Skip to content

Skip to table of contents

Olombangi Via Yehova

Select language Umbundu

Yehova Eye Ocitililo Cetu

Yehova Eye Ocitililo Cetu

‘A Yehova, ove ucitililo cetu kovitumbulukila viosi.’—OSA. 90:1.

1, 2. Afendeli va Yehova va siata oku kala ndati voluali lulo lua vĩha? Va kuete ndati onjo yimue?

 OVE hẽ, o sima okuti wa kolapo voluali lulo lua vĩha? Ndaño okuti kua kolelepo, pole, kuli umue o pondola oku ku kuatisa! Tunde kosimbu, omanu vana va lekisile ocisola ku Yehova, va kala ndovingendeleyi voluali lulo lua vĩha. Eci afendeli va Yehova va enda oku tumboka vovilombo vialua vofeka yo Kanana, ‘va popia vati, va kala akombe, haivo ovingendeleyi kulo kilu lieve.’—Va Hev. 11:13.

2 Cimuamue haico ci kasi oku pita Lakristão olombuavekua koloneke vilo okuti, ‘ofeka yavo yi kasi kilu,’ kuenda va kasi ‘ndakombe’ voluali lulo lua vĩha. (Va Fil. 3:20; 1 Pet. 2:11) “Olomeme vikuavo” via Kristu, ‘ka vi pangi onepa koluali lulo, kuenda vi kuãi ongangu ya Yesu yoku yuvula oku panga onepa koluali.’ (Yoa. 10:16; 17:16) Afendeli va Suku, va kuete “onjo” yimue. Pole, onjo yaco ka tu pondola oku yi mola lovaso etu, momo yi lomboloka ocitililo cimue tua tambula locisola. Mose wa soneha ndoco: ‘A Yehova, ove ucitililo cetu kovitumbulukila viosi.’ * (Osa. 90:1) Yehova wa lekisa ndati okuti wa kala ‘ocitililo’ cafendeli vaye kosimbu? Wa linga ndati ‘ocitililo’ cafendeli vaye koloneke vilo? O ka kala ndati ocitililo kovaso yoloneke?

YEHOVA WA KALA ‘OCITILILO’ CAFENDELI VAYE KOSIMBU

3. Yehova o sokisiwa la nye, ndomo ca lekisiwa Vosamo 90:​1, kuenda momo?

3 Olonjanja vimue, Embimbiliya li sokisa Yehova lovina tu pondola oku mola okuti tu kuata elomboloko liekalo liaye.  Osamo 90:1, yi sokisa Yehova ‘locitililo’ cimue, ale onjo. Yehova wa siata oku eca ocitililo kafendeli vaye. Eli olio esunga lieci Embimbiliya li popela hati, Yehova eye ocisola. (1 Yoa. 4:8) Eye Suku yombembua okuti o kuatisa afendeli vaye oku kala ‘vocitililo cimue cakoka.’ (Osa. 4:8) Omo liaco, tu konomuisi ndomo a kala ocitililo cafendeli vaye vakuekolelo kosimbu, oku fetikila ku Avirahama.

4, 5. Yehova wa kala ndati ‘ocitililo cocili’ ku Avirahama?

4 Tu pondola oku sokolola ndomo Avirahama a kala eci Yehova o sapuila hati: ‘Tunda vofeka yene loku vangandiove, kuende toke kofeka ndu ku lekisa.’ Olondaka evi vi lekisa okuti, Yehova wa ecele ekuatiso ku Avirahama poku u sapuila hati: ‘Ndu ku lingisa ofeka yinene, loku ku sumũlũisa, kuenda ndi kemãlisa onduko yove. Kuenje, vana va ku sumũlũisa, ndi va sumũlũisavo. Pole, nda umue wa ku siñala ndu siñalavo.’—Efet. 12:1-3.

5 Olondaka evi vi lekisa okuti, Yehova wa kala ocitililo cocili ku Avirahama, kuenda cocitumbulukila caye. (Efet. 26:1-6) Yehova wa tẽlisa ohuminyo yaye. Momo vepuluvi limue, wa tatekele Fareo wo ko Egito kumue la Soma Avimeleke wo ko Gerare okuti, ka va pondi Avirahama oco va tambule ukãi waye Sara. Eye wa kuama onjila yimuamue poku teyuila Isake la Rebeka. (Efet. 12:14-20; 20:1-14; 26:6-11) Ulandu waco u popia hati: “Yehova ka tavele okuti, umue o linga cĩvi Isake la Rebeka, pole wa pisa olosoma vina via va linga cĩvi poku vi sapuila hati: ‘Ko ka lambi kolombuavekua viange. Ko ka lingi cimue cĩvi kovaprofeto vange.’ ”—Osa. 105:14, 15, NW.

‘Si ku yanduluka’

6. Nye Isake a pinga ku Yakoba, kuenda Yakoba wa ci tẽlisa ndati?

6 Pokati kovaprofeto vaco pa kalavo Yakoba, onekulu ya Avirahama. Eci otembo ya Yakoba yoku sanda ukãi ya pitĩlapo, isiaye Isake wo sapuila hati: ‘Ku ka kuele ukãi u Kanana. Katuka, kuende ketapi lio ko Arama, konjo ya Sekulu Betuele, oko o ka kuela ukãi pokati komãla va nyohonu Lavane.’ (Efet. 28:1, 2) Yakoba wa pokola kepingilo lia Isake. Omo liaco, wa siapo epata liaye lina lia kala ko Kanana, kuenje, wa linga ungede walua likaliaye toke ko Harane. (Efet. 28:10) Citava okuti, wa lipula ndoco: ‘Oloneke viñami ndi ka kala ko Harane? Anga hẽ isiange yukulu o ka ndi yolela ciwa kuenda o ka nyiha ukãi umue wa sumbila Suku?’ Pole, kimbo lio Lusi lina lia kala ocinãla ci soka 100 kolokilometulu oku tunda ko Bereseva, kua pita ulandu umue wa kuatisa Yakoba oku yuvula esakalalo. Ulandu upi wa pitako?

7. Suku wa kuatisa ndati Yakoba locinjonde?

 7 Eci Yakoba a kala kimbo lio Lusi, Yehova wa molẽha kokuaye vocinjonde, kuenje wo sapuila hati: ‘Ndi kasi kumue love. Hu lava kuosi wenda, kuenje hu nena vali vofeka yilo. Si ku yanduluka toke eci ndi linga ovina nda ku likuminya.’ (Efet. 28:15) Olondaka evi via lembeleka calua Yakoba kuenda vio pamisa! O pondola hẽ oku limbuka ndomo Yakoba a kala eci a mola okuti Yehova wa tẽlisa ohuminyo yaye? Nda wa tundile konjo yove oco o ka kundile kofeka yikuavo kuna ka kuli akundi valua, nda wa limbuka esunga lieci Yakoba a kuatela esakalalo. Omo liaco, o pondolavo oku limbuka ekuatiso li tunda ku Yehova.

8, 9. Yehova wa lekisa ndati okuti wa kala ‘ocitililo cocili’ ku Yakoba, kuenda ulandu waco u tu longisa nye?

8 Eci Yakoba a pitĩla ko Harane, isiaye ukulu Lavane, wo tambula ciwa, noke wo wĩha Lea la Rahele, oco va linge akãi vaye. Pole, Lavane wa seteka oku kemba Yakoba, kuenda wa pongolola ofeto yaye ekũi kolonjanja! (Efet. 31:41, 42) Pole, Yakoba wa pandikisa kocitangi caco, kuenda wa kũlĩhĩle okuti, Yehova wa laikele oku u kuatisa! Noke, Yehova wa sapuila Yakoba oco a tiukile ko Kanana kofeka yolosekulu viaye kuna a kuata ‘oviunda via lua viovinyama, lafeko lakuenje, lolongamelo kuenda ovimbulu.’ (Efet. 30:43) Omo liaco, Yakoba wa eca olopandu ku Yehova poku likutilila hati: “Si sesamẽla ocisola cove ka ci pongoloka lesunguluko wa lekisa kokuange. Momo nda yoka olui lulo Yordão lombueti yange. Kuenje, cilo nda linga olohoka vivali.”—Efet. 32:10, NW.

9 Ovolandu a tukuiwa ndeti a lekisa okuti, ohutililo ya Mose ya kala yocili. Momo wa likutilila hati: ‘A Yehova, ove ucitililo cetu kovitumbulukila viosi’! (Osa. 90:1) Olondaka evi vi kuete esilivilo koloneke vilo, momo Yehova “ka pongoloka, kuenda ka ñualapo ndulembo.” Pole, amamako oku kala ocitililo ca vana vo kolela. (Tia. 1:17) Tu konomuisi ulandu waco.

YEHOVA EYE ‘OCITILILO’ CETU KOLONEKE VILO

10. Momo lie tu tavela okuti Yehova o ka amamako oku kala ocitililo cafendeli vaye?

10 Sokolola ndeci okuti, o kasi kombonge locimãho coku pisa ulume umue ukuacisoko cungangala. Ulume waco o kuete usongui umue wa loñoloha, haeye wa kemãla calua, ohembi, kuenda omondi. Ovisimĩlo vipi o pondola oku kuata kesulilo lieteke, noke yoku tunda kombonge? O sima hẽ okuti wa kolapo? Sio, ku kuata ovisimĩlo viaco! Pole, o vetiyiwa oku sanda vana va pondola oku ku teyuila. Ulandu owu, u sokisiwa lekalo liafendeli va Yehova okuti, va kasi oku eca uvangi watiamẽla ku Yehova, kuenda ka va kuete usumba woku situlula uhembi wa Satana! (Tanga Esituluilo 12:17.) Satana o tẽla hẽ oku tateka afendeli va Yehova? Sio, ka tẽla oku ci linga! Momo tu kasi oku amamako oku pamisa ekolelo lietu, kuenda tua kũlĩha okuti, Yehova eye ocikolo cetu, haeye ‘ocitililo cetu,’ ca piãla enene koloneke vilo via sulako. (Tanga Isaya. 54:14, 17.) Pole, nda tua ecelela oku yapuisiwa loluali lulo lua Satana, Yehova ka kala vali ocitililo cetu.

Ovangelo va Suku, va siata oku kuatisa afendeli vaye loku va teyuila

11. Ongangu yafendeli va Yehova kosimbu yi tu longisa nye?

11 Tu konomuisi vali ovolandu akuavo atiamẽla kafendeli va Yehova kosimbu. Ndaño okuti va kala vofeka yo Kanana, pole, va yuvula ovina vĩvi omanu vofeka yaco va enda oku linga. (Efet. 27:46) Ovo va kapeleko olonumbi via Suku, kuenda ka va sukilile oku kuama ulala wovihandeleko oco vi va songuile. Ovina va kũlĩhĩle viatiamẽla ku Yehova kuenda kekalo ­liaye, via va kuatisa calua. Omo okuti Yehova eye wa kala ocitililo cavo, va likolisilako oku yuvula oku panga onepa koluali.  Ovo va tu sila ongangu yiwa! Wa siata hẽ oku likolisilako oku kuama ongangu yavo poku nõla akamba, kuenda ovitalukilo o yongola oku linga? Kuli vamanji vamue va siata oku sima okuti, va kolapo voluali lulo lua vialiwa la Satana. Nda wa siata oku kuata ovisimĩlo viaco, likutilila ku Yehova loku tukula ocitangi caco. Ivaluka okuti, oluali lulo lua vialiwa la Satana, kuenda ka tu yonguila ekalo liwa.—2 Va Kor. 4:4; Va Efe. 2:1, 2.

12. (a) Aliangiliyo api Yehova a siata oku eca kafendeli vaye? (b) O tenda ndati aliangiliyo aco?

12 Oco ka tu ka yapuisiwe latutu a Satana, tu sukila oku kapako aliangiliyo Yehova a siata oku tu ĩha oco tu pamise ekolelo lietu, momo eye ocitililo cetu. Valiangiliyo aco mua kongela olohongele, efendelo liepata, kuenda akulu vekongelo va nõliwa laye oco va pamise ekolelo lietu poku liyaka lovitangi. (Va Efe. 4:8-12) Manji George Gangas okuti wa pangele onepa Kosungu Yolombangi Via Yehova vokuenda kuanyamo alua, eci a tukula esanju a kuata poku kala lavamanji wa soneha ndoco: “Eci ndi lisanga la vamanji, ci kala ndu okuti ndi kasi konjo lepata liange okuti nda lianja lavo.” Ove hẽ wa kuatele ale ovisimĩlo ndevi?

13. Ulandu upi u kuete esilivilo tu lilongisa kelivulu lia Va Heveru 11:13?

13 Ulandu ukuavo tu lilongisa kafendeli va Yehova kosimbu u lekisa okuti, tu sukila oku kuata ovituwa via litepa levi viomanu voluali. Ndomo ca lekisiwa  kocinimbu catete vocipama cilo, ovo ‘va popia vati, va kala akombe, haivo ovingendeleyi kulo kilu lieve.’ (Va Hev. 11:13) Ove hẽ wa nõlapo oku yuvula ovituwa violuali lulo? Ka ca lelukile oku ci linga. Pole, o pondola oku yuvula ovitangi viaco lekuatiso lia Suku, kuenda lia vamanji. Ivaluka okuti, ku kasi likaliove. Vosi va yongola oku vumba Yehova va kuete ocitangi coku liyaka la Satana kuenda oluali lulo! (Va Efe. 6:12) Pole, tu pondola oku yula, nda tua kolela Yehova loku ecelela okuti, o linga ocitililo cetu.

14. ‘Imbo’ lipi Avirahama a kala oku lavoka kosimbu?

14 Tu sukilavo oku kuama ongangu ya Avirahama, poku sokolola onima tu ka tambula kovaso yoloneke. (2 Va Kor. 4:18) Upostolo Paulu wa popia hati, Avirahama ‘wa kala oku lavoka imbo li kuete ociseveto ciwa okuti, omesele yalio lutungi walio, Suku.’ (Va Hev. 11:10) Imbo liaco li ­lomboloka Usoma wa Mesiya. Ocili okuti Avirahama wa kala oku lavoka ‘imbo’ liaco. Pole, etu ka tu kasi oku li lavoka.  Momo imbo liaco li lomboloka uviali wa Yehova u kasi oku viala kilu. Omo okuti uviali waco u sokisiwa lomunda yimue ya lepa calua, ndopo u ka viala oluali luosi. Ove hẽ o tava Kusoma waco? Wa velisapo hẽ usoma waco kuenda o yuvula oku panga onepa koluali lulo?—Tanga 2 Petulu 3:11, 12.

YEHOVA O KA AMAMAKO OKU KALA ‘OCITILILO’ CETU OSIMBU TU LAVOKA ESULILO

15. Nye ci ka pita lomanu vana va kolela koluali lulo?

15 Omo okuti oluali lua Satana lu panda kesulilo, citava okuti ‘ovitangi’ vi livokiya. (Mat. 24:7, 8) Ovitangi viaco vi ka livokiya calua eci ohali ya piãla yi fetika. Ovisoko viosi violuali vi ka iñila vombuanja, kuenje, omanu va ka kuata usumba. (Hav. 3:16, 17) Omo okuti omanu ka va ka kuata vali elavoko, va ka sandiliya ocitililo “valeva kuenda pokati kovawe o kolomunda.” (Esit. 6:15-17) Pole, ka ku ka kala aleva, ale ovisoko violuali vi ka va teyuila.

16. Tu tenda ndati ekongelo, kuenda momo lie?

16 Afendeli va Yehova, va ka amamako oku kala ‘vocitililo’ Caye. Kuenje, ‘va ka yolela kuenda va ka sanjukila Yehova, Suku yeyovo liavo,’ ndeci ca pita luprofeto Havakuki. (Hav. 3:18) Yehova o ka kala ndati ‘ocitililo’ cetu vokuenda kuotembo yovitangi? Tu keveleli oco tu mole ndomo ci ka lingiwa. Pole, tu sukila oku kolela okuti, ndeci Yehova a teyuila va Isareli ‘lelende linene poku tunda ko Egito, eye o ka tu ĩha olonumbi vi ka tu kuatisa oku kala vocisoko caye. (Esit. 7:9; tanga Etundilo 13:18.) Citava okuti Yehova o ka eca olonumbi viaco vakongelo. Elivulu lia Isaya 26:20, li tukula ‘olonjo’ vi ka teyuila afendeli va Suku. Olonjo viaco vi lomboloka akongelo a sangiwa voluali luosi. (Tanga Isaya 26:20.) Ove hẽ wa velisapo olohongele via siata oku lingiwa? Wa siata hẽ oku kapako olonumbi via Yehova vi eciwa vekongelo?—Va Hev. 13:17.

17. Yehova wa linga ndati ‘ocitililo’ cafendeli vaye va fa?

17 Omanu vana va pandikisa lekolelo toke kolofa osimbu ohali ya piãla ka ya fetikile, va kasi ‘vocitililo’ ca Yehova. Va kasi ndati vocitililo caco? Eci handi afendeli va Yehova kosimbu ka va file, Yehova wa sapuilile Mose hati: “Ame ndi Suku . . . ya Avirahama la Isake kuenda Yakoba.” (Etu. 3:6) Noke yoku popia olondaka evi, Yesu wa popiavo hati: “Suku hayeko Suku yava va fa, pole, eye Suku yava va kasi lomuenyo, momo omuenyo wavo wa tunda kokuaye.” (Luka 20:38, NW ) Yehova o tenda afendeli vaye va fa lekolelo ndu okuti, va kasi lomuenyo, kuenda o ka va pindula muẽle.—Uku. 7:1.

18. Voluali luokaliye Yehova o ka kala ndati ‘ocitililo’ cafendeli vaye lonjila yimue ya litepa?

18 Voluali luokaliye tu lavoka, Yehova o ka linga ocitililo cafendeli vaye lonjila yimue ya litepa. Elivulu Liesituluilo 21:3, NW, li popia hati: “Tala, onjo ya Suku yi kasi pokati komanu. Eye o ka kala lavo.” Yehova o ka kala lafendeli vaye lekuatiso lia Yesu Kristu. Kesulilo Liohulukãi yanyamo, Yesu o ka eca Usoma waco ku Isiaye, oco ocipango ca Suku ci tẽlisiwe palo posi. (1 Va Kor. 15:28) Kuenje, omanu va ka lipua, kuenda ka va ka sukila vali ekuatiso li eciwa vonduko ya Yesu. Momo Yehova eye o ka viala afendeli vaye va lipua. Tu kuete elavoko limue li komohisa calua! Omo liaco, tu kuami ongangu yafendeli va Yehova kosimbu poku ecelela okuti, Yehova o linga ‘ocitililo’ cetu.

^ tini. 2 The Contemporary English Version renders Psalm 90:1: “Our Lord, in all generations you have been our home.”