Skip to content

Skip to table of contents

Olombangi Via Yehova

Select language Umbundu

 Ulandu Wa Tunda Vociseleko Cetu Calivulu

‘Tua Yeva Esapulo Limue Lia Velapo’

‘Tua Yeva Esapulo Limue Lia Velapo’

ONJANJA yimue, manji George Naish wa pula hati: “Ovina vipi va yeva?” Poku linga epulilo eli, wa ilika komumu yimue yavaya yi kuete 18 kolometulu, ya kala kocitumãlo cimue ci tukuiwa hati, Saskatoon, Saskatchewan, kofeka yo Kanada. Eye wa popia hati, kua kala omanu vamue va tungile lavaya aco utala wolondavululi vokuenda Kuyaki Watete wa pita Voluali luosi. Manji Naish wa amisako loku popia hati: “Nda kuata ocisimĩlo cokuti, tu pondola oku tunga onjo yovingungu viasapulo lavaya aco. Noke, tua linga esokiyo lioku tunga onjo yovingungu viasapulo, oco vi tu kuatise oku sandeka olondaka viwa.” OVINGUNGU viaco via fetika oku talavaya kunyamo wo 1924, kuenda ovio via fetika tete oku lombolola ovolandu Embimbiliya ko Kanada.

(1) Ovingungu viasapulo volupale luo Edmonton, ko Alberta (2) Manji umue wa kala oku talavaya vovingungu viasapulo ko Toronto, volupale luo Ontario

Ndaño okuti o Europa ya lisoka lofeka yo Kanada, pole, vamanji va nõlapo oku tungila onjo yovingungu viasapulo ko Kanada, oco yi va kuatise oku kunda olondaka viwa. Manji Florence Johnson, una wa talavaya vovingungu viaco volupale luo Saskatoon, wa popia hati: “Tu eca olopandu omo liovingungu viasapulo tu kuete, momo vi tu kuatisa oku kundila omanu va kasi ocipãla okuti ka ca lelukile oku va kundila. Omo okuti ovingungu viaco via komohĩsa omanu valua, via va kuatisa oku yevelela esapulo liusoma.” Oku upisa kunyamo wo 1926, Vakuakulilongisa Embimbiliya (okuti cilo va tukuiwa hati, Olombangi Via Yehova,) ovo va enda oku talavaya vovingungu viavo viasapulo via kala valupale akuãla ko Kanada. *

3) OVINGUNGU viasaplulo ko Saskatoon, ko Saskatchewan

Nda wa yuluile ocisanji cove, esapulo lipi nda wa yeva vovingungu viaco viasapulo? Nda wa yeva vamanji vamue va sika oviyola poku imba ovisungo vioku sivaya Yehova. Vovingungu viaco mua kalavo vamanji vamue va enda oku linga olohundo, kuenda va kuavo va lombolola ovina viatiamẽla koku longisa Embimbiliya komanu. Manji umue o tukuiwa hati Amy Jones, okuti wa enda oku linga upange waco, wa popia hati: “Poku sapela lomanu ndi sanga kupange woku kunda, va enda oku tambulula vati: ‘Nda siata oku yeva ondaka yove vovingungu viasapulo.’”

“Tua yika ovingungu viasapulo vakukutu amue, omo liomanu valua va kala oku telefonala”

Vakuakulilongisa Embimbiliya va kala volupale luo Halifax, kofeka yo Nova Eskosia, va linga ovipama viavo vovingungu viasapulo lonjila yimue ya litepa. Noke yoku lombolola ulandu umue Wembimbiliya, va laleka olonjeveleli oco vi telefonale kokuavo loku linga apulilo atiamẽla Kembimbiliya, osimbu va amamako lovipama  viavo vovingungu viasapulo. Manji umue wa soneha ndoco: “Tua komoha calua omo liatambululo omanu va eca. Omo liaco, ka tua tẽlele oku tambulula apulilo omanu vosi, momo kua kala valua va telefonala.”

Ndeci ca pita kotembo yupostolo Paulu, koloneke vilo, kuli omanu vamue okuti va siata oku tava kesapulo Liusoma tu va kundila, pole, vakuavo ka va tava. (Ovil. 17:1-5) Kuli omanu vamue va sole oku yevelela esapulo liaco. Onjanja yimue, ulume umue o tukuiwa hati, Hector Marshall, wa yevele Vakuakulilongisa Embimbiliya eci va kala oku tukula vovingungu viasapulo elivulu Estudo das Escrituras. Kuenje, esapulo liaco lio vetiya oku pinga alivulu epandu. Omo liaco wa soneha ndoco: “Nda simĩle okuti, alivulu aco a pondola oku ndi kuatisa oku longisa omanu komisa ya Calumingu.” Pole, eci Hector a mala oku tanga Elivulu Liatete lio Estudo das Escrituras, wa siapo etavo liaye. Kuenje, wa linga Ombangi ya Yehova, kuenda wa kuata ombili yoku kunda olondaka viwa, toke kunyamo wo 1998 eci a fa. Ulume umue o tukuiwa hati, Colonel J. A. MacDonald, wo kofeka yo kutundilo wo Nova Eskosia, noke yoku yeva ohundo losapi hati: “Usoma u Nena Esanju Voluali,” keteke likuavo wa sapuila manji umue hati: “Omanu vo kocifuka co Kape Breton, va popia vati, va komoha calua omo liesapulo liwa va yeva hẽla.”

Pole, eci asongui vetavo liesanda va veya ulandu waco, va tema. Vamue vakuetavo Liokatolika va kala vimbo lio Halifax, va yonguile oku nyõla onjo yonvingungu viasapulo Vakuakulilongisa Embimbiliya va enda oku lingila ovipama viavo. Kunyamo wo 1928, asongui vetavo liesanda, va vetiya ombiali yofeka oco ka yi ka tambule vali elisimu lia Vakuakulilongisa Embimbiliya okuti, li va ecelela oku amamako lupange wavo. Oco Vakuakulilongisa Embimbiliya va pise ocisimĩlo caco, va sandeka okokanda kamue losapi hati: Helie wa Panga Ofela mu Pita Olondaka? Pole, ombiali ka ya tavele okuti Vakuakulilongisa Embimbiliya va feta elisimu lioku amamako lupange wavo.

Anga hẽ, ocitangi caco ca tateka afendeli va Yehova va kala ko Kanada oku amamako lupange wavo? Manji umue o tukuiwa hati Isabel Wainwright wa popia hati: “Eci ocitangi caco ca fetika, tua simĩle okuti, ovanyãli va pondola oku tateka upange wetu. Pole, nda Yehova o yongola okuti tua amamako oku kundila omanu lekuatiso liovingungu viasapulo, ka ecelela okuti, olombiali vi tu tateka oku linga upange waco. Kuenje, tua linga apongoloko amue a tu kuatisa oku amamako loku sandeka olondaka viwa Viusoma.” Omo liaco, Vakuakulilongisa Embimbiliya ko Kanada, va liwekapo oku kundila omanu lekuatiso liovingungu viasapulo. Kuenje, va fetika oku kundila omanu kolonjo viavo. Ulandu owu u lekisa okuti, ovingungu viasapulo, via kuatisa koku sandeka ‘esapulo limue lia velapo.’—Ulandu wopiwa vociseleko cetu calivulu kofeka yo Kanada.

^ tini. 4 Vamanji kofeka yo Kanada va enda oku feta kovingungu vikuavo viasapulo, oco va sandeke esapulo Liusoma.