova, tua sukilile oku linga epongoloko.”

Manji Jassa wa amisako hati: “Osimbu sia kuelele, nda kala ko Mesiku vekongelo limue va vangula elimi Liongelesi. Nda solele oku kala vekongelo liaco kuenda nda yonguile oku tiukilamo noke yolohuela.” Oco manji Dustin lukãi waye Jassa va pamise onjongole yavo yoku ilukila kocitumãlo cikuavo, vokuenda kuefendelo liepata va fetika oku tanga ovolandu omuenyo wa vamanji va ilukila kolofeka vikuavo, kuli omanu va sukila oku yeva olondaka viwa. (Yoa. 4:35) Manji Dustin wa popia hati: “Tua yonguilevo oku seteka esanju liaco.” Eci manji Dustin lukãi waye Jassa va yeva okuti akamba vavo ko Mesiku va enda kocikanjo cikuavo oco va kuatise ocimunga cokaliye, va kuatavo ovisimĩlo viaco. Kuenje, va siapo upange wavo, lowato wavo kuenda va ilukila ko Mesiku.

“ECI OCO OCINA CA VELAPO TUA LINGA”

Manji Dustin lukãi waye Jassa, va ilukila vocikanjo co Tecomán, ocipepi Lokalunga ko Pasifiku okuti, ca kala ocinãla ci soka 4.345 kolokilometulu kombuelo yo Astoria. Manji Dustin wa popia hati: “Ndaño vocikanjo caco ka mua kalele ofela ya talala kuenda olomunda via posoka, pole, mua kala ofela ya tokota, kuenda oviti viandulumãu tua enda oku mũila ocipãla.” Eci va pitĩla vocikanjo caco, ka va sangele upange woku sanda eteku. Vokuenda kuolosema vimue, ka va kuatele epondolo lioku landa oluoso locipoke, oco valie olonjanja vivali veteke. Manji Jasa wa popia hati: “Eci okulia kuetu kua pua, omanu tu longisa Embimbiliya va fetika oku tu ĩha olomanga, ahondio, ovimama, kuenda andulumãu!” Vokuenda kuotembo kavalikavo va sanga upange kosikola yimue va longisa kelimi lio Taiwan. Kuenje, olombongo va enda oku tambula via va kuatisa oku landa ovina va sukila.

Manji Dustin la Jassa nye va yeva kutima omo liomuenyo va kuata? Ovo va popia vati: “Oku ilukila kulo oco ocina ca velapo tua linga. Momo ukamba wetu la Yehova lomanu vaco wa livokiya. Oloneke viosi tua enda oku lingila ovina kumosi ndeci: oku enda kupange, poku sokiya ndomo tu kuatisa omanu tu longisa Embimbiliya kuenda oku pongiya olohongele. Kuenje, ka tua velisilepo vali ovina tua enda oku sakalala lavio kosimbu.” Ovo va amisako vati: “Cilo tua limbuka ocili colondaka vi sangiwa kelivulu Liosamo 34:8, li popia hati, ‘Seteki oco vu limbuke okuti Yehova ukuahenda.’”

NYE CA VETIYA VA MANJI VALUA OKU LIECA OLUMUE?

Ci pitãhala 2.900 ya vamanji alume kuenda akãi okuti vamue vakuela ale, vamue sio, okuti vakuete ci pitãhala 20 toke 30 kanyamo, va siata oku ilukila kovitumãlo vimue vio Mesiku okuti kuli esukila liakundi Vusoma. Momo lie vamanji valua  va siatela oku nõlapo oku linga upange umue ka wa lelukile? Eci ku lingiwa epulilo limue kocimunga cimue, ovo va tambulula loku tukula atosi atatu. Api atosi aco?

Leticia lulume waye Hermilo

Oku lekisa ocisola ku Yehova kuenda komanu. Manji Leticia okuti eci a papatisiwa wa kuata 18 kanyamo, wa popia hati: “Eci nda papatisiwa nda limbuka okuti, nda sukilile oku vumba Yehova lutima wosi kuenda lomuenyo wange wosi. Oco ndi lekise ocisola ku Yehova, nda sukilile oku pesila otembo yalua longusu yange kupange waye.” (Mar. 12:30) Manji Hermilo okuti cilo wa kuela manji Leticia, eci a ilukila kocikanjo kuna ka kuli akundi valua Vusoma, wa kuata eci ci pitahãla 20 kanyamo. Eye wa popia hati: “Oku kuatisa omanu vosi lolonumbi Viembimbiliya, oyo onjila ya velapo yoku lekisa ocisola cange kokuavo.” (Mar. 12:31) Eye wa tunda volupale luo Monterrey muna a kuata ekalo liwa omo lioku talavaya kombango, kuenje, wa ilukila volupale lumue lutito.

Essly

Ovolandu kuenda esanju. Manji Leticia noke yoku papatisiwa, eye kumue lamanji umue ukundi wotembo yosi, va ilukila kocikanjo cimue ci kasi ocipãla, kuna va kundila vokuenda kuosãi yimosi. Manji Leticia wa popia hati: “Nda komoha calua poku mola ndomo omanu va lekisa onjongole kesapulo Liusoma tua va kundila, kuenje, nda kuata esanju lialua. Kesulilo liosãi yaco nda popia ndoco: ‘Upange owu owo nda yonguile oku linga komuenyo wange!’” Manji Essly okuti ka kuelele handi haeye o kuete ci pitahãla 20 kanyamo, wa kuatavo esanju omo lioku litumbika kupange waco. Osimbu a kala oku tangela kosikola ya pita pokati, wa li sanga la vamanji vamue va kala oku kundila kovikanjo vina ka kuli akundi valua. Eye wa popia hati: “Poku mola esanju vamanji va lekisa, ca ndi vetiya oku kuama ongangu yavo.” Vamanji valua akãi va siatavo oku kuata ovisimĩlo ndevi via Essly. Kofeka yo Mesiku, kuli eci ci pitahãla 680 ya vamanji akãi ka va kuelele okuti va kasi oku kundila kovikanjo vina ka kuli akundi valua. Vamanji yaco va siata oku lekisa ongangu yiwa kamalẽhe kuenda kakulu!

Oku kuata ocimãho kuenda esanju komuenyo. Eci manji Essly amala oku lilongisa kosikola ya pita pokati, wa tambula ukanda woku lilongisila kosikola ya velapo. Akamba vaye, vo vetiya oku tambula ukanda waco oco a kuate ‘omuenyo uwa’ kosikola yaco, upange uwa woku sanda eteku, oku landa ekãlu liwa, kuenda oku linga ovongende. Pole, ka tavele kovisimĩlo viaco. Omo liaco, manji Essly wa popia hati: “Ndi kuete akamba vamue Olombangi Via Yehova okuti, va velisapo ovina viaco kuenda nda limbuka okuti ka va kuatele ocimaho coku pitisa kovaso upange woku kunda. Kuenje, nda limbuka okuti veya oku kuata ovitangi vialua omo lioku tiamisila utima koku sanda ovokuasi. Omo liaco, nda nõlapo oku pitisa kovaso upange wa Yehova osimbu sia kukile handi.”

Racquel lulume waye Phillip

Eci manji Essly a mala osikola ya pita pokati, wa lilongisa ovoloño akuavo okuti o kuatisa oku sanga olombongo vioku landa ovina a sukila  osimbu a kala kupange wakundi votembo yosi. Noke wa ilukila kocikanjo cimue okuti ka kuli akundi valua. Eye wa liyaka locitangi coku lilongisa elimi li vanguiwa lomanu vo ko Otomi kuenda ko Tlapaneco. Pa pita ale anyamo atatu tunde eci a ilukila kocikanjo caco. Kuenje wa popia hati: “Oku kundila kocikanjo cimue ka kuli akundi valua, ca ndi nenela esanju, kuenda nda limbuka esilivilo liomuenyo. Kuenje nda pamisa ukamba wange la Yehova.” Manji Phillip lukãi waye Racquel, va tunda ko Estados Unidos eci va kuata ci pitahãla 30 kanyamo. Ovo va popia vati: “Omo okuti ovina vi kasi oku pongoloka lonjanga voluali, omanu valua va sima okuti omuenyo wavo u kasi kohele. Pole, oku kala kovikanjo vina okuti omanu vaco va tava kesapulo Liembimbiliya tu va kundila, ci tu vetiya oku tẽlisa onjongole yetu. Omo liaco, tu kuete esanju kupange wetu!”

NDOMO TUA LIYAKA LOVITANGI

Verónica

Ka ca lelukile oku kundila kovikanjo vina ku sukila akundi Vusoma. Pamue, ka ci leluka oku sanga olombongo vioku landa ovina omunu a sukila. Omo liaco, o sukila oku linga apongoloko oco o kuame ekalo lio vocikanjo caco. Manji Verónica okuti wa loñoloha kupange wakundi votembo yosi wa popia hati: “Kocikanjo cimue nda kundila, ndaenda oku teleka okulia kumue okuti ka kua tĩlile oku ku landa. Kocikanjo cikuavo nda kala, ndaenda oku landisa uwalo kuenda oku teta esinga. Pole, cilo nda siata oku linga upange woku yelisa vonjo, kuenda oku longisa olonjali viokaliye oku sapela ciwa lomãla vavo.”

Olonjanja vimue, ka ca lelukile oku kuama ovituwa viomanu vo kovaimbo a kasi ocipãla. Manji Phillip lukãi waye Racquel, eci va kala oku kundila vocikanjo comanu va vangula elimi lio Náuatle, va liyaka locitangi caco. Omo liaco, manji Phillip wa popia hati: “Vocikanjo tua kundila, mua kala ovituwa via litepa.” Nye ca va kuatisa oku kuama ovituwa viaco? Eye wa amisako hati: “Tua kuama ovina via sunguluka tua enda oku limbuka komanu va vangula elimi lio Náuatle ndeci: Ukamba va kuata la vakuepata liavo, esunguluko la vakuavo, kuenda ocituwa coku kuatisa omanu.” Manji Racquel wa popiavo hati: “Tua lilongisa ovina vialua omo lioku kala kumosi la vamanji kovikanjo viaco.”

NDOMO O LIPONGIYA

Nda o yongola oku kundila kocikanjo cimue kakuli akundi valua, nye o sukila oku linga oco o lipongiye? Vamanji vamue va siata oku linga upange waco va popia vati: Osimbu kua ilukilile kocikanjo cikuavo leluisa omuenyo wove, kuenda sanjukila ekalo o ka sanga kocikanjo caco. (Va Fil. 4:11, 12) Nye o sukila oku linga vali? Manji Leticia wa popia hati: “Nda yuvula upange woku sanda eteku u ndi kisika oku talavaya otembo yalua. Momo nda yonguile oku kundila kovitumãlo viosi ka kuli akundi valua.” Manji Hermilo wa popia hati: “Nda lilongisa oku teleka, oku sukula kuenda oku ngomãla.” Manji Verónica wa popiavo hati: “Osimbu nda kala konjo lolonjali viange kumue lovimumba viange, ndaenda oku kuatisa kupange woku yelisa vonjo, kuenda nda lilongisavo oku teleka. Nda lilongisavo oku kũlĩhĩsa ovina ndi sukila oku landa.”

Amelia lulume waye Levi

Manji Levi lukãi waye Amelia va tunda ko Estados Unidos okuti tunde eci va kuela papita ale anyamo ecelãla, va lombolola ndomo olohutililo via va kuatisa oku lipongiya oco va ka kundile ko Mesiku. Manji Levi wa popia hati: “Tua pngiya olombongo vioku landa ovina tu sukila vokuenda kunyamo umosi kofeka yikuavo, kuenje tua pinga ku Yehova oco a tu kuatise oku sanga olombongo viaco.” Noke yolosãi vimue va sanga olombongo vina va pinga vohutililo, kuenje va ilukila kofeka yikuavo. Manji Levi wa popia hati: “Omo okuti Yehova wa tambulula epingilo lietu, tu sukila oku tẽlisa onjongole yaco.” Manji Amelia wa popia hati: “Tua simĩle okuti, tu ka kala lika kofeka yaco unyamo umosi. Pole, cilo tu kasi vofeka yaco anyamo epanduvali, kuenda ka tu yongola oku tiukila! Oku kala kulo ci tu kuatisa oku limbuka ekuatiso lia Yehova. Oloneke viosi tua siata oku limbuka ovina Yehova a tu lingila.”

Adam lulume waye Jennifer

Manji Adam lukãi waye Jennifer va tunda ko Estados Unidos okuti cilo va kasi oku kundila ko Mesiku vocikanjo muli omanu va vangula Ongelesi, va limbuka esilivilo lioku likutilila. Ovo va eca evetiyo poku popia vati: “Ku ka kevelele toke eci o kuata ekalo liwa. Pole, tukula vohutililo onjongole yove yoku kundila kocikanjo cikuavo, kuenje yi tẽlisa. Leluisa omuenyo wove kuenda tuma ukanda kombetele vofeka yene loku tukula ocikanjo o yongola oku kundila. Noke yoku kũlĩhĩsa ovina vi sukiliwa, ilukila kocikanjo caco!” * Nda wa ci linga, o pamisa ekolelo liove, kuenda o kuata esanju.

^ tini. 21 Oco o kuate elomboloko lia suapo liatiamẽla kondaka eyi, tanga onepa losapi hati: “Ove hẽ o Pondola ‘Oku Enda ko Makedonia’?Vupange Wetu Wusoma Wenyenye, 2011.