Skip to content

Skip to table of contents

Olombangi Via Yehova

Select language Umbundu

 ULANDU WOMUENYO

Nda Linga “Lomanu Vosi Ndukuavina Viosi”

Nda Linga “Lomanu Vosi Ndukuavina Viosi”

“Nda wa papatisiwa tu linyãla!” Evi ovio olondaka isia yange a saluisa lavio ina yange kunyamo wo 1941. Ndaño lolondaka viaco, ina yange wa nõlapo oku papatisiwa. Omo liaco, isia yange wa nõlapo oku liyãla. Kotembo yaco nda kuata lika anyamo ecelãla.

OSIMBU isia yange ka linyãlele la ina yange, nda lekisile ale onjongole yoku lilongisa ocili Cembimbiliya. Ina yange wa enda oku tambula alivulu a lombolola ocili Cembimbiliya kuenje nda fetika oku a sola. Nda solele calua oviluvialuvia vi sangiwa valivulu aco. Isia yange ka yonguile okuti ina yange o ndi longisa ovina a kala oku lilongisa. Pole, omo okuti nda kuatele onjongole yoku lilongisa, nda linga apulilo alua, kuenje ina yange wa enda oku ndi longisa osimbu isia yange ka kasi konjo. Omo liaco, nda nõlapo oku tumbika omuenyo wange ku Yehova. Nda papatisiwa volupale luo Blackpool, kofeka yo Inglaterra kunyamo wo 1943 eci nda kuata ekũi kanyamo.

NDA FETIKA OKU FENDELA YEHOVA

Oku upisa kotembo yaco toke cilo, ame kumue la ina yange tu kasi oku amamako lupange woku kunda. Kotembo yaco, tua enda oku kunda lekuatiso liongalamafone. Ovio via kala  vinene kuenda via lemẽle calua okuti via kuata olokilu vikuãla lomeyu. Sokolola umalẽhe umue utito oku ambata ongalamafone yaco!

Kotembo yaco nda kuata eci ci soka 14 kanyamo, pole, nda yonguile oku kala ukundi wotembo yosi. Ina yange wa ndi sapuila okuti catete nda sukilile oku sapela lukulu ukuakunyula akongelo okuti kotembo yaco va enda oku tukuiwa hati, (servo aos irmãos). Noke yoku sapela laye manji wa ndi vetiya oku lilongisa uloño umue oco u ndi kuatise kupange waco. Kuenje nda tava. Noke yoku talavaya anyamo avali nda sapela lukulu ukuavo ukuakunyula akongelo catiamẽla kupange waco. Eye wa popia hati, “Litumbika kupange waco!”

Kosãi ya Kupupu yunyamo wo 1949, ame kumue la ina yange tua landisa ovikuata tua kuatele kuenda tua ilukila vimbo luo Middleton, ocipepi lolupale luo Manchester, kuna nda fetika upange wakundi votembo yosi. Noke, liolosãi vikuãla nda nõla manji umue oco tu lingile kumosi upange waco. O Betele ya pinga kokuetu oco tu ilukile vekongelo limue liokaliye kolupale luo Irlam. Ina yange wa kala ukundi wotembo yosi kumue lamanji ukuavo ukãi vekongelo likuavo.

Kotembo yaco nda kuata eci ci soka 17 kanyamo, pole, ame kumue lamanji tua kala oku lingila kumosi upange waco tua tambula ocikele coku songola olohongele momo vekongelo liaco liokaliye mua kala lika vamanji vatito va loñoloha. Noke nda ilukila vekongelo lio Buxton kuna kua kala etendelo litito liakundi kuenda va sukilile ekuatiso. Ovolandu aco a ndi kuatisa oku lipongiyila oku tambula ovikele vikuavo.

Poku linga esapulo liohundo yowiñi la vamanji vakuavo ko Rochester, kolupale luo Nova Yorke, kunyamo wo 1953

Kunyamo wo 1951, nda lisonehĩsa kosikola Yembimbiliya yo Gileada. Noke kosãi ya Cembanima, yunyamo wo 1952, nda lalekiwa oco ndi pange onepa kupange usualali. Pole, sia tavele oku litumbika kupange waco momo, nda kala ukundi wotembo yosi, pole ombonge ka ya tavele kepingilo liange, omo liaco nda kapiwa vokayike kuenje nda kalamo olosãi epandu. Osimbu nda kala vokayike nda tambula elaleko lioku enda kocisoko 22 kosikola yo Gileada. Kosãi Yevambi Linene yunyamo wo 1953, noke lioku tunda vokayike nda linga ungende locimbaluku ci tukuiwa hati, Georgic oco tu ende ko lupale luo Nova Yorke.

Noke lioku pitĩla ko lupale luaco, kunyamo wo 1953 nda endele kohongele losapi hati: Assembléia da Sociedade do Novo Mundo. Noke nda linga ungende lomboyo volupale luo South Lansing ko Nova Yorke kuna kua kala osikola yaco. Eci nda tunda vokayike sia kuatele olombongo. Eci nda loka vomboyo, nda londa vokalela ka kala oku enda volupale luo South Lansing, pole,  nda sukilile oku levala olombongo vimue oco ndi feteleko omunu nda kala oku lingila kumosi ungende.

OCIKELE VOFEKA YIKUAVO

Kosikola yo Gileada tua pindisiwa lonjila yimue okuti tu “linga lomanu vosi ndukuavina viosi.” (1 Va Korindo 9:22) Manji Paul Bruun, Raymond Leach kumue lame tua tumiwa kofeka yo Filipina pole, tua sukilile oku kevelela olosãi vialua oco tu kuate ukanda wuvangi woku iñila vofeka yaco. Noke tua linga ungende locimbaluku oco tu ende volupale luo Rotterdam, kofeka yo Holanda. Noke tua pita vokalunga ko Mediterrâneo, Volui Suez kuenda ko Oceano Indico kofeka yo Malásia kuenda kofeka yo Hong Kong. Eci pa pita 47 koloneke, tua pitĩla volupale luo Manila keteke 19 kosãi ya Kuvala yunyamo wo 1954.

Ame kumue la manji Raymond Leach tua linga ungende vokuenda kueci ci soka 47 koloneke oku enda kolupale luo Filipina oco tu tẽlise ocikele tua tambula coku kala olomisionaliu

Kofeka yaco, tua sukilile oku kũlĩha ovituwa viokaliye, ofeka yokaliye kuenda oku lilongisa elimi liokaliye. Pole kefetikilo, katatu ketu, tua tumiwa vekongelo limue Kolupale luo Quezon muna muli omanu valua va vangula elimi Liongelesi. Eci pa pita olosãi epandu, tua kũlĩhĩle lika olondaka vimue kelimi lio Tagalog. Noke tua tambula ocikele ca pongolola ovina viosi.

Eteke limue kosãi ya Kupemba kunyamo wo 1955, eci tua tiuka kupange woku kunda, manji Leach kumue lame tua sanga ovikanda via lekisa okuti tua tambula ocikele coku nyula akongelo. Nda kuatele lika ci soka 22 kanyamo, kuenda vocikele caco nda sukilile oku lilongisa olonjila viokaliye vioku “linga lomanu vosi ndukuavina viosi.”

Poku linga ohundo yowiñi kohongele yimbo kelimi lio Bicol

Eci nda fetika upange woku nyula akongelo nda linga ohundo yange yatete voluayela vimbo limue ocipepi lonjo yimue yolomĩlu. Kotembo yaco, kofeka yo Filipina olohundo viowiñi via enda oku lingiwa volokololo! Omo okuti, nda nyula akongelo alitepa, olonjanja vimue ndaenda oku lingila olohundo viange volonjago, kovitanda, kolonjo vimue vinene, kocila coku imba o basquete, vo loparke, kuenda olonjanja vialua volokolololo violupale. Eci tua kala volupale luo San Pablo, sia lingile ohundo yange kocitanda omo okuti kua kala ombela yalua. Nda sapela la vamanji vakuatele ocikele coku songola oco ohundo yaco yi lingiwe  Vonjango Yusoma. Noke, vamanji vaco va pula nda citava oku linga esapulo liokuti ku lingiwa ohundo yowiñi, momo ka yi lingiwa voluayela!

Olonjanja viosi ndaenda oku sikĩla kolonjo via vamanji. Ndaño okuti olonjo via kala vitito pole, via enda oku yelisiwa ciwa. Olonjanja vimue nda enda oku lala vevinda limue posi. Ocitumãlo coku yuila ca kala posamua, okuti omanu vosi va ponduile oku ndi mola, omo liaco, nda kuata utate poku yua. Nda linga ungende lokalela kuenda olonjanja vimue nda enda oku linga ungende locimbaluku oco ngende vovifuka vikuavo. Vokuenda kuanyamo wupange waco, sia la kuata ekãlu.

Nda lilongisa oku vangula elimi lio Tagalog, ndaño sia pitile kosikola yoku lilongisa elimi liaco. Nda ci linga poku yevelela vamanji kupange woku kunda kuenda kolohongele. Vamanji va yonguile oku ndi longisa, kuenje ngeca olopandu omo liepandi va lekisa kuenda ndomo va kala vakuacili poku ndi pandiya.

Vokuenda kuotembo nda linga apongoloko alua omo liovikele viokaliye. Kunyamo wo 1956, eci manji Nathan Knorr a tu nyula tua kuata ohongele yimue yofeka. Nda tambula ocikele coku talavaya lovingungu viasapulo. Sia telẽle oku linga upange waco, pole, vamanji vakuavo va ndongisa ndomo nda ponduile oku ci linga. Noke liolosãi vimue, tua kuata ohongele yikuavo yofeka, kuenje ame nda kala usongui yohongele yaco. Manji Frederick Franz wa tunda kombala yinene, weyile oku tu  nyula kuenje nda lilongisa ovina vialua laye. Eci manji Franz a linga ohundo yowiñi, wa wala uwalo wofeka yo ko Filipina u tukuiwa hati, barong Tagalog. Eci ca sanjuisa calua vamanji va kala kohongele yaco, kuenje ca ndongisa oku kũlĩha ovituwa viomanu.

Nda sukilile oku linga vali apangoloko akuavo eci nda tambula ocikele coku kala omitavaso ya vakuakunyula akongelo vofeka. Kotembo yaco tua lekisa ofilme losapi hati, A Felicidade da Sociedade do Novo Mundo. Olonjanja vialua tua enda oku lekisa ofilme yaco volokololo, pole ovipuka via enda oku tu sakalaisa. Ocinyi comakina ca enda oku vetiya ovipuka oku kala komakina yaco. Tua kuata upange walua poku yelisa ocitumãlo caco! Ka ca lelukile oku sokiya ovipito viaco, pole, tua kuata esanju poku mola omanu oku iya oco va lilongise eci catiamẽla kocisoko ca Yehova voluali luosi.

Olopatele vietavo Liokatolika kovitumãlo vimue va enda oku vetiya olombiali oco va tateke olohongele vietu vimbo. Omo liaco, oco va tu tateke oku yevelela manji o kasi oku linga ohundo, va enda oku sika ongunga, olonjanja viosi tua enda oku linga olohongele ocipepi lolonembele viavo. Ndaño latateko aco, omanu va amamako oku lilongisa ocili Cembimbiliya kuenje valua pokati kavo va kasi oku fendela Yehova.

OVIKELE VIOKALIYE LAPONGOLOKO ALUA

Kunyamo wo 1959, nda lalekiwa oku talavaya ko Betele. Nda lilongisa oku linga ovopange amue ko Betele. Noke liotembo yimue nda tumiwa kolofeka vikuavo oco ndi nyule Olobetele. Kovongende aco, nda kũlĩha manji umue ukãi o misionalia o tukuiwa hati, Janet Dumond kofeka yo Tailândia. Tua enda oku li sonehela ovikanda, noke tua likuela. Vokuenda kueci ci soka 51 kanyamo tua kuata esanju lialua lioku fendela Yehova kumosi.

Lukãi wange Janet, eci tua kala kocifuka cimue kofeka yo Filipina

Nda sola calua oku nyula afendeli va Yehova va sangiwa kueci ci soka 33 kolofeka. Ndi kuete esanju lialua omo okuti, ovikele nda kuatele via ndi kuatisa oku kũlĩha ovituwa  viomanu va sangiwa kolofeka via litepa! Apasu aco a ndi kuatisa oku limbuka okuti Yehova o sole omanu vosi.—Ovilinga 10:34, 35.

Tu kuete esanju lialua momo etendelo Liolombangi Via Yehova li kasi oku livokiya

TU KASI OKU AMAMAKO OKU LINGA APONGOLOKO

Ame kumue lukãi wange Janet tua kuata esanju lialua oku talavayela kumosi la vamanji kofefa yo ko Filipina, kuenje tu kasi oku amamako oku talavaya ko Betele Yolupale luo Quezon. Tunde eci nda fetika oku talavaya kolupale luaco, pa pita ale 60 kanyamo kuenda etendelo liakundi lia livokiya calua. Ndaño pa pita ale anyamo alua, ndi sukila oku lipongiya kapongoloko Yehova a laika oku linga. Omo liapongoloko a lingiwa vocisoko vanyamo a sulako, tua siata oku lekisa ombili yoku linga apongoloko.

Tua kolela okuti tu ka amamako oku linga upange woku kunda

Tua siata oku likolisilako oco tu kuame olonumbi via Yehova, kuenje ovina viaco via siata oku tu nenẽla esanju lialua komuenyo. Tua sukililevo oku linga apongoloko amue oco tu kuatise ciwa vamanjetu. Omo liaco, olonjanja viosi Yehova a tu pinga oku linga upange waye, tu nõlapo oku “linga lomanu vosi ndukuavina viosi.”

Tu kasi oku amamako oku talavaya ko Betele Kolupale luo Quezon