Skip to content

Skip to table of contents

Olombangi Via Yehova

Select language Umbundu

Ombanjaile ya Suku yocisembi okuti yi nena omuenyo ko pui, oco ombanjaile ya velapo

 OSAPI YO KOÑOÑO | OMBANJAILE YIPI YA VELAPO?

Ombanjaile Yipi ya Velapo?

Ombanjaile Yipi ya Velapo?

“Ongavelo yosi yiwa, lombanjaile yosi ya lipua yi tunda kilu ku Isia yovinyi.” (Tiago 1:17) Ovisonehua vi tukula ocali ca Isietu wokilu, Yehova Suku. Pole, pokati kolombanjaile viosi Suku a siata oku eca komanu, kuli yimue ya velapo. Ombanjaile yipi? Olondaka via Yesu vi sangiwa kelivulu lia Yoano 3:16, vi tu sapuila hati: “Omo Suku a sola calua oluali, wa eca Omõlaye wongunga, okuti wosi o kolela kokuaye ka nyõliwa, o kuata omuenyo ko pui.”

Ombanjaile ya Suku okuti, Omõlaye wongunga, oyo ya velapo tu pondola oku tambula, momo yi tu kuatisa oku yovuiwa kekandu, koku kuka kuenda kolofa. (Osamo 51:5; Yoano 8:34) Ndaño okuti tu likolisilako, ka kuli lacimue tu pondola oku linga oco tu yovuiwe kupika waco. Omo liocisola caye, Suku wa linga esokiyo li sukiliwa oco tu yovuiwe. Poku eca Omõlaye wongunga Yesu Kristu ndocisembi, Yehova Suku wa eca komanu vakuepokolo elavoko lioku kuata omuenyo ko pui. Pole, ocisembi ci lomboloka nye? Momo ca sukiliwile? Tu pondola oku kuatisiwa ndati laco?

Ocisembi ci lomboloka ofeto yeciwa kocina cimue ca nyõleha ale oku yovola omunu umue kupika. Embimbiliya li lombolola okuti olonjali vietu viatete, Adama la Heva, eci va lulikiwa ka va kuatele ekandu kuenda va ponduile oku kala komuenyo otembo ka yi pui vocumbo celau palo posi, kumue lovitumbulukila va laikele oku cita. (Efetikilo 1:26-28) Pole, ovo va pumba ovina viaco viosi momo va nõlapo oku sinĩla Suku kuenje va linga vakuakandu. Onima yipi yeyilikako? Embimbiliya li tambulula ndoco: “Ndeci ekandu lia iñila voluali omo liomunu umosi kuenda oku fa omo liekandu kuenje oku fa kua li sanduila komanu vosi momo vosi va linga ekandu.” (Va Roma 5:12) Omo liaco, ovitumbulukila viavo via piñalavo ekandu kuenda olofa.

Catiamẽla kocisembi, ca sukilile oku feta ocina cimuamue ca pumbiwa. Eci Adama a sinĩla Suku ocipango, eye wa linga ekandu kuenje wa pumba omuenyo wa lipua. Embimbiliya li popia okuti Adama wa koka okuti ocitumbulukila caye ci kalavo apika vekandu kuenda olofa. Omo liaco, ca sukilile oku feta omuenyo ukuavo wa lipua, okuti omuenyo wa Yesu, wa eciwa ndocilumba oco ci tu yovole kupika waco. (Va Roma 5:19; Va Efeso 1:7) Omo liocisembi Suku a feta, omanu va kuete elavoko lioku kuata ovina Adama la Heva va pumba okuti omuenyo ko pui vocumbo celau palo posi.—Esituluilo 21:3-5.

Omo liovina viaco, ka kuli atatahãi okuti ongavelo ombanjaile ya Suku yocisembi okuti ci nena omuenyo ko pui, oco ombanjaile ya velapo. Oco tu sanjukile “ombanjaile yaco ya lipua,” tu konomuisi ndomo tu pondola oku sanjukila ombanjaile yaco ndomo ca lomboluiwa vocipama ca pita.

Oku tẽlisa olojongole vietu. Etu tu kuete ojongole yoku amamako oku kala lomuenyo. (Ukundi 3:11) Ndaño okuti ka tu kuete epondolo lioku tẽlisa onjongole yaco, pole ocisembi ci pondola oku ci tẽlisa. Embimbiliya li popia hati: “Onima yekandu  oku fa, pole, ongavelo ya eciwa la Suku omuenyo ko pui vu Kristu Yesu Ñala yetu.”—Va Roma 6:23.

Oku tẽlisa asukila etu. Omanu ka va kuete epondolo lioku angiliya ocisembi. Embmbiliya li lombolola okuti: “Momo eyovo liomuenyo waye lia tĩla, kuenje lalimue eteke li soka.” (Osamo 49:8) Omo liaco, ka tua kuatele elavoko lia Suku lioku tu yovola kupika wekandu kuenda wolofa. Pole, “omo liohenda ya piãla poku yovuiwa locisembi ca eciwa la Kristu Yesu,” Suku wa angiliya ovina tu sukila.—Va Roma 3:23, 24.

Votembo ya sokiyiwa. Embimbiliya li tu sapuila hati: “Osimbu tua kala vakuakandu, Kristu wa tu fila.” (Va Roma 5:8) Omo liovina va tu lingila “osimbu tua kala vakuakandu,” ocisembi ci tu ecelela oku limbuka ocisola Suku a lekisa kokuetu osimbu tua kala vakuakandu. Kuenje eci ci tu ĩha elavoko, ndaño okuti tu liyaka ovitangi via tunda kekandu.

Esunga limue li kuete esilivilo halio lilingiwa ocali. Embimbiliya li lekisa esunga lieci Suku a ecela Omõlaye ndocisembi poku popia hati: “Ocisola ca Suku ca situluiwa ndoco kokuetu okuti, Suku wa tuma Omõlaye wongunga voluali okuti tu kuata omuenyo mekonda liaye. Ocisola ka ci lomboloka okuti, etu tua sola Suku.”—1 Yoano 4:9, 10.

O pondola oku lekisa ndati okuti wa sanjukila ombanjaile yaco ya velapo? Ivailuka okuti olondaka via Yesu vi sangiwa kelivulu lia Yoano 3:16, yi lekisa okuti omanu vana va “kolela” kokuaye va ka popeliwa. Embimbiliya li lekisa okuti ekolelo, “ociseveto covina vi lavokaiwa.” (Va Heveru 11:1) Oco tu kuate elavoko liaco tu sukila oku kuata ukũlĩhĩso. Omo liaco, tu ku vetiya oku sanda otembo yoku lilongisa catiamẽla ku Yehova Suku, una wa Eca “ombanjaile ya lipua,” kuenda ovina o sukila oku linga oco o kuate omuenyo ko pui una o pondola oku kuata omo liocisembi ca eciwa la Yesu.

O pondola oku lilongisa ulandu waco poku konomuisa Ovisonehua vi sangiwa vonumbi yo internet www.jw.org Olombangi Via Yehova vi sanjukila oku ku kuatisa. Tua kolela okuti osimbu o lilongisa catiamẽla kombanjaile yaco ya velapo kuenda onima yililako, o ka vetiyiwa oku popia hati: “Ngeca olopandu ku Suku vonduko ya Yesu Kristu Ñala yetu!”—Va Roma 7:25.