Skip to content

Skip to table of contents

Olombangi Via Yehova

Select language Umbundu

Va Lieca Olumue​—ko Noruega

Va Lieca Olumue​—ko Noruega

Noke lianyamo amue, manji Roald lukãi waye Elsebeth okuti va kuete ci pitãhala 40 kanyamo, va kala ko Bergen okuti oluo olupale luavali lunene vofeka yo Noruega. Ovo kumue lomãla vavo vavali ndeci, Isabel la Fabian, va enda oku lingila kumosi ovopange vekongelo. Manji Roald, ukulu wekongelo, ukãi waye Elsebeth ukundi wotembo yosi, kuenda Isabel la Fabian, va kuata ombili kupange woku kunda.

Kosãi Yenyenye Linene yunyamo wo 2009, epata liaco lia linga esokiyo lioku ka kundila osemana yosi vocikanjo cimue okuti, ka muli akundi. Manji Roald lukãi waye Elsebeth, kumue la Fabian, o kuete 18 kanyamo, va endele kimbo limue li tukuiwa hati Nordkyn, li sangiwa volupale luo Finnmark, konano yo Noruega. Eci va pitĩla kimbo lio Kjøllefjord, va lisanga la vamanji va tunda kovaimbo akuavo, oco vakundile kumosi. Manji Roald wa popia hati: “Nda kuata esanju kefetikilo liosemana omo liesokiyo nda linga okuti, li ecelela oku litumbika kupange woku kunda vokuenda kuosemana yosi.”  Pole, vosemana yaco, wa fetika oku sima okuti, ka nõlele onjila ya sunguluka. Nye ca pita laye?

EPULILO LIMUE KA TUA LAVOKAILE

Manji Roald wa popia hati: “Omo okuti manji Mario wa kala ukundi wotembo yosi ko Finnmark, wa linga epulilo limue sialavokaile. Momo wa pinga kokuetu nda tu yongola oku ilukila vimbo lio Lakselv oco tu kuatise eci ci soka 23 kakundi va kasi vekongelo liaco.” Kuenje, manji, Roald wa komoha calua omo liepingilo liaco. Noke wa popia hati: “Ame kumue lukãi wange, tu yongola oku kundila vocikanjo cimue ka ci kuete akundi. Pole, tu tẽlisa lika ocimãho caco, eci tu limbuka okuti omãla vetu ka va kasi vali letu konjo.” Vokuenda kuoloneke manji Roald a kala oku kundila vimbo liaco, wa limbuka okuti, omanu vaco va kuete onjongole yoku li longisa Embimbiliya, kuenda va sukila oku kuatisiwa lonjanga. Noke, wa popia hati: “Nda sumuile calua omo liepulilo liaco, kuenje, nda pita ovoteke amue okuti, sia pekelele.” Kuenje, manji Mario la Roald kumue lepata liaye, va endele kimbo lio Lakselv, li kasi ocinãla ci soka 240 kolokilometulu kombuelo yo Kjøllefjord. Momo wa yonguile okuti, akombe va lisanga la vamanji va kasi vekongelo litito li sangiwa vimbo liaco.

Eci va pĩtila ko Lakselv, ukulu umue wekongelo o tukuiwa hati Andreas, wa lekisa kakombe imbo liaco kuenda Onjango Yusoma. Olombangi Via Yehova via kala vekongelo liaco, via tambula lesanju manji Roald kumue lukãi waye Elsebeth. Kuenje, va va sapuila hati, nda va tava oku ilukila vimbo liaco kumue lepata liavo oco va kuatise kupange woku kunda esapulo Liusoma, va pondola oku kuata esanju. Omo liaco, manji Andreas wa popia hati, nda sanga ale upange umue manji Roald la Fabian va ka pulisiwa oco va fetike oku talavaya! Onjila yipi akombe va nõlapo?

ONJILA YIPI TUA SUKILILE OKU KUAMA?

Kefetikilo, manji Fabian wa popia hati: “Sia kuatele onjongole yoku ilukila vocikanjo cilo.” Eye ka yonguile oku siapo akamba vaye va kasi vekongelo a kulila, oco a ilukile volupale lumue lutito. Momo wa kala oku lilongisa uloño woku kapa ocinyi volonjo. Eci manji Isabel o kuete 21 kanyamo a pulisiwa nda o yongola oku ilukila kocikanjo cikuavo, wa tambulula hati: “Ndi kuete onjongole yoku iluka tunde osimbu!” Pole, wa popia hati: “Eci nda sokolola ciwa ondaka yaco, nda lipula ndoco: ‘Ca sunguluka hẽ oku ilukila kocikanjo cikuavo? Si ka kuata hẽ ongeva lakamba vange? Ndi sukila hẽ oku amamako vekongelo ndi kasi?’” Manji Elsebeth wa tenda ndati elaleko liaco? Eye wa popia hati: “Nda simĩle okuti, Yehova wa eca ocikele cimue kepata lietu. Pole, nda sokololavo onjo yetu ya semuluiwa ndopo, kuenda ovina viosi tua landa vokuenda kueci ci soka 25 kanyamo.”

(Kombuelo) Manji Elsebeth la Isabel

Kesulilo liosemana yaco, manji Roald kumue lepata liaye, va tiukila volupale luo Bergen. Pole, ka va liwekelepo oku sokolola catiamẽla ku vamanji va siala vimbo lio Lakselv, lia kala ocinala ci soka 2.100 kolokilometulu oku tunda ko Bergen. Manji Elsebeth wa popia hati: “Nda likutilila olonjanja vialua ku Yehova, kuenda nda sapela lakamba vetu. Kuenje, omunu lomunu pokati ketu, wa lombolola ulandu waye, kuenda tua li tumisa alitalatu.” Manji Roald wa popia hati: “Nda sukilile oku pita otembo yalua loku sokolola catiamẽla koku ilukila kocikanjo cikuavo. Nda sokololavo nda noke yoku iluka tu ka sanga upange u tu kuatisa oku landa ovina tu sukila. Omo liaco, nda li pula ndoco: Tu ka kala ndati vocikanjo caco? Noke yoku likutilila ku Yehova, nda sapela lepata liange kumue la vamanji vakuavo.” Manji Fabian wa popia hati: “Noke yoku sokolola lutate ondaka yaco, nda limbuka okuti, sia kuatele lacimue ci ndi tateka oku tava kelaleko liaco. Omo liaco, noke yoku likutilila ku Yehova, nda limbuka okuti, onjongole yange yoku ilukila kocikanjo cikuavo ya livokiya.” Nye manji Isabel a linga? Osimbu ka ilukile handi, wa li tumbikile kupange wakundi votembo yosi volupale luavo. Vokuenda kuolosãi epandu a kala kupange waco, wa pesilavo otembo yalua kelilongiso liaye Liembimbiliya. Kuenje, wa limbuka okuti, o pondola oku ilukila kocikanjo cikuavo.

ESOKIYO LIOKU TẼLISA OVIMAHO VIAVO

Osimbu onjongole yepata liaco ya kala oku livokiya, va linga esokiyo lioku tẽlisa ocimaho cavo coku ilukila kocikanjo kuna ka kuli akundi. Kotembo yaco, manji Roald wa kala oku talavaya kupange umue a enda oku tambula olombongo vialua. Kuenje, wa pinga ku cime caye oco a kale unyamo umosi okuti keya kupange. Pole, cime caye wo pula nda o pondola oku talavaya lika olosemana vivali kuenje, o kala konjo olosemana epandu. Omo liaco, manji Roald wa popia hati: “Ndaño okuti ofeto yange ya tepuluka, pole, nda tava kocisimĩlo caye.”

Manji Elsebeth wa popia hati: “Ulume wange wa ndi pulisa nda tu pondola oku sanga onjo yimue ko Lakselv, oco tu lukalise onjo yetu yi kasi volupale luo Bergen. Ndaño okuti tua pita otembo yalua loku linga esokiyo liaco, pole, tua kuata onima yiwa. Noke liotembo yimue, omãla vetu va sanga upange wolowola vikuãla veteke.” Kuenje, “va tu kuatisa oku landa okulia kuenda ovina vikuavo tu sukila.”

 Manji Isabel wa popia hati: “Omo okuti tua ilukila volupale lumue lutito, nda kuata ocitangi coku sanga upange u ndi kuatisa oku amamako lupange wakundi votembo yosi. Noke, nda limbuka okuti, sia kuatele elavoko lioku sanga upange waco.” Omo okuti manji Isabel wa nõlapo oku talavaya lika kupange wolowola vikuãla veteke, vokuenda kunyamo umosi, wa sanga ovopange ecea. Kuenje, co kuatisa oku landa ovina a sukilile. Nye ci popiwa catiamẽla ku manji Fabian? Eye wa popia hati: “Oco ndi malusule epindiso liange liuloño woku kapa ocinyi volonjo, nda sandiliya upange waco ndaño sia loñolohele calua. Nda talavaya vimbo lio Lakselv muna tua kala. Noke yoku linga oseteko yuloño waco, nda sanga upange umue wolowola vikuãla veteke, woku kapa ocinyi volonjo.”

NDOMO VAMANJI VAMUE VA VOKIYA UPANGE WOKU KUNDA

(Konano) Manji Marelius la Kesia va kasi oku kundila ukãi umue o vangula elimi lio Sami, ko Noruega

Manji Marelius kumue lukãi waye Kesia, va yonguile oku kundila kocikanjo cimue ku sukila ekuatiso liakundi. Manji Marelius, okuti okuete 29 kanyamo wa popia hati: “Olohundo via lingiwa kohongele yofeka kumue lovolandu a vamanji va pulisiwa catiamẽla kupange wakundi votembo yosi, ca ndi vetiya oku vokiya upange woku kunda.” Manji Kesia okuti okuete 26 kanyamo, ka sanjukilile ocisimĩlo coku siapo epata liaye oco a ilukile kocikanjo cikuavo. Kuenje, wa popia hati: “Nda kuata usumba woku kala ocipãla lakamba vange.” Omo liaco, manji Marelius, wa talavaya kupange umue oco amalusule oku feta onjo yavo. Eye wa popia hati: “Tua pinga ku Yehova volohutililo oco a tu kuatise oku sanga onjila yoku ilukila kocikanjo cikuavo.” Catete, va pesila otembo yalua koku lilongisa Embimbiliya. Noke, olohueli viaco via landisa onjo yavo, kuenda via siapo upange wavo, kuenje, kosãi Yenyenye yunyamo wo 2011, va ilukila kolupale luo Alta konano yo Noruega. Eci va pitĩla volupale luaco, manji Marelius wa fetika oku talavaya kupange woku tenda olombongo, kuenda manji Kesia wa talavaya vovenda yimue, oco va sange eteku.

Manji Knut lukãi waye Lisbeth, va kuete ci pitãhãla 30 kanyamo va tanga ovolandu a sangiwa vo Anuário atiamẽla ku vamanji va talavaya kovikanjo ku sukila ekuatiso liakundi Vusoma. Manji Lisbeth, wa popia hati: “Ovolandu aco, a tu vetiya oku ilukila kofeka yikuavo. Pole, nda kuata a tatahãi momo upange waco u pondola oku lingiwa lomanu vakuavo.” Omo liaco, va likolisilako oku tẽlisa ocimaho cavo. Manji Knut, wa popia hati: “Tua landisa onjo yetu oco tu kuate olombongo, kuenje, tua ilukila konjo ya ina yange. Oco tu limbuke nda tu pondola oku kala kofeka yikuavo, tua ilukila volupale luo Bergen kuna tua kala unyamo umosi, kuenda tua tiamẽlele kekongelo lielimi Liongelesi. Kuenje, tua kala konjo ya ina ya manji Lisbeth.” Noke liotembo yimue, manji Knut lukãi waye Lisbeth, va nõlapo oku ilukila kofeka yo Uganda. Pole, veya oku tiukila ko Noruega kuna va talavaya olosãi vivali. Kuenje, ca va kuatisa oku kuata olombongo vioku landa ovina va sukila, osimbu va kala oku kundila vofeka yo Uganda vokuenda kunyamo umosi.

‘SETEKI OCO VU LIMBUKE OKUTI YEHOVA UWA’

“Epata lietu lia livokiya.”​—Roald

Nye ca pita la vamanji vana va lieca olumue kupange woku kunda? Manji Roald, wa popia hati: “Upange waco wa tu kuatisa oku kala pamosi lepata lietu vocikanjo ci kasi ocipãla okuti eci tua kala ko Bergen ka tua tẽlele oku ci linga. Kuenje ukamba wepata lietu wa li vokiya.  Omo liaco, tu kuete esanju lialua poku mola ndomo omãla vetu va pamisa ukamba wavo la Yehova.” Eye wa amisako hati: “Cilo ka tua pitisile vali kovaso ovokuasi, pole, tua tula utima.”

Manji Elsebeth, wa limbuka esilivilo lioku lilongisa elimi likuavo. Momo lie? Momo vocikanjo Cekongelo lio Lakselv mua kongelele imbo lio Karasjok lia tiamẽla kolupale luo Sami okuti, mu sangiwa omanu va tunda konano yo Noruega, ko Suesia, ko Filandia, kuenda ko Rusia. Manji Elsebeth wa lilongisa elimi lio Sami, oco a kundile omanu vaco. Cilo, o tẽla oku vangula ciwa lomanu vaco. Wa sanjukila hẽ ocikanjo caye cokaliye? Eye wa popia hati: “Ndi kasi oku longisa Embimbiliya komanu epandu, kuenda nda sanjukila oku kundila vocikanjo cilo!”

Manji Fabian okuti cilo ukundi wotembo yosi kuenda oñuatisi yekongelo, wa popia hati, eye kumue la manji Isabel va kuatisa amalẽhe vatatu vekongele liokaliye muna va kasi okuti, va sukilile evetiyo oco va kuate ombili kovopange ekongelo. Cilo, amalẽhe vaco vatatu, va kuete ombili kupange woku kunda. Omo okuti vavali pokati kavo va papatisiwa ale, kosãi Yelombo yunyamo wo 2012, va litumbikile kupange wakundi va sokamo. Umalẽhe umue ufeko okuti ka kuatele vali ombili kupange woku kunda, wa eca olopandu ku manji Fabian kuenda ku manji Isabel, omo a kuatisiwa oku “pamisa ekolelo liaye.” Manji Fabian wa popia hati: “Nda kuata esanju lialua eci umalẽhe a popia olondaka viaco. Oku kuatisa omunu umue oco a pamise ekolelo liaye, ci nena esanju lialua!” Manji Isabel wa popia hati: “Ocikele coku kundila omanu ca ndi kuatisa ‘oku seteka kuenda oku limbuka okuti, Yehova uwa.’” (Osa. 34:8) Eye wa amisako hati: Oku kundila kulo, ci nena esanju lialua!”

Cilo, manji Marelius kumue lukãi waye Kesia, va kuete esanju omo lioku ambata omuenyo umue wa leluka. Vekongelo lio Alta kuna va ilukila cilo muli 41 kakundi. Manji Marelius wa popia hati: “Eci ndi ivaluka otembo ya pita, ndi limbuka a pongoloko tua linga komuenyo wetu. Omo liaco, tu eca olopandu ku Yehova omo lioku tu kuatisa oku iñila kupange wakundi votembo yosi vocikanjo cilo. Upange waco u kuete esilivilo lia velapo.” Manji Kesia wa amisako hati: “Nda lilongisa oku kolela Yehova kuenje, nda limbuka ndomo a siata oku tu kuatisa. Nda limbukavo okuti, oku kala ocipãla lepata liange, ca ndi kuatisa oku kala otembo yalua lulume wange poku linga ovopange. Lalimue eteke nda livelele omo lionjila tua nõla.”

(Kepĩli) Manji Knut la Lisbeth va kasi oku longisa epata limue ko Uganda

Manji Knut kumue lukãi waye Lisbeth nye va kasi oku linga ko Uganda? Manji Knut wa popia hati: “Tua pita otembo yalua oco tu kuame ovituwa viofeka yaco. Ndaño olonjanja vimue tu liyaka locitangi cekambo liovava, olusu, kuenda evalo liovimo, pole, tua siata oku longisa Embimbiliya komanu valua!” Manji Lisbeth wa popia hati: “Ndaño okuti tu sukila oku enda akũi atatu kakukutu oco tu pitĩle vocikanjo cetu, pole, kuli ovaimbo amue okuti lomue wa kundilako olondaka viwa. Pole, eci tu enda kovaimbo aco tu sanga omanu va tanga Embimbiliya kuenje, va pinga kokuetu oco tu va longise. Oku longisa esapulo Liembimbiliya komanu vaco ambombe, ci nena esanju lialua!”

Cime cetu Yesu Kristu o kuete esanju lialua poku mola ndomo upange woku kunda a fetika u kasi oku tualiwa kolonepa viosi violuali! Omo liaco, afendeli vosi va Yehova, va sanjukila oku lieca olumue kupange woku tẽlisa ocikundi ca Yesu catiamẽla koku kundila omanu loku va ‘longisa oco va linge olondonge.’​—Mat. 28:19, 20.