Skip to content

Skip to table of contents

Olombangi Via Yehova

Select language Umbundu

‘Oku Tiamisila Utima Wove Kovina vi Pamisa Ekolelo ci Lomboloka Omuenyo Kuenda Ombembua’

‘Oku Tiamisila Utima Wove Kovina vi Pamisa Ekolelo ci Lomboloka Omuenyo Kuenda Ombembua’

“Ava va ambata omuenyo u litava lespiritu, [va tiamisila utima wavo] kovina viespiritu.”​—VA ROMA 8:5.

OVISUNGO: 45, 36

1, 2. Momo lie Akristão olombuavekua vi tiamisila utima wavo kukanda wa Va Roma ocipama 8?

CITAVA okuti vokuenda kuotembo Yocipito Conjivaluko yolofa via Yesu, wa tanga ukanda wa Va Roma 8:15-17. Ovinimbu viaco vi lekisa ndomo Akristão olombuavekua va pondola oku kũlĩha elavoko liavo lioku kala kilu otembo ka yi pui. Ukanda wa Va Roma 8:1 u tenda olombuavekua okuti, omanu “vana va kasi vomunga kumue la Kristu.” Anga hẽ ukanda wa va Roma ocipama 8 u tiamisiwila lika kolombuavekua? Ale u pondolavo oku kuatisa omanu vana va kuete elavoko lioku kala palo posi otembo ka yi pui?

2 Ukanda wa va Roma kocipama 8 u tiamisiwila vali calua kolombuavekua. Ovo va tambula “Espiritu” okuti, va “lavoka oku tendiwa ndomãla, loku yovuiwa katimba [avo ositu] omo liocisembi.” (Va Roma 8:23) Kovaso yoloneke, va ka kala omãla va Suku kilu. Yehova wa ecela akandu avo lekuatiso liocisembi. Eye  wa va tenda okuti vakuesunga oco va kale omãla vaye.—Va Roma 3:23-26; 4:25; 8:30.

3. Momo lie omanu vana va kuete elavoko lioku kala palo posi otembo ka yi pui va sukilavo oku lilongisa ukanda wa Va Roma ocipama 8?

3 Kefetikilo liukanda wa Va Roma, Paulu wa soneha eci catiamẽla kulume umue okuti ka kalele ombuavekua pole, wa kala ukuesunga kovaso a Yehova. Ulume waco Avirahama. Ulume waco ukuekolelo, wa kala komuenyo osimbu Yesu ka ecele omuenyo waye ndocisembi. (Tanga Va Roma 4:20-22.) Koloneke vilo, Yehova o pondolavo oku tenda Akristão vana vakuekolelo okuti, olondigesunga kuenda va kuete elavoko lioku kala palo posi otembo ka yi pui. Ovo va pondolavo, oku kuatisiwa lelungulo li sangiwa vukanda wa Va Roma ocipama 8.

4. Eci tu tanga ukanda wa Va Roma 8:21, nye tu sukila oku lipula?

4 Kukanda wa Va Roma 8:21, tu sangako ohuminyo ya Yehova yatiamẽla koluali luaye luokaliye okuti omanu va ka yovuiwa kekandu kuenda kolofa. Ocinimbu caco ci lekisa okuti, omanu va ka “kuata eyovo liulamba womãla va Suku.” Anga hẽ o pondola oku sokolola ekalo liove voluali luokaliye? Tu lilongisi eci tu sukila oku linga oco tu ka kale voluali luaco.

OKU “TIAMISILA UTIMA KOVINA VIETIMBA”

5. Nye Paulu a lombolola vukanda wa Va Roma 8:4-13?

5 Tanga Va Roma 8:4-13. Vukanda wa Va Roma kocipama cecelãla, Paulu wa lombolola ovimunga vivali viomanu va litepa, vana va ‘tiamisila utima kovina vietimba’ kuenda  vana va ‘tiamisila utima kovina vi pamisa ekolelo.’ Omanu vamue va sima okuti, Paulu wa kala oku tiamisila olondaka viaco komanu vana okuti Hakristãoko kuenda vana va kala Akristão. Pole, kocinimbu eci Paulu wa kala oku sonehela Akristão vana ‘va tukuiwa okuti olosandu.’ (Va Roma 1:7) Cikale vana va “tiamisila utima kovina vietimba” kuenda vana va ‘tiamisila utima kovina vi pamisa ekolelo,’ vosi yavo va kala Akristão. Etepiso lipi lia kala pokati kavo?

6, 7. (a) Ondaka “etimba” Vembimbiliya yi lomboloka nye? (b) Ondaka yokuti “etimba” ya tukuiwa ndati kukanda wa Va Roma 8:4-13?

6 Eci Embimbiliya li tukula ondaka “etimba,” yi tiamisila ondaka yaco kovina vialua. Olonjanja vimue ci lomboloka ositu yetimba lietu. (Va Roma 2:28; 1 Va Korindo 15:39, 50) Li tiamisiwilavo kukamba u sangiwa pokati kepata limue. Embimbiliya li lekisa okuti, Yesu “wa citiwa ndomunu kocitumbulukila ca Daviti” kuenda Paulu wa tenda va Yudea hati, ‘vangandiaye ketimba.’—Va Roma 1:3; 9:3.

7 Nye Paulu a yonguile oku popia catiamẽla komanu vana va ‘tiamisila utima kovina vietimba,’ ndomo ca lekisiwa kukanda wa Va Roma 8:4-13? Oco tu sange etambululo tu sukila oku tanga ukanda wa Va Roma 7:5. Vukanda waco Paulu wa soneha ndoco: “Eci tua endaile loloñeyi vietimba, olonjongole vĩvi via situluiwa Locihandeleko via talavayele vatimba.” Paulu wa kala oku lombolola okuti omanu vana va ‘tiamisila utima kovina vietimba,’ va lomboloka omanu vana va tiamisila utima wavo kolonjongole viavo ka via sungulukile, haivo va linga ovina va yongola.

8. Momo lie Paulu a sukilile oku lungula Akristão olombuavekua koku ‘tiamisila utima kovina vietimba’?

 8 Momo lie Paulu a lunguila Akristão olombuavekua oco va yuvule oku ‘tiamisila utima kovina vietimba’? Momo lie Akristão koloneke vilo va sukilila elungulo liaco? Momo afendeli vosi vakuekolelo va Suku, va pondola oku tiamisila utima wavo kolonjongole ka via sungulukile. Paulu wa soneha okuti, vamanji vamue kolupale luo Roma va kala “apika voloñeyi vĩvi viatimba avo.” Kocinimbu eci, eye wa kala oku lekisa okuti onjongole yoku litokeka kuomanu va likuele, okulia ale olonjongole vikuavo, via kala ovina via velapo komuenyo wavo. (Va Roma 16:17, 18; Va Filipoi 3:18, 19; Yuda 4, 8, 12) Vokuenda kuotembo, kua kala ocitangi cimue vekongelo lio ko Korindo cokuti, manji umue wa linga evĩho liukahonga “lukãi wa isiaye.” (1 Va Korindo 5:1) Ocili okuti, Akristão vatete va sukilile elungulo liatiamẽla koku ‘tiamisila utima kovina vietimba.’—Va Roma 8:5, 6.

9. Nye Ukanda wa Va Roma 8:6 ka u lombolola?

9 Koloneke vilo tu pondolavo oku kapako elungulo liaco. Ndaño omunu umue o kasi oku fendela Yehova vokuenda kuanyamo alua, o pondolavo oku ‘tiamisila utima kovina vietimba.’ Anga hẽ Paulu wa kala oku popia okuti tu sukila oku yuvula oku kuata ovisimĩlo viatimẽla kovina vimue ndeci, o kulia, upange, olomapalo ale oku namulala? Sio. Momo ovina viaco vi panga onepa kekalo liomuenyo. Yesu wa solelevo oku lia kuenda wa tekulavo omanu vakuavo. Eye wa limbukavo okuti, wa sukilile oku puyuka. Paulu wa soneha okuti, volowuela oku litokeka kuomanu va likuele ci kuete esilivilo lialua.

Ovina tu sapela vi situlula nye? (Tala ocinimbu  10, 11)

10. Ondaka ‘oku tiamisila utima’ yi lomboloka nye?

10 Nye Paulu a yonguile oku popia lolondaka “oku tiamisila utima”? Ondaka yo Helasi Paulu a tukula yi tiamisiwila kovisimĩlo vietu kuenda kovina viosi tu yongola oku linga. Onoño yimue ya lombolola okuti ondaka oku tiamisila utima “olonjanja vialua yi tiamisiwila komanu vana va vangula calua catiamẽla kondaka yaco” okuti, va tiamisila calua utima wavo kolonjongole viavo ka via sungulukile. Omanu vaco, va siata oku ecelela okuti olonjongole viaco vi linga ovina via velapo komuenyo wavo.

Ovina vipi tua velisapo komuenyo wetu?

11. Ovina vipi vi pondola oku kala ndu okuti via velapo kokuetu?

11 Akristão vo ko Roma, va sukilile oku likonomuisa ovo muẽle kuenda oku limbuka ovina va tiamisilile utima wavo. Anga hẽ via kala ‘ovina vioketimba’? Koloneke vilo, tu sukilavo oku kũlĩhĩsa ovina vi kuete esilivilo lialua komuenyo wetu. Ovina vipi tu sole oku sapela? Nye tu sole oku linga? Omanu vamue va limbuka okuti, va sole oku sokolola calua catiamẽla koku seteka oku nyua ovinyu ya li tepa, oku posuisa onjo yavo, oku landa uwalo wokaliye, oku talavaya lolombongo ale oku linga esokiyo lioku linga ovongende. Ka cĩviko oku linga ovina viaco. Momo ovina viaco vi panga onepa kekalo liomuenyo. Yesu wa eca ovinyu kocipito cimue cuvala kuenda Paulu wa vetiya Timoteo oco a nyuepo “okavinyu” omo liuveyi a kuatele. (1 Timoteo 5:23; Yoano 2:3-11) Pole, ovinyu hayoko va  velisilepo komueyo wavo. Nye ci popiwa catiamẽla kokuetu? Ovina vipi tua velisapo komuenyo wetu?

12, 13. Momo lie tu sikilila oku lunguka lovina tua tiamisila utima?

12 Paulu wa lungula hati: “Oku tiamisila utima ketimba ci lomboloka oku fa.” (Va Roma 8:6) Nye a yonguile oku popia? Eye wa yonguile oku popia okuti, nda tu “tiamisila utima kovina vietimba,” ka tu kuata ukamba uwa la Yehova cilo kuenda ka tu ka kuata omuenyo kovaso yoloneke. Pole, ka tu yongola okuti ovina viaco vi pita letu. Omunu umue o pondola oku linga apongoloko komuenyo waye. Ivaluka hẽ ulume wa linga evĩho liukahonga ko Korindo okuti, wa tundisiwile vekongelo? Eye wa linga apongoloko komuenyo waye kuenda wa liwekapo oku kuata oloñeyi ka via sungulukile. Kuenje wa fetika vali oku fendela Yehova lutima wa yela.—2 Va Korindo 2:6-8.

13 Ulume waco wa kala ongangu yimue yoku “tiamisila utima kovina vietimba” pole, ndaño locitangi caco wa linga apongoloko komuenyo waye. Omo liaco, nda Ukristão umue koloneke vilo, o fetika oku kuata oloñeyi ka via sungulukile okuti ka kapiko vali olonumbi via Yehova citava okuti, o lingavo apongoloko. Oku ivaluka elungulo lia Paulu, ci pondola oku tu vetiya oku linga apongoloko a sukiliwa komuenyo wetu.

‘OKU TIAMISILA UTIMA KOVINA VI PAMISA EKOLELO’

14, 15. (a) Paulu o tu vetiya oku tiamisila utima wetu kovina vipi? (b) Nye ka ci lomboloka oku ‘tiamisila utima kovina vi pamisa ekolelo’?

14 Noke lioku popia ohele iyilila koku “tiamisila utima kovina vietimba” Paulu wa lombolola ndoco: Oku ‘tiamisila utima kovina vi pamisa ekolelo, ci lomboloka omuenyo kuenda ombembua.’ Ocili okuti, esumũlũho limue lia velapo tu pondola oku kuata!

15 Pole, oku ‘tiamisila utima kovina vi pamisa ekolelo,’ ka ci lomboloka okuti omunu ka popi ovina viatiamẽla komuenyo. Ka ci lombolokavo okuti omunu waco o vangula lika ovina viatiamẽla ku Yehova ale Kembimbiliya. Afendeli va Suku kocita catete va ambatele omuenyo umue wa pita pokati. Ovo va solele oku lia, oku nyua, oku kuela, oku tekula epata kuenda oku talavaya.​—Marko 6:3; 1 Va Tesalonike 2:9.

Oku fendela Suku oco ca kala ocina ca velapo komuenyo wa Paulu

16. Ocina cipi Paulu a velisilepo vali komuenyo waye?

16 Paulu kuenda Akristão vakuavo vo kocita catete ka va ecelele okuti, ovina via tukuiwa vi kala ovina via velapo komuenyo wavo. Tua kũlĩha okuti, oco Paulu a sande onjila yoku litekula, wa enda oku tunga olombalaka. Pole, ka ecelele okuti upange waye u kala ocina cimue ca velapo komuenyo waye. Oku fendela Suku oco ca kala ocina ca velapo komuenyo waye. Momo, Paulu wa tiamisilile utima waye koku kunda kuenda kupange woku longisa omanu. (Tanga Ovilinga 18:2-4; 20:20, 21, 34, 35.) Vamanji vo ko Roma va sukilile oku setukula ongangu ya Paulu, omo liaco, tu sukilavo oku ci linga.—​Va Roma 15:15, 16.

17. Onima yipi tu kuata nda tua ‘tiamisila utima kovina vi pamisa ekolelo’?

17 Nye tu lavoka nda tua tiamisila utima wetu koku fendela Yehova? Ukanda wa Va Roma 8:6, u lekisa okuti: ‘Oku tiamisila utima  kovina vi pamisa ekolelo ci lomboloka omuenyo kuenda ombembua.’ Voku ci linga, mua kongela oku ecelela okuti, utima wetu u songuiwa lespiritu lia Yehova kuenda oku kuata ovisimĩlo ndevi viaye. Yehova wa li kuminya oku tu ĩha omuenyo umue wesanju cilo kuenda omuenyo ko pui kovaso yoloneke.

Tu eca olopandu ku Yehova momo tu kuete ombembua yo vutima

18. Tu pondola oku kuata ndati ombembua poku ‘tiamisila utima kovina vi pamisa ekolelo’?

18 Nye Paulu a yonguile oku popia poku lombolola okuti ‘oku tiamisila utima kovina vi pamisa ekolelo’ ci tu nenẽla ombembua? Ocili okuti, omanu vosi va yongola oku kuata ombembua, ca piãla enene ombembua yo vutima, pole, havosiko va kuete ombembua yaco. Tu eca olopandu ku Yehova, momo tu kuete ombembua yo vutima. Tu pondolavo oku kuata ombembua vepata lietu kuenda la vamanji vekongelo. Omo okuti, ka tua li puile, olonjanja vimue tu ka kuata ovitangi la vamanjetu. Eci tu liyaka locitangi caco, tu sukila oku kapako elungulo lia Yesu wa popia hati: “Tete ka lisunguluise la manjove.” (Mateo 5:24) Ivaluka okuti manjove o fendelavo Yehova, “Suku una eca eca ombembua.”​—Va Roma 15:33; 16:20.

19. Ombembua yipi tu pondola oku kuata?

19 Nda tua ‘tiamisila utima kovina vi pamisa ekolelo’ tu ka kuatavo ombembua la Suku. Uprofeto Isaya wa soneha ndoco: “Ove [a Yehova] o tumalaisa lombembua yocili utima wu wa ku kolela, momo wa ku kolela.”​—Isaya 26:3; tanga Va Roma 5:1.

20. Momo lie tua sanjukilila elungulo li sangiwa kukanda wa Va Roma kocipama 8?

20 Cikale okuti tu kuete elavoko lioku enda kilu ale tu kuete elavoko lioku kala palo posi, vosi yetu tu pondola oku kuatisiwa lolondaka vi sangiwa vukanda wa Va Roma kocipama 8. Tu eca olopandu omo okuti Embimbiliya li tu vetiya oku tiamisila utima wetu koku fendela Yehova okuti kolonjongole vietu ci sule. Tua kũlĩha okuti, oku ‘tiamisila utima kovina vi pamisa ekolelo’ ci ka tu kuatisa oku kuata esumũlũho lia velapo. Omo liaco, Paulu wa soneha ndoco: “Ongavelo ya eciwa la Suku omuenyo ko pui vu Kristu Yesu Ñala yetu.”​—Va Roma 6:23.