Skip to content

Skip to table of contents

Olombangi Via Yehova

Select language Umbundu

 Ocipama Celilongiso 4

Ceci Ocipito Condalelo ci tu Longisa Catiamẽla Kosoma Yokilu

Ceci Ocipito Condalelo ci tu Longisa Catiamẽla Kosoma Yokilu

“Eci ci lomboloka etimba liange. . . Eci ci lomboloka ‘osonde yange yocisila.’”​MAT. 26:26-28.

OCISUNGO 16 Sivayi Yehova Omo Liomõlaye Una wa Nõliwa

OVINA TU LILONGISA *

1-2. (a) Momo lie tu popela tuti, Yesu wa linga ocipito colofa viaye lonjila yimue ya leluka? (b) Ovituwa vipi via Yesu tu konomuisa?

O PONDOLA hẽ oku lombolola eci ca pita Konjivaluko yolofa via Kristu? Ocili okuti, valua pokati ketu tu ivaluka ovina via lingiwa Kocipito Condalelo ya Ñala. Momo lie? Momo ocipito caco ca lingiwa lonjila yimue ya leluka. Pole, ocipito caco ci kuete esilivilo lia velapo. Omo liaco, tu sukila oku lipula ndoco, ‘Momo lie ocipito caco ca lingiwila lonjila yimue ya leluka?’

2 Yesu kupange waye woku kunda palo posi, wa kũlĩhĩwile omo lioku longisa ocili lonjila yimue ya leluka, yi teta onimbu haiyo ya lomboloka. (Mat. 7:28, 29) Cimuamue haico okuti, poku linga ocipito * colofa viaye wa ci linga lonjila yimue ya leluka. Tu kũlĩhĩsi lutate ocipito caco kuenda ovina Yesu a popia levi a linga. Tu ka sola calua oku kũlĩha ndomo Yesu a lekisa umbombe, utõi kuenda ocisola. Tu lilongisavo ndomo tu pondola oku u setukula ciwa.

YESU EMBOMBE

Konjivaluko ombolo lovinyu yi tu ivaluisa okuti Yesu wa eca omuenyo waye kokuetu kuenda cilo kilu wa linga Soma yetu (Tala ovinimbu 3-5)

3. Ndomo ca lomboluiwa kelivulu lia Mateo 26:26-28, onjila yipi ya leluka Yesu a kuama Kocipito Conjivaluko kuenda ombolo lovinyu vi lomboloka nye?

3 Yesu wa tumbika ocipito coku ivaluka olofa viaye eci a kala kumue 11 kovapostolo vakuekolelo. Eye wa tikula ombolo lovinyu via supile Kopaskoa kuenda wa linga lavio  ocipito conjivaluko. (Tanga Mateo 26:26-28.) Eye wa kuata lika ombolo ka yi kuete etumbisa lovinyu ya kalapo ale. Yesu wa sapuila ovapostolo vaye okuti ombolo yi lomboloka etimba liaye lia lipua kuenda ovinyu osonde yaye yina a laikele oku eca kokuavo ndocilumba. Citava okuti ovapostolo ka va lekisile esakalalo ndomo ocipito caco ca lingiwa lonjila yimue ya leluka. Momo lie?

4. Elungulo lipi Yesu a eca ku Marta li tu kuatisa oku kuata elomboloko lieci Yesu a lingila ocipito conjivaluko lonjila yimue ya leluka?

4 Kũlĩhĩsa eci ca pita la Yesu vokuenda kuanyamo atatu wupange waye woku kunda, eci a ka nyũlile akamba vaye Lasaru, Marta kuenda Maria. Osimbu a kala lavo, wa fetika oku va longisa. Marta haipo a kala, pole, wa sakalala loku pongiya ovina vialua viokulia kakombe. Eci Yesu a ci mola, locisola wa lungula Marta kuenda wo kuatisa oku limbuka okuti oku pongiya ovina vialua olonjanja vimue ka ci sukiliwa. (Luka 10:40-42) Noke yolowola vimue osimbu Yesu ka ecele omuenyo waye ndocilumba, wa kuama elungulo lina a eca ku Marta. Eye wa ci linga poku leluisa Ocipito Conjivakuko. Eci ci tu longisa nye catiamẽla ku Yesu?

5. Ocipito ca lingiwa lonjila ya leluka ci tu longisa nye catiamẽla ku Yesu kuenda ci li kuata ndati lolondaka vi sangiwa kelivulu lia Va Filipoi 2:5-8?

5 Kovina viosi Yesu a vangula levi a linga, wa lekisa umbombe. Omo liaco, ka ci tu komõhisa oku kũlĩha okuti wa lekisa umbombe kuteke wa sulako womuenyo waye palo posi. (Mat. 11:29) Eye wa kũlĩhĩle okuti wa laikele oku eca omuenyo waye ndocilumba coku yovola omanu kuenda Yehova wa ponduile oku u pindula oco a kale osoma kilu. Kuenje ndaño ndoco, eye ka sandele oku sivayiwa lomanu loku kisika oku linga ocipito cimue ca kemãla colofa viaye. Pole, wa sapuila olondonge viaye oco va ivaluke olofa viaye onjanja yimosi vunyamo poku linga ocipito cimue lonjila ya leluka. (Yoa. 13:15; 1 Va Kor. 11:23-25) Onjila ya kuamiwa yi lekisa okuti, Yesu ka kaile omunu umue ukuepela. Tu sanjuka oku kũlĩha okuti Soma yetu wokilu embombe.​—Tanga Va Filipoi 2:5-8.

6. Tu setukula ndati umbombe wa Yesu eci tu liyaka lovitangi?

6 Tu setukula ndati umbombe wa Yesu? Poku pitisa kovaso olonjongole via vakuetu. (Va Fil. 2:3, 4) Sokolola kuteke wa  sulako womuenyo wa Yesu palo posi. Eye wa kũlĩhĩle okuti ndopo o laika oku talisiwa ohali loku pondiwa. Pole, ndaño ndoco, wa pitisile kovaso olonjongole viovapostolo vaye vakuekolelo, okuti va laikele oku sumua calua omo liolofa viaye. Omo liaco vuteke wa sulako, Yesu wa kala lolondonge viaye oku va longisa, oku va pamisa kuenda oku va lembeleka. (Yoa. 14:25-31) Yesu lumbombe wa lekisa esakalalo lialua ku vakuavo okuti kokuaye muẽle ci sule. Hangangukuoyo yiwa eye a tu sila!

YESU UKUOTÕI

7. Yesu wa lekisa ndati utõi noke Yocipito Condalelo ya Ñala?

7 Yesu noke yoku linga Ocipito Condalelo ya Ñala, wa sukilile oku lekisa utõi walua. Ndamupi? Yesu wa tava okuti ocipango ca Isiaye ci tẽlisiwa vokuaye, ndaño wa kũlĩhĩle okuti oku ci linga ca laikele oku u nenela olofa viesepu ndongangala. (Mat. 26:65, 66; Luka 22:41, 42) Yesu wa pandikisa toke kesulilo, oco a kemainye Isiaye Yehova kuenda oku teyuila uviali wa Suku, loku ecelela okuti omanu vana va likekembela va kuata omuenyo ko pui. Handi vali, Yesu wa pongiya olondonge viaye kovitangi va laikele oku kuata.

8. (a) Ovina vipi Yesu a sapuila ovapostolo vaye vakuekolelo? (b) Noke lianyamo amue yolofa via Yesu, olondonge viaye via lekisa ndati ongangu yiwa yutõi?

8 Yesu wa lekisavo utõi poku yuvula oku sakalala locitangi caye muẽle, pole, wa tiamisila utima kovina ovapostolo vaye vakuekolelo va sukilile. Ocipito conjivaluko ca lingiwa noke lia Yuda oku tunda, ca laikele oku ivaluisa vana va ponduile oku kala olombuavekua okuti, va kuatisiwa losonde ya Yesu kuenda oku panga onepa kocisila  cokaliye. (1 Va Kor. 10:16, 17) Oco a va kuatise oku taviwa oku enda kilu, Yesu wa sapuila olondonge viaye oco va linge ovina eye kumue la Isiaye va lavoka kokuavo. (Yoa. 15:12-15) Yesu wa sapuilavo ovapostolo ovitangi va laikele oku liyaka lavio. Pole, wa va vetiya oku kuama ongangu yaye loku va sapuila hati, “kuati utõi!” (Yoa. 16:1-4a, 33) Noke lianyamo alua, olondonge via Yesu viamamako oku kuama ongangu yaye loku lekisa utõi. Ndaño va liyaka lovitangi vialua, va likuatisa pokati koloseteko viosi.—Va Hev. 10:33, 34.

9. Tu kuama ndati ongangu ya Yesu yoku lekisa utõi?

9 Cimuamue haico okuti koloneke vilo, tu kuãivo ongangu ya Yesu yoku lekisa utõi. Ndeci, ci sukila utõi walua oco tu kuatise vamanjetu va kasi oku lambalaliwa omo lioku kolela Yehova. Olonjanja vimue, vamanji va kapiwa vokayike ndaño ka va kuete eko. Eci kuiya ovitangi viaco, tu linga cosi citava oco tu va kuatise. (Va Fil. 1:14; Va Hev. 13:19) Onjila yikuavo yoku lekisa utõi poku amamako oku kunda “lutõi.” (Ovil. 14:3) Ndeci Yesu a linga, etu tua nõlapo oku kunda esapulo Liusoma, ndaño omanu valua va tu suvuka kuenda va tu lambalala. Pole, olonjanja vimue tu limbuka okuti ka tu kuete utõi. Nye tu sukila oku linga?

10. Osimbu Ocipito Condalelo ka ca pitilile, nye tu sukila oku linga kuenda momo lie?

10 Tu pondola oku pamisa utõi wetu poku sokolola kueci ocilumba cocisembi ca Kristu ca tu lingila. (Yoa. 3:16; Va Efe. 1:7) Kosemana Yonjivaluko tu kuete epuluvi lilikasi lioku lekisa olopandu kocisembi. Vokuenda kuosemana yaco, tu ka tanga Ovisonehua viatiamẽla Konjivaluko loku sokolola kovolandu olofa via Yesu. Eci tu kala Kocipito Condalelo ya  Ñala, tu ka kuata elomboloko liwa yovinyu lombolo yi ka lekisiwa Konjivaluko kuenda eci ocilumba caco ci lomboloka. Eci tu limbuka ovina Yesu kuenda Yehova va siata oku tu lingila loku limbuka ndomo ovina viaco vi tu kuatisa, ocisola lelavoko lietu vi pamisiwa calua kuenda tu vetiyiwa oku pandikisa lutõi toke kesulilo.​—Va Hev. 12:3.

11-12. Nye tua lilongisa toke cilo?

11 Toke cilo, tua lilongisa okuti Ocipito Condalelo ya Ñala ka ci tu ivaluisa lika ocisembi ca Yesu, pole, ci tu ivaluisavo ovituwa viwa viumbombe kuenda viutõi Yesu a lekisa. Tu eca olopandu omo okuti, Yesu o kasi oku amamako locituwa caco Ndocitunda cetu Cinene kilu kuenda o kasi oku tu pingilako! (Va Hev. 7:24, 25) Oco tu lekise olopandu lutima wosi, tu sukila oku ivaluka olofa via Yesu, ndomo eye a ci handeleka. (Luka 22:19, 20) Etu tu ivaluka eteke liaco lilikuata 14 ya Nisana, okuti olio eteke lia velapo vunyamo.

12 Kocipito Condalelo ya Ñala, tu pondola oku limbuka ocituwa cikuavo ca vetiya Yesu oku tu fila. Eci eye a kala palo posi wa kũlĩhĩwile omo liocituwa caco. Cipi ca kala ocituwa caco?

YESU UKUACISOLA

13. Ocisola ca Yehova la Yesu ca lomboluiwa ndati kelivulu lia Yoano 15:9; 1 Yoano 4:8-10 kuenda helie o kuatisiwa locisola cavo?

13 Yesu wa setukula ciwa ocisola ca Yehova poku ci lekisa kokuetu kovina viosi eye a linga. (Tanga Yoano 15:9; 1 Yoano 4:8-10.) Ca velapo ceci okuti, Yesu wa vetiyiwa oku eca omuenyo waye kokuetu oco a tu yovole. Ci kale okuti tu panga onepa kolombuavekua, ale ‘kolomeme vikuavo,’ vosi yetu tu kuatisiwa locisola Yehova kumue lomõlaye va lekisa kokuetu omo liocisembi. (Yoa. 10:16; 1 Yoa. 2:2) Sokololavo kovina vi kuamiwa kocipito Conjivaluko; ovio vi sitululavo ocisola ca Yesu kuenda ci lekisa okuti wa kapeleko olondonge viaye. Ndamupi?

Yesu locisola calua wa tumbika ocipito Conjivaluko okuti ca lingiwa lonjila ya leluka oco ci ivalukiwe tunde kotembo yaco toke koloneke via laikele oku iya kuenda ci lingiwa vakalo a litepa (Tala ovinimbu 14-16) *

14. Volonjila vipi Yesu a lekisa ocisola kolondonge viaye?

14 Yesu wa lekisa ocisola kolondonge viaye via nõliwa lespiritu sandu, poku linga ocipito lonjila yimue ya leluka oco va ci kuame. Vokuenda kuotembo olondonge olombuavekua, via sukila oku linga ocipito caco Conjivaluko unyamo lunyamo, vakalo a litepa, oku kongelamo vokayike. (Esit. 2:10) Anga hẽ va tẽla oku pokola ku Yesu? Ocili okuti va pokola!

15-16. Vekalo lipi vamue va siata oku linga Ocipito Condalelo ya Ñala?

15 Tunde kocita catete toke cilo, Akristão vocili va siata oku likolisilako oku linga onjivaluko yolofa via Yesu. Poku linga Ocipito Condalelo ya Ñala, ovo va likolisilako ndaño lovitangi. Kũlĩhĩsa ulandu ukuãimo. Eci manji Harold King a kala vokayike kofeka yo China, wa linga cosi ci tava oco a linge ocipito Conjivaluko. Vuyombeki, eye wa pongiya ombolo lovinyu Yonjivaluko, poku kuama ovina a kuata. Handi vali, lutate walua wa enda oku patekela eteke Lionjivaluko. Eci otembo yonjivaluko ya pitĩla eye lika liaye vokayike, wa imba ocisungo, wa likutilila kuenda wa linga ohundo.

16 Kũlĩhisa ulandu ukuavo. Ocimunga cimue ca vamanji akãi, okuti va kala vocila coku talisiwa ohali vokuenda Kuyaki Wavali wa pita Voluali Luosi, va kapa omuenyo wavo kohele oco va linge Ocipito Condalelo ya Ñala. Omo okuti ovina via kuamiwa kocipito caco ca lingiwa lonjila ya leluka, ovo vuyombeki va tẽla oku linga Onjivaluko. Ovo va lombolola hati: “Etu tua liongoluila  pamosi, komangu ya kala vokati tua yalako onanga yi yela kuenje tua kapako ovinyu lombolo. Tua taimisa ovela momo olusu nda ya situlula eci tua kala oku linga vohondo. . . . Tua enda oku pitulula olohuminyo tua linga ku Yehova oco tu amameko oku kemãlisa onduko Yaye yi kola.” Ovo va lekisa ekolelo lialua! Yesu wa lekisa ocisola calua poku linga Onjivaluko lonjila yimue ya leluka, oco cecelele okuti vosi va ci linga ndaño va sangiwa lovitangi!

17. Apulilo api tu sukila oku linga?

17 Osimbu Ocipito Conjivaluko ci panda ocipepi, tu sukila oku lipula ndoco: ‘Ndi setukula ndati ocisola Yesu a lekisa? Anga hẽ nda kapako asukila a vamanji, ale nda likapakoño ame muẽle? Anga hẽ ndi kisika vamanji kovina ka va pondola oku linga, ale nda kapako ekalo liavo? Olonjanja viosi tu setukuli Yesu poku ‘kala vakuahenda.’—1 Pet. 3:8.

IVALUKA OLONUMBI EVI OTEMBO YOSI

18-19. (a) Ekolelo lipi tu kuete? (b) Nye wa nõlapo oku linga?

18 Ocikundi coku Ivaluka olofa via Yesu ndopo, ci ka sulila. Eci Yesu a ‘keya’ vokuenda kuohali ya piãla, eye o kongolola ocisupe ca “vana va nõliwa” oco va ende kilu kuenje ocipito Conjivaluko ci ka sulila.—1 Va Kor. 11:26; Mat. 24:31.

19 Ndaño ceci ocipito Conjivaluko ci ka sulila, tu koleli okuti afendeli va Yehova, va ka ivaloka ocipito caco ndocindekaise cimue ca lekisiwa lumbombe, lutõi kuenda ocisola okuti laumue wa lekisile ovituwa viaco. Kotembo yaco, vana va enda oku linga ocipito caco, va ka lomboluila vana va ka kala kotembo yaco, ndomo vosi va kuatisiwa locipito caco. Pole, oco tu kuatisiwe locipito caco, tu sukila oku setukula cilo umbombe wa Yesu, utõi waye kuenda ocisola caye. Nda tua ci linga tu ka tambula onima yetu ku Yehova.—2 Pet. 1:10, 11.

OCISUNGO 13 Kristu Eye Ongangu Yetu

^ tini. 5 Ndopo tu ka kala Kocipito Condalelo ya Ñala oco tu ivaluke olofa via Yesu Kristu. Ocipito caco, ci tu longisa calua catiamẽla kumbombe, kutõi kuenda kocisola ca Yesu. Vocipama cilo, tu lilongisa ndomo tu setukula ovituwa evi viwa Yesu a lekisa.

^ tini. 2 ONDAKA YA LOMBOLUIWA: Ocipito conjivaluko ci lomboloka oku linga cimue ci likasi locimãho coku ivaluka kuenda oku lekisa esumbilo komunu, ale kocipito cimue.

^ tini. 56 ELOMBOLUILO YOCILUVIALUVIA: Afendeli vakuekolelo kocita catete va kasi oku linga ocipito Conjivaluko; kesulilo liunyamo 1800 Vocila coku kangisila omanu; kuenda koloneke vietu Vonjango yimue Yusoma ka ya sitikiwile, Kombuelo yo Amerika kotembo yowuya.