Skip to content

Skip to table of contents

Olombangi Via Yehova

Select language Umbundu

Lukãi wange Tabitha poku kundila kovitumãlo mu sangiwa omanu valua

 EMBIMBILIYA LI PONGOLOLA OMUENYO WOMANU

Kokuange ka Kua Kaile Suku

Kokuange ka Kua Kaile Suku
  • UNYAMO A CITIWA: 1974

  • OFEKA A CITIWILA KO: REPUBLIKA DEMOKRATIKA YO ALEMANYA

  • ULANDU WOMUENYO: KA TAVELE OKUTI KULI SUKU

OMUENYO WANGE KOSIMBU

Nda citiwila vimbo limue ko Saxony ko Republika Demokratika yo Alemanya (GDR). Vepata lietu tua li kuatele ocisola pokati kuenda olonjali viange via ndi longisa ovituwa viwa. O GDR ya kala ocitundo co Komunismu, kuenda komanu valua vimbo lio Saxony, etavo ka lia kuatele esilivilo. Kokuange ka kuakaile Suku. Eci nda kuata 18 kanyamo kua kala ovina vivali via pongolola omuenyo wange, ndeci: Elongiso liokuti ka kuli Suku kuenda o Komunismu.

Momo lie o Komunismu ya ndi vetiyila? Momo nda solele ocisimĩlo cokuti omanu vosi va kuata ekalo limuamue komuenyo. Nda tavele okuti ovina viosi vi tepisiwa lesunga okuti ci yuvula omanu oku kala okuti vamue olohuasi vakuavo olohukũi. Omo liaco, nda fetika oku talavaya vocisoko co Komunismu. Eci nda kuata 14 kanyamo, nda kala oku talavaya kupange woku yelisa ofela. Omanu vo kolupale luo Aue, va sola calua alikolisilo ange kuenda olombiali via nyĩha ombanjaile yimue. Ndaño okuti nda kala umalẽhe, nda ka kũlĩhĩle ombala yo pulitika ko GDR. Nda simĩle okuti nda kala oku tẽlisa ocimãho cimue ciwa kuenda ndi kuata ekalo limue liwa kovaso yoloneke.

Noke liotembo yimue, ekalo liomuenyo wange lia pongoloka. Kunyamo wo 1989, ofeka yo Berlin kuenda asongui vo Komunismu kutundilo wocifuka co Europa, va fetika oku liyaka. Kuenje ombuanja ya livokiya. Noke nda limbuka okuti ko GDR kua kala ekambo lialua liesunga. Omanu vana ka va tiamẽlele ko Komunismu va tendiwile ndomanu ka va kuete esilivilo. Ocitangi caco ca fetika ndati? Etu tu panga onepa kocisoko Cokomunismu, ka tua tavele hẽ okuti omanu va kuatele ekalo limuamue liomuenyo? Anga hẽ o Komunismu ya kala ocina ka ci kuete esilivilo? Nda kuata esakalalo lialua.

Noke nda tiamisila utima wange koku sika kuenda kovopange akuavo. Kuenje nda litumbika kosikola yovisikilo locimãho coku tangela kosikola ya velapo kuenda nda yonguile oku kala umue pokati kolonjimbi via kemãla. Omo liaco, nda siapo ovituwa viwa nda lilongisa eci nda kala omõla. Ocina ca velelepo kokuange, oku kuata otembo yiwa kuenda oku namũlala lafeko valua. Pole, ovisikilo, ovopange akuavo kuenda elianjo liomuenyo nda kuatele, ka via tepuluile asakalalo ange. Alitalatu nda enda oku linga a enda oku situlula usumba nda kala lawo. Nye ca lipita lelavoko nda kuatele? Cipi ca kala ocimãho comuenyo?

Eci nda sanga atambululo kapulilo nda enda oku linga, nda komõha. Eteke limue kosikola, nda tumala locimunga cimue colondonge  kuenda tua kala oku sapela catiamẽla kovaso yoloneke. Mandy * umue pokati kolondonge wa kala Ombangi ya Yehova. Vuteke waco, wa eca kokuange onumbi yimue yiwa. Eye wa popia hati, a “Andreas nda o yongola oku kuata atambululo kapulilo ove atiamẽla komuenyo kuenda kovaso yoloneke lilongisa Embimbiliya.”

Ndaño okuti kefetikilo sia kuatele onjongole, pole nda nõlapo oku sanda atambululo aco Vembimbiliya. Mandy wa ndekisa kelivulu lia Daniele kocipama 2 kuenje nda ci tanga kuenda ca ndi vetiya oku sokolola. Ocitumasuku caco ci lombolola ovonene oluali okuti olombiali via laikele oku kuata unene koloneke vilo. Mandy wa ndekisa ocitumasuku cikuavo Cembimbiliya catiamẽla kovaso yoloneke. Kuenje nda sanga atambululo kapulilo ange! Pole helie wa soneha ocitumasuku caco kuenda helie o pondola oku situlula ovina vi laika oku iya kovaso yoloneke? Anga hẽ kuli Suku?

NDOMO EMBIMBILIYA LIA PONGOLOLA OMUENYO WANGE

Mandy wa ndekisa manji Horst kuenda Angelika, ohueli yimue okuti Olombangi Via Yehova kuenda via ndi kuatisa oku kuata elomboloko liwa Liembimbiliya. Nda limbuka okuti, Olombangi Via Yehova ovio lika etavo lia siata oku sandeka kuenda oku tukula onduko ya Suku okuti, Yehova. (Osamo 83:18; Mateo 6:9) Nda lilongisa okuti Yehova Suku wa likuminya oku eca komanu omuenyo ko pui voluali luokaliye palo posi. Elivulu Liosamo 37:9 li popia hati: “ Ava puãi va imba ovaso Yehova va piñala ofeka.” Eci ca ndi vetiya oku limbuka okuti omanu vosi va sukila oku likolisilako oku ambata omuenyo umue u litava lolonumbi via Suku, ndomo ca lomboluiwa Vembimbiliya.

Omo liaco, nda likolisilako oku linga apongoloko komuenyo oco ndi kuate ovituwa vi litava lolonumbi Viembimbiliya. Ekemãlo lioku kala onjimbi lia enda oku ndi nenela epela kuenje nda sukilile oku lilongisa oku kala embombe. Pole, ka ca lelukile kokuange oku siapo omuenyo ka wa sungulukile nda ambatele. Ngeca olopandu ku Yehova omo lioku kala ukuepandi, ukuahenda kuenda oku kuata elomboloko liomanu vana va likolisilako calua oku linga ovina Embimbiliya lilongisa!

O Komunismu kuenda elongiso liokuti ka kuli Suku via pangele onepa komuenyo wange toke eci nda kuata 18 kanyamo, pole Embimbiliya lia siata oku pongolola omuenyo wange. Ovina nda lilongisa via tepulula asakalalo ange atiamẽla kovaso yoloneke kuenda via ndi kuatisa oku kuata ocimãho komuenyo. Kunyamo wo 1993 nda papatisiwa Ndombangi ya Yehova kuenda kunyamo wo 2000 nda likuela la manji Tabitha ukãi umue ukuambili kupange woku kunda. Tua siata oku pesela otembo yalua poku kuatisa omanu oku lilongisa Embimbiliya. Omanu tua siata oku sanga, vambatelevo omuenyo umue ndowu ndambatele poku songuiwa Lokomunismu kuenda lelongiso liokuti ka kuli Suku. Ndi kuata esanju lialua eci ndi va sapuila ndomo va pondola oku kuata ukuamba la Yehova.

NDOMO NDA KUATISIWA

Eci nda fetika oku lilongisa Embimbiliya Lolombangi Via Yehova, olonjali viange via temẽle calua. Pole, cilo ovo va siata oku limbuka apongoloko nda linga omo lioku lilongisa Embimbiliya Lolombangi Via Yehova. Kuenje cilo, vosi yavo va lilongisa Embimbiliya loku enda enda kolohongele Viakristão Violombangi Via Yehova.

Ame lukãi wange Tabitha tu kuete esanju volohuela momo tua siata oku likolisilako oku kapako olonumbi Viembimbiliya viatiamẽla kolohueli. Oku kapako alungulo atiamẽla koku kala ukuacili volohuela, ca siata oku pamisa olohuela vietu.—Va Heveru 13:4.

Cilo si kuete vali usumba komuenyo kuenda asakalalo atiamẽla kovaso yoloneke. Nda tiamẽla kepata limue linene voluali okuti pokati kavo pali ombembua kuenda omunga yocili. Vepata liaco vosi yetu tu kuete ekalo limuamue liomuenyo. Eci ocina cimue nda tavele kuenda oco nda yonguile vokuenda kuomuenyo wange wosi.

^ tini. 12 Onduko ya pongoluiwa.