Skip to content

Skip to table of contents

Olombangi Via Yehova

Select language Umbundu

O Pondola hẽ Oku Kũlĩha Suku Cilo?

O Pondola hẽ Oku Kũlĩha Suku Cilo?

‘Cilo wa kũlĩhi Suku.’—VA GAL. 4:9.

1. Momo lie ukuakuendisa ombalãu a sukilila oku kũlĩhĩsa olonumbi viaco osimbu ka fetikile ungende?

VANA va kuete ocikele coku endisa ombalãu osimbu ka va fetikile ungende wavo va kũlĩhĩsa eci ci soka 30 kolonumbi viatiamẽla kupange wavo. Nda ka va kũlĩhĩsile lutate olonumbi viaco, va kuata ovitangi. Ove hẽ wa kũlĩha umue ukuakuendisa ombalãu okuti, wa siata oku konomuisa olonumbi viaco osimbu ka fetikile ungende? Omunu wosi o ci linga, o lekisa okuti, wa loñoloha calua koku endisa ombalãu! Ndaño okuti umue wa loñoloha calua koku endisa ombalãu, nda ka kũlĩhĩsile lutate olonumbi viaco, o kuata ovitangi.

2. Ovina vipi Akristão va sukila oku kũlĩhĩsa?

2 Ndeci vakuakuendisa ombalãu va sukila oku kũlĩhĩsa olonumbi vi sukiliwa, ove o sukilavo oku kũlĩhĩsa olonumbi vi ku kuatisa oku pamisa ekolelo liove oco o pandikise kovitangi. Cikale okuti ndopo wa papatisiwa, ale o kasi oku vumba Yehova vokuenda kuanyamo alua, oku kũlĩhĩsa ekolelo liove kuenda ukamba wove la Yehova Suku, ci kuete esilivilo lia velapo. Nda kua ci lingile, ekolelo liove li hongua. Embimbiliya li tu lungula hati: “Omunu wosi o sima hati o tãi, a lunguke oco ka ka kupuke.”—1 Va Kor. 10:12, NW.

3. Akristão va kala ko Galatia nye va sukilile oku linga?

3 Akristão va kala ko Galatia va sukilile oku amamako oku kũlĩhĩsa ekolelo liavo kuenda oku sanjukila elianjo va kuata lioku vumba Yehova. Ocisembi ca Yesu ca yulula onjila yokuti, omanu vosi va kolela kokuaye, va pondola oku kũlĩha Suku, oco va linge omãla vaye! (Va Gal. 4:9) Oco Akristão voko Galatia va amameko oku kuata ukamba la Yehova, va sukilile oku yuvula alongiso a va Yudea vana va simĩle okuti, va kala oku lava Ocihandeleko ca eciwile ku Mose. Pole, vakualofeka vana ka va seviwile evamba okuti va kala vakongelo, ka va pokuile Kocihandeleko caco! Cikale va Yudea ale Vakualofeka, vosi yavo va sukilile oku pamisa ekolelo liavo. Oco va ci linge, va sukilile oku yuvula oku tumbika olonumbi ka vi litava Locihandeleko Suku a ecele ku Mose.

OLONUMBI VI KUATISA OKU KŨLĨHA SUKU

4, 5. Elungulo lipi Paulu a ecele ku vamanji va kala ko Galatia, kuenda li kuete esilivilo lie kokuetu?

4 Elungulo upostolo Paulu a ecele Kakristão va kala ko Galatia lia sonehiwa locimaho coku kuatisa vamanji oco vamameko loku pokola kolonumbi Viembimbiliya, kuenda oku yuvula ovina via siala konyima. Yehova wa vetiya upostolo Paulu oku pamisa vamanji vosi va kala vakongelo o ko Galatia oco va amameko oku u fendela.

5 Vosi yetu tu sukila oku ivaluka ndomo tua yovoka kalongiso esanda, kuenje tua linga Olombangi Via Yehova. Omo liaco, tu kũlĩhĩsi apulilo avali ndeci: Ove hẽ ivaluka olonumbi wa sukilile oku kuama oco o papatisiwe? Ivaluka hẽ ndomo weya oku kũlĩha Suku kuenda ndomo wa kũlĩhĩwa laye okuti wa sanjukila elianjo o kuete lioku u fendela?

6. Olonumbi vipi tu kũlĩhĩsa?

6 Eci tua fetika oku lilongisa Embimbiliya, tua sukilile oku pokola kolonumbi ecea. Olonumbi viaco vi sangiwa pokakasia losapi hati:  “Olonumbi vi Tuala Kepapatiso Loku Amamako Oku Pamisa Ekolelo.” Oku kapako olonumbi ecea via tukuiwa ndeti, ci tu kuatisa oku yuvula oku tiamisila utima kovina violuali lulo. Ndeci ukuakuendisa ombalãu a sukila oku kuama olonumbi osimbu ka lingile ungende, nda tua pokola kolonumbi via Suku, ci tu kuatisa oku pandikisa lekolelo poku linga upange waye.

VANA VA KŨLĨHĨWA LA SUKU VAMAMAKO OKU PAMISA EKOLELO LIAVO

7. Onumbi yipi tu sukila oku kuama, kuenda momo lie?

7 Ukuakuendisa ombalãu wa kũlĩha okuti osimbu ka fetikile ungende, o sukila oku kũlĩhĩsa lutate olonumbi viaco. Cimuamue haico catiamẽla kokuetu okuti, tu sukilavo oku kũlĩhĩsa ekalo lietu kuenda oku kuama olonumbi tua tambula tunde eci tua papatisiwa. Paulu wa sonehela Timoteo hati: “Kapako olondaka viocili wa yeva kokuange. Vi pokola lekolelo kuenda locisola omo lioku li kuata omunga la Kristu Yesu.” (2 Tim. 1:13, NW) ‘Olondaka viaco viocili’ vi sangiwa Vembimbiliya. (1 Tim. 6:3) Osimbu omesele ka ya tungile onjo, yi soneha ociluvialuvia caco vopapelo oco cu kuatise oku limbuka ndomo onjo yaco yi ka kala. Cimuamue haico catiamẽla ‘kolondaka viocili’ okuti, vi tu kuatisa oku limbuka ovina Yehova a yongola kokuetu. Omo liaco, tu konomuisi olonumbi vi kuatisa omunu oku papatisiwa kuenda ndomo a pondola oku vi kapako.

8, 9. (a) Momo lie tu sukilila oku amamako oku vokiya ukũlĩhĩso loku pamisa ekolelo lietu? (b) Tukula esilivilo lioku pamisa ekolelo kuenda esunga lieci tu sukilila oku amamako oku ci linga.

8 Catete, tu sukila oku kuata ukũlĩhĩso wa Suku, kuenda oku pamisa ekolelo lietu. Pole, tu sukila oku amamako oku ci linga. (2 Va Tes. 1:3) Voku amamako oku pamisa ekolelo lietu, mua kongela oku linga apongoloko alua. Ondaka “oku amamako,” yi lombolokavo oku kula kuocina cimue toke ci linga cinene. Omo liaco, noke yoku papatisiwa, tu sukila oku amamako oku pamisa ukamba wetu la Yehova oco ekolelo lietu ka li ka hongue.

Ndeci uti wa amamako oku kula, Ukristão o sukilavo oku pamisa ekolelo liaye

9 Tu pondola oku sokisa oku pamisa ekolelo lietu loku kula kuti umue. Uti u pondola oku kula toke eci u kuata ononga yimue yinene, ca piãla enene nda olombombo viaco via enda ondongosi. Kuli oviti vimue Violevanone okuti, oku lepa kuaco ku sokisiwa lonjo yi kuete 12 kolosapalalo. Oviti viaco via pama calua momo vi kuete olombombo via enda ondongosi, kuenda oku sanjavala kuaco ku kuete 12 kolometulu. (Ocis. ca Sal. 5:15) Ocili okuti, noke yoku tuika uti umue u kula lonjanga. Noke lianyamo amue, olombombo vi enda ondongosi, kuenje ononga yaco yi pama. Pole, lomue o tẽla oku limbuka ndomo uti waco wa kula. Cimuamue aco ci pita Lukristão poku pamisa ekolelo liaye. Citava okuti eci tua fetika oku lilongisa Embimbiliya, tua pamisa lonjanga ekolelo lietu, kuenje tua papatisiwa. Vamanji, va sanjuka calua poku limbuka ndomo tua pamisa lonjanga ekolelo lietu. Citava okuti, tu litumbika kupange wakundi votembo yosi, ale tu tambula ovikele vikuavo vekongelo. Vokuenda kuotembo, vamanji ka va limbuka ndomo tu kasi oku pamisa ekolelo lietu. Pole, tu sukila ‘oku amamako oku li kuata omunga la vamanji oco tu kuate ekolelo limuamue kuenda ukũlĩhĩso watiamẽla ku Kristu.’ (Va Efe. 4:13) Oku amamako loku pamisa ekolelo lietu, ku sokisiwa lombuto yimue yitito okuti noke yoku tunda, yi linga uti umue unene.

10. Momo lie vamanji vana va kasi osimbu vocisoko ca Yehova va sukilila oku amamako oku pamisa ekolelo liavo?

10 Oku pamisa ekolelo lietu ka ku sulila noke yoku papatisiwa. Momo, tu sukila oku amamako oku vokiya ukũlĩhĩso wetu kuenda oku pamisa ekolelo lietu. Nda tua ci linga, ci tu kuatisa oku kakatela Kondaka ya Suku. (Olosap. 12:3) Vekongelo muli vamanji valua va siata oku ci linga. Manji umue okuti tunde eci a linga ukulu wekongelo pa pita ale ci pitahãla akũi atatu kanyamo, wa limbuka okuti, wa sukilile oku amamako oku pamisa ekolelo liaye. Eye wa popia hati: “Onjongole yange yoku lilongisa Embimbiliya ya livokiya calua. Momo ya siata oku ndi kuatisa oku kapako olonumbi Viembimbiliya volonepa vialitepa. Cilo, onjongole yange yoku endaenda kupange woku kunda ya livokiya.”

AMAMAKO OKU PAMISA UKAMBA WOVE LA SUKU

11. Tu pondola ndati oku amamako oku pamisa ukamba wetu la Yehova?

11 Voku pamisa ekolelo lietu mua kongelavo oku vokiya ukamba wetu la Isietu Yehova. Eye o tu yonguila oku limbuka okuti, tu soliwe kuenda tu tatiwa laye. Cimuamue haico ci pita lomõla nda o tatiwa ciwa lolonjali viaye, ale esanju tu kuata poku kala lakamba vawa. Ocili okuti ukamba waco la Yehova ka wiya ocipikipiki. Pole, tu sukila oku pita otembo yalua oco tu kũlĩhe Yehova loku lekisa ocisola kokuaye. Oco ukamba wetu la Yehova u livokiye, tu sukila oku sokiya otembo yoku tanga Embimbiliya olonjanja viosi, Utala wondavululi, lo Despertai!, kuenda alivulu akuavo.

12. Nye tu sukila oku linga oco tu kũlĩhĩwe la Yehova?

12 Akamba va Suku va pamisa ekolelo liavo poku likutilila lutima wosi, kuenda oku linga ukamba la vana va kuete ovituwa viwa. (Tanga Malakiya 3:16.) Yehova o yeva ‘olohutililo viafendeli vaye.’ (1 Pet. 3:12) Ndeci onjali yi kuatisa omõlaye locisola, cimuamue haico Yehova a siata oku linga okuti, o yevelela lutate olohutililo via vana va pinga ekuatiso kokuaye. Omo liaco, tu ‘amamiko oku likutilila.’ (Va Rom. 12:12) Tu pamisa lika ekolelo lietu nda tua tambula ekuatiso li tunda ku Yehova. Pole, oco tu kuatisiwe, tu sukila oku pandikisa, momo tu kasi voluali lue yuka ovitangi lelambalalo. Nda tua liwekapo oku likutilila, ka tu tambula ongusu yi tunda ku Suku o yongola oku tu kuatisa. Wa sanjukila hẽ olohutililo wa siata oku linga ale wa limbuka okuti o sukila oku linga a pongoloko poku likutilila?—Yer. 16:19.

13. Momo lie oku endaenda kolohongele ci kuetele esilivilo?

13 Yehova o sanjukila vana va sandiliya ‘ekuatiso kokuaye.’ Ndaño okuti tu kuete ukũlĩhĩso watiamẽla ku Suku, pole, tu sukila oku amamako oku kala kumosi la vamanji. (Nah. 1:7) Omo okuti tu kasi voluali lueyuka ovitangi, tu sukila oku kala lavamanji oco tu pamisiwe. Asumũlũho api tu pondola oku tambula poku ci linga? Tu pondola oku sanga vekongelo vamanji va tu vetiya oku lekisa ‘ocisola kuenda oku linga ovina viwa.’ (Va Hev. 10:24, 25) Vukanda Paulu a sonehela Akristão vo ko Heveru wa va vetiya oku lekisa ocisola loku likuata omunga. Oco va lekise ocisola caco, va sukilile oku kapako vakuavo. Omo liaco, tu sukila oku endaenda kolohongele olonjanja viosi loku eca atambululo.

14. Momo lie tu sukilila oku amamako oku likekembela, loku linga apongoloko?

14 Tu pondola lika oku kala Akristão vocili nda tua likekembela akandu etu. Oku likekembela, ocina cimue tu sukila oku linga olonjanja viosi. Omo okuti ka tua lipuile, tua vialiwa lekandu li sokisiwa lonyõha yi yongola oku lumana omunu umue. (Va Rom. 3:9, 10; 6:12-14) Omo liaco, tu sukila oku lavulula kuenda oku limbuka akulueya etu. Tu kuete esanju lialua poku limbuka okuti, ndaño tua vialiwa lekandu, pole Yehova o lekisa epandi kokuetu kuenda o tu kuatisa oku linga a pongoloko tu sukila. (Va Fil. 2:12; 2 Pet. 3:9) Tu kuatisiwa lika nda tua lavulula otembo tu pesila kovopange etu eteke leteke. Manji umue ukãi wa soneha ndoco: “Ndaño okuti nda fetika oku lilongisa Embimbiliya tunde vutila pole, sia kapeleko olonumbi via Yehova. Nda simĩle okuti Yehova ongangala, kuenda si pondola oku linga ovina viu nenela esanju.” Kuenje, ekolelo liaye lia fetika oku hongua omo liovitangi a kuata. Eye wa amisako lulandu waye hati: “Sia kuatele ovitangi omo liekambo lioku lekisa ocisola ku Yehova, pole, ovitangi viaco via tunda kekambo lioku u kũlĩha ciwa. Noke yoku likutilila olonjanja vialua, nda fetika oku likekembela. Kuenje nda limbuka okuti, Yehova wa ndi tata ciwa ndomõla, loku ndi kuatisa oku tetulula ovitangi viosi nda liyaka lavio, kuenda wa ndi lekisa ovina nda sukilile oku linga.”

15. Ovina vipi Yesu kumue la Isiaye va lete?

15 “Amamako oku kundila omanu” olondaka viwa. Ungelo wa Suku wa sapuilile Petulu kumue lovapostolo vakuavo olondaka evi noke yoku yovuiwa vokayike locikomo. (Ovil. 5:19-21) Oku endaenda kupange woku kunda olosemana viosi, ci pamisa ekolelo lietu. Yesu kumue la Isiaye va limbuka ekolelo tua siata oku lekisa kuenda upange woku kunda tu kasi oku linga. (Esit. 2:19) Ukulu wekongelo wa tukuiwa vovinimbu viatete viocipama cilo wa popia hati: “Upange woku kunda olondaka viwa u kuete esilivilo kokuetu.”

16. Momo lie ci kuetele esilivilo oku sokolola elitumbiko lietu ku Yehova?

16 Sokolola elitumbiko liove. Ukamba wetu la Yehova oco ocina ca velapo kokuetu. Eye wa kũlĩha vana vatiamẽla kokuaye. (Tanga Isaya 44:5.) Likutilila ku Yehova oco a ku kuatise oku pamisa ukamba wove laye. Sokolola eteke wa papatisiwa, kuenda ka likakulimbe. Nda wa ci linga, ci ku kuatisa oku ivaluka ohuminyo wa linga poku papatisiwa.

AMAMAKO OKU KUATA UKAMBA LA YEHOVA NDAÑO LOVITANGI

17. Momo lie tu sukila oku pandikisa oco tu pamise ukamba wetu la Yehova?

17 Paulu poku sonehela Akristão va kala ko Galatia, wa lekisa esilivilo lioku pandikisa. (Va Gal. 6:9) Olondaka a popia, vi kuete esilivilo Kakristão vo koloneke vilo. Ndaño wa siata oku liyaka lovitangi ivaluka okuti, Yehova o pondola oku ku kuatisa. Pinga ekuatiso liespiritu sandu liaye volohutililo viove. Nda wa ci linga, o limbuka okuti Yehova o piñainya esumuo lesanju kuenda ombembua. (Mat. 7:7-11) Sokolola epulilo eli: Nda Yehova wa siata oku tata ciwa olonjila, ka pondola hẽ oku ku tata ove u kuetele ocisola kuenda wa lieca kokuaye? (Mat. 10:29-31) Ndaño okuti o kasi oku liyaka lovitangi, ku ka liwekepo oku fendela Yehova. Tu kuete esanju lialua omo lioku kũlĩhĩwa la Yehova!

18. Nye o sukila oku linga cilo oco o “kũlĩhe Suku”?

18 Nda ndopo wa kũlĩha Yehova kuenda wa papatisiwa, nye o sukila oku linga cilo? Amamako oku kuata ukũlĩhĩso watiamẽla ku Yehova oco o pamise ekolelo liove. Nda tunde eci wa papatisiwa papita ale anyamo alua, nye o sukila oku linga cilo? O sukila oku amamako oku vokiya ukũlĩhĩso watiamẽla ku Yehova. Tu yuvuli ovisimĩlo viokuti, ka tu sukila vali oku linga ovina vi pamisa ukamba wetu la Yehova. Pole, tu sukila oku kũlĩhĩsa ndomo ekolelo lietu li kasi oco tu limbuke nda, tu kasi oku amamako oku pamisa ukamba wetu la Yehova, Suku yetu.—Tanga 2 Va Korindo 13:5, 6.