Skip to content

Skip to table of contents

Olombangi Via Yehova

Select language Umbundu

“Ene wa velipo.”—MATEO 10:31

Anga hẽ Suku wa ku Kapako?

Anga hẽ Suku wa ku Kapako?

CECI TU LILONGISA KOVINA VIA LULIKIWA

Owola yatete yomuenyo woñaña ya citiwa ndopo, epuluvi limue li kuete esilivilo omo liekalo liokaliye a sanga. Momo lie? Ocisola onjali yi lekisa koñaña yaye, vokuenda kuakukutu aco, ci kuatisa oñaña oku kula ciwa kuenda oku kuata uhayele. *

Nye ci vetiya onjali yimue oku tata locisola oñaña yaye ya citiwa ndopo? Ulongisi wo kosikola ya velapo londuko Jeannette Crensha ukuoloño woku sakula, wa popia okuti oku livokiya kuolo hormoniu oxitocina, “ci vetiya ovisimĩlo onjali yi lekisa koñaña yaye osimbu o lamba lamba, oku u vanja kuenda oku u nyamisa.” O hormoniu yikuavo yi molẽha vepuluvi liaco, “yi kuatisa onjali oku tata ciwa oñaña yaye” kuenda oku vokiya ukamba lomõlaye. Momo lie ci kuetele esilivilo?

Ukamba u kasi pokati konjali loñaña yaye, wa sokiyiwa Lululiki wetu ukuacisola, Yehova Suku. * Soma Daviti wa popia okuti Suku eye wo ‘upa vimo lia inaye’ loku u kuatisa oku kolapo peka lia inaye. Eye wa likutilila ndoco: “Tunde kokucitiwa nda kundikiwa kokuove. Ove Suku yange tunde mai a nyita.”—Osamo 22:9, 10.

KŨLĨHĨSA: Suku wa lulika ukamba u kasi pokati konjali loñaña yaye oco ci kuatise onjali oku lekisa ocisola komõlaye, oku u tata lutate kuenda oku wĩha eci a sukila. Omo liaco, tu pondola oku kolela okuti Suku wa kapako omunu lomunu pokati ketu, omo ‘tumãla Vaye.’—Ovilinga 17:29.

CECI EMBIMBILIYA LI TU LONGISA CATIAMẼLA KONJILA NDOMO SUKU A TU TATA

Yesu Kristu una wa kũlĩha ciwa Ululiki wa longisa hati: “Olongungu vivali ka vi landisiwa hẽ locingangu ci kuete esilivilo litito? Haimo lumue, layimue pokati kavio yi kupukila posi okuti Isiene ka ci kũlĩha. Kuenda esinga liovitue viene liosi lia tendiwa. Omo liaco, ko ka sakalali; ene wa velipo okuti olongungu vialua vi sule”—Mateo 10:29-31.

Valua pokati ketu ka tua kapeleko olonjila vitito tua siata oku mola, ndaño muẽle ceci ‘yimue pokati kavio yi kupukila posi.’ Pole, Isietu wo kilu wa vi kapako viosi! Omanu va velapo okuti olonjila vialua vi sule. Etosi lieli: Ku sukila oku ‘kuata usumba’ wokuti Suku ka ku kapeleko. Ocili okuti eye wa ku kapako calua!

Suku o tu yonguila ekalo liwa kuenda o tu lavulula locisola

 Ceci Embimbiliya li tu likuminya

  • “Ovaso a Yehova a lete kuosi, a lavulula olondingaĩvi lolondingesunga.”—OLOSAPO 15:3.

  • “Ovaso a Yehova a vanja vakuesunga, o vonguila ovatui aye kevilikiyo liavo.”—OSAMO 34:15.

  • “Njolela, sanjukila ocisola cove ka ci pui. Momo wa mõla ohali yange kuenje wa limbuka otokua yange.”—OSAMO 31:7.

“NDA LI YEVAILE OKUTI YEHOVA KA NDI SOLE”

Ci kuete hẽ esilivilo oku kũlĩha okuti Suku wa kapako calua ekalo lietu kuenda o tu tata locisola? Ocili okuti, ci kuete! Ukãi umue o tukuiwa hati Hannah, * wo ko Inglaterra wa popia hati:

“Olonjanja vialua nda simaile okuti Yehova ka ndi sole kuenda ka yevaile olohutililo viange. Si patekela olonjanja viñami nda kuata ocisimĩlo caco. Nda simĩle okuti nda kala oku kangisiwa omo nda kuata ekolelo litito ale sia kuatele esilivilo ku Suku. Nda li yeva ndu okuti Suku ka ñapeleko.”

Pole, cilo Hannah wa kolelaokuti Yehova wo kapako kuenda u kuetele ocisola. Momo lie a pongoluila ovisimĩlo viaye? Eye wa popia hati: “Kamue kamue nda pongolola ovisimĩlo viange. Njivaluka ohundo yimue Yembimbiliya ya lingiwa kanyamo a pita yatiamẽla kocilumba cocisembi ca eciwa la Yesu. Ohundo yaco ya mbetiya calua kuenda ya ndi kuatisa oku kolela okuti Yehova o ndi sole. Eci olohutililo viange via enda oku tambuluiwa, olonjanja vialua nda enda oku lila, momo nda limbuka okuti Yehova o ndi sole cocili. Handi vali poku lilongisa Embimbiliya loku enda enda kolohongele, ca ndi kuatisa oku lilongisa ovina vialua viatiamẽla ku Yehova, ovituwa viaye kuenda ovisimĩlo a tu kuetele. Cilo ndi limbuka okuti Yehova o tu kuetele ocisola kuenda o yongola oku tu tata.”

Olondaka Hannah a popia vi tu pamisa. Pole, o kolela ndati okuti Suku wa kũlĩha ovisimĩlo viove kuenda wa kapako eci o yevite? Ocipama ci kuãimo ci ka tambulula epulilo eli.

^ tini. 3 Olonjali vimue vi kuete ocitangi cesumuo noke yoku cita, kuenje ka ci leluka kokuavo oku kala loñaña yaco. Pole, va sukila oku yuvula oku livetela evelo. Ndomo ca lekisiwa Locisoko ci Sakula Uvei Wuyui, ko Estados Unidos, ocitangi cesumuo noke yoku cita, citava okuti ci “tunda kovitangi vio ketimba ale kovisimĩlo : . . pole, ka ci tundi kocina cimue onjali ya linga, ale kueci ka ya lingile.” Oco o kũlĩhe alomboluilo akuavo, tanga ocipama losapi: “Entenda Melhor a Depressão Pós-Parto,” vo Despertai! 8 Yevambi 2003

^ tini. 5 Yehova onduko ya Suku ndomo ci lekisiwa Vembimbiliya.—Osamo 83:18.

^ tini. 15 Olonduko vimue vo revista yilo, via pongoluiwa.