Skip to content

Skip to table of contents

Olombangi Via Yehova

Select language Umbundu

 OCIPAMA CELILONGISO 34

Ndomo o Sanjukila Epongoloko Liocikele Cove

Ndomo o Sanjukila Epongoloko Liocikele Cove

“Suku hokuanyako okuti ivalako upange wene, locisola wa lekisili onduko yaye.”VA HEV. 6:10.

OCISUNGO 38 Eye o vu Pamisi

OVINA TU LILONGISA *

1-3. Nye ci koka okuti ovikele via vamanji va kasi kupange ulikasi pamue u pongoloka?

MANJI Robert kuenda Mary Jo, va popia hati: “Noke yoku pita 21 kanyamo kupange wumisionaliu olonjali vietu via fetika oku vela. Ka tua sumuile omo lioku va tata. Pole, ca tu vala kutima oku siapo ocikele cetu.”

2 Manji William kuenda Terrie, va popia hati: “Eci tua limbuka okuti uhayele wetu ka u tu ecelela vali oku tẽlisa ocikele cetu, tua lila. Onjongole yetu yoku vumba Yehova kofeka yimue yo kupãla, ka ya tẽlisiwile.”

3 Manji Aleksey wa popia hati: “Tua kũlĩhĩle okuti ovanyali vetu va yonguile oku yika ofiliale. Kuenje eci va tu sapuila okuti te tua tunda ko Betele tua salukile calua.”

4. Apulilo api tu konomuisa vocipama cilo?

4 Sokololavo ndomo vamanji vakuavo ko Betele kuenda kupange ukuavo ulikasi va liyeva eci ocikele cavo ca pongoloka. * Ka ca lelukile kokuavo oku siapo ocikele va solele calua. Nye ca va kuatisa oku liyaka lapongoloko aco? O pondola oku va kuatisa ndati? Atambululo apulilo a-a a tu kuatisa vosi yetu oku litunda ciwa poku liyaka lapongoloko komuenyo.

 NDOMO TU TENDA APONGOLOKO

Vana va kasi kupange wotembo yosi eci ocikele cavo ci pongoloka ovitangi vipi va pondola oku kuata? (Tala ocinimbu 5) *

5. Tu liyeva ndati eci kuiya apongoloko amue?

5 Cikale okuti tu kasi kupange wakundi votembo yosi, ale ko Betele, tu sukila oku sola omanu kuenda ocitumãlo tu kasi. Citava okuti, tu sumua nda tua siapo ocikele cetu. Tu kuatela ongeva vamanji tua sia kuenda tu sakalala lavo, capiãla enene nda tua siapo ocikele cetu omo lielambalalo. (Mat. 10:23; 2 Va Kor. 11:28, 29) Handi vali, ci pondola oku tĩla calua oku enda kocitumãlo cikuavo omo okuti tu sukila oku ikisa ekalo likuavo. Manji Robert kuenda Mary Jo, va popia hati, “tua solaile ekalo lietu kuenda tua kundaile kelimi lietu. Omo okuti tua kala oku kundila kocitumãlo cikuavo vokuenda kuanyamo alua, tua liyeva ndu okuti tu vingendeleyi vofeka yetu muele.” Vamue okuti ocikele cavo ca pongoloka, pamue va liyaka lekambo liolombongo. Kuenje va pondola oku sumua kuenda va liyeva okuti ka va kolelepo. Nye ci pondola oku va kuatisa?

Ci kuete esilivilo oku pamisa ukamba wetu la Yehova loku u kolela (Tala ovinimbu 6-7) *

6. Tu amẽla ndati ku Yehova?

6 Oku amẽla ku Yehova. (Tia. 4:8) Tu ci linga ndati? Poku kolela okuti eye ‘Ukuakuyeva ohutililo.’ (Osa. 65:2) Osamo 62:8 yi popia hati, “Peseleli ovitima viene kokuaye.” Yehova o pondola oku linga “ovina viosi tu pinga ale tu sima.” (Va Efe. 3:20) Eye ka tu ĩha lika ovina tu pinga vohutililo. O pondolavo oku potolola ovitangi vietu lonjila yimue ka tua lavokaile.

7. (a) Nye ci ka tu kuatisa oku amamako ku pamisa ukamba wetu la Yehova? (b) Ndomo ca lekisiwa ku Va Heveru 6:10-12, onima yipi tu kuata nda tuamamako oku vumba Yehova lekolelo?

7 Oco tu amẽle ku Yehova tu sukila oku tanga Embimbiliya oloneke viosi loku sokolola kovina tua tanga. Manji umue wa kala omisionaliu wa popia hati: “oku kuata ocituwa coku linga efendelo liepata kuenda oku pongiya olohongele, ci ku kuatisa oku tiamisila utima kocikele cove.” Handi vali, amamako oku kunda olondaka viwa lutima wosi vekongelo o kasi. Yehova ivaluka vosi vana vamamako oku u vumba lekolelo, ndaño okuti ka va pondola oku linga vali ovina viosi va lingaile.—Tanga Va Heveru 6:10-12.

8. Olondaka vi sangiwa ku 1 Yoano 2:15-17, vi ku kuatisa ndati oku amamako oku leluisa omuenyo wove?

8 Amamako oku leluisa omuenyo wove. Ku  ka ecelele okuti asakalalo oluali lua Satana a ku kokela oku “liwekapo” oku vumba Yehova. (Mat. 13:22) Yuvula oku yevelela vana ka va vumbi Yehova, oku kongelamo akamba, epata eci va ku sapuila okuti oco omuenyo woye u kolepo, o sukila oku kuata olombongo vialua. (Tanga 1 Yoano 2:15-17.) Kolela Yehova una wa likuminya oku ku ĩha cosi, ‘eci o sukila ekuatiso.’—Va Hev. 4:16; 13:5, 6.

9. Ndomo ca tangiwa Kolosapo 22:3, 7, momo lie ci kuetele esilivilo oku yuvula oku levala kuenda nye ci tu kuatisa oku nõla onjila ya sunguluka?

9 Ku ka levale olombongo nda ka pali esunga lioku ci linga. (Tanga Olosapo 22:3, 7.) Ocikuata cimue pamue ca tĩla calua kuenje ci ku kokela oku levala oco o ci lande. Oco o yuvule oku kuata olofuka, lekisa utate okuti ku landi cimue ku sukila. Eci tu kasi lesumuo lialua omo lioku tata umue o vela, pamue ci tĩla kokuetu oku kũlĩha etendelo liolombongo tu sukila oku levala. Vapuluvi aco, ivaluka okuti ‘olohutililo kuenda alombelo a pondola oku ku kuatisa oku nõla onjila ya sunguluka. Yehova poku tambulula olohutililo viove oku ĩha ombembua yina yi ‘lava utima wove kuenda ovisimĩlo’ loku ku kuatisa oku tula utima.—Va Fil. 4:6, 7; 1 Pet. 5:7.

10. Tu pondola oku sanga ndati akamba vokaliye?

10 Linga ukamba lomanu va kuete ovituwa viwa. Sapuila kakamba vove ovisimĩlo viove kuenda ulandu wove, ca piãla enene ku vana va pitavo locitangi cimuamue. Nda wa ci linga o ka liyeva ciwa. (Uku. 4:9, 10) Eci wa kala kocikele catete akamba wa linga, va ka amamako oku kala akamba vove. Cilo, kocikele cikuavo o sukila vali oku sanda akamba vakuavo. Ivaluka okuti, oco o kuate akamba o sukila oku lekisa ukamba. O pondola oku sanga ndati akamba vokaliye? Lombolola asumũlũho Yehova a ku ĩha kuenda ecelela okuti vakuene va limbuka esanju o kuete omo lioku vumba Yehova. Vamanji vamue vekongelo pamue ka va kuata elomboloko lieci o solele calua upange wakundi votembo yosi, pole, vamue va yongola oku kũlĩha vali ovina vialua viatiamẽla kupange wa Yehova kuenda oku linga ukamba love. Pole, poku lombolola ulandu wove, yuvula oku lipanda kuenda ku ka tiamisile ombangulo kovina via ku sumuisa.

11. Nye o sukila oku linga oco olohuela viove vi amameko lesanju?

11 Nda wa siapo ocikele cove omo lioku vela kuohueli yove, ku ko vetele evelo. Handi vali, nda ove o kasi locitangi cuhayele ku ka livetele evelo loku sima okuti wa sumuisa ohueli yove. Ivaluka okuti ene ‘wetimba limuamue’ kuenda kovaso a Yehova ove wa likuminya okuti u ka litata pokati ndaño ceci  kuiya ovitangi. (Mat. 19:5, 6) Nda wa sia ocikele cove omo lioku mina, limbuka okuti omõla wene wa velapo vali okuti ocikele wa kuateli ci sule. Tenda omõlene okuti “onima” yimue ya tunda ku Suku. (Osa. 127:3-5) Vokuenda kuotembo sapuili omõlene asumũlũho wa kuati kocikele cene. Poku ci linga ci ka vetiya omõlene oku litumbika kupange wa Yehova, ndeci ene wa lingi.

NDOMO VAMANJI VA PONDOLA OKU KUATISA

12. (a) Tu kuatisa ndati vana va kasi kupange wakundi votembo yosi oku amamako locikele cavo? (b) Tu va kuatisa ndati oku sanjukila ocikele cavo cokaliye?

12 Akongelo alua oku kongelamo manji lumanji, va siata oku kuatisa vana va kasi kupange wotembo yosi, oco vamameko lupange wavo. Ovo va ci linga poku va vetiya oku amamako lupange wavo, poku va ĩha ovina va sukila, ale poku va kuatisa oku tata apata avo a kasi ocipãla. (Va Gal. 6:2) Vana va kasi kupange wotembo yosi nda okuti ocikele cavo ca pongoloka kuenje va tumiwa vekongelo o kasi, ku ka sime okuti ka va tẽlisile ciwa ocikele cavo, ale va linga cimue cĩvi.  * Va kuatisa oku sanjukila ocikele cavo cokaliye. Va yoleli loku va pandiya omo liupange va siata oku linga, ndaño okuti ka va pondola oku linga ovina vialua omo liekambo liuhayele. Sanda oku linga lavo ukamba. Lilongisila kukũlĩhĩso walua va kuete, kulandu wavo kuenda kepindiso liavo.

13. Ekuatiso lipi tu pondola oku eca ku vana okuti ocikele cavo ca pongoloka?

13 Catete, vana okuti ocikele cavo ca pongoloka va sukila ekuatiso liove ndeci, koku sanga ocitumãlo coku kala, ocendelo, oku  sanga upange kuenda ovina vikuavo va sukila. Ovo va sukilavo onumbi ndomo va pondola oku feta elisimu kuenda ndomo va suisapo ovicapa viocendelo. Pole, eci va sukila vali calua, ove oku kũlĩha ciwa ekalo liavo. Citava okuti ovo, ale umue ukuepata liavo va kasi oku liyaka locitangi cuhayele. Pamue va sumua omo lioku fisa umue va sole. * Handi vali, ndaño okuti ovo ka va lombolola ocitangi cavo, citava okuti va yeva esumuo omo liongeva va kuetele akamba vavo va siala. Cambata otembo oco esumuo liaco li pite kuenda olonjanja vialua esumuo liaco liamamako.

14. Akundi vamue va kuatisa ndati manji ukãi oku sanjukila ocikele cikuavo a tambula?

14 Olonjanja vimue ekuatiso eca kuenda ongangu yove yiwa yi va kuatisa oku sanjukila ocikele va kuete cilo. Manji umue ukãi wa kundila kofeka yikuavo vokuenda kuanyamo alua, wa popia hati: “Kocikele cange catete, ndaenda oku songola alilongiso Embimbiliya oloneke viosi. Pole, vocikanjo cokaliye ka ca lelukile oku fetika elilongiso Liembimbiliya, ale oku lekisa ovideo kupange woku kunda. Kuenje, vamanji vekongelo ndi kasi, va ndi laleka oco ngende lavo kapasu avo kuenda oku songola alilongiso Embimbiliya. Oku mola ombili kuenda utõi vamanji va lekisa poku songola alilongiso Embimbiliya, ca mbetiya calua. Nda lilongisa ndomo ku fetikiwa ombangulo vocikanjo cokaliye. Ovina evi viosi via ñuatisa oku kuata vali esanju.”

AMAMAKO OKU TẼLISA CIWA OCIKELE COVE!

Sanda olonjila vioku vokiya upange wove woku kunda vocikanjo cove (Tala ovinimbu 15-16) *

15. O kuata ndati onima yiwa kocikele cikuavo?

15 Ove o pondola oku litunda ciwa kocikele cikuavo. Ku ka sime okuti ku kuete vali esilivilo omo lioku tambula ocikele cikuavo. Ivaluka kapuluvi osi Yehova a ku kuatisa ale, kuenda amamako oku kunda. Setukula ekolelo Liakristão vo kocita catete. Kolonepa viosi va sangiwa, ovo va “ñuala ñuala vofeka oku kunda olondaka viwa.” (Ovil. 8:1, 4) Nda  wa likolisilako oku kunda, o ka kuata onima yiwa. Akundi valua votembo yosi, okuti va tundisiwa vofeka yavo, va sondolokela kofeka ya kala ocipepi. Kofeka yaco kua kala esukila lialua liakundi va vangula elimi liavo. Kuenje, vokuenda kuolosãi vimue omanu valua va likongela kovimunga viokaliye kelimi vamanji va kala oku kunda.

16. O pondola oku sanga ndati esanju kocikele wa tambula?

16 “Esanju lioku sanjukila Yehova olio ongusu yene.” (Neh. 8:10) Esanju lietu te litunda koku kũlĩha Yehova, ka tu kuata lika esanju omo liocikele cetu. Omo liaco, nda tu yongola oku kuata esanju tu sukila oku pamisa ukamba wetu la Yehova kuenda oku u kolela. Ivaluka okuti ove wa solele ocikele cove catete, omo wa tiamisilile utima koku kuatisa omanu. Tiamisila utima kocikele wa tambula kuenje o ka limbuka okuti Yehova o ka ku kuatisa oku solavo ocikele caco.—Uku. 7:10.

17. Nye tu sukila oku ivaluka catiamẽla kocikele tu kuete cilo?

17 Tu sukila oku ivaluka okuti upange tu lingila Yehova u ka amamako, pole, ocikele tu kuete cilo, ka ci ka amamako ci pondola oku pongoloka. Voluali luokaliye, vosi yetu citava okuti tu ka tambula ovikele vikuavo. Manji Aleksey wa tukuiwa kefetikilo, wa kolelele okuti ulandu a pita lawo, wa kala oku u pongiyila apongoloko a laika okuiya kovaso. Manji Aleksey wa popia hati: “Nda kolelele okuti Yehova o kasiko muẽle kuenda oluali luokaliye luiya muẽle, pole, olonjanja vimue ca molẽhele ndu okuti lu kasi ocipãla. Cilo, ndi kasi vali ocipepi la Yehova kuenda ndi liyeva okuti oluali luokaliye lu kasi muẽle ocipepi.” (Ovil. 2:25) Nda ocikele cetu upange wotembo yosi, nda upange wumisionaliu, ale ocikele cikuavo, tu sukila oku amamako oku endaenda la Yehova. Eye lalimue eteke a ka tu yanduluka, pole, o ka tu kuatisa oku kuata esanju kovina tu pondola oku linga kupange waye kuenda kocikele cosi tu tambula.—Isa. 41:13.

OCISUNGO 90 Tu Livetiyi Pokati

^ tini. 5 Vamanji va kasi kupange wakundi votembo yosi pamue ka va pondola vali oku amamako locikele cavo. Ocipama cilo, ci ka lombolola ovitangi va pondola oku liyaka lavio kuenda eci ci pondola oku va kuatisa oco va litunde ciwa. Ci ka lombololavo eci vakuetu va sukila oku linga oco akundi vaco va lembelekiwe loku kuatisiwa kuenda ci ka lekisavo olonumbi vi pondola oku tu kuatisa vosi yetu eci tu pita lapongoloko.

^ tini. 4 Handi vali, vamanji valua va kuete ovikele, eci va kuka va eca ovikele viavo ku vamanji amalẽhe. Tanga ocipama “Irmãos Mais Velhos—Jeová dá Valor à Lealdade de Vocês,” Vutala Wondavululi Wenyenye Linene wo 2018 kamẽla 8-11; kuenda ocipama “Amamako Oku Kuata Ombembua yo Vutima Ndaño Ekalo Li PongolokaVutala Wondavululi wa Mbalavipembe wo 2018 kamẽla 22-27.

^ tini. 12 Akulu vekongelo muna vamanji akundi votembo yosi va tunda, va sukila oku soneha lonjanga ukanda wuvangi oco va tuĩhinye locikele cavo cukundi wotembo yosi, cukulu wekongelo, ale coñuatisi yekongelo.

^ tini. 13 Tanga ocipama losapi hati, “Como Lidar Com a Dor da Morte” vo Despertai! No. 3 wo 2018.

^ tini. 57 ELOMBOLUILO YOCILUVIALUVIA: Ohueli yimue omo liocitangi cimue, yi kasi oku siapo upange wavo wumionaliu kofeka yikuavo, ovo va sumua poku liusika la vamanji vo vekongelo.

^ tini. 59 ELOMBOLUILO YOCILUVIALUVIA: Ohueli yaco osimbu yi kasi vofeka yavo yi likutilila loku pinga ku Yehova ekuatiso oco va tẽle oku yula ovitangi va kasi oku liyaka lavio.

^ tini. 61 ELOMBOLUILO YOCILUVIALUVIA: Lekuatiso lia Yehova ohueli ya tiukila vali kupange wakundi votembo yosi. Oyo yi talavaya ciwa lelimi liokaliye va lilongisa, poku kundila omanu vana va tunda kofeka yikuavo va sangiwa vocikanjo cavo.