Skip to content

Skip to table of contents

Olombangi Via Yehova

Select language Umbundu

Yehova Eca Onima Kuava vo Sanda Lutima Wosi

Yehova Eca Onima Kuava vo Sanda Lutima Wosi

“Wosi amela ku Suku loku u fendela o sukila oku kolela okuti eye o kasi lomuenyo kuenda eca onima kuava vo sanda lutima wosi.” —VA HEVERU 11:6.

OVISUNGO: 136, 139

1, 2. (a) Elitokeko lipi li kasi pokati kocisola kuenda ekolelo? (b) Apulilo api tu konomuisa vocipama cilo?

ISIETU wokilu Yehova, wa likuminya oku sumũlũisa afendeli vaye vakuekolelo. Eyi onjila yimue Yehova a siata oku lekisa ocisola caye kokuetu, kuenda tu lekisa ocisola kokuaye “momo eye wa tu sola tete.” (1 Yoano 4:19) Osimbu ocisola cetu ku Yehova camamako, ekolelo lietu kokuaye li pamisiwa kuenda ci tu ĩha utõi woku lekisa okuti Yehova eca onima komanu vana a sole.—Tanga Va Heveru 11:6.

2 Yehova ukuakueca onima! Eli olio onepa ya velapo yekalo liaye kuenda yovina eye a linga. Omo liaco, ekolelo tu kuetele Suku ka li ka pamisiwa nda ka tu kolela okuti Yehova eca onima kuava vo sanda lutima wosi. Momo lie? Momo “Ekolelo ociseveto covina vi lavokaiwa.” (Va Heveru 11:1) Ekolelo li lomboloka oku tava okuti Suku o ka sumũlũisa afendeli vaye vakuekolelo. Elavoko tu kuete liatiamẽla kasumũlũho tu lavoka li tu kuatisa ndati? Yehova wa sumũlũisa ndati afendeli  vaye kosimbu kuenda vokoloneke vilo? Tu ci konomuisi.

YEHOVA WA LIKUMINYA OKU SUMŨLŨISA AFENDELI VAYE

3. Eci tu tanga elivulu lia Malakiya 3:10 ohuminyo yipi tu sangako?

3 Yehova Suku wa likuminya oku eca onima kafendeli vaye vakuekolelo. Eye o tu laleka oco tu likolisileko kuenda oku kolela okuti o ka tu sumũlũisa. Yehova wa popia hati: “Seteki ondaka yange.” Eye wa amisako hati: “Nda siu yikuluili olonjanela viokilu loku u sukumuĩli esumũlũho lia piãla enene, liokuti apa li selekiwa ka pa molẽha!” (Malakiya 3:10) Tu lekisa okuti tua sanjukila ombanjaile yaco eci tu tava kelaleko lia Yehova lioku seteka ondaka yaye.

4. Momo lie tua kolelela kohuminyo ya Yesu yi sangiwa kelivulu lia Mateo 6:33?

4 Yesu wa likuminya kolondonge viaye okuti nda va pitisa kovaso Usoma komuenyo wavo, Suku o ka va kuatisa. (Tanga Mateo 6:33.) Yesu wa tukula olondaka viaco momo wa kũlĩhĩle okuti olohuminyo viosi via Suku vi tẽlisiwa. (Isaya 55:11) Omo liaco, tu pondola oku tava okuti nda tua kolela ku Yehova lutima wosi, eye o ka tẽlisa ohuminyo yokuti: “Ame lalimue eteke hu sia, ale oku ku yanduluka.” (Va Heveru 13:5) Ohuminyo eyi ya Yehova yi tu kuatisa oku kolela kolondaka via Yesu vi sangiwa kelivulu lia Mateo 6:33.

Yesu wa lekisa okuti olondonge viaye via ponduile oku tambula onima omo lialikolisilo avo (Tala ocinimbu 5)

5. Momo lie etambululo Yesu a eca ku Petulu li tu pamisila vosi yetu?

5 Upostolu Petulu wa pula Yesu hati: “Tua  sia ovina viosi kuenje tua ku kuama; oco hẽ nye tu tambula?” (Mateo 19:27) Yesu ka pisile Petulu omo lioku linga epulilo liaco. Pole eye wa sapuila kolondonge viaye okuti ovo va laikele oku tambula onima omo lialikolisilo avo. Ovapostolo kuenda afendeli vakuavo vakuekolelo va ka viala la Yesu kilu kovaso yoloneke. Pole, Yesu wa popia okuti ndaño cilo va pondola oku tambula onima poku va sapuila hati: “Wosi o sia onjo, ale vamanjaye alume la vamanjaye akãi, pamue isia ale ina, pamue omãla ale epia omo lionduko yange, o tambula ocita kolonjanja kuenda o piñala omuenyo ko pui.” (Mateo 19:29) Olondonge viosi via Yesu vi pondola oku sanga va isia, va ina, vamanjavo alume, la vamanjavo akãi, kuenda omãla vekongelo koloneke vilo. Ovina viaco via velapo okuti alikolisilo tua linga oco tu pitise kovaso Usoma wa Suku ci sule.

‘ONJUNDO YIMUE YOMUENYO’

6. Momo lie Yehova a likuminyila oku eca onima kafendeli vaye?

6 Ndaño okuti tua siata oku tambula asumũlũho alua koloneke vilo pole, tu kuete esanju lioku lavoka asumũlũho a velapo kovaso yoloneke. (1 Timoteo 4:8) Yehova wa likuminya oku eca onima kafendeli vaye vakuekolelo, kuenje oku kũlĩha ovina viaco ci tu kuatisa oku pandikisa kovitangi. Omo lioku tava okuti Yehova “eca onima kuava vo sanda lutima wosi,” tu pondola oku amamako lekolelo.—Va Heveru 11:6.

7. Elavoko li sokisiwa ndati lonjundo?

7 Vohundo Yesu a lingila komunda, wa popia hati: “Sanjuki kuenda yoleli, momo vu kuete onima yinene kilu, ovaprofeto va lambalaliwilevo ndene.” (Mateo 5:12) Afendeli vamue va Suku va ka tambula onima yavo kilu. Vakuavo va ka tambula onima yomuenyo ko pui palo posi vofeka yelau. Ovina evi vi vetiya oku ‘Sanjuka kuenda oku yolela.’ (Osamo 37:11; Luka 18:30) Pole, vosi yetu tu kuete elavoko li pondola oku kala “ndonjundo ya pama vomuenyo wetu.” (Va Heveru 6:17-20) Ndeci onjundo yimue yi pondola oku kuatisa ocimbaluku vokuenda kuehunguhungu liofela, elavoko lietu li pondolavo oku tu kuatisa oku amamako oku pamisa ekolelo lietu. Eci ci pondola oku tu kuatisa oku amamako oku pandikisa kovitangi.

Yehova wa likuminya oku eca onima kafendeli vaye vakuekolelo, kuenje oku kũlĩha ovina viaco ci tu kuatisa oku pandikisa kovitangi

8. Elavoko lietu li tepulula ndati esakalalo?

8 Elavoko lietu li pondola oku tu kuatisa oku tepulula esakalalo. Ndeci ulela u pondola oku leñelisa etimba, olohuminyo via Suku vi pondolavo oku tepulula asakalalo utima wetu. Ocili okuti, ci tu kavuluisa calua oku kũlĩha okuti Yehova o ka tu tata eci tu tuika ocilemo cetu kokuaye. (Osamo 55:22) Tu pondola oku kolela lutima wosi okuti Suku o pondola oku tu ĩha “ovina viosi tu pinga ale tu sima.” (Va Efeso 3:20)  Yehova ka tu kuatisa lika lovina tu sukila, pole o tu ĩhavo “ovina viosi”!

9. Tua kolela ndati okuti tu pondola oku tambula asumũlũho a Yehova?

9 Oco tu tambule onima, tu sukila oku pamisa ekolelo lietu ku Yehova kuenda oku pokola koviandeleko viaye. Mose wa sapuila epata lia va Isareli hati: “Yehova o vu sumũluĩsa calua vofeka Yehova, Suku yene, a wĩhi haiyo yi linga ocipiñalo. Cinene oku yevelela lutate kondaka ya Yehova, Suku yene, loku pokola kovihandeleko ndu wĩhi etaili. Momo Yehova, Suku yene, o vu sumũluĩsa ndeci a likuminya lene.” (Esinumuĩlo 15:4-6) Wa kolela hẽ okuti o ka sumũlũisiwa la Yehova nda wa amamako oku u fendela lekolelo? O pondola oku kolela kolohuminyo viaco.

YEHOVA WA KALA ONIMA YAVO

10, 11. Yehova wa eca ndati onima ku Yosefe?

10 Embimbiliya lia sonehiwa oco li tu kuatise. Vembimbiliya tu sangamo ovolandu a lekisa ndomo Suku a eca onima kafendeli vaye vakuekolelo vo kosimbu. (Va Roma 15:4) Umue pokati kovolandu aco wa Yosefe. Catete, vahuvaye vo landisa oco a linge upika. Noke, ukãi wa cime caye wo lundila kuenje wa kapiwa vokayike Kegito. Eci Yosefe a kala vokayike, anga hẽ wa tepa ukamba waye la Yehova? Ocili okuti sio! Embimbiliya li lekisa okuti: “Yehova wa kala la Yosefe, wo kuatisa locisola caye ka ci pongoloka.” Olio li lekisavo okuti “Yehova wa kala laye kuenje cosi a linga, Yehova wa ci sumũluisa.” (Efetikilo 39:21-23) Ndaño lovitangi a kala oku liyaka lavio, Yosefe wa kevelela lepandi ku Suku yaye.

11 Noke lianyamo amue, Fareo wa yovola Yosefe vo kayike kuenda upika waco ukuembombe wa linga ombiali yavali ya velapo vofeka Yegito. (Efetikilo 41:1, 37-43) Eci Yosefe kumue lukãi waye va kuata omãla vavali, “Yosefe wa luka nuñulu yaye hati, Manase, momo hati, Suku wa njivalisa upongo wange wosi kuenda vakuanjo ya tate vosi. Omõla wavali wo luka Efarimi hati, Momo Suku wa nyimisila epako vofeka yohali yange.” (Efetikilo 41:51, 52) Yehova wa eca onima ku Yosefe, kuenje eye wa yovola va Isareli kuenda va Egito konjala. Yosefe wa kũlĩhĩle okuti Yehova eye wa eca onima kokuaye loku u sumũlũisa.—Efetikilo 45:5-9.

Yesu wa kuata esanju poku kemãlisa onduko ya Suku

12. Yesu wa amamako ndati lekolelo eci a setekiwa?

12 Yesu Kristu wa pokolavo ku Suku ndaño okuti wa pita voloseteko vialua, kuenje Yehova wa eca onima kokuaye. Nye ca kuatisa Yesu oku amamako oku lekisa ekolelo? Ondaka ya Suku yi lombolola ndoco: “Omo liesanju lio kapiwila, wa pandikisa kuti wekangiso, wa pembula osõi.” (Va Heveru 12:2) Yesu wa kuata esanju poku kemãlisa onduko ya Suku. Eye wa  tambula onima yoku taviwa la Isiaye kuenda wa tambulavo ovikele vialua via velapo. Embimbiliya li lekisa okuti eye “wa tumãla kondio yocalo ca Suku.” Tu tangavo ndoco: “Suku wo kemainyisa komangu yimue ya velapo kuenda wo wĩha onduko ya velapo olonduko viosi.”—Va Filipoi 2:9.

YEHOVA KA IVALAKO OVINA TU LINGA

13, 14. Nye Yehova a yeva vutima omo liovina tua siata oku u lingila?

13 Tu koleli okuti Yehova wa kapako alikolisilo osi tua siata oku linga oco tu u fendele. Eye wa kũlĩha ndomo tu kala eci tu kuata atatahãi atiamẽla kokuetu muẽle ale kupange umue ka tu tẽla oku linga. O tu kuatisavo eci tu liyaka lasakalalo atiamẽla kupange ale oku tekula epata lietu. Yehova wa kũlĩha okuti omo lioku vela ale esakalalo ka tu pondola oku linga ovina vialua kupange waye ndeci tua enda oku linga kosimbu. Tu pondola oku kolela okuti Yehova wa kapako alikolisilo etu ndaño lovitangi tua siata oku liyaka lavio.—Tanga Va Heveru 6:10, 11.

14 Ivaluka okuti Yehova ‘Ukuakuyeva ohutililo.’ Tu pondola oku kolela okuti eci tu likutilila kokuaye eye o tu yevelela. (Osamo 65:2) “Isia yohenda kuenda Suku yelembeleko liosi” o ka tu ĩha ovina viosi tu sukila oco tu kuate ukamba uwa laye. (2 Va Korindo 1:3) Yehova o sanjuka eci tu lekisa ohenda komanu vakuavo. “U o linga olosuke ohenda wondika Yehova, kuenje Yehova u tiuwila oviali viaye.” (Olosapo 19:17; Mateo 6:3, 4) Eci tu lekisa ohenda kuenda tu kuatisa vamanji, Yehova o ci tenda ndu okuti tu kasi oku undika kokuaye. Eye wa likuminya oku sumũlũisa ohenda tu lekisa.

ONIMA CILO KUENDA OTEMBO KA YI PUI

15. Onima yipi o lavoka oku tambula kovaso yoloneke? (Tala ociluvialuvia kefetikilo liocipama cilo.)

15 Akristão olombuavekua va kuete elavoko lioku tambula “ekolowa ndonima,” ya tunda ku Yesu. (2 Timoteo 4:7, 8) Pole, eci ka ci lekisa okuti omo lioku kuata elavoko lia litepa ku kuete esilivilo kovaso a Suku. Omanu valua va panga onepa ‘kolomeme vikuavo’ via Yesu va lavoka lesanju onima yoku kuata omuenyo ko pui vofeka yelau palo posi. Ovo va ka “sanjukila okusalala kualua.”—Yoano 10:16; Osamo 37:11.

16. Elembeleko lipi tu sanga vukanda wa 1 Yoano 3:19, 20?

16 Olonjanja vimue tu sima okuti, ka tu kasi oku linga calua kupange wa Yehova ale tu lipula nda eye wa siata oku sanjukila ovina tua siata oku linga. Pamue, tu sima okuti ka tu sesamẽla oku tambula ocikele cimue. Pole, ka tu ka ivaliko okuti, “Suku wa velapo, ovitima vietu vi sule kuenda eye wa kũlĩha ovina viosi.” (Tanga 1 Yoano 3:19, 20.) Eci tu fendela Yehova omo liekolelo lietu kuenda ocisola tu u kuetele, tu pondola oku kolela okuti eye o ka tu sumũlũisa, ndaño okuti ovina tu linga vi molẽha ndu okuti ka vi kuete esilivilo lialua.—Marko 12:41-44.

17. Asumũlũho api tua siata oku tambula koloneke vilo?

17 Koloneke vilo via sulako violuali lulo lua vĩha lua Satana, Yehova wa siatavo oku sumũlũisa afendeli vaye. Eye wa  siata oku tu ĩha ukũlĩhĩso walua kuenda ombembua yi tunda ku vamanjetu voluali luosi. (Isaya 54:13) Ndeci Yesu a likuminya, Yehova wa tu ĩha onima cilo liepata limue li sangiwa voluali luosi okuti va likuetele ocisola. (Marko 10:29, 30) Handi vali, omanu vana va sanda Suku lutima wosi va siata oku tambula onima yombembua yovutima kuenda esanju.—Va Filipoi 4:4-7.

18, 19. Esanju lipi afendeli va Yehova va yevite vutima omo lionima va siata oku tambula?

18 Afendeli va Yehova voluali luosi va kuete ovolandu a komohĩsa atiamẽla konima va tambula ku Isietu. Manji umue o tukuiwa okuti Bianca kofeka yo Alemanya wa popia hati: “Ndi pandula calua Yehova omo okuti wa siata oku ndi kuatisa kasakalalo ange eteke leteke. Voluali mueyuka ovitangi vialua kuenda esumuo. Omo okuti ndi ndingupange ya Yehova, ndi kuete esanju lioku teyuiwa leka liaye lia pama. Olonjanja viosi ndi likolisilako oku linga ovopange a Yehova, eye wa siata oku ndi sumũlũisa calua.”

19 Sokolola ulandu wa manji Paula o kuete ci soka 70 kanyamo, kofeka yo Kanada okuti ka tẽla oku linga ovina vialua omo liuvei a kuete. Eye wa popia okuti, ndaño uvei waco wa siata oku u tateka oku enda pole, ka wa siatele oku u tateka oku enda kupange woku kunda. Eye wamisako loku popia hati: “Nda siata oku kuama olonjila via litepa kupange woku kunda ndeci oku kundila votelefone kuenda oku eca uvangi ka wa sokiyiwile. Oco ndi pamisiwe, nda siata oku soneha ovinimbu Viembimbiliya velivulu limue kuenda olonumbi vi sangiwa valivulu etu, oco ndi a konomuise olonjanja viosi. Elivulu liaco ndi li tukula hati: ‘Elivulu lioku puluka.’ Tu pondolo oku tepulula esumuo poku tiamisila utima wetu kolohuminyo via Yehova. Eye wa siata oku tu kuatisa, kovitangi viosi tu liyaka lavio.” Citava okuti, ocitangi cove ca litepa locitangi ca manji Bianca ale ca manji Paula. Pole, ndaño locitangi caco, citava okuti o pondola oku sokolola kolonjila Yehova a kuama oco a ece onima kokuove kuenda komanu vana va lisungue love. Ci sanjuisa calua oku sokolola ndomo Yehova a siata oku eca onima kokuove koloneke vilo kuenda ndomo a ka ci linga kovaso yoloneke!

20. Onima yipi tu lavoka nda tua likolisilako oku fendela Yehova lekolelo?

20 Ivaluka okuti olohutililo viove vi lingiwa lutima wosi ‘vi ka kuata onima.’ Kolela okuti “noke yoku linga ocipango ca Suku,” o ka “mola oku tẽlisiwa kuohuminyo.” (Va Heveru 10:35, 36) Omo liaco, tu amamiko oku pamisa ekolelo lietu kuenda oku likolisilako oco tu fendele Yehova. Tua kolela okuti Yehova o ka tu ĩha onima!—Tanga Va Kolosai 3:23, 24.