Skip to content

Skip to table of contents

Olombangi Via Yehova

Select language Umbundu

 Ocipama Celilongiso 2

Sivaya Yehova Vekongelo

Sivaya Yehova Vekongelo

“Hu sivaya pokati kekongelo.”​OSA. 22:22.

OCISUNGO 59 Sivayi Yehova

OVINA TU LILONGISA *

1. Nye Daviti a yeva vutima catiamẽla ku Yehova kuenda co vetiya oku linga nye?

SOMA DAVITI wa soneha hati: “Yehova unene, wa posokela enene esivayo.” (Osa. 145:3) Eye wa solele Yehova kuenje ocisola co vetiya oku u sivaya “pokati kekongelo.” (Osa. 22:22; 40:5) Ocili okuti, ove o solevo Yehova kuenda o tava kolondaka via Daviti viokuti: “A Yehova, Suku ya isietu Isareli, kokuove ku kale etumbangiyo koloneke viendaño hu!”—1 Asa. 29:10-13.

2. (a) Tu sivaya ndati Yehova? (b) Ohele yipi vamue va kuete kuenda nye tu konomuisa?

2 Koloneke vilo, onjila yimue yoku sivaya Yehova, poku eca atambululo kolohongele. Pole, vamue pokati ka vamanjetu ka ca lelukile oku ci linga. Ovo va kuete onjongole yoku eca atambululo, pole, usumba u va tateka. Va pondola oku yula ndati usumba waco? Nye ci tu kuatisa vosi yetu oku eca atambululo a pamisa? Osimbu handi ka tua tambuluile apulilo a-a, tete tu konomuisi asunga akuãla, eci tu sukilila oku eca atambululo kolohongele.

ESUNGA LIECI TU ECELA ATAMBULULO KOLOHONGELE

3-5. (a) Ndomo ca lomboluiwa kelivulu lia Va Heveru 13:15, momo lie tu sukilila oku eca atambululo kolohongele? b) Anga hẽ vosi yetu tu sukila oku eca etambululo limuamue? Ci lombolola.

3 Yehova eca ku vosi yetu esumũlũho lioku u sivaya. (Osa. 119:108) Atambululo etu kolohongele a panga onepa  ‘kocilumba cesivayo’ kuenda lomue o pondola oku tu ecelako ocilumba caco. (Tanga Va Heveru 13:15.) Anga hẽ Yehova o tu kisika oku eca ocilumba cimuamue, ale etambululo limuamue? Sio!

4 Yehova wa kũlĩha okuti tu kuete ovoloño a litepa lekalo lia litepa kuenda eye wa kapako calua ovilumba tu eca kokuaye. Sokolola kovilumba eye a tavale ku va Isareli. Va Isareli vamue va enda oku eca omeme ale ohombo. Pole, u Isareli ohukuĩ wa ponduile oku eca “olopomba vivali pamue ivuvu vivali violonende.” Nda u Isareli umue ka kuatele epondolo lioku eca olopomba vivali, Yehova wa tavale “onepa yekũi yefa liosema ya fina.” (Ovis. 5:7, 11) Ondando yaco yosema ya lelukilepo vali, pole, Yehova wa kapeleko ocilumba caco ‘cosema ya fina.’

5 Suku yetu ka pongolokele toke etaili. Eci tu eca atambululo etu, eye ka kisika okuti tu loñoloha koku vangula ndeci Apolosi, ale Paulu. (Ovil. 18:24; 26:28) Yehova o yongola okuti tu eca atambululo a kasi vepondolo lietu. Ivaluka ocimbumba ca eca ovingangu vivali vitito. Yehova wo solele calua, omo okuti wa eca eci ca kala vepondolo liaye.—Luka 21:1-4.

Oku eca atambululo ci tu kuatisa etu kuenda vana va tu yevelela(Tala ovinimbu 6-7) *

6. (a) Ndomo ca lomboluiwa kelivulu lia Va Heveru 10:24, 25 tu kuatisiwa ndati poku yeva atambululo a vakuetu? (b) O lekisa ndati olopandu poku yevelela atambululo a pamisa?

6 Tu lipamisa pakati eci tu eca atambululo. (Tanga Va Heveru 10:24, 25.) Vosi yetu tu sole calua oku yeva atambululo a litepa kolohongele. Tu sanjukavo poku yeva omõla umue utito eca etambululo lutima wosi. Handi vali, tu sanjuka calua poku yeva umue o lombolola ndomo opa esilivilo kocinimbu cimue. Tu pandiya calua vana va ‘kuete utõi’ woku eca atambululo, ndaño okuti vakuete osõi, ale ka va vangula ciwa elimi lietu. (1 Va Tes. 2:2) Nye tu sukila oku linga oco tu lekise okuti tua sanjukila alikolisilo avo? Tu sukila oku va pandula omo liatambululo avo noke liohongele. Tu ci lingavo poku eca atambululo etu. Momo poku eca atambululo ka tu lipamisa lika etu, tu pamisavo vakuetu.—Va Rom. 1:11, 12.

7. Tu kuatisiwa ndati poku eca atambululo?

 7 Tu likuatisa etu muẽle eci tu eca atambululo. (Isa. 48:17) Ndamupi? Tete, nda tua linga esokiyo lioku eca etambululo limue, ombili yetu yoku pongiya olohongele yi livokiya. Eci tu lipongiya ciwa, tu ka kuata elomboloko liwa Liondaka ya Suku. Kuenje osimbu tu amamako oku kuata elomboloko Liembimbiliya, tu kuatisiwa oku kapako ovina tua lilongisa. Vali, ka tu ka ecelela okuti utima wetu u lungayala. Tatu, omo okuti ci sukila alikolisilo alua oku eca atambululo, oku ci linga ci tu kuatisa oku patekela ovina tua popia.

8-9. (a) Ndomo ca lomboluiwa kelivulu lia Malakiya 3:16, Yehova o liyeva ndati eci tu eca atambululo? (b) Pole, ocitangi cipi vamue va kuete?

8 Yehova o sanjuka eci tu lekisa ekolelo lietu vocakati catambululo. Tu koleli okuti Yehova o tu yeva kuenda wa kapako a likolisilo etu oku eca atambululo kolohongele. (Tanga Malakiya 3:16.) Eci tu likolisilako oku sanjuisa Yehova, eye o tu sumũlũisa.—Mal. 3:10.

9 Ocili okuti tu kuete asunga alua oku eca atambululo kolohongele. Pole, vamue va kuete usumba woku votola ovaka. Nda okuti wa siata oku liyaka locitangi caco, ku ka sumue. Tu konomuisa ovolandu amue Embimbiliya kuenda olonumbi vimue vi pondola oku tu kuatisa oku eca atambululo kolohongele.

NDOMO TU YULA USUMBA

10. (a) Usumba upi vosi yetu tu kuete? (b)  Momo lie hacĩviko oku kuata usumba waco?

10 Anga hẽ olonjanja viosi eci o sima oku votola eka vimo mu tieña? Nda oco, haveko lika. Ocili okuti, valua pokati ketu va kuete usumba woku eca atambululo. Oco o yule usumba waco, o sukila oku kũlĩhisa eci ca siata oku ku kokela sumba. Anga hẽ o kuete usumba woku ivala eci o yongola oku vangula? O sima hẽ okuti etambululo liove li  sule okuti liavakuene lia velapo? Oku sakalala lovina evi ca sunguluka. Eci ci lekisa okuti ove wa liketisa loku velisapo vakuene. Yehova o sole ocituwa caco. (Osa. 138:6; Va Fil. 2:3) Pole, Yehova o yongolavo okuti ove u sivaya loku pamisa vamanji kolohongele. (1 Va Tes. 5:11) Yehova oku sole kuenda oku ĩha utõi o sukila.

11. Ovisonehua vipi vi pondola oku tu kuatisa?

11 Kũlĩhisa Ovisonehua vimue. Embimbiliya li popia okuti vosi yetu tua siata oku lueya kovina tu popia kuenda ndomo tu vi popia. (Tia. 3:2) Ci kale Yehova, ci kale vamanji ka va tu kisika oku lipua. (Osa. 103:12-14) Vamanji epata lietu kespiritu kuenda ovo va tu sole. (Mar. 10:29, 30; Yoa. 13:35) Ovo va kũlĩha okuti pamue atambululo etu ka a eciwa ndomo tua yonguile.

12-13. Nye tu lilongisa kulandu wa Nehemiya kuenda wa Yona?

12 Ovolandu amue Embimbiliya a pondola oku ku kuatisa oku yula usumba. Sokolola kulandu wa Nehemiya. Eye wa vumba kelombe lia soma umue wa kemãlele. Nehemiya wa sumuile calua, omo wa yeva okuti ovimbaka lolombundi vio Yerusalãi via lunduiwa. (Neh. 1:1-4) Sokolola usumba eye a kuata eci soma o pula esunga lieci a sumuila! Nehemiya lonjanga yalua wa likutilila kuenje wa eca etambululo. Etambululo lia soma lia kuatisa afendeli va Suku. (Neh. 2:1-8) Sokololavo kulandu wa Yona. Eci Yehova o pinga oco a ka vangule lolonungi vio Ninivei, Yona wa yeva usumba kuenje wa enda konele yikuavo. (Yona 1:1-3) Lekuatiso lia Yehova, Yona wa tẽlisa ocikele caye. Olondaka a popia via kuatisa va Ninivei. (Yona 3:5-10) Nye tua lilongisa kovolandu a-a? Ku Nehemiya, tua lilongisa okuti ci kuete esilivilo oku likutilila osimbu handi ka tua tambuluile. Ku Yona, tua lilongisa okuti ndaño tu kuete usumba walua, Yehova o tu kuatisa oku u vumba. Oku eca atambululo vekongelo ca leluka vali, okuti oku eca esapulo liesombiso ku va Ninivei ca tĩla.

13 Ovina vipi vi pondola oku ku kuatisa oku eca atambululo a vetiya kolohonge? Tu kũlĩhĩsi vimue pokati kovina viaco.

14. Momo lie tu sukilila oku pongiya ciwa olohongele vietu kuenda vapuluvi api?

14 Pongiya olonepa viosi viohongele. Eci o linga esokiyo lioku lipongiya ciwa, o tula utima poku eca atambululo. (Olosap. 21:5) Ocili okuti, vosi yetu tu kuete asokiyo a litepa oku pongiya olohongele. Manji Eloise, cimbumba umue o kuete 80 kanyamo, o fetika selo vosemana oku pongiya Utala Wondavululi. Eye wa popia hati: “Ndi kuata vali esanju oku kala kolohongele nda nda lipongiya selo.” Manji Joy, okuti kupange o talavaya eteke liosi, o sokiya otembo vo Casapalo oco a pongiye Utala  Wondavululi. Eye wa popia hati: “Ci ñuatisa oku ivaluka ovina nda pongiya osimbu sia endele kohongele.” Manji Ike, okuti ukulu wekongelo haiye ukundi wotembo yosi wa popia hati: “Kokuange ci leluka vali oku pongiya kamue kamue vokuenda kuosemana, oku pongiya vonjanja yimosi ca ndi tĩlila.”

15. O pondola oku pongiya ndati ciwa olohongele?

15 Nye ca kongela voku pongiya ciwa olohongele? Apa handi kua fetikile oku pongiya, likutilila ku Yehova oku pinga espiritu sandu. (Luka 11:13; 1 Yoa. 5:14) Noke, kũlĩhĩsa ovina viosi via kongela vocipama o yongola oku pongiya. Konomuisa osapi, otulosapi, oviluvialuvia kuenda alomboluilo akuavo. Osimbu o lilongisa ocinimbu locinimbu, likolisilako oku tanga onepa yalua yovisonehua. Sokolola kovina o kasi oku tanga ca piãla enene ketosi o yongola oku tambulula. Nda wa lipongiya ciwa, o kopako esilivilo lialua kuenda ci leluka oku eca atambululo.—2 Va Kor. 9:6.

16. Ovimalẽho vipi vi pondola oku ku kuatisa kuenda o talavaya lavio ndati?

16 Nda citava pongiyila vo tablet ale vovimalẽho vikuavo kelimi liove. Yehova vocakati cocisoko caye wa siata oku tu ĩha ovipama tu pondola oku tapa vo tablet ale vo telefone oco vi tu kuatise oku pongiya olohongele. O JW Library® o ocimalẽho cimue ci tu kuatisa oku tapa alivulu elilongiso vo tablet ale vovimalẽho vikuavo. Kuenje tu pondola oku lilongisa, ale oku tanga pamue oku yevelela ocipama kalivala osi kuenda povitumãlo viosi. Vamue va ci linga eci va enda kupange, kosikola, ale vokuenda kuepuyuko. O Watchtower Library kuenda o Watchtower ONLINE LIBRARYyi kuatisa oku linga akonomuiso katosi ocipama tu yongola oku kuata vali elomboloko.

Vapuluvi api wa siata oku pongiya olohongele? (Tala ovinimbu 14-16) *

17. (a) Momo lie ci kuetele esilivilo oku pongiya atambululo alua? (b) Nye wa lilongisa vovideo losapi hati Kala Ekamba Lia Yehova—Pongiya Etambululo Liove?

17 Nda citava pongiya atambululo alua. Momo lie? Momo pamue eci o tulika okuokuo vonjanja yatete ka va ku ilika. Pamue manji o songola, ilika omunu ukuavo. Oco ohongele yipue velivala lia sokiyiwa, manji o songola pamue ka pondola oku ilika vosi va tulika ovoko oco va ece atambululo. Omo liaco, ku ka sumue nda manji o songola kefetikilo ka ku ilikile. Nda wa pongiya atambululo alua, o ka kuata apuluvi oku tambulula apulilo akuavo. Amue pokati katambululo o sukila oku eca, oku tanga ocisonehua cimue. Pole, nda citava pongiya etambululo limue volondaka viove muẽle. *

18. Momo lie ci kuetele esilivilo oku eca atambululo a teta onimbu?

 18 Eca atambululo a teta onimbu. Olonjanja vimue atambululo a teta onimbu a pamisa vali. Omo liaco, likolisilako oku ci linga. Likolisilakovo okuti etambululo liove ka li pitãhala 30 kolosengundu. (Olosap. 10:19; 15:23) Nda o kasi ale anyamo alua, oku eca atambululo kolohongele, o sukila oku eca ongangu yiwa yoku teta onimbu katambululo ove. Nda o vangula calua poku eca etambululo, vakuene va ka sima okuti ka va ka tẽla oku eca etambululo ndeli liove. Handi vali, atambululo a teta onimbu a ecavo ku vamanji vakuavo epuluvi lioku eca atambululo avo. Nda ove wa ilikiwa tete oku tambulula, teta onimbu kepulilo lia lingiwa. Ku ka tukule atosi osi a sangiwa vocinimbu. Nda etosi lia velapo liocinimbu lia tambuluiwa ale, ove o pondola oku tukula atosi akuavo.—Tanga okakasia “ Nye Ndi Pondola Oku Tambulula?

19. Manji o songola o pondola oku ku kuatisa ndati, pole, nye o sukila oku linga?

19 Sapuila manji o songola ocinimbu o yongola oku tambulula. Nda oco wa nõlapo, ci linga osimbu ohongele ka ya fetikile handi. Eci ci pitĩla otembo yoku tambulula ocinimbu caco, votola lonjanga eka loku litulika ciwa oco manji o songola a ku mole.

20. Ohongele yi sokisiwa ndati ndokulila kumosi lakamba?

20 Tenda olohongele ndepuluvi limue lioku lia lakamba. Sokolola okuti akamba vamue vekongelo va ku laleka konanya yimue kuenje va ku pinga oco o nene cimue coku lia. O liyeva hẽ ndati? Ocili okuti pamue o sakalala, pole, o likolisilako oku linga cosi ci tava oco o pongiye cimue ci ka sanjuisa vosi. Yehova eye wa tu laleka kolohongele kuenje wa tu pongiyila omesa yeyuka ovina vialua viwa. (Osa. 23:5; Mat. 24:45) Eye o sanjuka nda tu nena cimue okuti tu ceca lutima wosi. Omo liaco, lipongiya ciwa kuenda lianja poku eca atambululo ove. Kuenje nda wa ci linga, ku ka lia ño komesa ya Yehova, pole, o ka ecavo cimue oco ci kuatise ekongelo.

OCISUNGO 2 Yehova Oyo Onduko Yove

^ tini. 5 Ndeci Daviti, vosi yetu tu sole Yehova kuenda tu sanjukila oku u sivaya. Tu kuete epuluvi lilikasi lioku lekisa ocisola cetu ku Suku eci tu eca atambululo kolohongele. Pole, vamue va kuete ohele yoku eca atambululo kolohongele. Nda o kuete ocitangi caco, ocipama cilo ci ku kuatisa oku yula ocitangi caco.

^ tini. 17 Tala ovideo vo jw.org, losapi hati, Kala Ekamba Lia Yehova—Pongiya Etambululo Liove. Vonepa hati: ALONGISO EMBIMBILIYA > OMÃLA.

^ tini. 63 ELOMBOLUILO YOCILUVIALUVIA: Vamanji va sanjuka omo lioku eca atambululo kelilongiso Liutala Wondavululi.

^ tini. 65 ELOMBOLUILO YOCILUVIALUVIA: Vamanji vamue okuti va lekisiwa ale kelitalatu liatete, va kasi oku pongiya ohongele. Ndaño okuti va kuate apuluvi a litepa, pole, vosi yavo va sanda otembo yoku lilongisa ovipama viohongele.