Skip to content

Skip to table of contents

Olombangi Via Yehova

Select language Umbundu

Apulilo A Lingiwa La Vakuakutanga

Apulilo A Lingiwa La Vakuakutanga

Anga hẽ, olondaka Yesu a tukula kelivulu lia Mateo 19:10-12, vi lekisa okuti vana ka va yongola oku kuela va tambula ombanjaile yaco locikomo?

Tu konomuisi ulandu Yesu a tukula watiamẽla komunu ka yongola oku kuela. Eci va Fariseo va sapuila Yesu ondaka yatiamẽla koku li nyãla, wa va lomboluila onumbi ya Yehova yatiamẽla kolohuela. Ndaño Ocihandeleko ca lekisile okuti ulume o pondola oku soneha ukanda woku nyãla ukãi waye nda wa linga ‘cimue cĩvi,’ pole, Suku ka ecele onumbi yaco eci a tokekisa olohuela viatete. (Esin. 24:1, 2) Noke, Yesu wa popia hati: “Ulume wosi o nyala ukãi waye, ndaño ka lingile ukahonga, kuenje, o kuela ukãi ukuavo, o linga ukahokolo.”​—Mat. 19:3-9, NW.

Eci olondonge via Yesu via yeva ondaka yaco via popia viti: “Nda ulume lukãi waye va kuete ocitangi caco, hĩse ka va ka kuele vali.” Pole, Yesu wa tambulula hati: “Havosiko va pondola oku pokola kondaka yaco, te lika vana va tambula ongavelo yaco. Kuli ava ka va kuela omo liocitangi cimue va citiwa laco, vakuavo, va nyõliwa lomanu. Kulivo omanu vamue ka va kuela omo lioku pitisa kovaso Usoma wokilu. Wosi o tẽla oku likandangiya, o pondola oku ci linga.”​—Mat. 19:10-12, NW.

Kosimbu, kua kala omanu vamue ka va kuelele omo liocitangi cimue va citiwa laco, ale va nyõliwa lomanu. Pole, kua kala vakuavo okuti, va nõlapo oku yuvula oku kuela. Omo okuti ka va yongola oku kuela, va enda oku likandangiya oco va ‘pitise kovaso usoma wokilu.’ Omo liaco, va nõlelepo oku yuvula oku kuela, kuenda va litumbikile lika kupange Wusoma wa Suku, ndeci Yesu a linga. Ovo, ka va citiwile lombanjaile yaco, kuenda ka va yi tambuile locikomo. Pole, va enda oku likandangiya, oco va tẽlise ohuminyo yaco. Eli olio esunga lieci va kuetele ombanjaile yaco.

Upostolo Paulu poku lombolola ovina Yesu a popia, wa lekisa okuti, Akristão vosi, ci kale vana va kuele, ale vava ka va kuelele, va pondola oku linga upange u taviwa la Suku. Pole, vana ‘ka va yongola oku kuela, va nõla onjila yiwa.’ Va nõla ndati onjila yaco? Momo vamanji vana va kuele, va sukila oku tepa otembo, oco va sanjuise olohueli viavo. Pole, vana ka va kuelele, va pondola oku pesila otembo yavo kupange wa Yehova okuti, lacimue ci va tateka. Ovo va tenda ekalo liavo ‘ndombanjaile’ ya tunda ku Suku.​—1 Va Kor. 7:7, 32-38.

Embimbiliya li tu sapuila okuti, Ukristão wocili, ka tambuile locikomo ombanjaile yoku yuvula oku kuela. Pole, o ci linga omo liupange wa Yehova okuti, lacimue cu tateka. Koloneke vilo, kuli vamanji valua okuti, va siata oku yuvula oku kuela omo liupange wa Yehova. Vamanji vamue va siata oku nõla onjila yaco oco va pamise vakuavo.