Skip to content

Skip to table of contents

Olombangi Via Yehova

Select language Umbundu

 ULANDU WOMUENYO

Akũi Atãlo Kanyamo Kupange Wakundi Votembo Yosi Ocipepi lo Konano yo Europa

Akũi Atãlo Kanyamo Kupange Wakundi Votembo Yosi Ocipepi lo Konano yo Europa

Umue pokati kakamba vetu wa kala kupange wakundi votembo yosi, tuo sapuila ndoco: “Ca leluka oku fetika upange wakundi votembo yosi. Olonjali viove afendeli va Yehova kuenda vi pondola oku ku kuatisa.” Eye wa tambulula hati: “Yeveleli! Vosi yetu tu kuete Isia umuamue.” Etambululo liaye lia tu longisa ocina cimue ci kuete esilivilo. Momo Isietu wokilu wa siata oku tata afendeli vaye kuenda oku va pamisa. Omo liaco, ulandu womuenyo wetu weca uvangi waco.

 TUA citiwa ekũi liomãla vepia limue volupale luo Northern, vocikanjo co Ostrobothnia, ko Finlândia. Eci tua kala omãla, tua talisiwa ohali Luyaki Wavali wa pita Voluali luosi. Ndaño onjo yetu ya kala ocipãla loku kua pita uyaki, pole, tua kũlĩha okuti omanu valua va tala ohali omo liuyaki. Eci olupale luo Oulu kuenda luo Kalajoki a timihĩwa latenda, tua mõla ilu lia kusuka lulienge wondalu. Eci olonjali vietu via mõla olombalãu viuyaki via kala oku pita ocipepi lonjo yetu, via tu vetiya oku salama. Pole, tua kuata esanju eci kota lietu Tauno a tu sapuila catiamẽla koluali luokaliye palo posi okuti, ka mu kakala ungangala.

Kota lietu Tauno wa fetika oku lilongisa Embimbiliya eci a kuata 14 kanyamo lekuatiso lialivulu a tambuile ku Vakuakulilongisa Embimbiliya. Eci Uyaki Wavali wa pita Voluali luosi wa pitĩla kesulilo, eye ka tavele oku enda kuyaki omo liovina a lilongisa Vembimbiliya, kuenje, wa kapiwa vokayike. Eye wa talisiwa ohali yalua. Onjila a nõlapo yoku vumba Yehova, ya pamisa ekolelo liaye, kuenje eci a tunda vokayike wa kuata ombili yalua kupange woku kunda. Ongangu yaye yiwa ya tu vetiya oku endaenda kolohongele Olombangi Via Yehova via enda oku lingila vimbo limue lia kala ocipepi letu. Tua kuata ocituwa coku endaenda kolohongele viofeka, ndaño okuti ka ca lelukile oku sanga olombongo vioku linga ungende. Tua enda oku lima osapola, loviti viapako, kuenda oku tonga uwalo womanu vo posongo yetu. Omo okuti tua kuata upange walua vepia, ka ca tavele okuti vosi yetu tu enda onjanja yimosi kohongele yofeka.

Oku upisa kepĩli vamanji: Matti (isia), Tauno, Maria Emilia (ina), Väinö, Saimi, Aili, kuenda Annikki kunyamo wo 1935

Ovina tua lilongisa Vembimbiliya viatiamẽla ku Yehova kuenda kocipango caye, via vokiya ocisola cetu kokuaye, kuenje, tua nõlapo oku litumbika kokuaye. Kunyamo wo 1947 eci manjange Annikki a kuata 15 kanyamo, kuenda Aili a kuata 17 kanyamo, vosi yetu tua papatisiwa. Mana yetu Saimi wa papatisiwavo kunyamo waco. Tua longisavo Embimbiliya ku mana yetu ukuavo Linnea okuti, otembo yaco wa kuela ale. Eye kumue lepata liaye, va lingavo Olombangi Via Yehova. Noke yoku papatisiwa tua sokiya okuti, vepuluvi liepuyuko kosikola, tu kala akundi va sokamo.

TUA FETIKA UPANGE WAKUNDI VOTEMBO YOSI

Oku upisa kepĩli vamanji: Eeva Kallio, Saimi Mattila-Syrjälä, Aili, Annikki, kuenda Saara Noponen, kunyamo wo 1949

Kunyamo wo 1955, tua ilukila volupale luo Kemi, konano yofeka yaco. Ndaño tua kuata onjongole yoku amamako kupange wakundi votembo yosi, pole, tua kala lohele yokuti, ka tu kuata olombongo vioku landa ovina tu sukila oco tu amameko kupange waco. Kuenje osimbu ka tua fetikile upange waco, tua nõlapo oku sanda olombongo vi ka tu kuatisa. Manji wa tukuiwa kefetikilo liocipama cilo, wa tu kuatisa oku limbuka okuti, tu pondola oku fetika upange waco. Noke tua limbuka okuti, ekuatiso lioku vumba Yehova kupange wakundi votembo yosi, ka li tundi kokuetu muẽle ale kepata lietu. Pole tua nõlapo oku kolela ku Yehova oco tu kuate ovina tu sukila.

Tua loña kohongele yofeka volupale luo Kuopio, kunyamo wo 1952.

Noke tua sanga olombongo via tu kuatisa vokuenda kuolosãi vivali. Kuenje kosãi ya Kupemba yunyamo wo 1957, tua pinga oco tu kundile olosãi vivali vocikanjo co Pello volupale luo Lapland, Konano yo Europa. Noke yolosãi vivali tua limbuka okuti tua kuata handi olombongo, kuenje tua vokiyako olosãi vivali. Omo liaco, tua limbuka okuti, Yehova wa siata oku tu kuatisa.  Noke yoku tẽlisa 50 kanyamo kupange wakundi votembo yosi, tua kuata handi olombongo! Poku ivaluka upange tua linga vokuenda kuotembo tua limbuka okuti, Yehova o tu kuete peka loku tu sapuila hati: “Ku ka kuate usumba, hu kuatisa.”—Isa. 41:13.

Noke yoku tẽlisa 50 kanyamo kupange wakundi votembo yosi, tua kuata handi olombongo!

Oku upisa kepĩli: Manji Annikki, la Aili, kuenda Eeva Kallio

Kunyamo wo 1958, manji ukuakunyula akongelo wa tu sapuila oco tu ilukile vocikanjo co Sodankylä, volupale luo Lapland, oco tu iñile kupange wakundi valikasi. Vimbo liaco, mua kala lika ukãi umosi Ombangi ya Yehova. Eye wa lilongisa Embimbiliya lonjila yimue yi komohisa. Omõlaye ulume wa endele lolondonge vikuavo oku ka nyula o Helsinki, ombala yofeka yo Finlândia. Eci olondonge via tiuka, manji umue ukãi okuti ukulu wendamba, wa eca kumalẽhe waco Utala Wondavululi, kuenje wo pinga oco a wece ku inaye. Noke, umalẽhe wa eca Utala waco Wondavululi, kuenje eci inaye a u tanga wa limbuka okuti wa sanga ocili.

Tua kala vosapalalo vohondo yimue yoku fetela, ocipepi locitumãlo coku songela avaya. Vohondo yaco, omo tua enda oku lingila olohongele. Kefetikilo, ame lika la mana yange tua enda oku kala kolohongele, kuenda manji umue ukãi kumue lomõlaye ufeko. Tua enda oku tangela kumosi ovipama vi lingiwa vokuenda kuosemana. Noke, ulume umue wa enda oku lilongisa Embimbiliya Lolombangi Via Yehova, wa fetika oku talavaya vonjo yaco yoku songela avaya. Eye kumue lepata liaye va fetikavo oku endaenda kolohongele. Eye kumue lukãi waye veya oku papatisiwa. Kuenje, manji yaco wa fetika oku songola olohongele. Noke, alume vamue vakuavo va kala oku talavaya kupange waco, va fetikavo oku lilongisa Embimbiliya loku endaenda kolohongele. Eci pa pita anyamo amue, ocimunga caco ca livokiya, kuenje, ca linga ekongelo.

KA CA LELUKILE OKU KUNDA

Tua enda oku linga ovongende alua kupange woku kunda. Kotembo yondombo, tua enda oku linga ovongende alua losikaleta oco tu pitĩle vocikanjo cetu. Olosikaleta vietu via tu kuatisavo oku endaenda kolohongele viofeka, kuenda oku nyula olonjali vietu via kala ocipãla. Kotembo yombambi, tua enda oku tunda selo konjo, kuenje, tu endela vokalela, oco tu kundile omanu konjo lanjo. Noke yoku kundila olonjo viosi vimbo limue, tu enda vimbo likuavo. Omo okuti vetapalo mua kala ocikokoto calua, ka ca lelukile oku linga ungende. Pole, nda mua pita ale omunu umue okuti, wa sia ondimbukiso yolomãhi viaye, ci leluka oku pitamo.

Manji Kaisu Reikko la Aili, kupange woku kunda

 Omo liombambi locikokoto kofeka yaco, tua enda oku wala uwalo u koka owuya vetimba. Tua enda oku lundikila olomeya vivali, kuenje tu wala olombota. Olonjanja vimue, olombota vietu via enda oku yuka ocikokoto. Eci tu pitĩla puvelo wonjo yimue, tu lula olombota loku vitutumũla ocikokoto. Asũsu olosembele vietu a enda oku yula poku pita vocikokoto. Eci ku kala ombambi yalua, asũsu olosembele vietu a likuata locikokoto, kuenda a kala ndutale. Ukãi umue tua sanga wa popia hati: “Ene u kuete ekolelo liocili, omo lioku iya kulo ndaño lombambi yalua.” Tua enda oku enda ocinãla ci soka 11 kolokilometulu oco tu pitĩle konjo yaco.

Omo liungende walua tua, enda oku lala kolonjo viomanu tu sanga vocikanjo. Eci tu limbuka okuti ekumbi lia enda, tu pinga komanu ocitumãlo tu lala. Ndaño okuti olonjo viaco ka via posokele, pole omanu vaco va enda oku tu yolela ciwa loku tu yekisa poku tu ĩha ohondo yoku lala kuenda okulia. Olonjanja vimue tua enda oku lala povipa viovinyama. Pole, eteke limue tua lale vonjo yimue ya posoka. Momo ukãi umue o kuete onjo yinene, wa tu yekisa vohondo yakombe kosapalalo okuti ula waco wa yaliwa ciwa. Olonjanja vimue tua enda oku sapela lepata liaco catiamẽla Kembimbiliya toke koñolosi. Konjo yimue, ulume lukãi waye va lala kohondo yimue etu tua lale kohondo yikuavo. Olonjanja vimue tua enda oku sapela lavo toke vokati kuteke ale kolowola viatete komẽle. Ulume waco kumue lukãi waye va linga apulilo alua.

TUA KUATA ONIMA KUPANGE WOKU KUNDA

Olupale luo Lapland ocitumãlo cimue ca posoka. Pole, omanu va lilongisa catiamẽla ku Yehova, va posokele vali enene kokuetu. Umue pokati komanu vaco tua kundila, ulume umue wa enda oku tunda kocitumãlo cimue ocipãla ko Lapland. Vokuenda kuotembo tua iñila vovipundo viomanu valua va kala kocitumãlo caco. Ovo va enda oku sanjukila calua oku yevelela esapulo Liembimbiliya kuenda oku tanga alivulu etu.

Tua kuata ovolandu alua awa. Eteke limue tua cilua oku enda pocitumãlo coku londela vokalela kuenda o kalela ketu ka tu sia. Kuenje tua nõlapo oku londa vokalela ka enda kimbo likuavo. Lalimue eteke tua kundilile kocitumãlo caco. Vonjo yatete, tua sanga umalẽhe umue ukãi wa popia hati: “Ndi sima siti, ene wamalẽhe.” Tua fetika oku longisa Embimbiliya mukãi waye, kuenje, ufeko waco pinga mana yaye oco tu tiukile konjo yavo keteke liaco. Pole, lalimue eteke tua sangele omunu o tu tambulula ndoco. Kuenje tua fetika oku longisa Embimbiliya kokuaye kuenda komanu va kala ocipepi lonjo yaye. Noke yotembo yimue tua sapela lolondonge viaco oco vi vetiye vakuavo oku ­lilongisa Embimbiliya.  Kuenje valua vepata liaco va linga Olombangi Via Yehova.

Kunyamo wo 1965, tua pinga oco tuende Kekongelo lietu lia kala ko Kuusamo kombuelo yofeka. Kotembo yaco, kua kala lika akundi vatito. Kacalelukile oku kundila vocikanjo cetu co kaliye momo, omanu va pitisile calua kovaso etavo kuenda ka va solele upange wetu. Pole, valua pokati kavo va sumbilile Embimbiliya. Tua sanda oku linga ukamba lavo, kuenje noke yanyamo avali, ca tu kuatisa oku fetika oku longisa Embimbiliya komanu vamue.

TU KASI OKU AMAMAKO KUPANGE WOKU KUNDA

Va kasi oku kundila kumosi eteke kua kala ombambi yalua

Vamue tua longisa Embimbiliya

Koloneke vilo, ndaño okuti ka tu kuete ongusu yoku talavaya calua kupange woku kunda, pole, oloneke viosi tu likolisilako oku talavaya kupange woku kunda. Cilo ca leluka oku kundila vocikanjo cetu ndaño cinene momo, manji Aili wa lilongisile oku endisa ekãlu. Ocimumba cetu covetiya oco a pindisiwe kosikola yoku endisa olombinete, kuenje wa tambula ovicapa viaco kunyamo wo 1987 eci a kuata 56 kanyamo. Tua kuatisa koku tunga Onjango Yusoma yokaliye, kuenje tua ilukila vonjo ya kala ocipepi lonjango yaco.

Tua kuata esanju poku mola omanu valua konano yo Finlândia vatava oku lilongisa Embimbiliya. Eci tua fetika upange wakundi votembo yosi konano yo Finlândia, kua kala lika akundi vamue va li sanduila vocikanjo caco. Cilo vocikanjo caco muli akongelo alua. Eci tu enda kolohongele vimbo kuenda viofeka tua siata oku lisanga lomanu va tu pulisa nda handi tu va ivaluka. Momo, eci tua enda oku longisa Embimbiliya kolonjo viavo va kala omãla. Ombuto tua kũla kosimbu ya eca onima yiwa!—1 Va Kor. 3:6.

Tua sanjukila upange woku kunda ndaño kotembo yombambi

Kunyamo wo 2008, tua tẽlisa 50 kanyamo tunde eci tua fetika upange wakundi valikasi. Tu eca olopandu ku Yehova omo liekuatiso tua siata oku eca komanu oco va pandikise koku linga upange waye. Ndaño okuti tu ambata omuenyo wa leluka, pole lalimue eteke tua kambelele cimue. (Osa. 23:1) Cilo tua limbuka esunga lieci tua yuvuila oku kuata ohele osimbu ka tua fetikile upange wakundi votembo yosi! Tu kuete esanju lialua, momo tunde eci tua fetika upange wakundi va likasi, tua siata oku pamisiwa lolondaka via Yehova vi sangiwa kelivulu lia Isaya 41:10, vi popia hati: “Hu kolisa, hu kuatisa; [kuenda] hu kuata leka liange liondio hailio liesunga.”