Skip to content

Skip to table of contents

Olombangi Via Yehova

Select language Umbundu

 OSAPI YOKOÑOÑO | PI O PONDOLA OKU SANGA ELEMBELEKO?

Elembeleko Eci tu Liyaka Lovitangi

Elembeleko Eci tu Liyaka Lovitangi

Ovitangi viya volonepa via litepa. Vocipama cilo, ka tu lombolola ovitangi viosi omanu va siata oku liyaka lavio, pole, tu kũlĩhĩsa ovolandu akuãla omanu va tukuiwa ale vocipama ca pita. Kũlĩhĩsa ndomo omanu va liyaka lovitangi via litepa va sanga elembeleko li tunda ku Suku.

CECI KA TU KUETE UPANGE WOKU SANDA ETEKU

“Nda enda oku tava upange wosi u molẽha kuenda tua yuvula oku landa ovina ka tu sukila.”​—Jonathan

Ulume umue o tukuiwa hati, Seth * wa popia hati: “Ame kumue lukãi wange va tu tundisa kupange vonjanja yimuamue.” Vokuenda kuanyamo avali, tua enda oku linga ovopange amue ño atito oco tu tekule epata lietu. Noke ukãi wange Priscilla weya oku sumua calua kuenje ame nda kala ndu okuti si silivila.

“Tua yula ndati ocitangi caco? Olonjanja viosi Priscilla wa enda oku ivaluka olondaka via Yesu vi sangiwa kelivulu lia Mateo 6:34. Ovio vi tu sapuila oco ka tu ka sakalali leteke likuavo momo eteke leteke li kuete esakalalo liayo. Kuenda olohutililo viaye vio wĩha ongusu yoku pandikisa. Kokuange nda lembelekiwa lolondaka vi sangiwa kelivulu Liosamo 55:22. Ndeci ukualosamo, ame nda tuika ocitele cange ku Yehova kuenda nda limbuka okuti eye o ñuatisa. Ndaño okuti cilo ndi kuete upange, pole, tua leluisa omuenyo wetu oco u likuate lelungulo lia Yesu li sangiwa kelivulu lia Mateo 6:20-22. Ca velapo vali, tua amẽla vali ku Suku kuenda omunu lukuavo.”

Ulume umue o tukuiwa hati Jonathan, wa popia hati: “Eci omĩlu yepata lietu ya nyõleha, nda sakalalele leci ci keya kovaso. Omo liocitangi colombongo, upange tua lingile vokuenda kueci ci soka 20 kanyamo wa nyõleha. Ame lukãi wange tua fetika oku lihoya omo liolombongo. Tua kuata usumba woku landa ovina lokartão ketu, sanga ka ka taviwa vokasia.”

“Pole, Ondaka ya Suku kuenda espiritu liaye lia tu kuatisa oku nõla onjila yiwa tu kuama. Nda lilongisa oku tava upange wosi u molẽha kuenda tua yuvula oku landa ovina ka tu sukila. Omo okuti Tulombangi Via Yehova, tua kuatisiwavo la vamanji. Ovo va tu kuatisa oku yuvula oku sumua, ca piãla enene eci ovitangi viaco via tĩlile calua.”

 CECI OLOHUELA VI NYÕLEHA

Ukãi umue o tukuiwa hati, Raquel wa popia hati: “Eci ulume wange a ndi siapo, ca mbala calua kuenda nda kuata onyeño yalua.” Nda sumuile calua.“Nda amẽla ku Suku kuenda eye wa ndembeleka. Ombembua ya Suku ya teyuila utima wange eci nda likutilila kokuaye eteke leteke. Ca kala ndu okuti eye wa kala oku semulula utima wange wa teka.

“Ndi pandula calua omo Liondaka yaye Embimbiliya, momo lia ndi kuatisa oku yula onyeño kuenda ocikumbiti. Nda kapako olondaka viupostolo Paulu vi sangiwa kelivulu lia Va Roma 12:21 viokuti: ‘Ku ka yuliwe leci cĩvi, puãi eci cĩvi ci yula leci ciwa.’”

“Ya kala otembo ‘yoku nyelĩsa.’ . . . Cilo ndi kuete ovimãho viwa komuenyo.”​—Raquel

“Ekamba limue liwa lia ndi kuatisa oku kuata ovisimĩlo via sunguluka. Eye wa ndi lekisa elivulu Liukundi 3:6 kuenda wa ndi sapuila okuti, ya kala otembo ‘yoku nyelĩsa.’ Elungulo liaco lia ndi sumuisa pole, olio nda sukilile. Cilo ndi kuete ovimãho viwa komuenyo.”

Ukãi umue o tukuiwa hati, Elizabeth wa popia hati: “Eci olohuela viove vi nyõleha ove o sukila ekuatiso. Nda kuata ekamba limue lia enda oku ndi kuatisa olonjanja viosi. Tua lilila kumosi, wa ndi lembeleka, kuenda wa ndi kuatisa oku limbuka okuti nda kapiwako. Nda kolelele okuti Yehova eye wa tuma ekamba liaco oco a ndi lembeleke.”

CECI TU KUATIWA LOKU VELA ALE OKU KUKA

“Noke yoku li kutilila ku Suku, ndi limbuka okuti espiritu liaye li ndi pamisa.”​—Luis

Luis wa tukuiwa kefetikilo liovipama vilo, o kuete uvei wovutima, kuenda wa puluka oku fa olonjanja vivali. Cilo veteke limosi o sukila oku kapiwa o fela vokuenda kueci ci soka 16 kolowola. Eye wa popia hati: “Nda siata oku li kutilila ku Yehova olonjanja viosi. Noke yoku li kutilila ndi limbuka okuti Espiritu liaye li ndi pamisa. Ohutililo yeca kokuange utõi woku amamako momo nda kolela kokuaye kuenda nda kũlĩha okuti eye o ndi kuatisa.”

Ukãi umue o tukuiwa hati Petra, okuti o kuete ci pitãhãla 80 kanyamo wa popia hati: “Ndi yongola oku linga ovina vialua pole, si pondola oku vi linga. Eci ndi limbuka okuti ongusu yange yi kasi oku tepuluka ci ndi sumuisa calua. Nda siata oku yeva ekavo lialua. Kuenda ndi sukila oku nyua ovihemba olonjanja viosi. Nda siata oku sokolola eci Yesu a pinga ku isiaye oco, o upe okopo nda citava. Pole Yehova wa eca ongusu ku Yesu kuenje eci ca siata oku ndi pamisa. Kokuange, eteke olio eteke, olohutililo vi kasi  ndovihemba. Eci ndi sapela la Suku vohutililo ndi kala ciwa.”​—Mateo 26:39.

Ulume umue o tukuiwa hati Julian okuti o kasi oku liyaka luvei wociteyateya vokuenda kueci ci panda 30 kanyamo, wa siatavo oku liyeva ndoco. Eye wa popia hati: “Ndaño okuti kosimbu nda enda oku tumãla komangu yimue yonalavayi, cilo nda siata oku tumãla komangu yalola. Pole, ndi yuvula oku sokolola calua kovitangi viange kuenda nda siata oku linga ovina vi nyĩha esanju, momo ndi tiamisila utima koku kuatisa vakuetu. Oku kuatisa ci pondola oku tepulula ohali kuenda Yehova wa siata oku tẽlisa ohuminyo yaye yoku tu pamisa eci tu liyaka lovitangi. Ndeci upostolo Paulu, ndi pondolavo oku popia hati: ‘Kovina viosi ñuete ongusu mekonda lia una o nyĩha unene.’”​—Va Filipoi 4:13.

CECI TU YEVA ESUMUO

Ulume umue o tukuiwa hati Antonio wa popia hati: “Eci isia yange a fa kocilunga cimue, kefetikilo sia tavele.” Eye ka sesamẽlele oku fa. Pole sia ponduile oku linga cimue. Osimbu handi ka file, wa kala oloneke vitãlo okuti ka vangula. Nda li kandangiya oku lila kovaso a ina yange, pole eci nda kala lika liange ka ca tavele oku li kandangiya. Noke nda li pula ndoco: Momo lie? Momo lie?

“Vokuenda kuoloneke viaco, nda amamako oku pinga ku Yehova oco a ñuatise oku likandangiya, kuenda oku kuata ombembua. Kuenje nda liwekapo oku sakalala. Nda ivaluka eci Embimbiliya li popia okuti ovina viya ño komanu vosi. Omo okuti Suku ka kembi, nda kolela okuti ndi ka mola vali isiange eci a ka pinduiwa.”​—Ukundi 9:11; Yoano 11:25; Tito 1:2.

Robert wa tukuiwa vocipama catete o kuetevo ovisimĩlo vimuamue. Eye wa popia hati: “Ame lukãi wange tua kuata ombembua yovutima ya tukuiwa kelivulu lia Va Filipoi 4:6, 7. Olondaka viaco tua enda oku vi kongela volohutililo vietu. Ombembua yaco yi tu vetiya oku eca esapulo liatiamẽla kelavoko lietu liepinduko. Ndaño okuti ocilunga cimue combalãu ca ponda omõletu, tu ivaluka lesanju ovina vialua tua lingila kumosi. Tua siata oku sokolola kovina viaco.

“Ndaño okuti ocilunga cimue combalãu ca ponda omõletu, tu ivaluka lesanju ovina vialua tua lingila kumosi.”​—Robert

“Eci omanu vamue va tu sapuila okuti va mola ndomo tua kala oku lombolola ovina viatiamẽla kekolelo lietu votelevisão, tua va sapuila hati tua tẽla oku linga ovina viaco lekuatiso liolohutililo via lingiwa vonduko yetu. Nda kolela okuti Yehova eye wa kala oku tu pamisa lekuatiso liasapulo elembeleko tua kala oku tambula.”

Ndomo ca lomboluiwa kovolandu a lekisiwa, Suku o pondola oku lembeleka omunu una o kasi oku liyaka lovitangi vialua. Nye ci popiwa catiamẽla kokuove? Ndaño wa siata oku liyaka lovitangi vialua, kuli elembeleko li pondola oku ku kuatisa eci o liyaka lovitangi. * Omo liaco, momo lie ku pingila ekuatiso ku Yehova? Eye o “Suku yelembeleko liosi.”​—2 Va Korindo 1:3.

^ tini. 5 Olonduko vimue vocipama eci via pongoluiwa.

^ tini. 23 Nda o yongola ekuatiso oco o kuate ukamba la Suku kuenda oku tambula elembeko, sapela lombangi yimue ya Yehova yi kasi ocipepi lonjo yove ale sonehẽla ko filiale yi kasi vofeka yove.