Skip to content

Skip to table of contents

Olombangi Via Yehova

Select language Umbundu

Ongecelo Ya Yehova Yi Lomboloka Nye Kokuove?

Ongecelo Ya Yehova Yi Lomboloka Nye Kokuove?

‘Yehova eye Suku yohenda, ukuacali, ukuakulivala konyeño. Ukuakuecela akandu levĩho.’​—ETU. 34:6, 7.

1, 2. (a) Yehova wa lekisa ndati ku va Isareli okuti eye Suku yocili? (b) Epulilo lipi tu konomisa vocipama cilo?

KOLONEKE via Nehemiya, va Lewi vana va ñoliwile oco va lingile olohutililo powiñi, olonjali viavo, ‘ka via pokuile’ kovihandeleko via Yehova. Pole, olonjanja viosi Yehova wa lekisa kokuavo okuti, eye ‘Suku ukuakuecela akandu omanu, ukuambembua, o livala konyeño, kuenda o lekisa ohenda.’ Omo liaco, Yehova wa enda oku lekisa ohenda komanu va kala kumandekua kotembo ya Neheminya.​—Neh. 9:16, 17.

2 Omunu lomunu pokati ketu o sukila oku lipula ndoco: ‘Ongecelo ya Yehova yi lomboloka nye kokuange?’ Oco tu sange etambululo liepulilo eli, tu konomuisi ndomo Daviti la Manase, vana va kala olosoma, va kuatisiwa longecelo ya Yehova.

DAVITI WA LINGA AKANDU ANENE

3-5. Daviti wa linga ndati akandu anene?

3 Ndaño okuti Daviti wa lekisile esumbilo ku Suku, pole wa linga akandu anene. Vakandu avali a linga, mua kongela Uriya lukãi waye Batisieva. Akandu aco a nena esumuo lialua komanu vosi va kongeliwamo. Onjila Yehova Suku a kuama poku kuatisa Daviti, ya lekisa okuti, eye lika wa velapo koku ecela vana va lueya. Omo liaco, tu konomuisi ulandu waco.

4 Daviti wa tumile olohoka via va Isareli oco vi ñuale ocingonja olupale lua va Amoni lu tukuiwa hati, o Raba. Olupale luaco, lua kala ocinãla ci soka 80 kolokilometulu kutundilo wo Yerusalãi ocipepi Lolui Yordão. Osimbu Daviti a kala oku ñuala ñuala kosapalalo yonjo yaye vo Yerusalãi, wa mõla Batisieva wa kala oku yua, osimbu ulume waye a enda kuyaki. Kuenje, Daviti wa tuma oku vilikiya Batisieva,  noke wa linga laye ukahokolo.​—2 Sam. 11:1-4.

5 Eci Daviti a limbuka okuti Batisieva wa mina, wa tuma oku vilikiya ulume waye Uriya wa kala kuyaki, oco eye ko Yerusalãi lelavoko liokuti, o pekela lukãi waye. Pole, Uriya ka tavele oku iñila vonjo yaye ndaño Daviti wo kisika oku ci linga. Omo liaco, usonehi wa soma Daviti wa tuma ukanda ku kesongo kasualali oco Uriya a kapiwe ‘kovaso yolohoka viuyaki’ okuti, asualali vakuavo va kala konyima yaye oco a pondiwe ndomo Daviti a yonguile. (2 Sam. 11:12-17) Vekandu liukahokolo soma Daviti a linga mua kongelele olofa via Uriya okuti, ka kuatele eko.

DAVITI WA SIAPO OVITUWA VIAYE VĨVI

6. Nye Yehova a linga, eci a limbuka okuti Daviti wa lueya? Ulandu waco u tu longisa nye catiamẽla ku Yehova?

6 Yehova wa mola ovina viosi Daviti a linga. Momo olete ovina viosi via siata oku pita voluali. (Olosap. 15:3) Ndaño okuti soma Daviti weya oku kuela Batisieva, pole ovina ‘a linga via molẽha kovaso a Yehova.’ (2 Sam. 11:27) Yehova wa kuatisa ndati Daviti noke liakandu anene a linga? Eye wa tuma uprofeto waye Natana oco a vangule la Daviti. Omo okuti Yehova Suku ukuahenda, wa sandiliya onjila yoku ecela Daviti. Ku tava hẽ okuti Yehova wa lekisa ocituwa cimue ci vetiya utima wetu? Yehova ka kisikile Daviti oku likekembela, pole, Natana wa vangula la soma catiamẽla kulandu umue wo kuatisa oku situlula akandu aye. (Tanga 2 Samuele 12:1-4.) Yehova wa kuama onjila yimue yiwa yoku situlula ovisimĩlo via Daviti!

7. Daviti wa tambulula ndati eci Natana o situluila ulandu umue?

7 Soma Daviti wa limbuka okuti, ulandu Natana o lomboluila wocili. Noke, Daviti wa temẽla ulume ohuasi wa tukuiwa vulandu waco, kuenje wa sapuila Natana hati: ‘Omo okuti Yehova ukuamuenyo, ulume wa linga ekandu liaco, o sesamẽla oku pondiwa.’ Noke, Daviti wa amisako hati, ulume vopa okameme kaye, o sukila oku fetiwa. Kuenje, ekandu liaco lia situluiwa, momo Natana wa tambulula hati: “Ove muẽle ulume waco”! Kuenje wa sapuila Daviti hati, omo liakandu wa linga, osipata ka yi tundi vonjo yove kuenda epata liove li ka pondiwa. Kuenje o ka kutisiwa osõi omo liovina wa linga. Omo okuti Daviti wa limbuka ekandu liaye, wa popia hati: “Nda linga ekandu kovaso a Yehova.”​—2 Sam. 12:5-14.

DAVITI WA LIKUTILILA, KUENJE SUKU WO WECELA

8, 9. Osamo 51 yi situlula ndati ovisimĩlo via Daviti? Ulandu waco u tu longisa nye catiamẽla ku Yehova?

8 Olondaka viocisungo Soma Daviti a soneha, vi situlula esumuo a kuata. Osamo 51 yi lekisa okuti, Daviti wa limbuka akandu a linga, kuenje, wa likekembela. Daviti wa velisilepo ukamba waye la Suku. Eye wa likekembela hati: “[A Yehova], nda ku lingila ekandu.” Kuenje, wa likutilila kokuaye hati: ‘A Yehova, nyihe utima wa yela. Kapa vutima wange espiritu liokaliye liesunga. Niuwile esanju lieyovo liove. Ñolise lutima u kuete ombili.’ (Osa. 51:1-4, 7-12) Ove hẽ wa siata oku situlula ovisimĩlo viove ku Yehova, eci o sapela laye catiamẽla kakandu wa siata oku linga?

9 Yehova ka teyuilile Daviti kovitangi via tunda kakandu aye. Ovitangi viaco via amamako toke kesulilo liomuenyo waye. Pole, Yehova wa ecela Daviti eci a limbuka okuti wa likekembe kuenda ‘wa kuata utima wa teka.’ (Tanga Osamo 32:5; Osa. 51:17.) Omo okuti Yehova eye  Ukuonene Wavelapo, o pondola oku limbuka ovisimĩlo vi vetiya omunu oku linga ekandu. Yehova ka popele hati, Daviti la Batisieva va sesamẽla oku fa omo liesombiso lia lingiwa, ndeci ca enda oku lingiwa Vocihandeleko ca eciwile ku Mose. (Ovis. 20:10) Suku wa ecelela okuti omõla wavo Salomone o linga osoma ya va Isareli.​—1 Asa. 22:9, 10.

10. (a) Ovina vipi Yehova a limbuka ku Daviti oco o wecele? (b) Nye ca vetiya Yehova oku ci linga?

10 Esunga likuavo li lekisa okuti Yehova wa ecela Daviti, lieli liokuti, eye wa ecelavo Saulu. (1 Sam. 24:4-7) Yesu wa lombolola hati, tu sukila oku tata ciwa vakuetu, ndomo Yehova a siata oku tu tata. Eye wa popia hati: “Yuvuli oku sombisa vakuene oco ko ka sombisiwi. Momo esombiso vu linga ku vakuene, hailio vo sombisi lalio. Oseteko vu seteka layo vakuene, haiyo vo seteki layo.” (Mat. 7:1, 2, NW) Tu sanjuka calua poku limbuka okuti, nda tua linga ekandu linene ndeci, ukahokolo ale oku ponda omunu umue, pole, tu likekembela, Yehova o tu ecela! Pole, Yehova o tu ecela lika nda tu ecela vana va tu lueyela, loku likekembela akandu etu lutima wosi, kuenda tu yuvula ovituwa ka via sungulukile. Nda tua ci linga, tu ‘tambula ekavuluko liocili,’ li tunda ku Yehova.​—Tanga Ovilinga 3:19.

MANASE WA LINGA AKANDU ANENE, POLE WA LIKEKEMBELA

11. Ovina vipi vĩvi Soma Manase alinga kovaso a Suku?

11 Kũlĩhĩsa ulandu ukuavo u sangiwa Vovisonehua u lekisa onjongole ya Yehova yoku ecela. Manase weya oku linga osoma yo ko Yuda, noke yoku pita ci soka 360 kanyamo tunde eci Daviti a kala kuviali. Pole, Vokuenda kueci ci soka 55 kanyamo a kala kuviali, wa linga ovina ka via sungulukile, kuenje, Yehova wo pisa omo liakandu aye ndeci: Oku tungila utala Baale, oku ‘fendela olombungululu viokilu,’ oku yoka omãla vaye vondalu, kuenda oku tãha. Ocili okuti, ‘wa linga ovina vialua via vĩha kovaso a Yehova.’​—2 Asap. 33:1-6.

12. Manase weya oku kuata ndati ukamba la Yehova?

12 Vokuenda kuotembo, Manase weya oku kuatiwa vofeka yaye, kuenje, wa tualiwa vokayike ko Bavulono. Citava okuti eci a kala vokayike, wa ivaluka olondaka via Yehova Mose a sapuilile va Isareli hati: “Eci vu tala ohali loku liyaka lovitangi, vu sukila oku tiukila ku Yehova, Suku yene, loku pokola kondaka yaye.” (Esin. 4:30, NW) Noke,  Manase weya oku kuata vali ukamba la Yehova. Wa ci linga ndati? (Ndomo ca lomboluiwa kemẽla 21,) wa ci linga poku ‘lekisa umbombe, kuenda wa likutilila’ ku Suku. (2 Asap. 33:12, 13) Embimbiliya ka li lekisa olondaka Manase a tukula vohutililo yaye, pole, citava okuti, vi sokisiwa lolondaka via Soma Daviti vi sangiwa Kosamo 51. Omo liaco, Manase wa siapo ovituwa viaye vĩvi.

13. Momo lie Yehova a tavela oku ecela akandu a Manase?

13 Yehova wa tambulula ndati olohutililo via Manase? ‘Wa ci linga poku yeva epingilo liongecelo yakandu aye.’ Manase wa limbuka akandu aye kuenda wa likekembela lutima wosi, ndeci Daviti a linga. Eli olio esunga lieci Suku a tavela oku ecela Manase, kuenje, wa tava okuti amamako oku viala ko Yerusalãi. Omo liaco, ‘Manase weya oku kũlĩha Yehova okuti, eye Suku yocili.’ (2 Asap. 33:13) Tu kuata esanju lialua poku limbuka okuti, Yehova ecela omanu va likekembela lutima wosi!

Yehova noke yoku ecela Manase, wo kapele vali komangu yaye yusuma ko Yerusalãi

YEHOVA WA SIATA HẼ OKU ECELA AKANDU ETU?

14. Nye ci lekisa okuti Yehova o pondola oku ecela omunu wa linga akandu anene?

14 Koloneke vilo, kuli afendeli vamue va Yehova okuti, nda va linga akandu anene, ka va likekembela, ndeci Daviti la Manase va linga. Pole, omo okuti Yehova wa ecela olosoma vivali, ci tu kuatisa oku limbuka okuti, o pondola oku ecela vosi va linga akundu anene, nda va likekembela lutima wosi.

15. Tua kũlĩha ndati okuti olonjanja vimue Yehova ka ecela akandu omanu vosi?

15 Ka tu ka sima okuti, Yehova poku ecela akandu omanu, ka konomuisa vali esunga liaco. Omo liaco, tu konomuisi oku litepa ku kasi pokati kovituwa Daviti la Manase va lekisa, kuenda olonamãlala va Isareli la va Yuda va kuata. Suku wa tumĩle Natana oku sapela la Daviti oco a siepo ovituwa viaye vĩvi. Daviti wa tava kelungulo a tambula. Eci Manase a  limbuka okuti wa lueya, wa tava oku likekembela lutima wosi. Pole, va Isareli la va Yuda, ka va tavele oku likekembela. Omo liaco, Yehova ka tavele oku ecela akandu avo. Yehova wa tumĩle ovaprofeto vaye olonjanja vialua, oco va sapuile va Isareli okuti, o lete ovina vĩvi, va kala oku linga. (Tanga Nehemiya 9:30) Eci va Isareli va pitĩla vofeka yavo noke yoku tunda kumandekua ko Bavulono, Yehova wa amamako oku tuma olomunga viaye ndeci, ocitunda Esera luprofeto Malakiya, oco va kuatise omanu. Nda omanu va likolisilako oku linga ovina vi likuata locipango ca Yehova, va kuata esanju.​—Neh. 12:43-47.

16. (a) Nye ca pita la va Isareli vana ka va tavele oku likekembela? (b) Nye ca pita lovitumbulukila via va Isareli kosimbu?

16 Eci Yesu eya palo posi, noke yokueca ocilumba cocisembi ca lipua, Yehova ka tavele vali ovilumba viovinyama va Isareli va enda oku eca. (1 Yoano 4:9, 10) Eci Yesu a kala palo posi, wa situlula ovisimĩlo via Isiaye kuenda wa vetiyiwa oku popia hati: “A Yerusalãi, a Yerusalãi! Wa siata oku ponda ovaprofeto, loku sasõla lovawe vana va tumiwa kokuove. Olonjanja via lua nda yonguile oku kongela omãla vove ndeci osanji yi teyuila omãla vemehi liavava aye, kuenje ka wa taveli!” Omo liaco, Yesu wa popia hati: “Tali, onjo yene yi siala upolokoso.” (Mateo 23:37, 38, NW) Omo okuti va Isareli ka va likekembelele, va piñaliwa la va Isareli ya Suku. (Mat. 21:43; Va Gal. 6:16) Nye ci popiwa catiamẽla ku va Isareli va citiwila vofeka yaco? Ovo va ka kuatisiwa longecelo ya Yehova nda va kolela kokuaye, kuenda kocisembi ca Yesu Kristu. Omanu vana okuti eci va fa ka va kuatele ukũlĩhĩso Wondaka ya Yehova, va ka pinduiwavo oco va kale voluali luokaliye palo posi.​—Yoano 5:28, 29; Ovil. 24:15.

KUATISIWA LONGECELO YI TUNDA KU YEHOVA

17, 18. Tu pondola ndati oku tambula ongecelo ya Yehova?

17 Omo kuti Yehova wa siata oku ecela akandu etu, nye tu sukila oku linga? Tu sukila oku kuama ongangu ya Daviti la Manase okuti noke yoku limbuka akandu avo, va likekembela. Omo okuti ka tua lipuile, tu sukila oku limbuka akandu etu loku likekembela oco Yehova a tu ecele. Tu sukilavo oku pinga ekuatiso kokuaye, oco tu kuate ovisimĩlo via sunguluka. (Osa. 51:10) Nda tua linga ekandu limue linene, tu sukila oku pinga ekuatiso kakulu vekongelo. (Tia. 5:14, 15) Tu sukilavo oku ivaluka okuti, Yehova eye “Suku yohenda, ukuacali, ukuakulivala konyeño, ukuacisola calua haeye ukuacili, o muisa komanu ocisola ka ci pui, ukuakuecela akandu kuenda evĩho.” Omo liaco, Yehova ka pongoloka.​—Etu. 34:6, 7, NW.

18 Yehova wa likuminyile oku ecela va Isareli va likekembela akandu avo lutima wosi. Eye wa popia hati, ndaño akandu avo a ‘kusuka nge,’ a yelisiwa ‘ndocikokoto.’ (Tanga Isaya 1:18.) Ohenda ya Yehova yi lomboloka nye kokuetu? Omo okuti Yehova o pondola oku ecela akandu etu, nada tua lueya, tu sukila oku kuata ovituwa vi lekisa okuti, tua likekembela lutima wosi.

19. Nye tu ka konomuisa vocipama cikũaimo?

19 Omo okuti Yehova wa siata oku ecela akandu etu, tu kuama ndati ongangu yaye yoku ecela vana va tu lueyela? Tu ecela ndati vana va tu lueyela okuti va likekembela lutima wosi? Ocipama ci kuãimo, ci ka tu kuatisa oku kũlĩhĩsa ovisimĩlo vietu, oco tu kuate ovituwa ndevi via Yehova okuti, ‘wa sunguluka, haeye ukuakuecela.’​—Osa. 86:5.