Skip to content

Skip to table of contents

Olombangi Via Yehova

Select language Umbundu

Ohenda—O Pondola Oku yi Lekisa Ndati?

Ohenda—O Pondola Oku yi Lekisa Ndati?

VOSI yetu tu yongola oku kũlĩhĩwa okuti tu manu vamue va sunguluka. Pole, oku lekisa ohenda ka ca lelukile koloneke vilo. Omanu valua “ka va sole eci ciwa.” (2 Tim. 3:3) Ovo va likala olonumbi via Yehova kuenje eci eye a popia okuti ciwa ovo va popia hati, “cĩvi” kuenda eci eye a popia hati cĩvi ovo va popia hati, “ciwa.” (Isa. 5:20) Handi vali, ka ca lelukile oku linga eci ciwa omo liovituwa tu ambataile kosimbu kuenda ekambo lietu lioku lipua. Omo liaco, pamue tu liyeva nda manji Anne,  * okuti ndaño o kasi ale oku vumba Yehova vokuenda kuotembo yalua, wa popia hati: “Ca tĩla calua kokuange oku tava okuti ndi pondola oku kala omunu uwa.”

Vosi yetu tu pondola oku lekisa ohenda! Ohenda ocituwa cimue ci tunda kespiritu sandu lia Suku kuenda espiritu liaco li kuete unene walua okuti li pondola oku yula ovituwa vĩvi viomanu ale ovitangi vi tunda kekambo lietu lioku lipua. Cilo, tu lilongisa eci ci lomboloka ohenda kuenda ndomo tu pondola oku lekisa ocituwa caco lonjila yimue ya suapo.

NYE CI LOMBOLOKA OHENDA?

Voku lekisa ohenda mua kongela oku lekisa ovituwa viwa kuenda esunguluko. Ocituwa caco ci lekisiwa konjila ndomo o tenda vakuene. Oco ci lekisiwavo poku eca ekuatiso kuava va lisukila.

Citava okuti wa muile ale okuti omanu vamue va lingila ovina viwa epata liavo kuenda akamba vavo, anga hẽ opo lika pa sulila ovituwa viohenda? Ocili okuti, lomue pokati ketu o pondola oku lekisa ocituwa caco lonjila yimue ya lipua, momo Embimbiliya li popia hati, “ka kuli ukuesunga kilu lieve okuti o lingainga esunga kuenje ka lueya.” (Uku. 7:20) Upostolo Paulu wa popia hati: “Nda kũlĩha okuti vetimba liange ka muli eci ciwa.” (Va Rom. 7:18) Omo liaco, nda tu yongola oku kuata ocituwa cohenda tu sukila oku setukula Yehova.

“YEHOVA, UWA”

Yehova Suku wa tumbika olonumbi viwa. Embimbiliya li popia eci catiamẽla ku Yehova hati: “Ove uwa, o lingainga ciwa. Ndongise ovisila viove.” (Osa. 119:68) Tu kũlĩhisi ovina vivali viatiamẽla kohenda ya Yehova via tukuiwa vocinimbu eci.

Yehova uwa. Ohenda ocituwa cimue ci panga onepa ku Yehova. Kũlĩhĩsa eci ca pita eci Yehova a sapela la Mose hati: “Hu lekisa uwa wange wosi.” Yehova wa lekisa ku Mose ulamba waye oku kongelamo ohenda yaye. Mose wa yeva ondaka ya Yehova oku popia hati: “Yehova, Yehova Suku yohenda, ukuacali, ukuakulivala konyeño, ukuacisola calua haeye ukuacili, ukuakumuisa kolohulukãi viomanu ocisola ka ci pui. Ukuakuecela olongole levĩho kuenda akandu, kuenje ka yovuisa ukueko.” (Etu. 33:19; 34:6, 7) Tu kuete esunga lioku tava okuti Yehova o lekisa ohenda kovilinga viaye viosi. Yesu eci a kala palo posi, wa lekisa ciwa ocituwa cohenda, poku popia hati: “Lomue uwa, te lika umosi okuti, Suku.”—Luka 18:19.

Etu tu limbuka ohenda ya Yehova kovina a lulika

 Ovopange a Yehova awa. Kovina viosi Yehova a linga o lekisa ohenda. “Yehova o lingila vosi ohenda. Ocisola caye ci kasi koviluvo viaye viosi.” (Osa. 145:9) Yehova ka kuete ocame poku lekisa ohenda, poku eca omuenyo kuenda cosi omanu va sukila. (Ovil. 14:17) Eye o lekisa okuti uwa poku ecela a kandu etu. Ukualosamo wa soneha hati: “Ove, a Yehova, wa sunguluka haive wukuakuecela.” (Osa. 86:5) Tu pondolavo oku popia okuti, ‘Yehova ecaeca esumũlũho lekemainyo. Lacimue ciwa o ci limĩla ava va endaenda lesunga.’—Osa. 84:11.

‘LILONGISI OKU LINGA ECI CIWA’

Omo tua lulikiwa lesetahãlo lia Suku, tu pondola oku lekisa ovituwa viwa kuenda oku linga eci ciwa. (Efet. 1:27) Ndaño muẽle ndoco, Ondaka ya Suku yi vetiya afendeli vaye hati: ‘Lilongisi oku linga eci ciwa.’ (Isa. 1:17) Tu pondola oku kapako ndati ocituwa eci? Tu konomuisi olonjila vitatu tu pondola oku ci linga.

Tete, tu sukila oku likutilila oku pinga espiritu sandu, lina li kuatisa Akristão oku kuata ocituwa cohenda. (Va Gal. 5:22) Ocili okuti espiritu lia Suku li pondola oku tu kuatisa oku sola eci ciwa loku suvuka eci cĩvi. (Va Rom. 12:9) Embimbiliya li popia okuti Yehova o pondola oku tu ‘pamisa lovilinga kuenda londaka yiwa.’—2 Va Tes. 2:16, 17.

Vali, tu sukila oku tanga ondaka ya Suku. Nda tua ci linga Yehova o tu longisa oku kũlĩha “onjila yosi yiwa” kuenda o tu liangiliyila “upange wosi uwa.” (Olosap. 2:9; 2 Tim. 3:17) Eci tu tanga Embimbiliya loku sokolola kueci tua tanga, tu yukisa utima wetu lovina viwa viatiamẽla ku Suku kuenda kocipango caye. Kuenje lonjila eyi kukuasi wetu tu vokiyako vali ovina viwa.—Luka 6:45; Va Efe. 5:9.

Tatu, tu sukila oku likolisilako oku “setukula eci ciwa.” (3 Yoa. 11) Vembimbiliya omo tu sanga ovolandu awa tu pondola oku setukula. Ocili okuti, ongangu ya velapo, ya Yehova la Yesu. Pole, tu pondolavo oku konomuisa omanu vakuavo omo liocituwa cohenda va lekisa. Vavali pokati kavo, Tavita la Barnaba. (Ovil. 9:36; 11:22-24) Ove o pondola oku kuatisiwa poku konomuisa ulandu wavo uwa, vokuenda kuelilongiso liove liopokolika loku limbuka eci ovo va lingila vakuavo. Sokolola kolonjila vimue o pondola oku kuatisa umue ukuepata liove ale vamanji vekongelo. Limbukavo onima yiwa Tavita la Barnaba va kuata omo lioku lekisa ohenda ku vakuavo. O pondolavo oku kuatisiwa.

Koloneke vilo, kulivo omanu va siata oku linga eci ciwa. Ndeci, akulu vekongelo va siata oku likolisilako oku ‘sola eci ciwa.’ Sokololavo  ku vamanji akãi vakuekolelo okuti kovilinga kuenda kolondaka, va lekisa okuti “alongisi vawa.” (Tito 1:8; 2:3) Manji o tukuiwa Roslyn wa popia hati: “Ekamba liange lia siata oku likolisilako oku kuatisa loku pamisa vamanji vekongelo. Eye o sokolola kovitangi viavo kuenda eca kokuavo ombanjaile yimue ale o va kuatisa kolonepa vikuavo. Ame ndu tenda okuti omunu umue uwa.”

Yehova o vetiya afendeli vaye oku ‘sanda eci ciwa.’ (Amo. 5:14) Nda tua ci linga, ka tu ka sola lika olonumbi viaye, pole, tu ka pamisavo onjongole yetu yoku linga eci ciwa.

Etu tu likolisilako oku kala omanu vawa kuenda oku linga ovina viwa

Oku linga eci ciwa ka ci lomboloka okuti tu sukila oku lingila vakuetu ovina vinene. Kũlĩhĩsa ocindekaise eci: Sokolola komesele yimue ukuakupindala oviluvialuvia okuti o pindala lika lavala avali. Eye o pondola oku pindala lavala alua oco a linge ociluvialuvia cimue ca posoka. Cimuamue haico okuti, ohenda yetu yi lekisiwa kovilinga vialua viwa.

Embimbiliya li tu sapuila oku li ‘pongiyila’ kuenda oku “liangiliyila” oku linga eci ciwa. (2 Tim. 2:21; Tito 3:1) Nda tua kapako asukila a vakuetu, tu ka sanga apuluvi oku sanjuisa vakuetu poku linga ‘eci ciwa ci va kolisa.’ (Va Rom. 15:2) Pamue tu sukila oku va tepelako cimue tu kuete. (Olosap. 3:27) Tu pondola oku laleka vamue oku lia letu ale kolomapalo vimue vi pamisa. Nda tua kũlĩha okuti umue o vela, tu pondola oku u tumisa okokanda kamue, oku u nyula, ale oku u telefonalela. Ocili okuti tu kuete apuluvi alua oku popia “ondaka yiwa yi kolisa, haiyo ya soka lotembo yaco, okuti yi kuatisa ava va yi yeva.”—Va Efe. 4:29.

Ndeci Yehova, tu sandavo oku linga eci ciwa komanu vosi. Ka tu yongola oku lekisa ocame ku vakuetu. Onjila yimue yiwa yoku ci linga oku kunda olondaka viwa Viusoma komanu vosi. Ndomo Yesu a ci handeleka tu sanda oku linga eci ciwa ku vana va tu suvuka. (Luka 6:27) Kacĩviko oku lekisa ohenda kuenda oku linga eci ciwa ku vakuetu momo “ka kuli ocihandeleko ci patãla ovina evi.” (Va Gal. 5:22, 23) Eci tu linga eci ciwa ndaño omanu va tu tata lãvi, ale tu pita lovitangi, tu kuatisa omanu oku kũlĩha ocili kuenda oku sivaya Suku.—1 Pet. 3:16, 17.

TU SUMULUISIWA ECI TU LINGA OVINA VIWA

“Ukuesunga o kutisua lepako liovilinga viaye.” (Olosap. 14:14) Api amue pokati kasumũlũho aco? Eci tu linga ovina viwa ku vakuetu, ovo va ka vetiyiwavo o ku tu tata lonjila yimuamue. (Olosap. 14:22) Ndaño okuti omanu vakuavo ka va ci lingi, alikolisilo etu oku linga eci ciwa a pondola oku pongolola ovisimĩlo viavo.—Va Rom. 12:20.

Eci tu linga eci ciwa loku liwekapo oku linga eci cĩvi, tu likuatisavo etu muẽle. Vamanji valua va lombolola okuti eci oco ca siata oku lipita lavo. Tu kũlũlhisi ulandu wa manji Nancy. Eye wa popia hati: “Eci nda kula nda kala lesumuo lialua, pole, osimbu nda kala oku lilongisa loku kapako olonumbi viwa via Suku, nda fetika oku kuata esanju. Cilo ñuete ocisola kuenda oku likuatela esumbilo ame muẽle.”

Esunga lia velapo lieci tu sukilila oku lekisa ohenda ceci okuti oku ci linga ci sanjuisa Yehova. Ndaño okuti omanu valua ka va limbuka ovina viwa tu linga, Yehova o ci lete. Eye wa kũlĩha okuti olonjanja vialua tu linga ovina viwa kuenda tu kuete ovisimĩlo viwa. (Va Efe. 6:7, 8) Onima yipi tu kuata? Embimbiliya li popia hati: “Ukuesunga o tambula ohenda ku Yehova.” (Olosap. 12:2) Omo liaco, tuamamiko oku lekisa ohenda. Yehova wa likuminya okuti “vana va linga eci ciwa ku ka kala ulamba, ekemainyo kuenda ombembua.”—Va Rom. 2:10.

^ tini. 2 Olonduko vimue via pongoluiwa.