Skip to content

Skip to table of contents

Olombangi Via Yehova

Select language Umbundu

“Ka Tu Ka Kavi”

“Ka Tu Ka Kavi”

‘Ka tu ka kavi koku linga eci ciwa.’—VA GAL. 6:9.

1, 2. Tu pamisa ndati ekolelo lietu poku mola ovina vi kasi oku lingiwa vocisoko ca Yehova?

TU KOMÕHA calua poku limbuka okuti, tua tiamẽla kocisoko ca Yehova voluali luosi. Ovinjonde via tukuiwa kelivulu lia Esekiele kocipama 1, kuenda kelivulu lia Daniele kocipama 7, vi lombolola ndomo Yehova a kasi oku linga upange, oco a tẽlise ocipango caye. Yesu eye o kasi oku songuila ovina via kongela vocisoko ca Yehova palo posi ndeci: Oku kunda olondaka viwa, oku kuatisa vana va kasi oku linga upange waco, kuenda oku kuatisa vana va yongola oku fendela Yehova. Ovina viaco, vi tu vetiya oku kolela kocisoko ca Yehova!—Mat. 24:45.

2 Tu kasi hẽ oku pokola kolonumbi vi eciwa vocisoko ca Yehova? Anga hẽ ombili yetu kefendelo liocili ya livokiya, ale yi kasi oku tepuluka? Oku kũlĩhĩsa lutate apulilo a lingiwa ndeti, ci tu kuatisa oku limbuka nda tua kava, ale ombili yetu yi kasi oku tepuluka. Citava okuti o pita locitangi caco. Kocita catete, upostolo Paulu wa lungula Akristão oco va kuame ongangu yiwa yombili Yesu a lekisa. Kuenje, Paulu wa va kuatisa loku va vetiya okuti, ‘ka va kavi, kuenda ka va leñela vovitima viavo.’ (Va Hev. 12:3) Omo liaco, oku konomuisa ocipama ca pita okuti ci lekisa ovina vi kasi oku lingiwa vocisoko ca Yehova, ci tu kuatisa oku pandikisa kupange waye kuenda oku amamako lombili yetu.

3. Nye tu sukila oku linga oco ka tu ka kave, kuenda nye tu konomuisa vocipama cilo?

3 Paulu wa lekisa okuti, kuli upange walua u sukila oku lingiwa, nda ka tua kavele. Eye wa tu vetiya hati, tu sukila oku ‘linga ovina viwa.’ (Va Gal. 6:9) Pole, oco upange waco u lingiwe, tu sukila oku likolisilako. Tu konomuisi olonepa vitãlo viovopange okuti, vi pondola oku tu kuatisa oku pandikisa kuenda oku amamako lombembua vocisoko ca Yehova. Nda tua ci linga, etu kumue lepata lietu, tu kuatisiwa oku limbuka ovina tu sukila oku pitisa kovaso.

 OKU LIONGOLOLA LOKU LIVETIYA KUENDA OKU FENDELA YEHOVA

4. Momo lie tu popela tuti oku liongolola ku kuete esilivilo kefendelo liocili?

4 Oku liongolola olonjanja viosi, ci kuatisa afendeli va Yehova. Ovangelo vokilu, va siata oku lalekiwa oco va liongoluile ku Yehova votembo ya sokiyiwa. (1 Olo. 22:19; Yovi 1:6; 2:1; Dan. 7:10) Kosimbu, va Isareli va enda oku liongolola oco ‘va yevelele kuenda oku longisiwa.’ (Esin. 31:10-12) Va Yudea vo kocita catete, va kuata ocituwa coku enda volosunangonga oco va tange Ovisonehua. (Luka 4:16; Ovil. 15:21) Ocituwa caco coku liongolola, ca amamako toke eci kua sokiyiwa ekongelo Liakristão, kuenda ci kuete esilivilo kefendelo lietu. Akristão vocili va siata oku ‘livetiya pokati loku lekisa ocisola kuenda ovilinga viwa.’ Omo liaco, tu sukila oku ‘likuatisa pokati lalungulo, ca piãla enene omo tu lete okuti, eteke lia Yehova li kasi ocipepi.’—Va Hev. 10:24, 25.

5. Tu pondola ndati oku li pamisa pokati la vamanji kolohongele vietu?

5 Oku endaenda kolohongele, oyo onjila ya velapo yoku likolisa pokati. Tu pondola oku lekisa ekolelo lietu poku eca atambululo, oku lombolola ocinimbu cimue Cembimbiliya, kuenda oku lombolola ulandu umue u lekisa esilivilo lioku kapako olonumbi Viembimbiliya. (Osa. 22:22; 40:9) Ndaño pa pita ale anyamo alua tunde eci tua fetika oku endaenda kolohongele, pole, tu pondola oku pamisiwa poku yevelela atambululo a eciwa la vamanji akulu, kuenda amalẽhe.

6. Olohongele vietu vi tu kuatisa ndati oku pamisa ekolelo lietu?

6 Momo lie Suku yetu a velisilapo ocituwa coku liongolola olonjanja viosi? Olohongele vietu viekongelo, levi vimbo, kuenda viofeka, vi tu kuatisa oku lekisa utõi poku kundila vana va tu lambalala, ale ka va lekisa onjongole vocikanjo cetu. (Ovil. 4:23, 31) Olohundo, kuenda olonepa vikuavo via siata oku lingiwa kolohongele lekuatiso Liembimbiliya, vi pamisa ekolelo lietu. (Ovil. 15:32; Va Rom. 1:11, 12) Ovina tu lilongisa kolohongele, loku kala kumue la vamanji, vi tu kuatisa oku kuata esanju liocili, kuenda vi tu “kavuluisa koloneke viohali.” (Osa. 94:12, 13) Ocisoko Celongiso Cosungu Yolombangi Via Yehova, ca siata oku linga eliangiliyo liolonumbi vi eciwa kolohongele afendeli va Yehova va sukila voluali luosi. Omo liaco, tu eca olopandu ku Yehova omo liolonumbi tua siata oku tambula kolohongele vietu osemana losemana, kuenda anyamo osi!

7, 8. (a) Cipi ocimãho ca velapo coku endaenda kolohongele? (b) Olohongele vi pamisa ndati ekolelo lietu?

7 Etu ka tu endi lika kolohongele omo liekuatiso tua siata oku tambula. Pole, ocimãho cetu ca velapo, oku fendela Yehova. (Tanga Osamo 95:6.) Tu kuete esumũlũho lioku sivaya Suku yetu! (Va Kol. 3:16) Yehova o sesamẽla oku u fendela olonjanja viosi, kuenda oku eca atambululo kolohongele. (Esit. 4:11) Eli olio esunga lieci tu vetiyiwila oku ‘endaenda kolohongele loku livetiya pokati, ndeci vamue va siata oku ci linga.’—Va Hev. 10:25.

8 Tu tenda hẽ olohongele ndombanjaile yimue ya tunda ku Yehova yi tu kuatisa oku pandikisa toke eci a ka nyõla oluali lulo? Nda tua ci linga, ci tu kuatisa oku tenda olohongele ‘ndocina cimue ci kuete esilivilo lia velapo’ kovina viosi tu linga komuenyo wetu. (Va Fil. 1:10)  Pole, tu laña lika kolohongele nda tu kuete ocitangi cimue ci tu tateka oku li sanga la vamanji oco tu fendele Yehova.

SANDILIYA AMBOMBE

9. Tua kũlĩha ndati okuti oku kunda olondaka viwa owo upange wa velapo?

9 Oku pesila otembo yalua kupange woku kunda, ci tu kuatisa oku kala vocisoko ca Yehova. Yesu wa fetika upange waco eci a kala palo posi. (Mat. 28:19, 20) Tunde kotembo yaco, oku kunda Usoma loku longisa omanu oco va linge olondonge, owo upange wa velapo u kasi oku lingiwa vocisoko ca Yehova. Ovolandu o koloneke vilo a eca uvangi wokuti, ovangelo va siata oku kuatisa kupange woku kunda, kuenda va tu songuila komanu vana ‘va yongola oku kuata omuenyo ko pui.’ (Ovil. 13:48; Esit. 14:6, 7) Ocisoko ca Yehova palo posi, ca siata oku eca ekuatiso oco upange waco u lingiwe. Anga hẽ tua velisapo upange woku kunda?

10. (a) Lombolola ndomo tu pondola oku amamako lombili yetu kupange wa Yehova. (b) Upange woku kunda wa siata oku ku kuatisa ndati oku yuvula oku kava?

10 Oku lekisa ombili kupange woku kunda, ci tu kuatisa oku amamako lombili yetu kefendelo liocili. Kũlĩhĩsa olondaka via manji Mitchel okuti ukulu wekongelo kuenda ukundi wotembo yosi. Eye wa popia hati: “Ndi sole calua oku sapela lomanu catiamẽla Kembimbiliya. Noke yoku tanga ocipama cokaliye Vutala Wondavululi ale vo Despertai!, ndi komõha omo liukũlĩhĩso luloño, kuenda ndomo olorevista viaco via pangiwa. Kuenje, ndi kuata onjongole yoku enda vocikanjo oco ndi limbuke ndomo omanu va ka tenda ulandu waco, kuenda ndi sandiliya oku vetiya onjongole yavo. Upange woku kunda u ndi kuatisa oku pamisa ekolelo liange.  Ndaño ndi kuete ovikele vikuavo, pole, si ecelela okuti vi ndi tateka oku enda kupange woku kunda.” Omo liaco, oku pesila otembo yalua kupange woku kunda, ci tu kuatisa oku pandikisa koloneke vilo via sulako.—Tanga 1 Va Korindo 15:58.

KUATISIWA LALIVULU ETU

11. Momo lie tu sukilila oku tanga alivulu etu loku sokolola ovina tua lilongisa?

11 Yehova wa siata oku tu ĩha alivulu alua mu sangiwa olonumbi vi pamisa ekolelo lietu. Pamue ivaluka epuluvi limue okuti, noke yoku tanga ulandu umue wa popia ndoco: ‘Ovina evi ovio nda sukilile! Vi kasi ndu akuti, Yehova ame a ndi vi sonehela!’ Ocili okuti, o kuete esunga lioku popia olondaka evi. Lekuatiso lialivulu aco, Yehova wa siata oku tu ĩha olonumbi, kuenda oku tu songuila. Eye wa popia hati: ‘Hu longisa, hu imbaimba onumbi yonjila wendela. Hu lungula, kuenda hu imba ovaso.’ (Osa. 32:8) Tua siata hẽ oku likolisilako oku lilongisa alivulu tu tambula kuenda oku sokolola ovina tua lilongisa? Nda tua ci linga, ci tu kuatisa oku pandikisa kovitangi, kuenda oku amamako lombili yetu kupange wa Suku ndaño lovitangi koloneke vilo via sulako.—Tanga Osamo 1:1-3; 35:28; 119:97.

12. Momo lie tu sukilila oku tanga alivulu etu loku sokolola ovina tua lilongisa?

12 Tu velisapo lika alivulu etu, nda tua sokolola upange walua wa siata oku lingiwa okuti tu tambula alivulu aco olonjanja viosi, oco tu pamise ekolelo lietu. Ocisoko Casonehi Vosungu Yolombangi Via Yehova, ci songuila upange woku konomuisa ovolandu, oku a soneha, loku kapamo alitalatu, kuenda oku pongoluila ovolandu aco kalimi akuavo. Noke yoku pangiwa kualivulu etu, ulandu waco u kapiwa vo Internet. Olombetele vina vi panga alivulu, vi kuete ocikele coku a tumisa kakongelo a kasi ocipepi, kuenda ana a kasi kolofeka vikuavo. Momo lie ku lingiwila upange walua? U lingiwa oco afendeli va Yehova va pamise ekolelo liavo. (Isa. 65:13) Omo liaco, tu kapiko olonumbi via siata oku sandekiwa valivulu etu lekuatiso liocisoko ca Yehova.—Osa. 119:27.

KUATISA KALIANGILIYO OCISOKO CA YEHOVA

13, 14. Helie wa siata oku kuatisa kovopange ocisoko ca Yehova kilu? Tu eca ndati ekuatiso liaco palo posi?

13 Vocinjonde upostolo Yoano a kuata, wa mola Yesu endela kokavalu ka yela, oco a kundule omanu vosi ka va pokola ku Yehova. (Esit. 19:11-15) Oku limbuka okuti kondio kuenda kepĩli lia Yesu kuli ovangelo va koleliwa, kumue lolombuavekua via pinduiwa okuti via tambula onima yavo kilu, ci pamisa ekolelo lietu! (Esit. 2:26, 27) Ulandu owu u lekisa okuti, tu sukila oku kuatisa vamanji va kuete ocikele coku songuila ovopange osi a kasi oku lingiwa vocisoko ca Yehova!

14 Cimuamue haico ci pita lowiñi wakahandangala okuti, u kasi oku kuatisa kupange vamanji olombuavekua va kasi oku linga palo posi, woku songuila ocisoko ca Yehova koloneke vilo. (Tanga Sakariya 8:23.) Omunu lomunu pokati ketu o pondola ndati oku eca ekuatiso liaye kupange wa Yehova? Tu ci linga poku pokola ku vamanji va kuete ocikele coku tu songuila. (Va Hev. 13:7, 17) Epokolo liaco li fetikila vekongelo lietu. Ovina tu popia viatiamẽla kakulu vekongelo vi vetiya hẽ vakuetu oku lekisa esumbilo kokuavo, kuenda upange va siata oku linga? Tua siata hẽ oku vetiya omãla vetu oco va sumbile akulu vekongelo kuenda oku pokola kolonumbi Viembimbiliya va siata oku eca? Tua siata hẽ oku sapela vepata loku kũlĩhĩsa ndomo tu eca olombanjaile vietu, oco vi kuatise kupange woku kunda voluali luosi? (Olosap. 3:9; 1 Va Kor. 16:2; 2 Va Kor. 8:12) Tua kapako hẽ esumũlũho lioku yelisa Onjango yetu Yusoma, kuenda oku yi tata ciwa? Espiritu lia Yehova, lia siata oku kuatisa vana va lisumbila pokati, kuenda va likuete omunga. Li tu kuatisavo oku amamako lupange wetu okuti ka tu kavi koloneke vilo via sulako.—Isa. 40:29-31.

 KUATA OMUENYO U SANJUISA YEHOVA

15. Momo lie tu sukilila oku likolisilako oco tu ambate omuenyo u litava locipango ca Yehova?

15 Oco tu pandikise loku kala vocisoko ca Yehova, tu sukila oku ambata omuenyo u litava lesapulo tu kunda, kuenda oku ‘linga ovina vi taviwa la Yehova.’ (Va Efe. 5:10, 11) Omo okuti ka tua lipuile, kuenda tua ñualiwa layonjo oluali lulo lua vialiwa la Satana, tua siata oku liyaka lovina ka via sungulukile komuenyo wetu. Vamanji vamue va siata oku likolisilako oco va amameko lukamba wavo la Yehova. Vana va likolisilako oku ci linga, va sanjuisa Yehova. Omo liaco, ku ka liwekepo oku ci linga! Oku linga ovina vi likuata locipango ca Yehova, ci tu nenela esanju, loku limbuka okuti, efendelo lietu liocili.—1 Va Kor. 9:24-27.

16, 17. (a) Nye tu sukila oku linga, nda tua linga ekandu limue linene? (b) Ongangu ya manji Anne yi tu longisa nye?

16 Nye tu sukila oku linga nda tua linga ekandu limue linene? Tu sukila oku sandiliya ekuatiso lonjanga. Oku limbika ekandu, ci nena ovitangi. Ivaluka olondaka Daviti a popia hati, ‘osimbu ka litavelele akandu aye, etimba liaye lia honguele, momo wa litetela eteke liosi.’ (Osa. 32:3) Oku limbika ekandu, ci tu nenela ekavo, kuenda ci honguisa ekolelo lietu. Pole, omunu wosi ‘o litavela kuenje o tinduka kekandu liaye, Yehova u wecela.’—Olosap. 28:13.

17 Kũlĩhĩsa ulandu wa pita la manji Anne. * Eci a kala umalẽhe, wa kala ukundi wotembo yosi. Pole, noke wa fetika oku linga ovina ka via sungulukile, kuenje, vio nenela ovitangi vialua. Eye wa popia hati: “Utima wange wa fetika oku ndi vetela evelo. Kuenje, nda sumuile calua, kuenda esanju liange lia tepuluka.” Nye a linga noke? Eye wa popia hati, eteke limue eci a kala kohongele, kua lomboluiwa olondaka vi sangiwa kelivulu lia Tiago 5:14, 15. Manji Anne weya oku limbuka okuti, o sukila ekuatiso, kuenje, wa sapela lakulu vekongelo. Noke, wa popia hati: “Ovinimbu viaco Viembimbiliya, via sonehiwa la Yehova oco vi kuatise omanu oku pamisa ekolelo liavo. Ndaño okuti ka ca lelukile oku nyua ovihemba, pole, vi nena uhayele. Omo liaco, nda kapako elungulo li sangiwa Vovisonehua, kuenje via ndi kuatisa.” Ndaño pa pita ale anyamo alua tunde eci manji Anne a liyaka locitangi caco, pole, cilo o kasi oku amamako oku vumba Yehova lutima wa yela.

18. Nye tua nõlapo oku linga?

18 Tu sukila oku ivaluka okuti, tu kuete esumũlũho lioku panga onepa kocisoko ca Yehova koloneke vilo via sulako! Omo liaco, tu amamiko oku tẽlisa ovikele vietu, poku endaenda kolohongele kumue lepata lietu, oku sandiliya ambombe vocikanjo cetu, kuenda oku kapako olonumbi tua siata oku tambula vi pamisa ekolelo lietu. Tu kuatisi vamanji vana va kuete ocikele coku tu songuila, kuenda oku ambata omuenyo u litava lesapulo tu kunda. Nda tua ci linga, ka tu liwekapo oku endela vocisoko ca Yehova, kuenda ka tu kavi koku linga ovina viwa!

^ tini. 17 Onduko yaye ya pongoluiwa.