Skip to content

Skip to table of contents

Olombangi Via Yehova

Select language Umbundu

 Ocipama Celilongiso 13

Lekisa Ohenda Kupange Woku Kunda

Lekisa Ohenda Kupange Woku Kunda

“Wa va kuatela ohenda . . . Kuenje wa fetika oku va longisa ovina vialua.”MAR. 6:34.

OCISUNGO 70 Sandi Ava va Sesamẽla

OVINA TU LILONGISA *

1. Ocituwa cipi ca Yesu okuti oco ci vetiya vali utima wetu? Ci lombolola.

OCINA cimue ci komõhisa ku Yesu uloño woku kũlĩha ovitangi omanu ka va lipuile va siata oku liyaka lavio. Yesu eci a kala palo posi, wa ‘yolela lava va yolela’ kuenda wa ‘lila lava va lila.’ (Va Rom. 12:15) Ndeci, eci olondonge 70 via tiuka lesanju omo lionima yiwa va kuata kupange woku kunda, Yesu “wa sanjuka omo liespiritu sandu.” (Luka 10:17-21) Handi vali, eci Yesu a mola ndomo olofa via Lasaru via sumuisa vana vo solele, “wa kuata ocikembe kuenda wa tokotelua.”—Yoa. 11:33.

2. Nye ca vetiya Yesu oku lekisa ohenda?

2 Ndaño okuti Yesu wa kala omunu wa lipua eye wa kala ukuacikembe kuenda ukuahenda lomanu ka va lipuile. Ocina co kuatisa, ocisola a kuatela omanu. Ndomo ca lomboluiwa kocipama ca pita, eye wa ‘sanjukilile calua omãla vomanu.’ (Olosap. 8:31) Ocisola a kuatela omanu co vetiya oku kũlĩha ciwa ovisimĩlo viomanu. Upostolo Yoano wa popia hati: “Eye wa kũlĩhĩle eci ca kala vovitima viomanu.” (Yoa. 2:25) Yesu wa kapeleko asakalalo a vakuavo. Omanu va limbukile ocisola Yesu a vakuatela kuenje ca va vetiya oku yevelela esapulo Liusoma. Nda tua kuama onjila yimuamue yoku kapako asakalalo omanu, tu ka tẽlisa upange wetu woku kunda.—2 Tim. 4:5.

3-4. (a) Nda tua kala vakuahenda tu ka tenda ndati upange woku kunda? (b) Nye tu lilongisa vocipama cilo?

3 Upostolo Paulu wa kũlĩhile okuti wa kuatele ocikele coku kunda kuenda etu tu kuetevo ocikele caco. (1 Va Kor. 9:16) Nda tua kala vakuahenda lomanu, ka tu tendi upange woku kunda ndekisika. Tu yongola oku lekisa komanu okuti tua va  kapako kuenda tu yongola oku va kuatisa. Tua kũlĩha okuti “esanju li tunda koku eca olio lia velapo, li tunda koku tambula li sule.” (Ovil. 20:35) Etu tu kunda omo okuti tu sole omanu kuenda poku ci linga esanju lietu li livokiya.

4 Vocipama cilo, tu lilongisa ndomo tu kapako asakalalo omanu kupange woku kunda. Tete, tu ka mola eci tu pondola oku lilongisila konjila ndomo Yesu a kapeleko omanu. Noke tu ka konomuisa olonjila vikuãla vi ka tu kuatisa oku setukula ongangu yaye.—1 Pet. 2:21.

YESU WA LEKISA OHENDA KUPANGE WOKU KUNDA

Ohenda ya vetiya Yesu oku kunda esapulo lielembeleko (Tala ovinimbu 5-6)

5-6. (a) Komanu vapi Yesu a lekisa ohenda? (b) Momo lie Yesu a kuatela ohenda omanu a kundila, ndomo ca lomboluiwa kelivulu lia Isaya 61:1, 2?

5 Kũlĩhisa ndomo Yesu a lekisa ohenda. Eteke limue Yesu lolondonge viaye va kavele calua momo ka va puyukile eci va kala oku kunda olondaka viwa. “Ovo ka va kuatele otembo yoku lia.” Kuenje Yesu kumue olondonge viaye “va enda pocitumãlo cimue culika” oco va ‘puyukepo kamue.’ Kuenje owiñi wa enda toke pocitumãlo Yesu kuenda olondonge viaye va kala. Eci Yesu a mola omanu, nye a yeva vutima kuenda nye a linga? Eye “wa va kuatela ohenda, * momo va kala ndolomeme ka vi kuete ungombo. Kuenje wa fetika oku va longisa ovina vialua.”—Mar. 6:30-34.

6 Momo lie Yesu a kuatela ohenda omanu vaco? Eye wa popia hati, “va kala ndolomeme ka vi kuete ungombo.” Citava okuti Yesu wa limbuka okuti vamue pokati kavo va kala olohukũi kuenda va enda oku talavaya calua oco va tekule apata avo. Vamue va kala lesumuo lialua omo lioku fisa ngandiavo va sole. Yesu wa ponduile oku kuata elomboloko liekalo liavo. Ndomo ca lomboluiwa vocipama ca pita, citava okuti  eye wa lipitavo lovitangi vimuamue. Yesu wa kapeleko asakalalo a vakuavo kuenje wa vetiyiwa oku va kundila esapulo lielembeleko.—Tanga Isaya 61:1, 2.

7. Tu setukula ndati ongangu ya Yesu?

7 Nye tua lilongisa kulandu wa Yesu? Ndeci ca kala koloneke via Yesu, tua ñualiwavo lomanu va kasi “ndolomeme ka vi kuete ungombo.” Ovo va kasi loku liyaka lovitangi vialua. Etu tu kuete eci ovo va sukila okuti esapulo Liusoma. (Esit. 14:6) Omo liaco, tu sukila oku setukula Cime cetu, poku kunda olondaka viwa momo tu ‘kuetele ohenda ohukui losuke.’ (Osa. 72:13) Tu kuetele ohenda omanu kuenda tu yongola oku linga cimue oco tu va kuatise.

NDOMO TU PONDOLA OKU LEKISA OHENDA

Kapako a sukila omunu lomunu (Tala ovinimbu 8-9)

8. Konepa yipi tu sukila oku lekisa ohenda kupange woku kunda? Ci lombolola.

8 Nye ci pondola oku tu kuatisa oku lekisa ohenda ku vana tu kundila? Tu sukila oku likapa pomangu yomanu vana tu sanga kupange woku kunda kuenda oku va tata ndomo tu yongola oku tatiwavo. * (Mat. 7:12) Tu konomuisi olonjila vikuãla vi ka tu kuatisa oku ci linga. Tete, sokolola kasukila omunu lomunu. Upange woku kunda u sokisiwa leci ndotolo a sukila oku linga oco a kuatise omanu va vela. Ndotolo uwa, o sokolola kocitangi comunu lomunu. Eye o linga apulilo kuenda o yevelela lutate ocitangi comunu lomunu. Osimbu handi ndotolo ka ecele ovihemba, tete o sukila oku kũlĩhisa ombeyi noke oco lika a eca ovihemba vina okuti vi likuata luveyi wombeyi. Cimuamue haico tu sukila oku linga lomanu vosi tu sanga kupange woku kunda. Tu sukila oku sokolola kekalo kuenda kocitangi comunu lomunu.

9. Nye tu sukila oku yuvula? Ci lombolola.

9 Eci tu sanga omunu umue kupange woku kunda, tu yuvuli oku sima okuti tua kũlĩha ale cosi catiamẽla komunu waco, ale, kovina a tava kuenda momo lie a tavela kovina viaco. (Olosap. 18:13) Eci tu sanga omunu waco, lutate tu sukila oku linga apulilo asunguluka oco tu kũlĩhe ekalo liaye kuenda kovina a tava. (Olosap. 20:5) Nda ca sunguluka posongo yove, u pulisa eci catiamẽla kupange waye, kepata, kulandu waye kuenda onjila ndomo a tenda ovina. Poku ci linga, tu ecelela okuti ovo va lianja poku tu lomboluila esunga lieci va sukilila olondaka viwa. Eci tu limbuka ovina viaco, tu lekisa ohenda kokuavo capiãla enene ka sukila avo kuenda oku eca kokuavo ekuatiso va sukila, ndeci Yesu a linga.—Sokisa 1 Va Korindo 9:19-23.

Sokolola ndomo omunu una wa kundila a liyeva (Tala ovinimbu 10-11)

10-11. Ndomo ci lekisiwa kelivulu lia 2 Va Korindo 4:7, 8, konepa yipi yavali tu sukila oku lekisa ohenda? Tukula ulandu umue.

 10 Vali, sokolola ndomo omuenyo wavo u pondola oku pongoloka. Olonjanja vimue tu pondola oku kuata elomboloko liekalo liavo. Ocili okuti, ka tua lipuile kuenda tua siatavo oku liyaka lovitangi. (1 Va Kor. 10:13) Tua kũlĩha okuti omuenyo voluali lulo lua tĩla calua. Tu kasi oku pandikisa lika omo liekuatiso lia Yehova. (Tanga 2 Va Korindo 4:7, 8.) Sokolola ku vana ka va kuete ukamba la Yehova. Va kasi lovitangi vialua komuenyo voluali lulo okuti ka va kuete ekuatiso lia Yehova. Ndeci Yesu a linga, tu lekisa ohenda kokuavo poku va sapuila “ondaka yiwa yesanju.”—Isaya 52:7.

11 Tu kũlĩhisi ulandu wa manji Sergey. Eci handi ka fetikile oku lilongisa ocili, manji Sergey wa kuatele osõi yalua. Ca tĩlile calua kokuaye oku sapela lomanu. Noke wa tava oku lilongisa Embimbiliya. Manji Sergey wa popia hati: “Eci nda kala oku lilongisa Embimbiliya, nda limbuka okuti Akristão va kuete ocikele coku sapuilako omanu catiamẽla kocili Cembimbiliya. Ame nda simĩle okuti lalimue eteke ndi ka ci linga.” Pole, eye wa limbuka okuti omanu vana ka va kũlĩhile Yehova va kasi oku liyaka lovitangi vialua komuenyo. Eye wamisako hati: “Ovina nda lilongisa via ndi nenela esanju lialua kuenda ombembua yovutima. Nda kũlĩha okuti omanu vakuavo va sukilavo oku lilongisa ocili.” Manji Sergey omo lioku yula osõi wa kuata utõi woku kunda. Eye wa popia hati: “Poku sapela lomanu catiamẽla kesapulo Liembimbiliya ca ñuatisa oku kuata utõi kuenda ca pamisavo ekolelo liange.” *

Pamue cambata otembo oco omunu umue a linge epongoloko (Tala ovinimbu 12-13)

12-13. Momo lie tu sukilila oku lekisa epandi ku vana tu longisa kupange woku kunda? Tukula ocindekaise cimue.

12 Tatu, lekisa epandi ku vana o longisa. Ivaluka okuti ovo pamue ka va kũlĩhile lacimue catiamẽla kocili Cembimbiliya cina tua kũlĩha. Omanu valua va kolela calua kovina va kũlĩha. Ovo va tenda etavo liavo okuti  olio lipamisa ukamba wavo vepata, ovituwa viavo kuenda omanu va lisungue lavo. Tu va kuatisa ndati?

13 Sokolola kocidekaise eci: Nye ci lingiwa nda eyau limue lia kuka kuenje li sukila oku piñayiwa? Olonjanja vimue, osimbu eyau liokaliye li tungiwa, omanu handi va pita keyau liosimbu. Noke lioku malusuiwa kueyau liokaliye, liosimbu linyõliwa. Cimuamue haico okuti, osimbu tu longisa omanu oco va siepo alongiso esanda, tete tu sukila oku va kuatisa oco va pamise ekolelo liavo kalongiso “okaliye.” Nda tua ci linga, va ka vetiyiwa oku siapo alongiso esanda. Pole, oco omanu va linge apongoloko ci pondola oku ambata otembo yalua.—Va Rom. 12:2.

14-15. Tu kuatisa ndati vana okuti lacimue va kũlĩha, ale va kuete ño ukũlĩhiso utito watiamẽla komuenyo ko pui vocumbo celau palo posi? Tukula ulandu umue.

14 Nda tua lekisa epandi komanu kupange woku kunda, ka tu kalavoka okuti va kuata elomboloko ale va tava kocili Cembimbiliya konjanja yatete tu va kundila. Pole, ohenda yi tu vetiya oku va kuatisa oku sokolola kueci Embimbiliya li popia. Ndeci, kũlĩhisa ndomo tu pondola oku kuatisa omunu umue oku sokolola kelavoko liomuenyo kopui vocumbo celau palo posi. Omanu valua va kuete ukũlĩhiso utito, ale lacimue va kũlĩha catiamẽla kelavoko liaco. Ovo ka va kuete elavoko liokuti omanu va fa va ka pinduiwa. Ale, va sima okuti omanu vosi vawa va enda kilu. Tu pondola oku va kuatisa ndati?

15 Manji umue wa lombolola ndomo a kuatisa omanu oku kuata elomboloko lielavoko lioku kala otembo ka yi pui palo posi. Tete, eye o tanga Efetikilo 1:28. Noke, o pula komunu wa sangiwa, nda Suku o yongola okuti omanu va kuata ekalo lipi. Valua va tambulula okuti, “Ekalo limue lia lipua, palo posi.” Noke manji o tanga Isaya 55:11 kuenda o pula nda ocipango ca Suku ca pongoloka. Omunu wa sangiwa o tambulula okuti sio. Oku sulako manji o tanga Osamo 37:10, 11 kuenda o pula ndomo omanu va ka kala kovaso yoloneke. Poku talavaya ciwa Lembimbiliya, wa kuatisa omanu valua oku kuata elomboloko liokuti Suku handi o yongola okuti, omanu va kala otembo ka yi pui vocumbo celau palo posi.

Ndaño okuti tu linga ovina vimue vitito vioku lekisa ohenda ndeci, oku tuma ukanda umue u vetiya, ci pondola oku kuatisa omunu (Tala ovinimbu 16-17)

16-17. Ndomo ca lomboluiwa kelivulu Liolosapo 3:27, kolonepa vipi tu sukila oku lekisa okuti tu vakuahenda? Ci lombolola.

16 Kuãla, sanda apuluvi oku lekisa ohenda. Ndeci, tua siata hẽ oku sandiliya omanu vepuluvi limue ka lia sungulukile kokuavo? Tu pondola oku pinga ongecelo loku pinga kokuavo oco tu tiuke vepuluvi li va ecelela. Nye tu linga nda omunu wa sangiwa o sukila ekuatiso limue? Ale nye tu linga nda omunu wa sangiwa wa kuka kuenje o sukila oku landelako cimue? Kovitangi evi, tu sukila oku va kuatisa.—Tanga Olosapo 3:27.

 17 Manji umue ukãi wa kuata onima yiwa omo lioku lekisa ovilinga viohenda. Omo lioku vetiyiwa lohenda, wa tuma ukanda umue kolonjali vimue via fisa omõla. Vukanda waco mua kala Ovisonehua vimue vielembeleko. Ukanda waco wa kuatisa ndati olonjali? Ina, wa soneha hati: “Keteke liaco nda kala lesumuo lialua. Ove kua kũlĩhile ndomo ukanda waco wa tu kuatisa. Nda pandula calua omo liukanda wove kuenda wa tu lembeleka calua. Ame nda tanga ukanda wove olonjanja 20 keteke liaco. Ame nda komõha calua omo liohenda wa lekisa kuenda elembeleko wa eca. Nda pandula calua omo lioku tu lembeleka.” Ocili okuti, tu kuata onima yiwa eci tu likapa pomangu ya vana va tala ohali kuenje tu linga cimue oco tu va kuatise.

KUATA OVISIMĨLO VIA SUNGULUKA VIATIAMẼLA KOKUOVE

18. Ndomo ca lomboluiwa kelivulu lia 1 Va Korindo 3:6, 7, nye tu sukila oku ivaluka catiamẽla kupange woku kunda kuenda momo lie?

18 Etu tu yongola oku kuata ovisimĩlo via sunguluka viatiamẽla kokuetu kupange woku kunda. Ocili okuti tu kasi oku kuatisa omanu oku kũlĩha Suku, pole, ka tu kasi oku linga onepa ya velapo yupange waco. (Tanga 1 Va Korindo 3:6, 7.) Yehova eye o kokela omanu kokuaye. (Yoa. 6:44) Pole, omunu lomunu o kuete ocikele coku nõla onjila a yongola oku kuama. (Mat. 13:4-8) Ivaluka okuti omanu valua ka va tavele kesapulo lia Yesu ndaño okuti wa kala Ulongisi wa velapo! Omo liaco, ka tu sukila oku sumua nda omanu vamue ka va tava kesapulo tu va kundila.

19. Tu kuatisiwa ndati omo lioku lekisa ohenda kupange woku kunda?

19 Etu tu ka kuata asumũlũho alua nda tua lekisa ohenda komanu tu kundila. Esanju lietu lika livokiya calua kupange woku kunda. Tu ka kuata esanju li tunda koku eca. Kuenje tu ka kuatisa vosi “vakuotima wa sungulukila omuenyo ko pui,” oku tava kolondaka viwa. (Ovil. 13:48) Omo liaco, “osimbu tu kuete epuluvi tu lingi eci ciwa komanu vosi.” (Va Gal. 6:10) Nda tua ci linga tu ka kuata esanju kuenda tu ka sivaya Isietu wokilu.—Mat. 5:16.

OCISUNGO 64 Oku Ungula Lesanju

^ tini. 5 Eci tu lekisa ohenda, esanju lietu kupange woku kunda lilivokiya kuenda omanu va ka kuata onjongole yoku yevelela esapulo lietu. Momo lie? Ocipama cilo, ci ka konomuisa eci tu lilongisa kulandu wa Yesu kuenda olonepa vikuãla vi ka lekisa ndomo tu pondola oku kala vakuahenda lomanu vana tu sanga kupange woku kunda.

^ tini. 5 ONDAKA YA LOMBOLUIWA: Ndomo ca lomboluiwa vocipama cilo, oku lekisa ohenda ci lomboloka oku kuatela ocikembe omunu umue o kasi oku tala ohali, ale oku tatiwa lungangala. Ocituwa caco ci vetiya omunu oku linga cosi ci tava oco a kuatise vakuavo.

^ tini. 8 Tanga ocipama losapi hati, “Kuama Ocihandeleko Coku Sola Omanu Kupange Woku KundaVutala Wondavululi 15 ya Kupemba wunyamo wo 2014 kam. 11-14.

^ tini. 11 Tanga Utala Wondavululi 1 Yenyenye wo 2011, kam. 21-22, Kelimi lioputu.