Skip to content

Skip to table of contents

Olombangi Via Yehova

Select language Umbundu

 Ulandu Wopiwa Vociseleko Cetu

“Ohongele Yikuavo Yofeka yi ka Lingiwa Otembo Yipi?”

“Ohongele Yikuavo Yofeka yi ka Lingiwa Otembo Yipi?”

TU KASI Volupale luo México, kosãi ya Kuvala kunyamo wo 1932. Pa pita lika osemana yimosi tunde eci olondimbukiso vio vetapalo via kapiwa volupale luaco muna muli ci pitahãla ohuluwa yomanu. Pole, ovikanda viasapulo ka vi popi vali ovina viaco. Vakuakusandeka asapulo, va tiamisila lika utima kocipito ci laika oku lingiwa vosemana yaco. Lolomakina vioku ngalavala peka, ovo va kevelela pocitumãlo comboyo oku pitĩla kuamanji Joseph Rutherford usongui wo Sociedade Torre de Vigia wo ko Estados Unidos yo ko Amerika. Olombangi vialua Via Yehova, vi kasivo oku kevelela kocitumãlo caco. Momo va yongola oku yolela manji Rutherford, weya kohongele yofeka Yolombangi Via Yehova yoloneke vitatu.

Omanu vañami va endele kohongele yofeka? Ci soka 150 komanu. Pole, orevista Idade de Ouro, ya lombolola okuti: “Ohongele eyi yofeka, ya kala ohongele yimue yi komohĩsa haiyo ya kuata esilivilo lialua kulandu wupange Wolombangi Via Yehova ko México.” Momo lie ohongele yaco ya kuatela esilivilo lialua?

Osimbu ohongele yaco ka ya lingiwile, upange Wolombangi Via Yehova ko México, wa kala oku eca onima yitito. Ndaño okuti olohongele vitito viofeka via enda oku lingiwa vofeka yaco tunde kunyamo wo 1919, pole, etendelo liakongelo lia kala oku tepuluka. Kunyamo wo 1929, kolupale luo México kua yuluiwa ofiliale yimue. Ca kala ndu okuti ovina via laikele oku pongoloka, pole, kua moleha ovitangi vimue. Olondingupange viotembo yosi ndomo akundi votembo yosi va tukuiwile, va longisiwa oco ka va ka tenge ovina viatiamẽla kolomĩlu lupange woku kunda. Umue pokati kavo co temisa, noke wa siapo ocisoko ca Yehova kuenje wa fetika ocimunga caye coku longisa Embimbiliya. Handi vali, usongui wo filiale wa fetika oku linga ovina ka via sungulukile kuenje wa piñanyiwa. Omo liaco, vamanji vana va yonguile oku amamako va sukilile evetiyo.

Manji Rutherford vokuenda kuepasu liaye, wa pamisa vamanji valua. Kohongele yofeka, wa linga olohundo vivali via vetiya calua. Wa lingavo olohundo vitãlo via yevalisiwa kingungu via sapulo. Ca kala onjanja yatete uloño waco wa kuamiwa ko México, oco ku sandekiwe olondaka viwa vofeka yosi. Noke yohongele yofeka, manji ukuavo wa nõliwa oco a songuile ofiliale. Lekuatiso lia Yehova, vamanji va amamako oku lekisa ombili kupange woku kunda.

Noke ovo va fetika oku kuata onima yupange waco. Kuenje kunyamo wo 1933, ka kua lingiwile lika ohongele yimosi yofeka, pole, kua lingiwa olohongele vivali viofeka: yimue kolupale luo México kuenda yikuavo ko Veracruz. Kunyamo wo 1931, ko México kua kala lika 82 kakundi. Noke yoku pita anyamo ekũi, kua kala eci ci pitahãla 800 kakundi kuenje ci pitahãla ohulukãi yomanu, va endele kohongele yofeka kolupale luo México.

 “VOLOKOLOLO VIOSI MUA KALA AKUNDI VALUA”

Kunyamo wo 1943, Olombangi Via Yehova via linga upange woku sandeka esapulo liohongele yofeka losapi hati, “Nação Livre,” ya lingiwa kalupale 12 ko México. * (Tala etosi pombuelo yemẽla.) Ovo va talavaya lolopapelo vinene mua sonehiwa esapulo liohongele yofeka okuti, oyo onjila afendeli va Yehova va enda oku kuama tunde kunyamo wo 1936.

Oku talavaya lolopapelo viaco, ca vetiya omanu vo ko Lupale luo México. Orevista yimue yo kotembo yaco losapi hati, La Nación, ya lombolola eci catiamẽla kohongele yofeka ndoco: “Keteke liatete Olombangi Via Yehova via vetiyiwa oku laleka omanu valua. Kuenje keteke likuavo olomangu ka via tẽlele.” Upange waco wa temisa asongui vatavo vo Katolika kuenje va fetika oku popia lãvi afendeli va Yehova. Ndaño lovina viaco, vamanji ka va kuatele usumba woku amamako oku sandeka ohongele yofeka. Orevista yaco ya amisako ndoco: “Omanu vosi volupale va mola okuti alume lakãi va ambata olopapelo vinene vioku sandeka ohongele yofeka.” Orevista yaco, ya lekisavo ofoto ya vamanji va kasi volokololo vio lupale luo México. Olondaka viofoto yaco via lekisa okuti: “Volokololo viosi mua kala akundi valua.”

‘OLOHAMA VI KASI CIWA HAVIO VIA POSOKA OKUTI POSI CI SULE’

Kotembo yaco vamanji valua, va sukilile oku likosililako calua oco va ende kolohongele vimue viofeka via enda oku lingiwa ko México. Valua va kala kovaimbo a kasi ocipãla kuna ka kua kaile atapalo ndaño olonjila viomboyo. Vamanji vekongelo limue va soneha ndoco: “Onjila yi pita lika kulo yovikanda viasapulo.” Omo liaco, vamanji valua va sukilile oku endela posi oloneke vialua ale oku endela kocimbulu toke kocitumãlo comboyo oco va ende kolupale va ka lingila ohongele yofeka.

Vamanji valua, va kala olohukũi kuenda ka va ponduile oku feta opasasi yoku enda loku tiuka kohongele yofeka. Kuenje vamanji va lieca olumue oco va yekise vamanji valua va tunda kupãla. Vakuavo va enda oku lala Vonjango Yusoma. Onjanja yimue, ci soka 90 ya vamanji va sikĩla ko Betele, kuenje va lale kolokasia vialivulu via luvikiyiwa ndolohama. O Anuario ya lombolola okuti vamanji va pandula calua omo liekuatiso liaco kuenje va popia vati: “olohama vi kasi ciwa havio via posoka okuti posi ci sule.”

Vamanji vaco, va enda oku likolisilako poku enda enda kolohongele viofeka kuenda oku kala la vamanji vakuavo. Cilo, etendelo liakundi kofeka yo México, li pitahãla 850.000. * (Tala etosi pombuelo yemẽla.) Vamanji va kasi oku amamako oku velisapo calua olohongele viofeka. Ulandu umue wa tunda kofiliale wa sonehiwa kunyamo wo 1949, wa lekisa okuti: “Vamanji va liyaka lovitangi vialua, pole, ka va tepuluile ombiliyi yavo. Ovo va kasi oku amamako oku vangula catiamẽla kolohongele viofeka kuenje olonjanja viosi va pula ndoco: “Ohongele yi kuavo yofeka yi ka lingiwa otembo yipi?” Ocili okuti, vamanji toke cilo va kuete esanju limuamue! —Ulandu Wopiwa Vociseleko Cetu ko América Central.

^ tini. 9 Ndomo ca sonehiwa vo Anuario yunyamo wo 1944, ohongele yaco “ya ecelela okuti Olombangi Via Yehova vi kũlĩhiwa ko México.”

^ tini. 14 Kunyamo wo 2016, ci soka 2.262.646 komanu, va endele Kocipito Conjivaluko Yolofa via Kristu kofeka yo México.