Skip to content

Skip to table of contents

Olombangi Via Yehova

Select language Umbundu

Ecelela Okuti Ovihandeleko Kuenda Olonumbi Via Suku vi Pindisa Owanji Wutima Wove

Ecelela Okuti Ovihandeleko Kuenda Olonumbi Via Suku vi Pindisa Owanji Wutima Wove

“Ndukuakusokolola ovisila viove.”—OSAMO 119:99.

OVISUNGO: 127, 88

1. Ocina cipi ci lekisa okuti etu tua velapo ovinyama?

YEHOVA wa eca komanu ocina cimue ci likasi. Ocina caco owanji wutima wetu. Owanji wutima owo u lekisa okuti etu tua velapo ovinyama. Tua kũlĩha ndati okuti Adama la Eva va kuatele owanji wovutima? Noke lioku sinĩla Suku, ovo va li salamisa kovaso aye. Momo lie? Momo owanji wavo wutima wa va vetela evelo.

2. Owanji wutima wetu u sokisiwa ndati lombusula? (Tala ociluvialuvia kefetikilo liocipama.)

2 Owanji wetu wutima, olondunge vioku tepisa pokati keci ciwa leci cĩvi kuenda u songuila omuenyo wetu. Omunu una okuti owanji wutima waye ka wa pindisiwile ciwa, o sokisiwa lonaviyu yimue okuti ombusula yaco ya nyõleha. Ofela lakimba, vi pondola oku kokela onaviyu yaco konele yina okuti hakoko ya loña. Pole, ombusula yina okuti yi talavaya ciwa, yi pondola oku kuatisa ukuakuendisa onaviyu oku enda oku a loña. Cimuamue haico okuti, nda tua pindisa ciwa owanji wutima wetu, owo u ka tu songuila ciwa.

3. Nda ka tua pindisile ciwa owanji wutima wetu nye ci pondola oku pita letu?

 3 Nda owanji wutima wetu ka wa pindisiwile ciwa, owo ka u pondola vali oku tu lungula koku linga eci cĩvi. (1 Timoteo 4:1, 2) Pamue owo u tu vetiya oku sima okuti, ‘cĩvi oco ciwa.’ (Isaya 5:20) Yesu wa sapuila olondonge viaye hati: “Owola yiya eci umue a vu pondi loku sima okuti o kasi oku linga upange u kola wa Suku.” (Yoano 16:2) Vana va ponda Stefano oco va kalavo oku sima. (Ovilinga 6:8, 12; 7:54-60) Ovolandu a lekisa okuti, omanu vakuatavo esanda va siata oku linga ovina vialua vĩvi, ndeci oku ponda kuenje va popia okuti va ci lingila Suku. Pole, ovina va siata oku linga ka vi likuata lovihandeleko via Suku. (Etundilo 20:13) Ocili okuti, owanji wutima wavo ka u koleliwa!

4. Tu kũlĩha ndati okuti owanji wutima wetu u kasi oku talavaya ciwa?

4 Oco hẽ tu kũlĩha ndati okuti owanji wutima wetu u kasi oku talavaya ciwa? Ovihandeleko kuenda olonumbi Viembimbiliya “vi silivila koku tu longisa, koku tu pisa, koku suñamisa ovina loku tu pindisila vesunga.” (2 Timoteo 3:16) Tu sukila oku lilongisa Embimbiliya eteke leteke, loku sokolola lutate kueci olio li popia kuenda oku ci kapako komuenyo wetu. Poku ci linga, tu kuata ovisimĩlo ndevi via Yehova. Kuenje tu kolela okuti owanji wutima wetu u kasi oku tu songuila ciwa. Cilo, tu konomuisa ndomo ovihandeleko kuenda olonumbi via Yehova vi pondola oku pindisa owanji wutima wetu.

ECELELA OKU PINDISIWA LOVIHANDELEKO VIA SUKU

5, 6. Ovihandeleko via Suku vi tu kuatisa ndati?

5 Nda tu yongola okuti ovihandeleko via Suku vi tu kuatisa, ka tu sukila lika oku vi tanga ale oku vi kũlĩha. Tu sukila oku vi sola kuenda oku vi sumbila. Embimbiliya li tu sapuila hati: “Suvuki evĩho, soli esunga.” (Amosi 5:15) Pole, tu pondola oku ci linga ndati? Tu sukila oku lilongisa oku kuata ovisimĩlo ndevi via Yehova. Kũlĩhĩsa ocindekaise eci. Sokolola ndu okuti ku kasi oku pekela ciwa kuenje ndotolo umue o ku sapuila hati, o sukila oku litekula lokulia ku nena uhayele, oku pindisa etimba kuenda oku linga apongoloko amue vomuenyo wove. Ove o kuama olonumbi viaye kuenje ci ku kuatisa! Nye o sima catiamẽla konumbi ya ndotolo?

6 Cimuamue haico okuti, Ululiki wetu wa siata oku tu ĩha ovihandeleko vi tu teyuila kovina vĩvi vi tunda kekandu kuenda oku mioñolola omuenyo wetu. Ndeci, Embimbiliya li tu longisa okuti tu sukila oku yuvula oku kemba, elimbi, oku nyana, evĩho liukahonga, ungangala, ale ovina viosi viatiamẽla kolondele. (Tanga Olosapo 6:16-19; Esituluilo 21:8) Eci tu mola onima yi tunda koku pokola ku Yehova, ocisola tu u kuetele kuenda ocisola tu kuetele ovihandeleko viaye, vi livokiya.

7. Ovolandu a lomboluiwa Vembimbiliya a tu kuatisa ndati?

7 Ka tu sukila oku seteka oku tala ohali omo lioku lueya ovihandeleko via Suku oco tu limbuke eci ciwa leci cĩvi. Tu pondola oku lilongisila kakulueya a lingiwa lomanu vakuavo kosimbu. Ovolandu aco a sangiwa Vembimbiliya. Kelivulu Liolosapo 1:5 ku popia hati: “Ukualondunge layevo o tẽla oku yeva loku amamako kukũlĩhiso.” Ukũlĩhiso u tunda ku Suku, owo ukũlĩhiso wa velapo! Sokolola ndomo Daviti a kuata ovitangi  noke lioku sinĩla Yehova kuenda oku linga evĩho liukahonga la Batisieva. (2 Samuele 12:7-14) Eci o tanga ulandu waco, lipula ndoco: ‘Daviti nda wa yuvula ndati ovitangi viaco? Nye ame nda nda linga, nda ocitangi caco ca pitile lame? Nda nda setekiwile oku linga evĩho liukahonga nda nda setukula Daviti, ale nda nda linga nda Yosefe? (Efetikilo 39:11-15) Nda tua sokolola lutate ovitangi vi yilila kekandu, olonjanja viosi tu ka ‘suvuka evĩho.’

8, 9. (a) Owanji wutima wetu u tu kuatisa oku linga nye? (b) Olonumbi via Yehova vi kuatisa ndati owanji wutima wetu?

8 Etu tu sukila oku yuvula ovina Suku a nyale. Nye ci lingiwa nda tu kasi oku liyaka locitangi cimue okuti ka kuli onumbi layimue ya tukuiwa Vembimbiliya? Tu kũlĩha ndati ovina Suku a yongola okuti ovio tu linga? Nda tua ecelela okuti Embimbiliya li pindisa owanji wutima wetu, tu ka lekisa olondunge poku nõla onjila tu kuama.

9 Omo okuti Yehova o tu sole, wa siata oku tu ĩha olonumbi vi songuila owanji wutima wetu. Eye wa popia hati: “Ame ndi Yehova Suku yove, hu longisa eci cu ku kuatisa, hu songuila vonjila ya ku sungulukila.” (Isaya 48:17, 18) Eci tu sokolola lutate catiamẽla kolonumbi Viembimbiliya loku ecelela okuti ovio vi vetiya utima wetu, tu pondola oku pengulula kuenda oku linga apongoloko kowanji wutima wetu. Kuenje  eci ci tu kuatisa oku lekisa olondunge poku nõla onjila tu kuama.

ECELELA OKUTI OLONUMBI VIA SUKU VI KU SONGUILA

10. Onumbi yi lomboloka nye, kuenda Yesu wa tukula ndati olonumbi poku longisa?

10 Ondaka onumbi, yi lomboloka elongiso lia velapo li songuila ovisimĩlo vietu okuti, yi tu kuatisa oku nõla onjila ya sunguluka. Oku kũlĩha olonumbi via Yehova ci tu kuatisa oku limbuka ovisimĩlo viaye loku kũlĩha esunga lieci a tu ĩhila ovihandeleko vimue. Yesu wa tukula olonumbi oco a longise olondonge viaye okuti, kovituwa kuenda kovilinga kuiyilila onima yimue. Ndeci, eye wa longisa okuti onyeño yi kokela omunu oku linga ungangala kuenda ovisimĩlo vĩvi vi pondola oku tu tuala kukahokolo. (Mateo 5:21, 22, 27, 28) Eci tu ecelela okuti olonumbi via Yehova vi tu songuila, owanji wutima wetu u ka pindisiwa ciwa kuenda tu ka nõla onjila yi sivaya Suku.—1 Va Korindo 10:31.

Ukristão wendamba o sumbila owanji wutima wa vakuavo (Tala ovinimbu 11, 12)

11. Omunu o pondola oku kuata ndati ovisimĩlo via litepa lomunu ukuavo?

11 Ndaño okuti Akristão va pindisa owanji wutima wavo poku tanga Embimbiliya, citava okuti pamue va kuata ovisimĩlo via litepa viatiamẽla koku tetulula ocitangi cimue. Cimue pokati kovitangi viaco, ovinyua vi koluisa. Embimbiliya ka li popi okuti cĩvi oku nyua evi vi koluisa, pole, olio li tu lungula okuti ka citava okuti tu nyua calua ale oku kolua. (Olosapo 20:1; 1 Timoteo 3:8) Omo ka citava okuti Ukristão o nyua calua, anga hẽ ka sukila vali oku kapako ovisimĩlo via vakuavo eci eye a nõla onjila a kuama? Sio, hacoko. Ndaño okuti owanji wutima waye u wecelela oku nyua evi vi koluisa, pole, o sukila oku kapako ovisimĩlo via vakuavo.

12. Olondaka vi sangiwa kelivulu lia Va Roma 14:21 vi tu kuatisa ndati oku sumbila owanji wutima wa vakuetu?

12 Paulu wa lekisa okuti tu sukila oku sumbila owanji wutima wa vakuetu eci eye a soneha hati: “Ka ca sungulukile oku kokela manjove ocilondokua omo lioku lia ositu, oku nyua ovinyu, ale oku linga ocina cikuavo.” (Va Roma 14:21) Ndaño tu kuete omoko yoku nyua ovinyua vi koluisa, tu sukila oku likandangiya nda tua limbuka okuti, oku nyuila ponele Yukristão ukuavo cu kokela ocilondokua. Citava okuti manji umue vekongelo wa kala oholua osimbu ka fetikile oku lilongisa ocili kuenje wa nõlapo oku siapo oku nyua. Etu ka tu yongola oku linga cimue cu kokela oku tiukila kovituwa viaye viosimbu. (1 Va Korindo 6:9, 10) Nda manji yaco weya konjo yetu ndukombe, anga hẽ tu seteka oku u kisika oku nyua evi vi koluisa ndaño okuti eye ka yongola oku ci linga? Sio, ka citava!

Ove hẽ o pondolavo oku likandangiya oco o kuatise vakuene?

13. Timoteo wa sumbilile ndati owanji wutima wa vakuavo oco a va kuatise oku tava olondaka viwa?

13 Eci Timoteo a kala umalẽhe, eye wa tava kovisimĩlo vioku seviwa evamba ndaño okuti ka ca lelukile. Eye wa kũlĩhĩle okuti oku seviwa evamba ca kuatele esilivilo lialua ku va Yudea vana eye a laikele oku kundila. Ndeci ca linga Paulu, Timoteo ka yonguilevo oku sumuisa omunu laumue. (Ovilinga 16:3;  1 Va Korindo 9:19-23) Ove hẽ o pondolavo oku likandangiya oco o kuatise vakuene?

“TU LIKOLISILIKO OKU KALA AKULU VENDAMBA”

14, 15. (a) Tu amamako ndati oku kula kukũlĩhĩso? (b) Akristão vendamba va tata ndati omanu vakuavo?

14 Vosi yetu tu yongola oku “siapo alongiso atete atiamẽla ku Kristu” kuenda oku ‘likolisilako oku kala akulu vendamba.’ (Va Heveru 6:1) Oku kala Akristão vendamba ka ci lomboloka oku kala anyamo alua vocili. Oco omunu a kale ukulu wendamba o sukila oku likolisilako calua. Tu sukila oku amamako oku kula kukũlĩhĩso kuenda kolondunge. Omo liaco, tu sukila oku tanga Embimbiliya eteke leteke. (Osamo 1:1-3) Poku tanga Embimbiliya eteke leteke, o kuata elomboloko lia suapo liovihandeleko via Yehova kuenda violonumbi viaye.

15 Cipi ocihandeleko ca velapo vali Kakristão? Ocihandeleko cocisola. Yesu wa sapuila olondonge viaye hati: “Poku ci linga, vosi va limbuka okuti vulondonge viange—nda wa lisoli pokati.” (Yoano 13:35) Ocisola ci tukuiwa okuti ‘ocihandeleko ca soma’ kuenda “ci tẽlisa ocihandeleko.” (Tiago 2:8; Va Roma 13:10) Ka tu kuete atatahãi okuti ocisola ocituwa cimue ca velapo, momo Embimbiliya li popia okuti, “Suku eye ocisola.” (1 Yoano 4:8) Ku Suku, ocisola ka ci kasi ndocina cimue coku sima ño. Eye o lekisa ocisola caye kovilinga. Yoano wa soneha hati: “Ocisola ca Suku ca situluiwa ndoco kokuetu okuti, Suku wa tuma Omõlaye wongunga voluali okuti tu kuata omuenyo mekonda liaye.” (1 Yoano 4:9) Eci tu lekisa ocisola ku Yehova, ku Yesu, ku vamanjetu kuenda komanu vakuavo, tu lekisa okuti Tuakristão vendamba.—Mateo 22:37-39.

Owanji wutima wetu u pondola oku tu songuila ciwa eci tu kapako olonumbi Viembimbiliya (Tala ocinimbu 16)

16. Osimbu tu kala Akristão vendamba konepa yespiritu, momo lie tu velisilapo calua olonumbi via Suku?

16 Osimbu tu kala Akristão vendamba  konepa yespiritu, tu velisapo calua olonumbi via Suku. Ovihandeleko olonjanja vialua vi kuamiwa lika kolonepa vimue, pole, olonumbi vi kuamiwa volonepa via litepa. Ndeci, omõla umue ka tẽla oku limbuka ohele iyilila koku linga ukamba lomanu vãvi kuenje olonjali viaye vi sukila oku tumbika olonumbi vimue oco vo kuatise. (1 Va Korindo 15:33) Pole, eci omõla a kula eye o lilongisa ndomo a kapako olonumbi Viembimbiliya. Olonumbi viaco vi u kuatisa oku nõla akamba vawa. (Tanga 1 Va Korindo 13:11; 14:20.) Olonjanja viosi eci tu sokolola kolonumbi Viembimbiliya, owanji wutima wetu u pondola oku koleliwa. Tu kuata elomboloko lia suapo lieci Suku a yongola okuti oco tu linga kolonepa viosi.

17. Momo lie tu popela okuti tu kuete ovina vialua tu sukila oco tu nõle lolondunge onjila tu kuama?

17 Tu kuete ovimalẽho vialua tu sukila, oco tu nõle onjila yi sanjuisa Yehova. Vembimbiliya tu sangamo ovihandeleko kuenda olonumbi vi tu kuatisa oku “loñoloha loku liangiliyila upange wosi uwa.” (2 Timoteo 3:16, 17) Olonumbi Viembimbiliya vi tu kuatisa oku kuata elomboloko liovisimĩlo via Yehova. Pole, oku ci linga ci sukila alikolisilo. (Va Efeso 5:17) Oco tu kuatisiwe tu kuete o Índice das Publicações da Torre de Vigia, Elivulu Lioku Konomuisa Liolombangi Via Yehova, o Watchtower Library, o Watchtower ONLINE LIBRARY, kuenda o aplikativo JW Library. Eci tu talavaya lovimalẽho viaco, tu kuatisiwa kelilongiso lietu liopokolika kuenda kefendelo lietu liepata.

OWANJI WUTIMA WA PINDISIWA LEMBIMBILIYA U NENA ASUMŨLŨHO

18. Asumũlũho api tu pondola oku kuata poku kapako ovihandeleko kuenda olonumbi via Yehova vomuenyo wetu?

18 Omuenyo wetu u kala ciwa eci tu kapako ovihandeleko via Yehova kuenda olonumbi viaye! Kosamo 119:97-100 ku popia hati: “Sole cimue ovihandeleko viove. Ndukuaku vi sokolola ño-o eteke liosi. Ovihandeleko viove via muisa olondunge via piãla, evi viovanyali vange vi sule, momo ñasi lavio oloneke viosi. Uvanga ñasi lawo wa piãla, u wovalongisi vange vosi u sule, momo ndukuakusokolola ovisila viove. Vimue ka via lombolokele kovakulu, ame via ndomboloka, momo mokola kalungulo ove.” Eci tu sanda otembo yoku sokolola kovihandeleko kuenda kolonumbi via Suku, kovina viosi tu linga tu lekisa olondunge kuenda ukũlĩhĩso. Kuenje eci tu talavaya ciwa lovihandeleko kuenda olonumbi viaye oco tu pindise owanji wutima wetu, “tu pitĩla voseteko yutunga woku yuka kua Kristu.”—Va Efeso 4:13.