Skip to content

Skip to table of contents

Olombangi Via Yehova

Select language Umbundu

 OCIPAMA CELILONGISO 29

“Kuendi, ka Longisi Omanu . . . Oco va Linge Olondonge”

“Kuendi, ka Longisi Omanu . . . Oco va Linge Olondonge”

“Kuendi, ka longisi omanu vo kolofeka viosi oco va linge olondonge.”—MAT. 28:19.

OCISUNGO 60 Eci ci Lomboloka Omuenyo Wavo

OVINA TU LILONGISA *

1-2. (a) Ndomo ca tangiwa kelivulu lia Mateo 28:18-20, ocikundi cipi Yesu a eca kuenda ocikele cipi ca velapo Cakristão? (b) Apulilo api tu konomuisa vocipama cilo?

CITAVA okuti ovapostolo va lekisa ombili yalua eci va liongoluila kohulo yomunda. Yesu noke lioku pinduka, wa va sapuila oco va ka lisange kohulo yomunda yaco. (Mat. 28:16) Citava okuti ca kala epuluvi eci eye a “molẽha kueci ci pitahãla 500 ya vamanji.” (1 Va Kor. 15:6) Momo lie Yesu ongoluila olondonge viaye? Oco a va ĩhe ocihandeleko cokuti: “Kuendi, ka longisi omanu vo kolofeka viosi oco va linge olondonge.”—Tanga Mateo 28:18-20.

2 Olondonge vina via yeva olondaka via Yesu via panga onepa kekongelo Liakristão kocita catete. Ocimãho ca velapo cekongelo liaco, coku longisa omanu valua oco va linge olondonge via Kristu. * Koloneke vilo, kuli olohuluwa vialua via Kristão koluali luosi kuenda ocimãho cavo coku lingavo upange umuamue. Vocipama cilo, tu konomuisa olonumbi vikuãla ndeci: Momo lie ci kuetele esilivilo oku longisa omanu oco va linge olondonge? Vupange waco mua kongela oku linga nye? Anga hẽ Akristão vosi va panga onepa koku kuatisa omanu oco va linge olondonge? Kuenda momo lie tu sukilila oku lekisa epandi kupange waco?

 MOMO LIE CI KUETELE ESILIVILO OKU LINGA OLONDONGE?

3. Ndomo ca lekisiwa kelivulu lia Yoano 14:6 kuenda 17:3, momo lie ci kuetele esilivilo lialua oku longisa omanu oco va linge olondonge?

3 Momo lie upange woku linga olondonge u kuetele esilivilo lialua? Momo olondonge via Kristu ovio lika vi pondola oku kala akamba va Suku. Handi vali, vana va kuãi Kristu ovo lika va kuete ekalo liwa cilo kuenda va kuete elavoko liomuenyo umue wesanju kovaso yoloneke. (Tanga Yoano 14:6; 17:3.) Ocili okuti Yesu wa tu ĩha ocikele ca velapo, pole, ka tu kasi oku linga upange waco lika wetu. Upostolo Paulu wa soneha eci catiamẽla kokuaye muẽle kuenda ku vamanji vakuavo hati: “Tulondingupange kumue la Suku.” (1 Va Kor. 3:9) Eci ocikele cimue ca velapo Yehova la Kristu va eca komanu ka va lipuile!

4. Nye tu lilongisila kulandu wa vamanji Ivan kuenda Matilde?

4 Upange woku longisa omanu oco va linge olondonge, u tu nenela esanju lialua. Tu kũlĩhĩsi ulandu wamanji Ivan lukãi waye Matilde kofeka yo Kolombia. Ovo va kundila ukuenje umue o tukuiwa Davier kuenje eye wa sapuila vamanji hati: “Njongola oku linga apongoloko komuenyo wange, pole ca tĩla oku ci linga.” Davier wa enda oku linga omapalo yoku litĩla, oku nyua olodroga, ovinyua vi koluisa kuenda wa kala oku namulala lufeko umue o tukuiwa Erika. Manji Ivan wa lombolola hati: “Tua enda oku u nyula vimbo liaye, poku endela kolosikaleta olowola vialua vetapalo limue mueyuka olonata. Noke lioku mola okuti Davier wa kala oku linga apongoloko kovituwa viaye, Erika wa fetikavo oku lilongisa Embimbiliya.” Vokuenda kuotembo Davier wa siapo oku nyua olodroga, ovinyua vi koluisa kuenda omapalo yoku litĩla. Kuenje wa likuela la Erika. Manji Matilde hati: “Eci Davier la Erika va papatisiwa kunyamo wo 2016 tua ivaluka olondaka Davier a popele okuti, ‘Njongola oku linga apongoloko komuenyo wange, pole ca tĩla oku ci linga.’ Ca tu sanjuisa calua kuenje ca tu kokela asuẽlela.” Ocili okuti tu kuata esanju lialua eci tu kuatisa omanu oku linga olondonge via Kristu.

NYE CA KONGELA VUPANGE WOKU LINGA OLONDONGE?

5. Cipi ocina catete tu sukila oku linga oco tu kuatise omanu oku kala olondonge?

5 Ocina catete tu sukila oku linga oco tu kuatise omanu oku kala olondonge, oku ‘sanda’ vana va yongola oku lilongisa ocili catiamẽla ku Yehova. (Mat. 10:11) Tu lekisa okuti tu Lombangi Via Yehova poku sapuila omanu vosi catiamẽla ku Yehova. Tu lekisavo okuti Tuakristão vocili poku kapako ocihandeleko ca Kristu coku kunda.

6. Nye ci tu kuatisa oku litunda ciwa kupange woku kunda?

6 Omanu vamue eci tu va kundila va tava vepuluvi liaco, pole, vakuavo sio. Pamue tu sukila oku vetiya onjongole yavo. Oco tu kuate onima yiwa kupange woku kunda, tu sukila oku lipongiya ciwa. Nõla ulandu umue okuti u vetiya vana o ka lisanga lavo kupange woku kunda. Noke pongiya ndomo o ka fetika ombangulo.

7. O pondola oku fetika ndati ombangulo lomunu umue kuenda momo lie ci kuetele esilivilo oku yevelela loku lekisa esumbilo?

7 Ndeci, o pondola oku pula omunu wa sanga ndoco: “Citava okuti hupula cimue oco ndi kũlĩhe ocisimĩlo cove? Koloneke vilo omanu vosi voluali tu kasi oku liyaka lovitangi vialua. Osima hẽ okuti tu sukila ombiali yimue yi malako ovitangi viaco viosi?” Kuenje u tangela elivulu lia Daniele 2:44. Ale pulisa ndoco komunu wa sanga: “Yipi onjila  ya sunguluka yoku longisa omãla oku kuata ovituwa viwa? Njongola oku kũlĩha ocisimĩlo cove.” Kuenje u tangela elivulu Liesinumuĩlo 6:6, 7. Osapi losapi o nõla, sokolola ekalo liomanu va ka ku yevelela. Sokolola ndomo ovo va ka kuatisiwa poku kũlĩha eci Embimbiliya li longisa. Eci o sapela lavo, ci kuete esilivilo oku va yevelela kuenda oku sumbila ovisimĩlo viavo. Lonjila eyi o ka kuata elomboloko liovisimĩlo viavo kuenda ovo va ka lekisa vali onjongole yoku ku yevelela.

8. Momo lie ci kuetele esilivilo oku linga apasu olonjanja viosi?

8 Osimbu omunu ka nõlelepo oku lilongisa Embimbiliya, ove pamue o sukila oku likolisilako oku lingainga apasu. Momo lie? Momo pamue omanu ka va sangiwa konjo eci tu ka linga epasu. Handi vali, o sukila oku ko nyula olonjanja vialua toke eci omunu waco a nõlapo oku fetika elilongiso Liembimbiliya. Ivaluka okuti, ocikũla cimue ci kula ciwa nda tu ci tapela oloneke viosi. Cimuamue haico okuti, omunu umue o pondola oku sola Yehova la Kristu, nda olonjanja viosi tu sapela laye Ondaka ya Suku.

ANGA HẼ AKRISTÃO VOSI VA SUKILA OKU PANGA ONEPA KOKU LINGA OLONDONGE?

Olombangi Via Yehova koluali luosi va litumbika kupange woku sanda vana va lekisa onjongole (Tala ovinimbu 9-10) *

9-10. Momo lie tu popela okuti Aristão vosi, va kuete ocikele coku sanda omanu vakuavitima via sunguluka oco va linge olondonge?

9 Akristão vosi va kuete ocikele coku sanda vana vakuotima wa sunguluka. Tu pondola oku sokisa upange owu lomanu va sanda omõla umue wa nyelela. Ndamupi? Sokolola kulandu umue wa pita okuti omõla umue ukuanyamo atatu wa nyelela. Ci soka 500 komanu va kala oku u sandiliya. Noke lioku pita 20 kolowola, omunu umue wa sanga omõla wa nyelela vepia limue. Omunu wa sanga omõla ka yonguile okuti omanu vo feta omo lioku alula omõla. Eye wa popia hati: “Omõla  wa sangiwa, momo vosi va panga onepa koku u sandiliya.”

10 Omanu valua va sokisiwa ndomõla wa nyelela. Ovo va sukila ekuatiso omo okuti ka va kuete elavoko. (Va Efe. 2:12) Ci soka ecelãla kolohuluwa Violombangi Via Yehova vi kasi oku talavayela kumosi oco va kuatise omanu vaco. Citava okuti handi kua sangele laumue oco u longise Embimbiliya. Pole, akundi vakuavo vu kasi oku talavayela kumosi vocikanjo cimuamue, citava okuti va sanga omunu umue o yongola oku lilongisa ocili Condaka ya Suku. Nda manji umue wa kuatisa omunu umue oku kala ondonge ya Kristu, vosi vana va panga onepa kupange waco, va kuete esunga liwa lioku sanjuka.

11. Ndaño okuti ku kasi oku songola lalimue elilongiso Liembimbiliya, kolonepa vipi vikuavo o pondola oku kuatisa oku linga olondonge?

11 Nda ku kuete elilongiso limue Liembimbiliya, o pondola oku kuatisa oku linga olondonge volonjila vikuavo. Ndeci, ove o pondola oku yolela vana veya onjanja yatete Vonjango Yusoma loku linga ukamba lavo. Lonjila eyi, va kuatisiwa oku limbuka okuti ocisola ci situlula okuti Tuakristão vocili. (Yoa. 13:34, 35) Atambululo eca vokuenda kuohongele, a pondola oku kuatisa vana veya onjanja yatete oku pamisa ekolelo liavo lonjila yimue ya sunguluka. O pondolavo oku talavaya lohundi yokaliye loku u kuatisa oku talavaya ciwa Lembimbiliya poku longisa omanu. Poku ci linga, o ko kuatisa oku kuama ongangu ya Kristu.—Luka 10:25-28.

12. Anga hẽ tu sukila oku kuata ukũlĩhiso walua oco tu pange onepa kupange woku linga olondonge? Ci lombolola.

12 Pokati ketu lomue ka ka sime okuti o sukila ukũlĩhiso walua oco a kuatise omanu oku linga olondonge via Yesu. Momo lie? Kũlĩhĩsa ulandu wa manji Faustina o kasi ko Bolivia. Eci a fetika oku lilongisa Embimbiliya Lolombangi Via Yehova, ka tẽlele oku tanga. Kuenje cilo o tangapo kamue. Kaliye wa patisiwa kuenda o sanjukila oku longisa omanu. Volosemana viosi o songola alilongiso atãlo Embimbiliya. Ndaño okuti manji Faustina ka tẽla oku tanga ciwa eye wa kuatisa eci ci soka epandu komanu toke eci va papatisiwa.—Luka 10:21.

13. Asumũlũho api tu kuata eci tu panga onepa kupange woku linga olondonge?

13 Akristão vamue va kuete ovina vialua vioku linga. Ndaño muẽle ndoco, va sanda otembo yoku songola alilongiso Embimbiliya kuenda va kuete esanju lialua poku ci linga. Kũlĩhĩsa ulandu wa manji Melanie. Wa tekula likaliaye Omõlaye ukãi o kuete ecelãla kanyamo ko Alaska. Eye wa kuata upange umue wolowola vialua kuenda wa sukilile oku tata ngandiaye wa kala luveyi wo kanser. Manji  Melanie eye lika wa kala Ombangi ya Yehova vimbo liaco. Olonjanja viosi wa enda oku likutilila oco a kuate ongusu yoku enda kupange woku kunda ndaño okuti ka ca lelukile omo liombambi momo wa yonguile oku sanga omunu umue okuti u longisa Embimbiliya. Eye wa sanga ukãi umue o tukuiwa Sara, una wa yonguile oku kũlĩha onduko ya Suku. Noke liotembo yimue Sara wa tava oku lilongisa Embimbiliya. Manji Melanie wa popia hati: “Oloneke viosi votãlo koñolosi nda siata oku yeva ekavo lialua, pole, ame lomõlange tua siata oku kuatisiwa poku songola elilongiso liaco. Tu sanjukila oku linga akonomuiso kapulilo Sara a siata oku linga kuenda tua sanjukavo ndomo eye a kasi oku pamisa ukamba waye la Yehova.” Sara lutõi walua wa yula elambalalo, wa siapo etavo liaye kuenje wa papatisiwa.

ESUNGA LIECI CI SUKILILA EPANDI OKU LONGISA OMANU OCO VA LINGE OLONDONGE

14. (a) Vana va longisa omanu oco va linge olondonge va sokisiwa ndati lavakuakupipa? (b) Olondaka vi sangiwa kukanda wa 2 Timoteo 4:1, 2 viu ku kuatisa ndati?

14 Nda kupange woku kunda omunu tua kundila ka lekisa onjongole yoku kala ondonge ya Yesu, ku ka liwekepo amamako oku sandiliya. Ivaluka okuti Yesu wa popia hati, vana va longisa omanu oco va linge olondonge va sokisiwa lavakuakupipa. Vakuakupipa pamue va pita olowola vialua okuti ka va kuata ombisi layimue. Olonjanja vimue ovo va talavaya toke luteke, ale toke kociteketeke kuenda pamue va linga ovongende anene. (Luka 5:5) Cimuamue haico okuti, akundi vamue lepandi va pita olowola vialua vapuluvi a litepa, oco va ‘sandiliye’ omanu vana va yongola oku lilongisa Embimbiliya. Momo lie? Momo  va yongola oku sanga omanu valua. Akundi vana va likolisilako oku ci linga va kuata asumũlũho momo va ka sanga vana va lekisa onjongole kesapulo lietu. Ove hẽ o pondola oku kunda vepuluvi limue okuti o sanga omanu valua?—Tanga 2 Timoteo 4:1, 2.

Lepandi lialua kuatisa olondonge vina o longisa Embimbiliya oku sola loku pokola ku Yehova (Tala ovinimbu 15-16) *

15. Momo lie ci sukilila epandi oku songola alilongiso Embimbiliya?

15 Momo lie oku songola elilongiso Liembimbiliya ci sukilila epandi? Esunga limue lieli okuti, ka tu sukila lika oku kuatisa olondonge oku kũlĩha loku sola alongiso a sangiwa Vembimbiliya. Eci tu sukila oku linga oku kuatisa ondonge oku kũlĩha loku sola Una wa tuma oku soneha Embimbiliya okuti, Yehova. Handi vali, oco tu kuatise ondonge yimue oku kũlĩha eci Yesu a lavoka kolondonge viaye, tu sukila oku kuatisa ondonge oku kũlĩha ndomo a pondola oku kapako ocihandeleko ca Yesu. Tu sukila oku lekisa epandi kokuaye osimbu eye a likolisilako oku kapako olonumbi Viembimbiliya komuenyo waye. Vamue va linga apongoloko lonjanga, kovisimĩlo kuenda kovituwa; ku vamue cambata otembo yalua.

16. Ulandu wa manji Raúl wa ku longisa nye?

16 Omisionaliu yimue kofeka yo Peru wa lombolola ulandu umue u lekisa esilivilo lioku kala ukuepandi. Eye wa popia hati: “Nda kuatele ondonge yimue o tukuiwa Raúl ndolongisa alivulu avali. Pole eye wa kuata ovitangi vialua komuenyo waye. Wa kuatele ovitangi volohuela viaye, wa enda oku vangula ovina vi kutisa osõi kuenda omãla vaye ka vo sumbilile. Ndaño lovitangi viaco, eye ka liwekelepo oku endaenda kolohongele kuenje nda amamako oku u kuatisa kumue lepata liaye. Noke lioku pita anyamo atatu nda lisanga laye, pole, wa papatisiwa ale.”

17. Nye tu ka lilongisa vocipama cikuavo?

17 Yesu wa tu sapuila hati, “kuendi, ka longisi omanu vo kolofeka viosi oco va linge olondonge.” Oco tu tẽlise ocikundi eci, tu sukila oku kundila vana va kuete ovisimĩlo via litepa levi vietu, oku kongelamo vana ka va tiamẽlele ketavo limue, ale vana okuti ka va tava okuti kuli Suku. Vocipama cikuavo tu ka lilongisa ndomo tu pondola oku kundila omanu vaco.

OCISUNGO 68 Wayi Ombuto Yusoma

^ tini. 5 Ocimãho ca velapo cekongelo Liakristão, oku kuatisa omanu oco va linge olondonge via Kristu. Ocipama cilo, ci ka eca olonumbi vimue vi tu kuatisa oku tẽlisa ciwa ocikele cetu.

^ tini. 2 ONDAKA YA LOMBOLUIWA: Olondonge via Kristu ka vi yevelela lika ovina Yesu a longisa. Ovio vi kapako ovina va lilongisa komuenyo wavo. Handi vali, vi likolisilako oku kuama volomãhi viaye.—1 Pet. 2:21.

^ tini. 52 PICTURE DESCRIPTION: Ulume umue o kasi koloneke viepuyuko upa okokanda kamue kokakãlu kalivulu Kolombangi Via Yehova pocila colombalãu. Noke wa sanga vali Olombangi Via Yehova vi kasi oku kunda. Kuenje eteke likuavo akundi va totola kepito liaye.

^ tini. 54 PICTURE DESCRIPTION: Noke o tava oku lilongisa Embimbiliya. Cilo wa papatisiwa.