Skip to content

Skip to table of contents

Olombangi Via Yehova

Select language Umbundu

 OSAPI YOKOÑOÑO | PI O PONDOLA OKU SANGA ELEMBELEKO?

Ndomo Suku a Eca Elembeleko

Ndomo Suku a Eca Elembeleko

Upostolo Paulu wa tukula Yehova * okuti “Suku yelembeleko liosi, una o tu lembeleka kohali yetu yosi.” (2 Va Korindo 1:3, 4) Embimbiliya li tu sapuila okuti, Suku o kuatisa omanu vosi kuenda kakuli ocitangi lacimue okuti Isietu wokilu ka tẽla oku tu lembeleka.

Ocili okuti, nda tu yongola elembeleko li tunda ku Suku, tu sukila oku linga cimue. Ondotolo yimue, yi tu kuatisa ndati nda lalimue eteke tua endele kokuaye? Uprofeto Amosi wa pula ndoco: “Vavali hẽ, va endela pamosi nda ka va likapele utima umosi?” (Amosi 3:3) Ovisonehua vi tu sapuila hati: “Amẽli ku Suku kuenje eye amẽla kokuene.”—Tiago 4:8.

Momo lie tu kolelela okuti Suku o ka amẽla kokuetu? Catete, eye o tu sapuila olonjanja vialua okuti o yongola oku tu kuatisa. (Tala  okakasia ka kuãimo.) Cavali, tu kuete uvangi womanu va lembelekiwa la Suku okuti omanu vocili, ci kale koloneke vilo ale kosimbu.

Ndeci omanu valua koloneke vilo va siata oku sanda ekuatiso ku Suku, Soma Daviti wa liyakavo lovitangi. Onjanja yimue wa pinga ku Yehova hati: “Yeva ondaka yalombelo ange eci hu vilikiya.” Anga hẽ Suku wo tambulula? Oco. Daviti wa amisako hati: “Yehova eye ongusu yange. . . . Oco utima wange u yolela cimue.”​—Osamo 28:2, 7.

OCIKELE CA YESU COKU LEMBELEKA VOSI VA SUMUA

Suku wa linga eliangiliyo liokuti, Yesu o kuata ocikele ca velapo coku eca elembeleko. Pokati kovikele vikuavo Suku a eca kokuaye, Yesu wa kuata ocikele coku “petula ava va teka itima” kuenda oku “lembeleka vosi va sumua.” (Isaya 61:1, 2) Ndomo ca tukuiwa vocitumasuku, Yesu wa kapeleko omanu vana va ‘kava haivo va kuete ovilemo.’​—Mateo 11:28-30.

Yesu wa lembeleka omanu poku eca kokuavo alungulo olondunge, oku va tata lohenda kuenda olonjanja vimue wa sakula ovovei avo. Onjanja yimue, ulume umue ukuavilundu wa livondelela ku Yesu loku popia hati: “Nda wa panga, ñayise.”  Yesu lohenda, wo tambulula hati: “Nda panga! Kaya.” (Marko 1:40, 41) Kuenje ukuavilundu wa kaya.

Koloneke vilo, Omõla wa Suku ka kasi vali palo posi oco a tu lembeleke. Pole, Isiaye Yehova okuti eye “Suku yelembeleko liosi,” o kasi oku amamako oku kuatisa vana va sukila. (2 Va Korindo 1:3) Konomuisa ovina vikuãla via vepalo Suku a siata oku kuama oco a lembeleke omanu.

  • Embimbiliya. “Momo ovina viosi via sonehiwa osimbu, via sonehiwila oku tu longisa, okuti omo liepandi lietu kuenda elembeleko li tunda Kovisonehua, tu kuata elavoko.”​—Va Roma 15:4.

  • Espiritu Sandu Lia Suku. Noke liolofa via Yesu, ka pa pitile otembo yalua kuenje, ekongelo Liakristão lia kuata ombembua. Momo lie? Olio “lia endela vonjila yoku sumbila Yehova, lia pamisiwa lespiritu sandu.” (Ovilinga 9:31) Espiritu sandu okuti, ongunsu ya Suku, yi kuete unene. Suku o pondola oku lembeleka lalio omunu wosi o kasi oku liyaka lovitangi.

  • Ohutililo. Embimbiliya li tu sapuila hati: “Ko ka sakalali locina cimue, pole, kovina viosi lolohutililo kuenda alombelo kumue lolopandu, apingilo ene a kũlĩhĩwe la Suku; kuenje ombembua ya Suku yina ya piãla olondunge viosi, yi lava ovitima viene.”​—Filipoi 4:6, 7.

  • Vamanji Akristão va pondola oku kala akamba vetu vocili loku tu ĩha elembeleko eci tu liyaka lovitangi. Upostolo Paulu wa popia okuti akamba vaye vo “kolisa calua” ‘kotembo yohali.’​—Va Kolosai 4:11; 1 Va Tesalonike 3:7.

Pole, o komõha poku limbuka ndomo ovina viaco vi pondola oku tu kuatisa. Tu kũlĩhĩsi ovolandu omanu vana va liyaka lovitangi okuti va tukuiwa kocipama catete. Ove o pondolavo oku limbuka okuti Suku o tẽlisa ohuminyo eyi yokuti: “Ndeci umue a lembiwa la inaye haico ndu lembi.”​—Isaya 66:13.

^ tini. 3 Yehova onduko ya Suku ndomo ya situluiwa Vembimbiliya.