Skip to content

Skip to table of contents

Olombangi Via Yehova

Select language Umbundu

 Ocipama Celilongiso 20

Ndomo tu Eca Elembeleko ku Vana va Putuiwa

Ndomo tu Eca Elembeleko ku Vana va Putuiwa

“Suku yelembeleko liosi . . . o tu lembeleka kohali yetu yosi.” 2 VA KOR. 1:3, 4.

OCISUNGO 134 Omãla Ombanjaile yi Tunda ku Suku

OVINA TU LILONGISA *

1-2. (a) Nye ci lekisa okuti omanu va lulikiwa lonjongole yoku lembelekiwa kuenda va kuete uloño woku linga nye? (b) Ovitangi vipi omãla vamue va siata oku liyaka lavio?

OMANU va lulikiwa lonjongole yoku lembelekiwa kuenda luloño woku lembeleka vakuavo. Ndeci, omõla poku papala pamue o kupuka loku lipunyula pongolo kuenje loku lila o lupukila ku Isiaye, ale ku Inaye. Olonjali ka vi kayisa epute liaco, pole, vi pondola oku lembeleka omõla. Ovo va pondola oku pula omõla esunga lieci a lilila, oku puenya asuelẽla aye, oku u lembeleka kuenda oku kapa ovihemba pepute liaco. Kuenje omõla o liwekapo oku lila noke o fetika vali oku papala. Vokuenda kuotembo epute li kaya.

2 Olonjanja vimue omãla va lemehiwa lonjila yimue yĩvi calua. Ndeci, omãla vamue va siata oku putuiwa. Oku putuiwa kuaco pamue ku lingiwa vonjanja yimosi lika, ale vokuenda kuanyamo alua. Kuenje omunu wa putuiwa o kala lesumuo lialua. Pamue omunu wa putula o kuatiwa loku kangisiwa. Pole, olonjanja vimue ci molẽha ndu okuti una wa putula ka kangisiwa. Ndaño okuti omunu waco wa kuatiwa loku kapiwa vokayike, omõla wa putuiwa amamako lesumuo liaco toke eci a linga ukulu.

3. Ndomo ca tangiwa ku 2 Va Korindo 1:3, 4, Yehova o likuminya oku linga nye kuenda apulilo api tu konomuisa?

3 Nda manji umue wa putuiwa eci a kala omõla kuenje toke cilo amamako lesumuo, nye ci pondola oku u kuatisa? (Tanga 2 Va Korindo 1:3, 4.) Yehova wa likuminya kolomeme viaye okuti va tambula ocisola kuenda elembeleko ovo va sukila. Omo liaco, tu konomuisa apulilo atatu: (1) Momo lie  vana va putuiwa eci va kala omãla, va sukilila elembeleko? (2) Helie o kuete ocikele coku eca elembeleko? (3) Tu pondola oku eca ndati elembeleko?

MOMO LIE ELEMBELEKO LI SUKILIWILA?

4-5. (a) Momo lie ci kuetele esilivilo oku limbuka okuti omãla va li tepa lakulu? (b) Eci omõla umue a putuiwa nye ci pondola oku li pita laye?

4 Akulu vana okuti eci va kala omãla va putuiwa, va sukila elembeleko ndaño okuti pa pita ale anyamo alua. Momo lie? Oco tu kuate elomboloko liaco, tete tu sukila oku ivaluka okuti omãla ka va lisokele lakulu. Onjila ndomo omõla a liyeva kocitangi cimue, ca li tepa leci cukulu. Tu kũlĩhĩsi atosi amue.

5 Omãla va sukila oku limbuka okuti una o va tata, ukuacili kuenda wa koleliwa. Eci omanu va tata ciwa omãla, ovo va liyeva okuti va kolapo loku limbuka okuti va soliwe. (Osa. 22:9) Ci sumuisa calua omo okuti ava va siata oku putula omãla, umue ukuepata, ale akamba vepata. Eci omõla a putuiwa lomunu umue a kũlĩha, ci tĩla kokuaye oku kolela vali omanu vakuavo vokuenda kuanyamo alua.

6. Momo lie oku putula elinga limue lĩvi calua halio liungangala?

6 Omãla ka va tẽla oku liteyuila ovo muẽle kuenda oku putula elinga limue lĩvi calua halio liungangala. Oku kisika omõla oku lipekela laye osimbu ka kuete utunga waco haeye ka kulile kovisimĩlo lo kolondunge, eteke a kuela ci pondola oku u nenela esumuo lialua. Handi vali, oku putuiwa ku pondola oku koka oku kuata ovisimĩlo ka via sungulukile viatiamẽla koku lipekela kuenda komunu wosi o yongola oku amela kokuaye.

7. (a) Onjila yipi ukuakuputula a kuama oco a kembe omõla kuenda o ci linga ndati? (b) Ovitangi vipi viyilila kovohembi aco?

7 Omãla ka va kuete uloño woku sokolola, ale oku limbuka ohele yimue loku yi yuvula. (1 Va Kor. 13:11) Omo liaco, ci leluka komunu umue oku kemba omõla oco a lipekele laye. Vakuakuputula va siata oku sapuila komãla ovohembi amue ndeci: Omõla eye o kuete eko, omõla te wohĩla ondaka yaco, ka citava oku yi sapuila komunu laumue kuenda lomue o ci kũlĩha ale lomue o ka tava kolondaka viomõla, va popiavo okuti, oku lipekela kukulu lomõla elinga limue liocisola pokati kavo. Ovohembi aco a pondola oku nyõla ovisimĩlo viomõla vokuenda kuanyamo alua loku sima okuti ovina viosi via popiwa viocili. Omõla o pondola oku kula locisimĩlo cokuti ka kuete esilivilo, wa vĩhisua, ka ka piwileko, ale lomue o pondola oku u lembeleka.

8. Momo lie tua kolelela okuti Yehova o lembeleka vana va sumua omo lioku putuiwa?

8 Ocili okuti, vana va putuiwa va pondola oku kala lesumuo liaco vokuenda kuanyamo alua. Elinga eli lĩvi calua! Oku putula omãla ocituwa cimue ci lekisa okuti tu kasi muẽle koloneke via sulako, otembo yimue okuti omanu valua “ka va kuete ocisola la vangadiavo kuenda omanu vãvi lolohembi va amamako oku linga eci cĩvi.” (2 Tim. 3:1-5, 13) Atutu a Satana ãvi calua kuenda ci sumuisa eci omanu va lekisa elinga lĩvi ndeli lia Satana. Pole, unene wa Yehova wa velapo okuti wa Satana kumosi la vana va linga eci eye a yongola, u sule. Yehova wa kũlĩha atutu osi a Satana. Tua kolela okuti Yehova wa kũlĩha ovina viosi vĩvi vi pita letu kuenda o tu ĩha elembeleko tu sukila. Etu tu kuete esumũlũho omo lioku vumba “Suku yelembeleko liosi, una o tu lembeleka kohali yetu yosi, okuti tu tẽla oku lembeleka vakuetu kohali yosi lelembeleko tu tambula ku Suku.” (2 Va Kor. 1:3, 4) Yehova wa eca ku lie ocikele coku lembeleka?

 HELIE O PONDOLA OKU ECA ELEMBELEKO?

9. Ndomo olondaka via Soma Daviti vi lekisa Kosamo 27:10, nye Yehova a lingila vana va yandulukiwa lepata liavo?

9 Vosi vana okuti va yandulukiwa lepata kuenda vana va pita locitangi coku putuiwa, va sukila elembeleko lialua. Soma Daviti wa kũlĩhĩle okuti tu pondola oku kolela okuti Yehova olonjanja viosi o tu lembeleka. (Tanga Osamo 27:10.) Daviti wa kolelele okuti Yehova o tata vosi va yandulukiwa lepata liavo. Yehova o ci linga ndati? Eye o ci linga pocakati cafendeli vaye. Vamanji vekongelo, va kasi ndepata lietu. Eli olio esunga lieci Yesu a popela okuti vana va likongela kokuaye oku fendela Yehova va kasi nda va manjaye alume, la vamanjaye akãi kuenda va inaye.—Mat. 12:48-50.

10. Upostolo Paulu wa tukula ndati ocikele caye ndukulu wekongelo?

10 Vocinimbu cilo, leci cikuãimo tu ka limbuka ndomo ekongelo li sokisiwa lepata. Upostolo Paulu wa kala ukulu umue wekongelo ukuekolelo okuti wa likolisilako calua. Wa eca ongangu yiwa kuenje wa vetiyiwa oku sapuila vakuavo oku kala olosetukuli viaye ndeci eye a setukula Kristu. (1 Va Kor. 11:1) Limbuka ndomo Paulu a tukula ocikele caye ndukulu wekongelo poku popia hati: “Eci tua kala pokati kene tuo tati lohenda, ndeci ina a tata locikembe omãla vaye.” (1 Va Tes. 2:7) Akulu vekongelo vakuekolelo koloneke vilo, va kuama ovisonehua oco va lembeleke vana va sukila ekuatiso.

Vamanji akãi va pama kespiritu va siata oku eca elembeleko liwa (Tala ocinimbu 11) *

11. Anga hẽ akulu vekongelo ovo lika va kuete ocikele coku eca elembeleko?

11 Anga hẽ akulu vekongelo ovo lika va kuete ocikele coku eca elembeleko ku vana va pita locitangi coku putuiwa? Sio. Vosi yetu tu kuete ocikele coku ‘amamako oku likolisa pokati.’ (1 Va Tes. 4:18) Ndeci, manji umue ukãi okuti wa pama kespiritu, o pondola oku eca elembeleko liwa ku vamanji akãi va sukila elembeleko. Eli olio esunga lieci Yehova Suku a lisokisila la ina yimue yi lemba omõlaye. (Isa. 66:13) Vembimbiliya tu sangamo ovolandu akãi va eca elembeleko  ku vana va kala lesumuo lialua. (Yovi 42:11) Esanjukuolio Yehova a kuete poku mola Akristão akãi koloneke vilo oku eca elembeleko ku vamanji akãi va sumua calua. Olonjanja vimue akulu vekongelo va pinga ku vamanji akãi va pama kespiritu, oco va kuatise vamanji akãi va kasi lesumuo. *

TU ECA NDATI ELEMBELEKO?

12. Nye tu sukila oku yuvula?

12 Nda tu yongola oku kuatisa manji umue tu sukila oku yuvula oku linga apulilo ovina ka yongola oku popia. (1 Va Tes. 4:11) Nye tu pondola oku lingila vana va sukila ekuatiso kuenda elembeleko? Tu kũlĩhĩsa ovina vitãlo via tukuiwa Vembimbiliya vi pondola oku kuatisa vana va sumua.

13. Ndomo ca tangiwa kelivulu 1 Liolosoma 19:5-8, ungelo wa Yehova nye a lingila Eliya kuenda tu setukula ndati ungelo waco?

13 Eca ekuatiso li sukiliwa. Eci uprofeto Eliya a kala oku tila vana va yonguile oku u ponda, eye wa sumuile calua kuenje wa yonguile oku fa. Yehova wa tuma ungelo umue ku Eliya. Ungelo waco wa eca kokuaye ekuatiso a sukilile. Ungelo wa eca okulia ku Eliya kuenda wo sapuila oco a lie. (Tanga 1 Olosoma 19:5-8.) Ulandu owu u tu longisa ocina cimue ci kuete esilivilo liokuti: Olonjanja vimue elinga limue li lingiwa locisola ndaño litito, li pondola oku kuatisa vakuetu. Ndeci, oku pongiya okulia kumue, oku eca ombanjaile, ale oku tuma ukanda, ovina evi vi pondola oku kuatisa manji wa sumua oku limbuka okuti, tu u sole kuenda tuo kapako. Eci ci lekisa okuti nda ka tu tẽla oku lembeleka lolondaka, tu pondola oku ci linga lovina via tukuiwa ndeti.

14. Nye tu lilongisila kulandu wa pita la Eliya?

14 Lekisa ku vana va sumua oku limbuka okuti va kolapo kuenda va lembelekiwa. Kulandu wa Eliya tu lilongisilako ovina vikuavo. Yehova wa linga ocikomo cimue poku kuatisa uprofeto oku linga ungende unene toke Komunda Horeve. Citava okuti, Eliya wa liyeva okuti wa kolapo kocitumãlo cina Yehova a lingilile ocisila lafendeli vaye kosimbu. Lonjila eyi eye wa simĩle okuti wa kala ocipãla lomanu vana va yonguile oku u ponda. Nye tu lilongisila kulandu owu? Nda tu yongola oku lembeleka vana va pita locitangi coku putuiwa, tete tu sukila oku vakuatisa oku liyeva okuti va kolapo. Ndeci, akulu vekongelo va sukila oku ivaluka okuti manji ukãi wa sumua poku sapela laye, citava okuti o lianja vali nda va ci lingila vonjo yaye loku nyuapo okacisangua, okuti Vonjango Yusoma sio. Pole, omunu ukuavo citava okuti o nõlapo oku kala Vonjango Yusoma.

15-16. Voku kala onjeveleli yiwa mua kongela nye?

15 Kala onjeveleli yiwa. Embimbiliya li popia hati: “Omunu lomunu a kale ukuanjanga koku yevelela, a livale koku popia.” (Tia. 1:19) Anga hẽ tu lonjeveleli viwa? Pamue tu sima okuti oco tu kale olonjeveleli viwa, te tu luluvalela lika komunu waco, okuti ka tu popi cimue. Pole, voku kala onjeveleli yiwa mua kongela ovina vialua. Ndeci, Eliya eci a situluila Yehova asakalalo aye, Yehova wo yevelela lutate. Yehova wa limbuka okuti Eliya wa kala lusumba, wa kala ulika kuenda wa simĩle okuti upange wosi a linga, olivova. Yehova locisola wo kuatisa oku yula asakalalo aye. Eci ci lekisa okuti Yehova wa kala onjeveleli yiwa ku Eliya.—1 Olos. 19:9-11, 15-18.

16 Tu lekisa ndati ukamba kuenda ocikembe, okuti ovio ovituwa vi lekisa ocisola?  Olonjanja vimue, olondaka viocisola vi lekisa okuti tua kapako ekalo lia vakuetu. Ove o pondola oku popia ndoco: “Nda sumua calua omo liovina via pita love! Omõla laumue o sesamẽla oku tatiwa ndoco!” Nda citava, linga apulilo amue oco o kuate elomboloko lieci ci kasi oku pita lekamba liove. O pondola oku pula okuti, “Citava hẽ oku ndi lomboluilako ndomo o liyevite?” ale eci wa ndi lomboluilako nda sima okuti . . . Citava hẽ oku pitululamo? Olondaka viaco viocisola, vi pondola oku kuatisa omunu oku limbuka okuti ove unjeveleli yiwa kuenda o yongola oku kuata elomboloko liocitangi caye.—1 Va Kor. 13:4, 7.

17. Momo lie tu sukilila oku lekisa epandi loku “livala koku popia”?

17 Lekisa utate ndaño o ‘livala koku popia.’ Ku ko tete kondaka poku eca elungulo, ale oku pisa ovisimĩlo viomunu waco. Pole, kala ukuepandi! Eliya eci a situlula asakalalo aye ku Yehova, eye wa tukula olondaka vi lekisa ndomo a kala oku liyeva. Noke eci Yehova a pamisa ekolelo lia Eliya, eye wa situlula vali asakalalo aye poku tukula olondaka vimuamue. (1 Olos. 19:9, 10, 13, 14) Nye tu lilongisilako? Olonjanja vimue una wa sumua o yongola oku popia ovina viu sakalaisa olonjanja vialua. Ndeci Yehova a linga, tu sukilavo oku lekisa epandi poku yevelela. Kuenje tu eca ekuatiso poku lekisa ocisola kuenda oku kala vakuacikembe.—1 Pet. 3:8.

18. Olohutililo vietu vi pondola oku lembeleka ndati vana va sumua?

18 Likutilila lutima wosi kumue lomunu o kasi lesumuo. Omunu una wa sumua pamue ka kuata onjongole yoku likutilila. O litenda okuti ka kuete esilivilo ku Yehova. Kuenje nda tu yongola oku lembeleka omunu waco, tu sukila oku likutilila laye loku tukula onduko yaye vohutililo. Vohutililo yaco, tu sapuila Yehova okuti vosi yetu vekongelo tua kapako manji wa sumua. Tu pingavo ku Yehova  oco a kuatise ufendeli waye oku tula utima kuenda oku lembelekiwa. Oku likutilila ndoco, ci lembeleka calua.—Tia. 5:16.

19. Nye ci pondola oku tu kuatisa eci tu lembeleka omunu umue?

19 Sanda olondaka viwa okuti vi lembeleka. Osimbu kua vanguile, tete sokolola. Olondaka viukãlu vivalula, pole, olondaka viocisola vi sakula. (Olosap. 12:18) Omo liaco, likutilila ku Yehova oku pinga ekuatiso oco o sange olondaka via sunguluka, vi lembeleka havio vi vetiya. Ivaluka okuti olondaka vi lembeleka havio via velapo vina Yehova a popia Vembimbiliya.—Va Hev. 4:12.

20. Vana va putuiwa ovisimĩlo vipi pamue va pondola oku kuata kuenda nye tu sukila oku va ivaluisa?

20 Vamanji vamue okuti kosimbu va liyaka locitangi coku putuiwa, va pondola oku liyeva okuti va vĩhisua, ka va kuete esilivilo, ale ka va soliwe. Eci haciliko! Omo liaco, kuama Ovisonehua oco o lekise kokuavo okuti Yehova o va sole calua. (Tanga pokakasia losapi hati: “ Elembeleko li Tunda Vembimbiliya.”) Sokolola ndomo ungelo umue a pamisa uprofeto Daniele eci eye a kala lesumuo lialua. Yehova wa yonguile okuti ufendeli waye o kũlĩha okuti o soliwe calua. (Dan. 10:2, 11, 19) Cimuamue haico okuti, vamanji vosi va liyaka lesumuo, va soliwe calua la Yehova!

21. Nye ci ka pita la vana vamamako oku linga ekandu okuti ka va likekembela kuenda nye tu sukila oku lingila vana va kasi oku tatiwa lekambo liesunga?

21 Eci tu lembeleka vakuetu, tu va ivaluisa okuti Yehova o va kuetele ocisola. Lalimue eteke ka tu ka ivaliko okuti Yehova eye Suku yesunga. Eye wa kũlĩha vosi vana va pita locitangi coku putuiwa. Yehova o lete ovina viosi vĩvi kuenda wosi o linga ovina viaco kuenje ka likekembela o ka kunduiwa. (Ate. 14:18) Omo liaco, tu likolisiliko oku lekisa ocisola ku vana va pita locitangi coku putuiwa. Ci lembeleka calua oku kũlĩha okuti Yehova o ka malako ohali yosi ya kokiwa la Satana kuenda oluali luaye! Ndopo kuiya otembo okuti ovina vi koka evalo ka vi ka ivalukiwa vali, ale oku sokoluiwa.—Isa. 65:17.

OCISUNGO 109 Lisoli Lutima Wosi

^ tini. 5 Vana va putuiwa eci va kala omãla citava okuti va liyaka lesumuo lialua vokuenda kuanyamo. Ocipama cilo, ci ka tu kuatisa oku kuata elomboloko liesunga liaco. Tu ka kũlĩhavo ava va kuete ocikele coku eca elembeleko komanu va putuiwa. Tu ka lilongisavo olonjila viwa tu pondola oku kuama oco tu va lembeleke.

^ tini. 11 Nda omunu una wa putuiwa o yongola ekuatiso liondotolo yimue, eye muẽle o pondola oku nõla nda o ci linga.

^ tini. 76 ELOMBOLUILO YOCILUVIALUVIA: Manji umue ukãi wa pama kespiritu, o lembeleka manji ukuavo o kasi oku liyaka lesumuo.

^ tini. 78 ELOMBOLUILO YOCILUVIALUVIA: Akulu vavali vekongelo va kuatisa manji umue ukãi wa sumua calua. Eye wa lalekavo manji ukãi wa pama kespiritu oco a kalepo.