Skip to content

Skip to table of contents

Olombangi Via Yehova

Select language Umbundu

Apulilo a Lingiwa la Vakuakutanga

Apulilo a Lingiwa la Vakuakutanga

Upostolo Paulu wa soneha hati, Yehova “ka ecelela okuti vu yonjiwa leci ka vu tẽla.” (1 Va Korindo 10:13) Anga hẽ eci ci lomboloka okuti Yehova wa sokiya ale otembo tu ka pandikisa kovitangi kuenda wa nõla ale ocitangi tu ka liyaka laco?

NDA ovina viaco viocili sokolola ndomo omuenyo wetu nda wa kala. Ulandu umue u lekisa okuti omõla wa manji umue wa liponda. Isiaye wa yeva esumuo lialua. Eye wa lipula nda Yehova wa sokiyile ale okuti kovaso yoloneke va ka tẽla oku pandikisa poku liyaka locitangi caco. Valua pokati ketu tu lavoka oku liyaka lovilunga voluali lulo. Anga hẽ tu pondola oku tava okuti Yehova wa kũlĩha ovina viosi via siata oku pita vomuenyo wetu?

Poku konomuisa ukanda 1 Va Korindo 10:13 tu ka limbuka okuti Embimbimbiliya ka li lombolola ocisimĩlo cokuti Yehova wa kũlĩha ale otembo tu pondola oku pandikisa kuenda ndomo tu ka litunda poku liyaka locitangi cimue. Momo lie tu popela ndoco? Tu kũlĩhĩsi a sunga akũala.

Catete, Yehova wa eca komanu elianjo lioku nõla ovina va yongola oku linga. Eye o yongola okuti tu nõla onjila tu yongola oku kuama. (Esinumuĩlo 30:19, 20; Yehosua 24:15) Nda tu nõla onjila yi sanjuisa Yehova, tu lekisa okuti tu yongola oku songuiwa laye. (Olosapo 16:9) Pole, eci tu nõla onjila yimue ka ya sungulukile, tu ka kuata ovitangi vi yilila konjila tua nõla komuenyo wetu. (Va Galatia 6:7) Nda Yehova wa nõlele ovitangi tu pita lavio, anga hẽ nda ca lekisa okuti tu kuete elianjo lioku nõla onjila tu yongola oku kuama?

Cavali, Yehova ka tu teyuila ‘kovina viya ño havio vi veta ño.’ (Ukundi 9:11) Citava okuti, omunu umue o liyaka locilunga cimue omo lioku kala kocitumãlo cimue cĩvi vowola ka ya sungulukile. Yesu wa tukula eci catiamẽla kocilunga cimue ca ponda 18 komanu eci o sapalalo yimue ya va kupukila. Eye wa lekisa okuti Suku hayeko wa koka olofa viomanu vaco. (Luka 13:1-5) Ka ca sungulukile oku kuata ocisimĩlo cokuti, osimbu ka kua pitile ocilunga cimue Suku wa sokiya ale omunu o ka supuluka ale omunu o ka fa kocilunga caco.

Catatu, omunu lomunu pokati ketu o sukila oku kolela ku Yehova. Satana wa popia okuti afendeli va Yehova vofendela lika omo liovina Yehova a siata oku eca kokuavo. Satana wa popiavo okuti, ka tu lekisa epokola ku Yehova  eci tu liyaka lovitangi. (Yovi 1:9-11; 2:4; Esituluilo 12:10) Nda Yehova wa tu teyuilile kovitangi viosi, nda ca lekisa okuti Satana okuete esunga.

Cakuãla, Yehova ka nõla oku kũlĩha ovina viosi vi ka pita letu osimbu ovina viaco ka via pitile. Ocili okuti, Yehova o pondola oku kũlĩha ovina vi ka pita kovaso yoloneke nda eye wa panga. (Isaya 46:10) Pole, Embimbiliya li lekisa okuti, Yehova ka nõla oku kũlĩha ovina viosi vi ka pita letu osimbu ovina viaco ka via pitile. (Efetikilo 18:20, 21; 22:12) Omo okuti Yehova ukuacisola haiye ukuesunga, ka tateka elianjo lietu lioku nõla onjila tu yongola oku kuama.—Esinumuĩlo 32:4; 2 Va Korindo 3:17.

Nye Paulu a yonguile oku popia lolondaka viokuti Yehova “ka ecelela okuti vu yonjiwa leci ka vu tẽla”? Paulu wa kala oku popia eci Yehova a pondola oku linga vokuenda kuovitangi, pole, ka popele eci Yehova a pondola oku linga osimbu ka tua liyakele lovitangi viaco. * (Tala etosi pombuelo yemẽla.) Nda tua kolela ku Yehova eye o ka tu kuatisa kovitangi vietu viosi. (Osamo 55:22) Cilo tu konomuisi asunga avali lieci Paulu a popela olondaka evi.

Esunga liatete lieli okuti, ovitangi tu liyaka lavio via “siata pokati komanu.” Osimbu tu kasi voluali lua Satana vosi yetu, tu lavoka oku liyaka lovitangi kuenda ovilunga. Pole, nda tua kolela ku Yehova tu pondola oku pandikisa kovitangi viaco kuenda oku pokola kokuaye. (1 Petulu 5:8, 9) Vukanda 1 Va Korindo ocipama 10, Paulo wa soneha eci catiamẽla ku va Isareli eci ekolelo liavo lia setekiwa vekalasoko. (1 Va Korindo 10:6-11) Vana va kolelele ku Yehova va tẽla oku pandikisa kovitangi viaco. Pole, vamue pokati ka va Isareli va sinĩla Yehova. Ovo ka va tẽlele oku pokola ku Yehova momo ka va lekisile ekolelo kokuaye.

Esunga liavali lieli okuti, “Suku wa koleliwa.” Eci ci lomboloka nye? Ci lomboloka okuti eci tu sokolola ndomo Yehova a siata oku tata afendeli vaye tunde kosimbo toke cilo, ci tu kuatisa oku limbuka ndomo eye a siata oku kuatisa ‘omanu vana vo sole loku lava ovihandeleko viaye.’ (Esinumuĩlo 7:9) Tua lilongisa okuti Yehova olonjanja viosi o tẽlisa olohuminyo viaye. (Yehosua 23:14) Tu pondola oku kolela okuti, (1) Yehova ka ecelela okuti tu liyaka lovitangi vina okuti ka tu tẽla oku pandikisa lavio kuenda (2) eye o tu ‘muisa evelo lioku puluka.’

Yehova ‘o muisa ndati evelo lioku puluka’ komanu vana va kolela kokuaye? Eye o pondola oku ci linga poku malako ocitangi tu kasi oku liyaka laco. Pole, ivaluka okuti Paulu wa popia hati, Yehova “u muisivo evelo lioku puluka okuti vu pandikisi lalio.” Omo liaco, Yehova noke lioku tu muisa evelo lioku puluka, o tu pamisavo oco tu pandikise. Tu konomuisi olonjila vimue ndomo Yehova a siata oku ci linga.

  • Yehova “o tu lembeleka kohali yetu yosi.” (2 Va Korindo 1:3, 4) Eye o pondola oku lembeleka utima wetu lekuatiso Liembimbiliya, espiritu sandu liaye kuenda lekuatiso liukuenje wa kolelua.—Mateo 24:45; Yoano 14:16; Va Roma 15:4.

  • Yehova lekuatiso liespiritu liaye o pondola oku tu songuila. (Yoano 14:26) Espiritu sandu li pondola oku tu kuatisa oku ivaluka ovolandu Embimbiliya kuenda olonumbi vi tu kuatisa oku nõla onjila ya sunguluka.

  • Yehova o pondola oku tuma ovangelo vaye oco va tu kuatise.—Va Heveru 1:14.

  • Yehova o pondola oku vetiya vamanji oco va tu kuatise. Ovo, va pondola oku tu pamisa lolondaka viavo kuenda lovina va linga.—Va Kolosai 4:11.

Nye tua lilongisa kolondaka via Paulu vi sangiwa vukanda wa 1 Va Korindo 10:13? Yehova hayeko o nõla ovitangi tu liyaka lavio. Pole, tu pondola oku tava okuti, nda tua kolela Yehova, tu pondola oku pandikisa kovitangi viosi. Omo liaco, tua kũlĩha okuti Yehova olonjanja viosi o ka tu muisa evelo lioku puluka nda tua pokola ko kuaye.

^ tini. 7 Ondaka “eyonjo” kelimi lio Helasi yi lombolokavo “oloseteko” ale “ovitangi.”