Skip to content

Skip to table of contents

Olombangi Via Yehova

Select language Umbundu

Ku Ka Ecelele Okuti Cimue Ci Ku Tateka Oku Tambula Ulamba

Ku Ka Ecelele Okuti Cimue Ci Ku Tateka Oku Tambula Ulamba

“Omunu embombe o sumbiwa.”—OLOSAP. 29:23, NW.

1, 2. (a) Ondaka ulamba ndomo ya tukuiwa Vembimbiliya yi lomboloka nye? (b) Apulilo api tu konomuisa vocipama cilo?

ECI o yeva ondaka “ulamba,” ovisimĩlo vipi o kuata? O sokolola hẽ eposo liovina Suku a lulika? (Osa. 19:1) Ale o sokolola olopandu lepandiyo lia siata oku eciwa komanu vana va kuete ovokuasi, uloño ale ekalo liwa komuenyo? Vovisonehua, ondaka “ulamba,” yi tiamisiwila kovina vi kasi kilu. Kosimbu, ovingangu violombongo via enda oku pangiwa lutale, ndeci ulu, kuenda opalata. Oku lema kuovingangu viaco, kua kuatele esilivilo lia velapo. Eli olio esunga lieci ondaka ya pongoluiwa hati “ulamba,” yi lombolokela ocina cimue ci kuete esilivilo lia velapo, ale cimue ci komohĩsa.

2 Ndaño okuti tua siata oku komõha omo liunene kuenda ekemãlo omanu vamue va kuete, pole, Suku o va tenda ndati? Embimbiliya li lombolola eci catiamẽla kulamba Suku a siata oku eca komanu. Elivulu Liolosapo 22:4, NW, li popia hati: “Omunu embombe okuti wa sumba Yehova, o kuata ukuasi lulamba, kuenda omuenyo ko pui.” Ndonge Tiago wa popia hati: “Liketisi kovaso a Yehova, kuenje eye oku kapi kunene.” (Tia. 4:10, NW) Ulamba upi Yehova a eca komanu? Nye tu sukila oku yuvula oco tu tambule ulamba waco? Tu pondola ndati oku kuatisa omanu oco va tambule ulamba waco?

3-5. Yehova o tu ĩha ndati ulamba?

3 Ukualosamo wa kolelele okuti, Yehova u kuata peka liaye liondio, kuenda u wĩha ulamba waye. (Tanga Osamo 73:23, 24.) Yehova o ci linga ndati? Eye ocilinga poku eca ulamba waco kafendeli vaye ambombe volonepa via litepa, kuenda o va kuatisa oco va kuate elomboloko liocipango caye. (1 Va Kor. 2:7) Yehova o lekisa esumbilo komanu vana va tava kondaka yaye loku pokola kokuaye, kuenda ecelela okuti, va kuata ukamba laye.—Tia. 4:8.

 4 Yehova wa eca kafendeli vaye ocikele ca velapo coku kunda olondaka viwa. (2 Va Kor. 4:1, 7) Upange waco weca esivayo Kokuaye. Eye wa likuminya kafendeli vaye va tava oku linga upange weca esivayo kokuaye, oco va kuatise omanu poku popia hati: ‘Vana va ndi sumbila, lame ndi va sumbilavo.’ (1 Sam. 2:30) Yehova wa sumbila vana va kasi oku linga upange waye poku va ĩha onduko yiwa okuti, yi lomboloka oku taviwa laye. Kuenje, vamanji vakuavo va siata oku eca epandiyo kokuavo, omo liupange uwa va kasi oku linga.—Olosap. 11:16; 22:1.

5 Nye ci ka pita lomanu vana va ‘kevelela ku Yehova kuenda va endela vonjila yaye’? Embimbiliya li va likuminya hati: “[Yehova] o va kemãlisa oco va piñale ofeka. Eci olondingaĩvi vi ka nyõliwa, va ka vi mõla.” (Osa. 37:34, NW) Omo liaco, va lavoka oku kuata omuenyo ko pui.—Osa. 37:29.

‘SI TAVA ESIVAYO LI TUNDA KOMANU’

6, 7. Momo lie omanu valua ka va lekisilile ekolelo ku Yesu?

6 Nye ci pondola oku tu tateka oku tambula ulamba Yehova a yongola oku eca kokuetu? Ocina cimue ci pondola oku tu tateka oku tambula ulamba, oku tava kovisimĩlo via vana ka va pokola kolonumbi via Yehova. Tu konomuisi olondaka viupostolo Yoano viatiamẽla kolombiali vimue via kala koloneke via Yesu poku popia hati: “Va lua pokati kolombiali va lekisile ekolelo ku Yesu, pole, omo liusumba va kuatela va Fariseo, ka va li situluile omo liohele yoku tundisiwa vosunangonga. Momo va solele ca lua oku sivayiwa lomanu, okuti Suku ci sule.” (Yoa. 12:42, 43, NW) Olombiali viaco, via sukilile oku yuvula ovisimĩlo via va Fariseo.

7 Eci Yesu a fetika upange waye woku kunda palo posi, wa lombolola esunga lieci omanu valua ka va tavelele oku u tambula, loku kolela kokuaye. (Tanga Yoano 5:39-44.) Va Isareli va kala oku lavoka oku iya kua Mesiya vokuenda kuanyamo alua. Eci Yesu a fetika oku longisa omanu, vamue pokati kavo va limbuka ocitumasuku ca Daniele ca lekisile otembo Kristu a laikele oku iya. Omo okuti omanu va kala oku lavoka oku iya kua Yesu, eci Yoano Upapatisi a kala oku kunda, valua va lipula vati: ‘Anga hẽ eye Kristu?’ (Luka 3:15) Eci Mesiya una va kala oku lavoka vokuenda kuotembo yalua a kala oku longisa, vana va litendele vati va kũlĩha Ovihandeleko, ka va tavele kokuaye. Noke, Yesu wa tukula esunga liaco poku va pula hati: ‘Vu kuata ndati ekolelo, nda vu lipandiya ene muẽle, pole, ka vu sandi ulamba u tunda lika ku Suku?’

8, 9. Lekuatiso liocindekaise cocinyi, lombolola ndomo ulamba u tunda komanu u vetiya oku sima okuti ulamba u tunda ku Yehova ka u kuete esilivilo lia velapo.

8 Tu pondola oku limbuka ndomo tu velisapo ulamba u tunda komanu okuti ulamba u tunda ku Yehova u sule, poku u sokisa leposo liocinyi. Voluali mue yuka ovina vialua via posoka. Ove hẽ ivaluka eteke limue kuteke eci wa vanja kilu ka kuli alende, kuenje, wa mola olombungululu vialua? ‘Eposo liolombungululu’ li komohĩsa calua. (1 Va Kor. 15:40, 41) Nda tu kasi volupale, eci tu mola olombungululu ilu li kala ndati? Ocinyi co volupale, ci tu tateka oku mola eposo liolombungululu vi kasi ocipãla! Anga hẽ ocinyi ci kasi vatapalo, vocila coku tasula ombunje, kuenda ocinyi ci tunda volonjo ci kuete eposo lia velapo okuti liolombungululu li sule? Sio, hacoko! Momo ocinyi co volupale, ci tu tateka oku limbuka eposo liovina Yehova a lulika. Oco tu tale eposo liolombungululu vi kasi kilu, tu sukila oku enda kocitumãlo cimue okuti ka kuli ocinyi.

9 Cimuamue haico ci pondola oku pita letu okuti, nda tua velisapo ulamba u tunda komanu, tu vetiyiwa oku sima okuti, ulamba u tunda ku Yehova, ka u kuete esilivilo lia velapo. Omanu valua, ka va siatele oku tava kesapulo Liusoma tu  va kundila omo lioku sima okuti, akamba, kuenda epata liavo va pondola oku va vetela evelo. Anga hẽ onjongole yoku tambula ulamba u tunda komanu yi pondola oku tateka afendeli va Suku? Citava okuti manji umue umalẽhe o nõliwa oco a ka kundile vocikanjo cimue okuti wa kũlĩhĩwa lomanu vosi, pole, lomue wa kũlĩha okuti, Ombangi ya Yehova. O sukila hẽ oku kuata usumba woku kundila vimbo liaco? Nda manji umue o yoliwa epembe omo lioku tẽlisa ovikele viaye vekongelo, nye a sukila oku linga? Ecelela hẽ okuti, vana ka va pitisile kovaso ocipango ca Yehova vo tateka oku kuama onjila a nõlapo? Nda manji umue wa linga ekandu linene, o sukila hẽ oku limbika ekandu liaco omo liusumba woku pumba ovikele a kuete vekongelo, kuenda ka yongola oku sumuisa akamba vaye? Nda o yongola oku tumbulula ukamba waye la Yehova, o sukila ‘oku sapela lakulu vekongelo, kuenda oku pinga ekuatiso kokuavo.—Tanga Tiago 5:14-16.

10. (a) Nye ci pita letu nda tu kuete usumba omo liovina omanu va pondola oku sima viatiamẽla kokuetu? (b) Tu kuatisiwa ndati nda tua lekisa umbombe eci vakuetu va tu lungula?

10 Citava okuti tu kuete ekolelo lia pama, pole manji umue o tu ĩha elungulo. Tu kuatisiwa lika lelungulo liaye nda tua yuvula oku lisandela esunga omo liepela okuti, ka tu yevelela ovina a tu sapuila. Sokolola ndeci okuti, o kasi oku linga upange umue la vamanji. O velisapo hẽ vana va kapako ovisimĩlo viove viwa kuenda upange walua wa siata oku linga? Nda o kasi oku liyaka locitangi ca tukuiwa ndeti, ivaluka okuti, “omunu embombe o sumbiwa.”—Olosap. 29:23, NW.

11. Ovisimĩlo vipi tu sukila oku kuata eci tu pandiyiwa la vakuetu, kuenda momo lie?

11 Akulu vekongelo kuenda vamanji vana va yongola oku tambula ocikele coku kala akulu vekongelo, va sukila oku yuvula “oku sanda” oku sivayiwa lomanu. (1 Tim. 3:1; 1 Va Tes. 2:6) Nda manji umue o pandiyiwa omo liupange umue a linga ciwa, o tambulula ndati? Eye ka sukila oku lipandiya ndeci Soma Saulu a lingile. (1 Sam. 15:12) Anga hẽ manji yaco o tava okuti upange a linga cilo wa u tẽlisa lekuatiso lia Yehova, kuenda ovina a ka linga kovaso yoloneke o ka vi tẽlisavo lekuatiso liaye? (1 Pet. 4:11) Etambululo tu eca poku pandiyiwa, olio li situlula ulamba tu kasi oku sandiliya.—Olosap. 27:21.

‘VU YONGOLA OKU LINGA OCIPANGO CA ISIENE’

12. Nye ca tateka va Yudea vamue oku yevelela esapulo lia Yesu?

12 Ocina cikuavo ci pondola oku tu tateka oku tambula ulamba u tunda ku Suku, olonjongole vietu. Ovio vi pondolavo oku tu tateka oku yevelela ondaka yocili. (Tanga Yoano 8:43-47.) Yesu wa popia eci catiamẽla ku va Yudea vamue okuti ka va tavele oku yevelela kesapulo liaye, momo ‘va yonguile oku tẽlisa onjongole ya isiavo Eliapu.’

13, 14. (a) Ovina vipi olonoño via popia catiamẽla kowoño wetu kuenda koku vangula? (b) Nye ci lekisa okuti, tu yongola oku yevelela omunu umue?

13 Olonjanja vimue, onjongole yetu yi tu vetiya oku yevelela ovina tu yongola oku linga. (2 Pet. 3:5) Yehova wa tu lulika luloño woku yuvula ovina ka tu yongola oku yevelela. Nda o kasi pocitumãlo cimue okuti o yevelela lutate, vepuluvi liaco, o pondola oku yeva ovileñi via litepa. Citava okuti osimbu kua ci lingile, kua yevele ovileñi viaco. Ndaño okuti owoño wove u ku kuatisa oku yevelela ovileñi via litepa, pole, wa ku kuatisavo oku tiamisila lika utima kocileñi cimosi. Pole, olonoño vimue via limbuka okuti, vepuluvi limosi, tu pondola lika oku yevelela omunu umosi. Momo, nda omanu vavali va kasi oku vangula vepuluvi limuamue, ka tu kuata elomboloko liovina va kasi oku popia. Pole, tu sukila oku nõlapo umue pokati kavo okuti, eye tu yevelela. Omo okuti va Yudea va yonguile oku linga ocipango  ca isiavo Eliapu, ka va tavele oku yevelela Yesu.

14 Tua siata oku tambula asapulo a tunda ‘ku vakualondunge, kuenda kuava ka va kuete olondunge.’ (Olosap. 9:1-5, 13-17) Citava okuti vakualondunge kumue la vana ka va kuete olondunge va tu sapuila ondaka yimue tu sukila oku konomuisa lutate. Helie pokati kavo tu yevelela? Tu eca lika etambululo, nda tua nõlapo umue tu yongola oku yevelela. Olomeme via Yesu vi yeva ondaka yaye kuenda viu kuama. (Yoa. 10:16, 27) Momo ‘vakuacili.’ (Yoa. 18:37) Olomeme viaco ka ‘via kũlĩhĩle ondaka yomunu ukuavo.’ (Yoa. 10:5) Omo liaco, vana va lekisa umbombe, va pondola oku tambula ulamba u tunda ku Suku.—Olosap. 3:13, 16; 8:1, 18.

‘OHALI YANGE YI LOMBOLOKA ULAMBA WENE’

15. Ohali Paulu a liyaka layo, ‘ya lombolokele ndati ulamba’ ku vamanji ko Efeso?

15 Epandi tu lekisa poku linga ocipango ca Yehova, li kuatisa omanu oku tambula epandiyo li tunda kokuaye. Paulu wa soneha ndoco: “Ndu ku vetiyi okuti ka vu konyõha omo ndi kasi oku u taleli ohali. Momo ohali yange yi lomboloka ulamba wene.” (Va Efe. 3:13, NW) Ohali ya Paulu ‘ya lombolokele ndati ulamba’ ku va Efeso? Ndaño okuti Paulu wa liyaka lovitangi, pole, wa kuatisa vamanjaye ko Efeso oku limbuka okuti, esumũlũho va kuata lioku kala Akristão, lia kuata esilivilo lia velapo. Nda Paulu wa liwekelepo upange woku kunda omo liovitangi, vamanjaye nda ka va simĩle hẽ okuti ukamba wavo la Yehova, lupange wavo woku kunda, kuenda elavoko liavo ka vi kuete esilivilo? Ongangu yiwa yepandi Paulu a lekisa, yeca uvangi wokuti, oco omunu a kale ondonge ya Kristu, o sukila oku likolisilako.

16. Elambalalo lipi Paulu a liyaka lalio eci a kala ko Lustra?

16 Sokolola ndomo ombili lepandi Paulu a lekisa via kuatisa vamanji. Elivulu Liovilinga 14:19, 20 NW, li popia hati: “Eci va Yudea va tunda ko Antiokea lo ko Ikoniyu va pitĩla, va vetiya omanu oku tava kovisimĩlo viavo, noke, va sasõla Paulu lovawe. Omo okuti va sima hati wa fa, vo kokela kosamua yolupale. Eci olondonge vio ñuala, wa votoka kuenje wa iñila vimbo. Keteke likuavo wa enda ko Derbe kumue la Barnaba.” Sokolola ohali Paulu a tala okuti noke yoku tipuiwa, keteke likuavo, wa linga ungende posi u soka 100 kolokilometulu!

17, 18. (a) Timoteo wa limbukile ndati ohali ya Paulu eci a kala ko Lustra? (b) Epandi lia Paulu lia kuatisa ndati Timoteo?

17 Anga hẽ Timoteo wa kala umue ‘pokati kolondonge’ via kuatisa Paulu eci a tipuiwa? Ndaño okuti elivulu Liovilinga ka li lombolola ulandu waco, citava okuti wa  kalapo. Kũlĩhĩsa olondaka Paulu a sonehela Timoteo vukanda wavali poku u sapuila hati: ‘Ove wa mola oku longisa kuange, lovilinga viange, lovitangi nda pita lavio ko Antiokea, ko Ikoniyu, kuenda ko Lustra. Wa kũlĩha okuti, ndaño nda pandikisa kekangiso liaco, pole, Ñala wa ndi popela kovitangi viosi.’—2 Tim. 3:10, 11; Ovil. 13:50; 14:5, 19.

18 Timoteo wa kũlĩhĩle okuti, Paulu wa pandikisa kovitangi viosi a liyaka lavio. Kuenje, Timoteo wa komoha calua omo liovitangi viaco. Eci Paulu a nyula ekongelo lio ko Lustra, wa sanga okuti, Timoteo wa linga Ukristão umue o kuete ongangu yiwa, momo ‘vamanji ko Lustra lo ko Ikoniyu, vo wimbila uvangi uwa.’ (Ovil. 16:1, 2) Vokuenda kuotembo Timoteo weya oku loñoloha, kuenje wa tambula ovikele vinene.—Va Fil. 2:19, 20; 1 Tim. 1:3.

19. Epandi lietu li pondola ndati oku kuatisa vamanji?

19 Epandi tu lekisa poku linga ocipango ca Suku, li pondola oku kuatisa omanu, ca piãla enene amalẽhe vana va kuete onjongole yoku vumba Suku. Amalẽhe valua va siata oku kuama ovituwa viwa tu lekisa poku vangula lomanu kupange woku kunda, kuenda ndomo tu tetulula ovitangi tua siata oku liyaka lavio komuenyo. Ongangu yiwa Paulu a lekisa yoku ‘pandikisa kovitangi viosi, yi pondola oku kuatisa vana va kasi oku lekisa ekolelo, oco va popeliwe loku tambula ulamba ko pui.’—2 Tim. 2:10.

Ene amalẽhẽ sanjukili epandi liakristão vana va kuka

20. Momo lie tu sukilila oku sandiliya ulamba u tunda ku Suku?

20 Ka tu sukila hẽ oku amamako ‘oku sanda lika ulamba u tunda ku Suku’? (Yoa. 5:44; 7:18) Tu sukila oku ci linga! (Tanga Va Roma 2:6, 7.) Yehova eca omuenyo ko pui, komanu vana ‘va sanda ulamba’ kokuaye. Nda tua ‘pandikisa koku linga ovina viwa,’ ci vetiya vamanji oku pamisa ekolelo liavo oco va kuate omuenyo ko pui. Omo liaco, ku ka ecelele okuti, cimue ci ku tateka oku tambula ulamba u tunda ku Suku.