Skip to content

Skip to table of contents

Olombangi Via Yehova

Select language Umbundu

 OCIPAMA CELILONGISO 14

O Kasi hẽ Oku Tẽlisa Ciwa Upange wa Yehova?

O Kasi hẽ Oku Tẽlisa Ciwa Upange wa Yehova?

“Amamako oku kunda olondaka viwa, tẽlisa upange wove u kola.”—2 TIM. 4:5, etosi.

OCISUNGO 57 Oku Kundila Omanu Vos

OVINA TU LILONGISA *

Noke liepinduko lia Yesu, eye wa lisanga lolondonge viaye kuenda wa vi handeleka hati, “kuendi kalongisi omanu . . . oco va linge olondonge“ (Tala ocinimbu 1)

1. Afendeli vosi va Suku nye va yongola oku linga kuenda momo lie? (Tala ociluvialuvia koñoño.)

KRISTU YESU wa handeleka olondonge viaye okuti, “kuendi, ka longisi omanu vo kolofeka viosi.” (Mat. 28:19) Afendeli vosi va Suku vakuekolelo, va yongola oku lilongisa ndomo va pondola oku “tẽlisa upange” woku kunda, una ovo va tambula. (2 Tim. 4:5) Tua kũlĩha okuti upange waco wa velapo, u kuete esilivilo lialua kuenda wonjanga okuti ovina vikuavo vi sule. Pole, pamue ci tĩla oku kuata otembo yalua yoku kunda ndomo tu yongola.

2. Ovitangi vipi vi pondola oku tu tateka oku tẽlisa ciwa upange wa Suku?

2 Kuli ovopange akuavo a kuete esilivilo okuti a pesela otembo yalua kuenda ongusu yetu. Pamue tu talavaya olowola vialua veteke kupange woku sanda eteku oco tu tekule epata lietu kuenda etu muẽle. Ale, tu liyaka lovitangi vimue vepata ndeci, oku vela, esumuo kuenda oku kuka. Oco hẽ, tu tẽlisa ndati ciwa upange wa Suku, osimbu tu liyaka lovitangi viaco?

3. Nye ci lomboloka olondaka via Yesu vi sangiwa kelivulu lia Mateo 13:23?

3 Nda ekalo lietu ka liecelela oku linga ovina vialua kupange wa Yehova, ku ka sumue. Yesu wa kũlĩha okuti ka tu pondola oku ungula onjongo yimuamue yapako Wusoma. (Tanga Mateo 13:23.) Yehova wa kapako cosi tu linga kupange waye, osimbu tu linga ovina vi likuata lepondolo lietu. (Va Hev. 6:10-12) Handi vali, pamue tu liyeva okuti ekalo lietu li tu ecelela oku vokiya kupange wetu. Vocipama cilo, tu konomuisa ndomo tu pondola oku pitisa kovaso upange woku kunda,  oku amamako oku leluisa omuenyo wetu kuenda ndomo tu mioñoloha koku kunda loku longisa. Tete, nye ci lomboloka oku tẽlisa ciwa ocikundi cetu coku kunda?

4. Nye ci lomboloka oku tẽlisa ciwa upange wa Yehova?

4 Oku tẽlisa ciwa upange wa Yehova, ci lomboloka oku likolisilako oku kunda kuenda oku longisa ndomo ci likuata lepondolo lietu. Pole, eci ka ci lomboloka okuti te tua eca etendelo lialua liolowola. Ombili tu lekisa kupange waco, oyo ya velapo ku Yehova. Omo okuti tu sole Yehova kuenda omanu, tu linga upange woku kunda lutima wosi. * (Mar. 12:30, 31; Va Kol. 3:23) Oku vumba Suku lutima wosi ci lomboloka oku lieca olumue kupange waye, loku talavaya longusu yetu yosi kuenda lovoloño etu. Eci tu tenda upange woku kunda ndesumũlũho linene, ci tu vetiya oku sapuila omanu vosi olondaka viwa Viusoma.

5-6. Tukula ocindekaise ci lekisa ndomo omunu o kuete otembo yitito a pondola oku pitisa kovaso ovopange wusoma.

5 Sokolola umalẽhe umue o sole oku sika oviyola. Eye o sanjukila oku sika olonjanja viosi cu ecelela. Kasulilo olosemana, wa siata oku sikila povitumãlo vioku landa okafe. Pole, olombongo a nganyala ka vi tẽla, oco a lande ovina a yongola. Omo liaco, oku upisa Vosegunda toke Votãlo o talavaya vovenda yimue. Ndaño okuti o pita otembo yalua vovenda utima waye wa u tiamisila lika kovisikilo. Eye o yongola oku mioñolola uloño waye woku sika kuenda oku litumbika kupange woku kala onjimbi otembo yosi. Omo liaco, eye o sanda oku sika kapuluvi osi ndaño votembo yitito.

6 Cimuamue haico okuti, pamue ku kuete otembo yalua yoku kunda. Ndaño ndoco, ove o sanjukila oku linga upange waco. O pondolavo oku likolisilako oku mioñoloha kuloño wove woku vetiya ovitima viomanu lolondaka viwa. Omo okuti o kuete ovina vialua vioku linga, pamue o lipula nda o ka tẽla muẽle oku pitisa kovaso upange woku kunda.

 NDOMO O PITISA KOVASO UPANGE WOKU KUNDA

7-8. Tu setukula ndati Yesu kupange woku kunda?

7 Yesu wa lekisa ongangu yiwa kupange woku kunda. Eci ca velelepo komuenyo waye oku vangula eci catiamẽla Kusoma wa Suku. (Yoa. 4:34, 35) Eye wa linga ovongende alua oco a kundile omanu. Wa enda oku sanda apuluvi oku sapela lomanu kolonjo viavo kuenda povitumãlo pa sangiwa omanu valua. Yesu wa velisilepo upange woku kunda.

8 Tu pondolavo oku setukula Yesu poku sanda otembo yoku sapuila omanu olondaka viwa kovitumãlo viosi. Tua nõlapo oku yuvula oku pitisa kovaso olonjongole vietu muẽle, oco tu litumbike kupange woku kunda. (Mar. 6:31-34; 1 Pet. 2:21) Vamue vekongelo, va pondola oku kala akundi valikasi, akundi votembo yosi kuenda akundi vasokamo. Vakuavo, va lilongisa elimi likuavo, ale oku ilukila oku kuli esukila liakundi. Pole, onepa yalua yupange woku kunda, yi kasi oku lingiwa lakundi vana okuti ekalo liavo ka li va ecelela oku panga onepa kovopange aco. Nda tu linga calua, ale citito Yehova ka tu kisika oku linga eci ka tu tẽla. Eye o yongola okuti tu kuata esanju kupange wetu woku sandeka ‘ulamba wolondaka viwa via Suku ukuesanju.’—1 Tim. 1:11; Esin. 30:11.

9. (a) Paulu wa lekisa ndati okuti wa pitisile kovaso upange woku kunda ndaño okuti wa lingailevo upange woku sanda eteku? (b) Ndomo ca tangiwa kelivulu Liovilinga 28:16, 30, 31, ocituwa cipi Paulu a lekisa kupange woku kunda?

9 Upostolo Paulu wa eca ongangu yiwa yoku pitisa kovaso upange woku kunda komuenyo waye. Eci a nyula olupale luo Korindo vokuenda kungende waye wavali wumisionaliu, eye wa kala lekambo liolombongo, omo liaco wa enda oku tunga olombalaka oco a litekule. Pole, oku tunga olombalaka, haicoko upostolo Paulu a velisilepo. Eye wa linga upange waco oco cu ecelele oku kunda olondaka viwa ku va Korindo “ocali.” (2 Va Kor. 11:7) Ndaño okuti Paulu wa sukilile oku linga upange woku sanda eteku, eye wa velisilepo upange woku kunda kuenje wa enda oku ci linga Volocasapalo viosi. Eci Paulu a limbuka okuti ekalo liaye liu wecelela oku vokiya upange waye kuenje wa litumbika koku kunda ondaka. Eye wa fetika, ‘oku eca uvangi ku va Yudea oco a lekise okuti Yesu eye Kristu.’ (Ovil. 18:3-5; 2 Va Kor. 11:9) Noke, eci Paulu a kala vokayike anyamo avali ko Roma, eye wa kundila vana va enda oku u nyula kuenda wa soneha ovikanda. (Tanga Ovilinga 28:16, 30, 31.) Paulu ka ecelele okuti cimue cu tateka oku kunda. Eye wa soneha hati: “Omo okuti tu kuete upange owu. . . , ka tu liwekapo.” (2 Va Kor. 4:1) Ndeci ca linga Paulu, ndaño okuti tu kuete upange woku sanda eteku, lopo tu pondola oku lekisa okuti Usoma wa Suku owo wa velapo komuenyo wetu.

Kuli olonjila vialua vioku tẽlisa upange wetu woku kunda (Tala ovinimbu 10-11)

10-11. Tu tẽlisa ndati ciwa upange wa Suku nda tu kasi lekambo liuhayele kuenda nye tu sukila oku linga?

10 Nda okuti ka tu tẽla oku kundila konjo lanjo omo lioku kuka, ale ekambo liuhayele, tu pondola oku kuama olonjila vikuavo vioku kunda. Kocita catete akundi va enda oku sandiliya omanu kovitumãlo viosi va sangiwa. Kapuluvi osi, va enda oku vangula ciatiamẽla kocili, konjo lanjo, volokololo lo kovitumãlo viosi ku sangiwa omanu ndeci, ku vana “va enda oku kala pocitanda eteke leteke.” (Ovil. 17:17; 20:20) Nda tu kuete ocitangi cimue ci tu tateka oku enda, tu pondola oku tumala pana pa pita omanu valua. Ale, tu pondola oku eca  uvangi ka wa sokiyiwile lekuatiso liovikanda, pamue lotelefone. Akundi vana okuti va kuete ocitangi caco, va limbuka esanju li tunda koku kuama onjila eyi.

11 Ndaño lekambo liuhayele, ove o pondola oku tẽlisa ciwa upange wa Suku. Tu konomuisi vali ulandu wa Paulu. Eye wa popia hati: “Kovina viosi ñuete ongusu mekonda lia una o nyĩha unene.” (Va Fil. 4:13) Paulu wa sukilile unene waco eci a vela kungende umue wumisionaliu. Eye wa sapuila va Galatia hati: “Omo liuvei wo ketimba, nda kuata epuluvi lioku vu kundili olondaka viwa onjanja ya tete.” (Va Gal. 4:13) Cimuamue haico okuti, ekambo liove liuhayele liu ku ĩha epuluvi lioku kundila vakuene olondaka viwa ndeci, kolondotolo, kovifumelu kuenda komanu vakuavo va kasi oku ku tata. Valua pokati komanu vaco va kasi kupange osimbu akundi va nyula olonjo viavo.

NDOMO AMAMAKO OKU LELUISA OMUENYO WOVE

12. Nye ci lomboloka oku amamako oku kuata iso “li lete ciwa”?

12 Yesu wa popia hati: “Ondiyelo yetimba iso. Nda iso liove li lete ciwa, [ale “oku luluvala ciwa,” etosi.] etimba liove liosi li kala locinyi.” (Mat. 6:22) Nye Yesu a yonguile oku popia? Eye wa yonguile oku popia okuti, tu sukila oku ambata omuenyo umue wa leluka, ale oku luluvalela lika kocimãho cimuamue okuti lacimue ci tu tateka. Yesu wa eca ongangu yiwa poku tiamisila omuenyo waye koku kunda kuenda wa longisa olondonge viaye oku tiamisila omuenyo wavo koku vumba Yehova loku kunda Usoma waye. Etu tu setukula Yesu eci tu pitisa kovaso upange wa Suku  komuenyo wetu okuti ‘tete tu sandiliya Usoma lesunga [lia Suku].’—Mat. 6:33.

13. Nye ci tu kuatisa oku tiamisila utima kupange woku kunda?

13 Onjila yimue yoku tiamisila utima kupange woku kunda, oku sanda otembo yoku kuatisa omanu vakuavo oku kũlĩha Yehova loku u sola. * Anga hẽ tu pondola oku tepulula otembo tu pesila kupange woku sanda eteku, oco tu kuate otembo yoku kunda vokuenda kuosemana? Tu pondola hẽ oku tepulula otembo yolomapalo vimue vi pesela otembo yalua?

14. Esokiyo lipi lia linga ohueli yimue, oco yi vokiye otembo yavo kupange woku kunda?

14 Ukulu umue wekongelo o tukuiwa hati Elias kumue lukãi waye, va kuama onjila yaco. Eye wa lombolola hati: “Ka tua ponduile oku kala akundi votembo yosi, pole, kua kala olonjila vikuavo tua ponduile oku kuama, oco tu vokiye otembo yetu kupange woku kunda. Ndeci, tua leluisa omuenyo wetu oco tu kuate otembo yalua yoku kunda. Kuenda tua fetika oku tetelẽla olombongo, oku tepulula otembo yovitalukilo kuenda tua pinga ku vacime cetu, oco va tu ecelele oku talavaya lika oloneke vimue vosemana. Eci ca tu kuatisa oku kuata otembo yoku kunda koloñolosi, oku songola alilongiso alua Embimbiliya kuenda oku kunda vokati kosemana olonjanja vivali vosãi. Esanjukuolio tua kuata!”

NDOMO O MIOÑOLOHA KULOÑO WOVE WOKU KUNDA KUENDA WOKU LONGISA

Poku kapako ovina tu lilongisa kolohongele vio vokati kosemana tu kuatisiwa oku amamako oku mioñolola uloño wetu woku kunda kuenda woku longisa

(Tala ovinimbu 15-16) *

15-16. Ndomo ca tangiwa kelivulu lia 1 Timoteo 4:13, 15, tu mioñoloha ndati kuloño wetu woku kunda? (Tanga okakasia losapi hati: “ Ovimãho vi Ñuatisa Oku Tẽlisa Ciwa Upange Woku Kunda.”)

15 Onjila yikuavo yoku tẽlisa ciwa upange woku kunda, oku mioñolola  uloño wetu kupange waco. Omanu vamue okuti va kuete ale uloño umue, va kisikiwa oku pindisiwa kuenda oku longisiwa olonjanja viosi, oco va mioñolole uloño wavo. Eci oco ca siatavo oku lipita lakundi Vusoma. Etu tu sukilavo oku amamako oku lilongisa ndomo tu mioñoloha kupange woku kunda.—Olosap. 1:5; tanga 1 Timoteo 4:13, 15.

16 Tuamamako ndati oku mioñoloha kupange woku kunda? Poku yevelela lutate kolonumbi tu tambula kolohongele osemana losemana Kekalo Lietu Tuakristão. Olohongele evi vi tu kuatisa oku amamako oku mioñoloha kuloño wetu kupange woku kunda. Omo liaco, eci usongui wohongele a eca alungulo ku vana va panga olonepa violondonge, vosi yetu tu sukila oku limbuka etosi li pondola oku tu kuatisa kupange woku kunda. Tu sukilavo oku kapako olonumbi viaco eci tu kundila omunu umue. Etu tu pondola oku pinga ekuatiso ku mitavaso yocimunga cupange woku kunda, ale oku talavaya laye kupange woku kunda, pamue oku talavaya lukundi ukuavo wa loñoloha, ukundi wotembo yosi, ale manji ukuakunyula akongelo. Osimbu tuamamako oku talavaya ciwa Locimalẽho Coku Longisa tu loñoloha koku kunda kuenda koku longisa.

17. Asumũlũho api o pondola oku kuata eci o tẽlisa ciwa upange woku kunda?

17 Tu kuete esumũlũho linene momo Yehova wa tu ĩha epuluvi lioku kala ‘olondingupange’ viaye! (1 Va Kor. 3:9) Eci ove o “kũlĩha ovina via velapo” loku tiamisila utima kupange woku kunda, o ka ‘vumba Yehova lesanju.’ (Va Fil. 1:10; Osa. 100:2) Omo okuti u ndingupange ya Suku, kolela okuti eye o ka ku ĩha ongusu o sukila oco o tẽlise ciwa upange woku kunda, ndaño wa siata oku liyaka lovitangi. (2 Va Kor. 4:1, 7; 6:4) Nda ekalo liove liecelela oku vokiya o tembo kupange woku kunda “o kuata esunga lioku sanjuka” eci o litumbika kupange waco lutima wosi. (Va Gal. 6:4) Eci ove o tẽlisa ciwa upange woku kunda, o lekisa ocisola ku Yehova kuenda kumanji wa tunda laye. “Poku ci linga o lipopela ove muẽle kuenda vana va ku yeva.”—1 Tim. 4:16.

OCISUNGO 58 Oku Sandiliya Vana va Sole Ombembua

^ tini. 5 Yesu wa tu handeleka oku kunda olondaka viwa Viusoma loku longisa omanu oco va linge olondonge. Vocipama cilo, tu konomuisa ndomo tu pondola oku tẽlisa upange wa Suku, ndaño tu liyaka lovitangi vialua. Tu konomuisavo ndomo tu pondola oku mioñoloha koku kunda kuenda ndomo tu vokiya esanju lietu poku linga upange waco.

^ tini. 4 OLONDAKA VIA LOMBOLUIWA: Vupange tu lingila Yehova mua kongela oku linga ovina vialua ndeci, oku kunda, oku longisa, oku tunga kuenda oku semulula ovitumãlo viusoma kuenda upange woku kuatisa vana va pita lovilunga.—2 Va Kor. 5:18, 19; 8:4.

^ tini. 13 Tanga atosi epanduvali vokakasia losapi hati, “Ndomo o Pondola Oku Leluisa Omuenyo WoveVutala Wondavululi Wevambi Linene wo 2016, kem. 8.

^ tini. 63 OVILUVIALUVIA: Manji umue ukãi o kasi oku linga ocindekaise ndomo ku lingiwa epasu kohongele yovokati kosemana. Osimbu usongui wohongele a eca alungulo, eye o yikula ombrochura yaye losapi hati, Litumbika Koku Tanga Kuenda Koku Longisa noke o soneha atosi atiamẽla kalungulo a kasi oku tambula. Kuenje kesulilo liosemana kupange woku kunda, eye o kapako ovina viosi a lilongisa kohongele.